Genesis 42
42
Nakaꞌaduꞌun it Egipto i mga sulsug ni Jose
1Siyakep i pati Canaan it iting getem. Ta, si Jacob ngayti nga magtataꞌid duꞌun, nabaritaꞌan ya nga may pangaꞌen naga duꞌut Egipto. Aypaꞌ inaat yay mga anak ya ngayti, “Unuka yay buwat mi, rurungguk? Daꞌga puyangten ta?” 2Maat ya it kanira, “Nabaritaꞌan ku nga may magkapisiꞌ naga kunuꞌ nga pangaꞌen duꞌut Egipto. Magayen paꞌaduꞌun kamu, ka mangalang it makaꞌen tami, isaꞌun daꞌta naga puyangten.”
3Egay beken, sang puluꞌ ngayting mga sulsug ni Jose, namagpanaw na, nga mangalang it pangaꞌen duꞌut Egipto. 4Temed si Benjamin ngayting langgung ni Jose, ega tiyaꞌeg ni Jacob nga mayaꞌ it mga sulsug ya ngayti, ka magregen kanyat magated. 5Aypaꞌ, mga anak ngayti ni Israel, namagbaya-bayaꞌen na sirat beken gasiꞌ nga mangalang it pangaꞌen ka gintem na gasiꞌ i duꞌut Canaan ngayti.
6Ta si Jose na ngayti i gubirnadur nga magpamaalaꞌ it muꞌsang kaꞌadiꞌan. Kanya naga i magpaꞌalang it pangaꞌen kat muꞌsang katataawan nga magpangalang, taw kat Egipto baw mamagpanggaring duꞌut beken nga mga banwa. Aypaꞌ pagꞌabut it mga sulsug ya ngayti duꞌun, egay beken nga inaduꞌunan nira in daꞌga duꞌut kanya. Pagꞌabut nira, namagpanluud sira nga muꞌsa duꞌut adapan ya. 7Pagkalteg ni Jose it mga sulsug ya ngayti, nakilalaan ya naga sira, temed subuk pabetang ya, atnat egay pagkilala yat kanira. Masisigraꞌ nga ampang i ingkut ya it kanira. Maat ya, “Taga ari kamu?”
“Taga Canaan kami baytu,” maat i tubag nira. “Enged namen situ, magpangalang kamit makaꞌen.”
8Ki Jose, kilala ya naga i mga sulsug ya ngayti, temed kanya, ega na magkakilalaan nira. 9Duꞌun nademdeman ni Jose i tiyagaynep ya ngayti sabap it kanira.#42:9 Kapitulu 37:5-10. Maat ya siꞌ, “Ambut mi! Mga sunda kamu! Daꞌga baꞌ, iyan i enged mi ngaytu, magbaklay kamu it banwa namen, isaꞌun matili-tili mit magayen, madaliꞌ mandaꞌeg kamu!”
10“Abaa, ega bang matuud, Agalen namen,” katubag sirang muꞌsa. “Iyan talagay enged namen nga mga manigsirbi mu ngaytu, magpangalang kami it makaꞌen. 11Kami ngaytu, sang sulsugan kami tu, esa-esay amaꞌ namen. Egaytu maꞌaꞌambut kami nga mga taw. Talagang daꞌkami tu mga sunda.”
12“Aaꞌ, daꞌku yan magpamayaꞌ kayan,” maat ni Jose. “Talagang yay enged mi, magsunda it amen isaꞌun mandaꞌeg kamu it amen.”
13Ega na mindek sira it pasanguꞌ-sanguꞌ. Maat nira, “Abaa matuud baytu, kagalang-galang it imu. Kami ngaytu, sang puluꞌ may duwa kami magsulsu-sulsugun. Amaꞌ namen, duꞌun naga it Canaan. Kiyaꞌpusan namen, natuduꞌ naga duꞌun. Iyan ikasang puluꞌ may duwa namen, ega nay kanya.”
14“Aaꞌ,” maat ni Jose, “subung nat inaat ku ngayan. Mga sunda kamu! 15Ipagsumpa ku nga sukdanan ku bay tuturan mi ngaytu in unuy kamatuudan ya. Kayti isugid kut imyu nga daꞌkamu na makalꞌid situ seked it ega napabayaꞌ mi situ i kiyaꞌariꞌan mi ngayti. 16Ala, paꞌuliꞌen mi nay sang kataawan it imyu ka pisiꞌen ya. Iyan beken ngaytu, pirisuun situ seked it ega magmatuud i pamagꞌaaten mi ngayan. Basta egay matuud, talagang mga sunda kamu!” 17Tulung aldaw i pipirisu ya it mga sulsug ya ngayti.
18Pagꞌikatlu na, maat ni Jose, “May ipabwat ku it imyu. In masanggupan mi gaytu, egnen kamu naga, ka aku ngaytung taw, may iꞌlam kuytu it Ampuꞌang Diyus. 19Aypaꞌ kayti in daꞌkamu nga matuud magꞌambut, kaꞌilangan may esat imyu nga ituduꞌ mi situt pirisuwan. Iyan beken, muliꞌ na nga dumuꞌlung it naꞌalang mi nga pangaꞌen duꞌun it pamaggetmanan ngayti nga duꞌut babalayan mi. 20Temed yan paꞌuliꞌ kamu nga lagi situ baw magbabayaꞌ nat imyu i paꞌaaten mi ngayting ariꞌ mi, sikaytu maꞌrutan ku nga matuud i paꞌaaten mi, daꞌkamu magꞌambut. Ta daꞌkamu yan maꞌunu.” Miyeeꞌ i muꞌsa ngayti.
21Sikayti nakapagsugi-sugid sirang muꞌsa nga maat nira, “Siguru tiksaꞌ naytut aten it binwat tami ngayan it sulsug ta, nga urut ta naga i kasmek it nakem ya temed ega na piyagnegan tami i pasanguꞌ-sanguꞌ yat aten. Aypaꞌ kayti ungaytu nay magkabetangan ta ngaytu.”
22“Daꞌga baꞌ yanay paꞌaaten ku ngayan,” maat ni Ruben, “nga magpaꞌaluk-aluk aku na ngayan it sabat it imyu nga ega ipabetang it maraꞌe-raꞌet i waꞌwaꞌ? Temed daꞌkamu nagpagneg. Ta kayti daꞌga ungaytu, pagrigaen tami na sabap it kamataynen ya.” 23Ta, egay uru-urut nira nga magkasepsepan ni Jose i ampang nira ngayti, ka in magpakisugi-sugid kanyat kanira, may manigꞌugad gat ampang.
24Ta it ega na magkasagkaꞌ si Jose, nagpaꞌalaid kanya duꞌun it kanira ngayti ka kusga-kusgaw na kanya. Iyan magayen nay nakem ya, naꞌaduꞌun siꞌ it kanira. Ipiyablag ya na si Simeon ngayti, ka ipiyabayuk na nga pagleltegan nira nagang muꞌsa.
Lamang nakapari i mga anak ni Jacob takaꞌ gulu nagay ulu nirat magꞌuliꞌ
25Bawnga inaat ni Jose i mga taawan ya nga rugdan nat pangaꞌen i mga sakuꞌ it iting mga taw baw ibtang naga duꞌun i mga ibiyayad nira. Pabalunan paꞌ sira it kaꞌnen nira duꞌut dalan. Kumpur inaat ngayti ni Jose, siyunud nga muꞌsa it mga taawan ya. 26Pagkadawa-dawaꞌ it sang sulsugan ngayti it naꞌalang nira ngayting pangaꞌen, ipiyamagduluꞌ na nira duꞌut mga kabayuꞌ nira nga asno. Bawnga namagpanaw na sira.
27Iyan delem na, nga duꞌun na sirat igaꞌan nira, inukad it sang kataawan i kanyang sakuꞌ ka begayan yat kaꞌnen i asno ya. Pagꞌukad ya, magsasagpaw naga duꞌun i ipiyagꞌalang ya ngayti! 28Pagkalteg, maat yat mga sulsug ya, “Wayni nagay aken ngayang ibiyayad! Iringgud nira naga sinit sakuꞌ ku ngayni!”
Pagkagneg nira kayti, kiminlas i atay nira. Maamaatan sira nga magyeyegyeg, “Unuytu nga pabetang it Ampuꞌang Diyus it aten?”
29Pagꞌabut nira duꞌut Canaan, itiyuturan nira nga muꞌsa duꞌut ki Jacob ngayti nga amaꞌ nira i nabetangan nira ngayti. 30Maat nira, “Amaꞌ, talagang gulat-gulat i pangangampangan it manigpamaalaꞌ ngayti duꞌut Egipto. Lugud-lugudun mu nga pagtandesan kami paꞌ nga mga sunda. 31Maat namen it kanya, ‘Kagalang-galang it imu, mga taw kami baytung magagayen i adat. Daꞌkami baytu mga sunda.’ 32Talagang isiyugid namen i kamatuudan nga kami, sang puluꞌ may duwa kami nga magsulsu-sulsugun. Bulun kami nga mga lalaki, esa-esay amaꞌ namen. Isiyugid namen gasiꞌ it kanya nga iyan esang sulsug namen, ega nay kanya. Iyan kiyaꞌpusan namen, natuduꞌ naga situt imu nga situt Canaan.
33Temed taw ngayti nga manigpamaalaꞌ duꞌun, pagkagneg yat iting ampang namen, maat ya, ‘Abir, letganan ku in talagang matuud i pagꞌaaten mi ngaytu. Kaꞌilangan may ituduꞌ mi situt aken nga esa nga sulsug mi. Bawnga iyan beken, muliꞌ kamu nga dumuꞌlung it pangaꞌen duꞌun it pamaggetmanan nga kaꞌibaan mi duꞌut babalayan mi.’ 34Maat ya gasiꞌ nga kaꞌilangan pabayaꞌen namen i ariꞌ namen ngaytu baw paꞌuliꞌ kami naga duꞌun, isaꞌun maꞌrutan ya nga daꞌkami nga matuud mga sunda. ‘Pagꞌabut mi situ,’ maat ya, ‘bawnga ipaliꞌwan kuy sulsug mi ngaytu. Baw paꞌintulutan ku kamu nga malang, paꞌalang, situt itung banwa.’”
35Ta, pagsigꞌukad nirat betang it sakuꞌ nira ngayti, duꞌun naga gasiꞌ i kanira ngayting ipiyagꞌalang. Pagkalteg nirat pirak nira ngayti, unupat pati si Jacob ngayti nga amaꞌ nira, miniꞌlam na gasiꞌ. 36Maat yat kanira, “Salaꞌ mi naytuy ipagkaꞌilang mi ngaytung mga anak ku. Ka ungaytu, si Jose nga sulsug mi, ega na, patay na. Ta kayti, si Simeon, ega na gasiꞌ. Ta waytu siꞌ, si Benjamin ngaytu nga ariꞌ mi, kuꞌiriꞌen mi siꞌ situt aken. Talagang in atkaytu na, mabeꞌgat nang banar it aken, ataku nat diyaganat langit.”
37“Amaꞌ,” maat ni Ruben, “yay matuud, in ega na mapabayaꞌ kut muliꞌ situt imu si Benjamin, imatayen mu nay duwa ngayang anak ku! Isarig mu nat aken si Benjamin ngaytu. Siguradung pagꞌuliꞌ ku, magbabayaꞌ naga kanya.”
38Temed maat ni Jacob, “Ega bayan ipabayaꞌ kut imyu i iyang anak ku, ka ungayan, si Jose nga langgung ya, patay na. Kanya mana ngaytuy pagpalwasan kut nakem ku. Ka atkaytu na ngaytung kagurang ku, in magated kanya kat panawan mi ngayan, talagang pagsisiguruun ku nga kasmek ku, patayan ku lamang, ega na maꞌawaꞌ kat nakem ku.”
Currently Selected:
Genesis 42: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
