Genesis 31
31
1Iyan atnakayti, naringid-ringidan ni Jacob i pagꞌampa-ampangen it mga bayaw ya ngayting anak ni Laban, nga magꞌaat, “Talagang nanlaꞌtip na kanyat ki Amaꞌ nga bagiꞌ baw ikinseg ya ngayan, garing naga yan it ki Amaꞌ.” 2Baw ega lamang itiꞌen, naniidan ya gasiꞌ nga pagdelman na kanyat rupa it punyangan ya ngayti.
3Ta kat iti nga timpu, inaat nat AMPUꞌANG DIYUS si Jacob. Maat ya, “Muliꞌ ka na duꞌun it banwa it mga giyaringan mu baw duꞌun it mga kaduguꞌan mu. Tatarimaen ku naga ikaw.”
4Egay beken, ipiyapisiꞌ ya i duwa ngayting asawa ya, si Raquel baw si Lea, nga piyapaꞌaduꞌun yat kanya duꞌut pagpasturan ya ngayti. 5Pagꞌabut nira, maat ya it kanira, “Subuk magkaniidan ku nga pagdelman aku nat rupa it amaꞌ mi. Ega na subuk tagnaꞌ i pabetang yat aken. Temed kaꞌlay ngaytu, talagang pagtatarimaen aku naga it Ampuꞌang Diyus it amaꞌ ku. 6Baw kamu ngaytu, magkamuyaan mi it kaꞌlay ngaytu in magꞌuꞌunu i kagayen it pagsirbi ku it amaꞌ mi. 7Temed lamang kaꞌustuꞌan i pagsirbi ku, paglukuun ya ga lamang aku. Ka pirmi kanya nga magꞌugad-ugad it upakat namen. Temed subung nat paꞌaaten ku ngayan nga daꞌku naga pagpabaya-bayaꞌan it Ampuꞌang Diyus nga pakuriꞌan it amaꞌ mi i ginawa ku. 8Kamatuudan, in unuy aat ya nga itangdan yat aken kat pagꞌeperan ku ngaytung mga ayep ya, in burintiken, pagsigpanganak yan ta, burintiken nga matuud. U in aat it amaꞌ mi magbabaled i pamalang, ta yan, yan nga matuud. 9Ildaw talagaytu it Ampuꞌang Diyus it aken, nga mabagiꞌan aku it dakel nga mga ayep ngaytut amaꞌ mi.
10Ka kaꞌsang timpu nga magpaꞌasawa siꞌ i mga ramu-ramu ngaytu, nanagaynep aku. Tagaynep ku, magleteg akut purus balang i mga magbarakuꞌ nga mandangan. 11Kat tagaynep ku ngayti, nagpakisugid it aken i Anghil it Ampuꞌang Diyus. ‘Jacob!’ maat ya.
‘Wayni aku,’ maat i tubag ku.
12Maat ya sit aken, ‘Jacob, letganan mu i mga magbarakuꞌ ngayan nga mandangan, nga muꞌsa sira purus balang. Pabetang-betang kuytu i atkaytu ka magkaltegan ku nga paglukuun ka ni Laban. 13Aku ngaytu nga magpakisugid it imu kayti, aku i Ampuꞌang Diyus naga nga nagpakikita it imu duꞌut Betel, nga duꞌun kayti may isiyumpa mu it aken baw biyuꞌbuꞌan mu pat lana i batu ngayan nga ipiyatindeg mu nga piyakaꞌarandeman mu. Kayti limꞌid ka na situt itung rugar ka muliꞌ ka na duꞌun it banwa nga siyakitan mu.’”
14“Ta in atkayan,” maat na Raquel ngayti, duwa ni Lea, “magayen, ka kami ngaytu, ega naytuy maski unu nga masubli duꞌut ki Amaꞌ. 15Ka pabetang yat amen, ugaling na nga taw. Ka subung talaga it ipiyagpaꞌalang ya na kami, baw beken, pati amen nga bagiꞌ it napisiꞌ ya nga pirak, giyastaꞌ ya nang muꞌsa. 16Aypaꞌ muꞌsa ngayang manggad nga inawaꞌ nat Ampuꞌang Diyus duꞌut kanya, yanay amen baw kat mga anak namen. Kayti sunudun muy ipiyagꞌaat ngayan it Ampuꞌang Diyus it imu.”
17Aypaꞌ egay beken, piyasakay na ni Jacob i duwa ngayti nga asawa ya baw mga anak ya duꞌut mga kamelyo. 18Duꞌut uꞌnaan nira i mga magtataban it muꞌsang mga ayep nira, baw muꞌsang napanulusan ya duꞌut Mesopotamia ngayti. Taban ya nga muꞌsa it muliꞌ na ngayti duꞌut amaꞌ ya nga si Isaac nga duꞌun it Canaan. 19Temed paggaring nira ngaytit namagpanaw na, egay duꞌun nga si Laban ka magpamuꞌlug it mga tupa. Baw ta, parabir sira gimnaring, tiyakaw ni Raquel i mga tiyaw-taw nga pagsambaen it amaꞌ ya duꞌut balay. 20Baw beken, ega na namꞌun si Jacob duꞌut ki Laban ngayti nga punyangan ya. 21Aypaꞌ panaw nira ngayti, subuk palagyu. Uyut yat napanaw ngayti i muꞌsang kusas ya. Pamanaw nira, dimnipag it danum it Eufrates bawnga naꞌaduꞌun it Bukid it Galaad.
Tiyundug naga ni Laban na Jacob ngayti nga namagpanaw
22Desang nakatlu na, naringid-ringidan na ni Laban nga na Jacob, ega nay duꞌun, miyalagyu na. 23Pagkaꞌrut ni Laban, tiyundug nirat mga kaduguꞌan ya na Jacob ngayti. Pitung aldaw bawnga naꞌbutan nira na Jacob, duꞌun it Bukid it Galaad. 24Iting delem nga pagꞌeyag ngayti naꞌbutan na nira, piyatagaynep it Ampuꞌang Diyus si Laban ngayti nga taga Aram, nga magꞌaat, “Ayaw ka it kasalya mampang it inu-inu u ega magayen asat ki Jacob.”
25Ta, abutan na Laban, nakapagbalay-balay na na Jacob duꞌut Bukid ngaytit Galaad. Aypaꞌ ipiyakabrat gasiꞌ na Laban duꞌun i mga bala-balay nira nga magkapuru-purun. 26Pagkita nira, iningkut ni Laban si Jacob, nga magꞌaat, “Unuka atkayay binwat mu, Jacob, nga binwat mu akut ega magayen? Ka daꞌka namꞌun it aken, miyanu-anu ka napanaw nga taban i mga anak ku nga ipiyatibayaꞌ mut mga dakepan mu. 27Unuka atkayay buwat mu? Unuka itiyaguꞌ mut aken i panaw mi ngaytu? In ipiyaꞌrut mu lamang, parabir ta kamu papanawun, magkasagyaan tami daꞌan it may kantaꞌ baw tugtug. 28Ega gasiꞌ binggayan mu akut rugar nga maꞌarkan ku nagay mga anak ku ngaytu baw mga apuꞌ ku parabir sira mapanaw. Talagang dakulang kamaliꞌ i binwat mu ngaytu nga paglapastangan. 29Ka kaya ku naga nga buwaten ta ikaw it maraꞌe-raꞌet. Temed kat delem piyakisugidan aku it Ampuꞌang Diyus it amaꞌ mu, nga maat ya, ‘Iyan ayaw ka it kasalya mampang it inu-inu u ega magayen asat ki Jacob.’ 30Ta, magkaꞌrutan kuytu nga atkaytu nay binwat mu ka kuꞌuliꞌ ka nang kuꞌuliꞌ nga banar duꞌut giyaringan mu. Temed iyan lamang i ega magkapakay ku, binwat mu nga tiyakaw muy pagsambaen ku nga mga tiyaw-taw.”
31“Nabwat ku na bay atkaytu nga subung nat miyalagyu,” maat ni Jacob, “ka, kat nakem ku, barang in mamꞌun aku paꞌ, mangeseg ka nga baiꞌen muy mga anak mu situt aken. 32Temed in pasar it mga pagsirbiyan mu ngayang tiyaw-taw, kayti panletganan mu nay muꞌsa. In siyu-siyuy maparagan mut mga tiyaw-taw mu ngayan, ega begayan kanyat ildaw, in daꞌga imatayen. Sistigu i kadakel ngaytu nga kaduguꞌan ta, nga kayti panletganan mu nay muꞌsa. Ka in may maparagan mu nga maski unu nga betang mu, pisiꞌen mu lamang.” Nakaꞌampang si Jacob it atkayti ka ega naꞌrutan ya nga si Raquel i minsiꞌ it paꞌaaten ngayti nga pagsambaen ni Laban.
33Aypaꞌ egay beken, siyeled-seled ni Laban i bala-balay ni Jacob, ki Lea, bawnga kat duwa ngayting mga babay nga uripen. Temed egay naparagan ya nga pagsambaen ya ngayti nga tiyaw-taw. Sinled ya gasiꞌ i ki Raquel nga bala-balay. 34Temed ta, nakataguꞌ na ni Raquel i mga tiyaw-taw ngayti duꞌut ampilu it kamelyo ngayti nga pagsakayan yat kanya bawnga inadungan ya. Giyayen-gayen ni Laban nga tulus, temed egay naparagan ya.
35Inaat ni Raquel i amaꞌ ya ngayti, “Ega dalaꞌan mu aku, Amaꞌ, nga daꞌkuy aken magkatindeg kat adapan mu. Daꞌku baytu magkapanindeg-tindeg ka pagduguꞌun akuy aken.” Sigi-sigi nay tulus ni Laban ngayti it mga pagsambaen ya ngayti nga tiyaw-taw temed ega talagay magkaparagan ya.
36Ta it atkayti, kulput na si Jacob it pangise-iseg. Maat ya it punyangan ya ngayti, “Unu nay nabwat ku nga kasalaꞌan? Unu nang maraꞌe-raꞌet i binwat kut imu nga piyangungusig mu na aku? 37Kiyariwatang mu pay muꞌsang kusas ku. Ta, unu nay naparagan mu nga betang mu? Idataꞌ mu na kayti kat adapan it mga kaꞌibaan ta ngaytu ka isaꞌun betanganan ta na nira it ukuman in siyuy nagkasalaꞌan.
38Daꞌga baꞌ, duwang puluꞌ na nga taꞌun i kaꞌlay it pagsirbi ku it imu? Ineperan kut magayen i mga ayep mu, ka egay naꞌulkusan nga tupa u kambing mu. Ega gasiꞌ i kiyaꞌen ku nga maski sangbat nga lalaki it mga ayep mu. 39Baw in may tingkeb it manenkeb, ega naga tiyaban ku asat imu i natkeb ngayti nga ayep mu isaꞌun maltegan mu, in daꞌga paggantiyan ku na lamang nga ganti ngayti, pinsiꞌ ku na kat aken nga kabagiꞌan. Baw beken, kada may takawun, delemen na baꞌ u aldawun, ipagreges mu it aken nga bayadan. 40Makuriꞌ talagay kabetangan ku, kaꞌlay ngayan nga pagꞌeperan kuy mga ayep mu, ka in aldawun pagsagkaꞌen kuy init it masgaꞌ nga aldaw. U in delemen, yanay pagsagkaꞌen ku, ereꞌeret nga ramig. Beken paꞌ, igaꞌ ku, dekeyeꞌ lamang. 41Atkaytuy kabetangan ku it seledat duwang puluꞌ ngayting taꞌun nga sesled ku asat imu. Sang puluꞌ may epat nga taꞌun i kaꞌlay it pagsirbi ku it duwa ngaytung anak mu nga mga babay. Baw enem nga taꞌun, ipiyasigi ku nga pagꞌeperan kuy mga ayep mu isaꞌun may aken nagang mapisiꞌ nga ayep, nga yanay tangdan ku. Temed ta, pirmi ka nga magꞌugad-ugad it upakat ta, nga panluku mut aken. 42Magayen lamang talaga nga pagtatarimaen aku it Ampuꞌang Diyus it apuꞌ ku nga si Abraham, iyan Ampuꞌang Diyus nga paggalangen nagat may iꞌlam it amaꞌ ku nga si Isaac. Ka in daꞌga may kanya ngaytu nga magtatarima it aken, siguru piyaliꞌwan mu lamang aku it egay maski unu nga taban. Takaꞌ yay matuud, talagang magkaltegan it Ampuꞌang Diyus i kakuriꞌan ku baw pakariga ku, aypaꞌ siyardaw ya ikaw kat delem.”
Kiyaꞌpusang uꞌupakat na Laban duwa ni Jacob
43“Yay matuud,” maat ni Laban, “muꞌsa mu ngaytu, aken tu. Unuka ega aaten ku it anak ku naga i mga asawa mu, baw mga anak mu, muꞌsa sira, apuꞌ ku. Baw mga ayep mu ngaytu, garing nga muꞌsa situt aken. Temed ega nay mabwat ku sabap it mga anak baw apuꞌ ku. Naꞌubus i naꞌubus. 44Magayen kayti belag siꞌ i upakaten ta. Baw bilang keseg it itung upakat ta, rumuknuꞌ-ruknuꞌ tat mga batu.”
45Aypaꞌ miniliꞌ si Jacob it sangbat nga maꞌabwa-abwat nga batu, bawnga ipiyatindeg ya. 46Bawnga inaat yay mga kaꞌibaan ya nga mangakut it beken nga batu ka ikantur duꞌut linibut it kanya ngayting batu. Pagkabwat nira kayti, nagkaraꞌnen na sira duꞌut umid it ikiyantur nira ngayting mga batu. 47Kantur ngayti, piyangaranan ni Laban kat kanyang ampang it Jegar-sahaduta. Ki Jacob kat kanyang ampang nga Hinebreo, Galꞌed i ipiyangaran ya.
48“Kayti,” maat ni Laban, “ikiyantur ngaytu nga mga batu, bilang sistigu naytu it piyagꞌupakatan ta ngaytung duwa.” Aypaꞌ piyangaranan i sikayti it Galꞌed. 49Esang ipiyangaran ni Laban it sikayti, Mizpa, nga ireg sugiden, ega paglilikatan, ka maat ya, “Sana pirmi nga maglelteg i AMPUꞌANG DIYUS it aten maski magꞌala-alaiden tami na ngaytu. 50Magayen in dedemdemen mu nga in ipabetang mut ega magayen i pagꞌaꞌasawaen mu ngaytu nga mga anak ku, u in mangasawa ka it beken nga mga babay, maski maat ega maltegan ku ka nagꞌala-alaiden tami na, temed Ampuꞌang Diyus i magkalteg, kanya nga sistigu gasiꞌ it piyagꞌupakatan ta ngaytu.
51Itu paꞌ gasiꞌ,” maat ni Laban. “Kayti, Jacob, ituꞌun, mga batu ngaytung ipiyagruknu-ruknuꞌun ta, sistigu naytu it pagtataksiꞌan tami it Ampuꞌang Diyus. 52Itu na gasiꞌ i buwaten ta nga bintang-maraw ta. Maski siyu it aten nga duwa, egay pabali kaytu in maraꞌe-raꞌet i antap it nakem. 53Ka in siyuy rumanggaꞌ it gayen it piyagꞌupakatan ta ngaytu, mukuman it kanya i kanyang pagtaꞌwagan. In ikaw i rumanggaꞌ, Ampuꞌang Diyus i mukuman, nga yan i pagtaꞌwagan ni Abraham. In beteꞌ aku, aken nga pagtaꞌwagan i mukuman it aken, iyan nga pagtaꞌwagan gasiꞌ it apuꞌ ku nga si Nacor baw amaꞌ ya.”
Aypaꞌ simnumpa si Jacob kat ngaran it Ampuꞌang Diyus, kanya nagang paggalangen it may iꞌlam it amaꞌ ya nga si Isaac. Isiyumpa ya nga ega ranggaꞌen yay piyagꞌupakatan nira ngayti. 54Iyan naꞌubus nay muꞌsang susugi-sugiden nira, nagꞌanteng si Jacob it isiyamba ya it Ampuꞌang Diyus duꞌut bukid ngayti. Bawnga piyakaraꞌnen yay mga kaꞌibaan ya ngayti. Duꞌun na kayti i inigaꞌan nira nga muꞌsa.
55Pagꞌeyag it aldaw, nagpaꞌuliꞌ na na Laban it kanira. Yapaꞌ mapanaw si Laban ka naꞌarkan yay mga apuꞌ ya baw duwa ngayting mga anak ya, baw nakaꞌampang kanya it ampang nga paꞌildaw it kanira.
Currently Selected:
Genesis 31: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
