Genesis 45
45
Nagpakilala na si Jose it mga sulsug ya ngayti
1Sikayti ega na nga matuud napuꞌgunan ni Jose i kat nakem ya kat adapan it mga manigsirbi ya, aypaꞌ igiyaꞌu-gaꞌuy ya na nga maat yat kanira, “Ireg ku sana, duꞌun kamu daꞌan it liꞌwan nga muꞌsa.” Iyan sira-sira manay duꞌun, nagpakilala na si Jose it mga sulsug ya ngayti. 2Kat kadakulat sugaw ya, nagnegan it mga taga Egipto ngayti nga duꞌut liꞌwan, aypaꞌ madaliꞌ nga nakaꞌbut i baritaꞌ duꞌut balay it adiꞌ ngayti.
3“Aku na ngaytu baytu si Jose,” maat yat mga sulsug ya ngayti. “Unu egen paꞌ nga matuud i amaꞌ tami?” Temed daꞌsira nakariꞌe-riꞌeng ka talagang magꞌiꞌlam nga banar.
4“Patpad kamung muꞌsa,” maat siꞌ ni Jose it mga sulsug ya ngayti. Ta, namagpatpad sira. Ipiyasigi na ni Jose i ampang ya. “Aku na ngaytu baytung matuud si Jose nga sulsug mi ngayan, nga ipiyaꞌalang mi it timnaban it aken situt Egipto. 5Temed ega na masmekan mi pay itiꞌen ngayti. Ega na gasiꞌ isgan mi i sadili mi sabap it binwat mi ngaytut aken, ka Ampuꞌang Diyus i nagpabetang-betang it ikiyaꞌasitu ku it itung banwa, isaꞌun lamang dakel i maribri nga ginawa. 6Duwang taꞌun pay getem ngaytu nga nakataꞌlib. Temed lima paꞌ nga taꞌun i magꞌaꞌabut, nga talagang egay mapatbasan kat mga kaꞌuꞌumaan. 7Piyauꞌna aku situ it Ampuꞌang Diyus isaꞌun ega mapuuꞌ i bangsa ta. Tiyaban ya aku situ isaꞌun maribri kamu kat kamataynen, nga dumakel nang dumakel situt banwa i mga kaꞌanakan mi. 8Aypaꞌ ega kaꞌirgan mi yan, in daꞌga Ampuꞌang Diyus i nagpataban it aken situ. Ka binwat ya aku nga manigpaꞌiguꞌ-iguꞌ it magayen kat adapan it adiꞌ baw manigpamaalaꞌ it muꞌsang pamalay-balay ya, baw manigpamegbeg it muꞌsang Egipto.
9Kayti, muliꞌ kamu nga lagi duꞌut amaꞌ tami,” maat ni Jose. “Aaten mi kanya, ‘Ituy tugun it anak mu nga si Jose. Akuy binggayan it Ampuꞌang Diyus it pamaalaꞌ it muꞌsang Egipto. Mereg-ereg ka nat paꞌasini it aken. 10Duꞌun i taꞌidan mu it Gosen isaꞌun adeꞌdeng ka nat aken. Muꞌsang mga anak mu, mga apuꞌ mu, mga tupa, kambing, bakaꞌ baw mga kusas mi, ega nay ituduꞌ, tabanen nang muꞌsa. 11Ka in adeꞌdeng ka nat aken, makaꞌpet aku sit imu. Basta daꞌka paꞌasini, dakulaꞌ talagang karigaan mu, pati mga anak mu baw muꞌsa kat pamalay-balay mu. Ka yay matuud, gemtem paytu it seledat limang taꞌun.’
12Ta kamung mga sulsug ku, magkaltegan mi na, baw kuꞌkup ku nga si Benjamin ngaytu, magkaltegan ya gasiꞌ nga talagang aku naytu, si Jose na baytuy magpakiꞌsugi-sugid ngaytut imyu. 13Ibaritaꞌ mi na asat amaꞌ tami i kadakulat paggalang it aken situt Egipto baw ituturan mi naga gasiꞌ i muꞌsang naltegan mi. Apu-apuraꞌen mi nga panaw it panguliꞌ mi, isaꞌun makadaliꞌ na situ si Amaꞌ.”
14Magsusgaw kanya nga simnakem it ki Benjamin. Magsusgaw gasiꞌ si Benjamin nga simnakem it akaꞌ ya ngayti nga si Jose. 15Bawnga tiyeptep ni Jose it marek i mga sulsug ya ngayti it magsusgaw. Bawnga nagtuturan-tuturan na sira.
Kagayen it adiꞌ ngayti baw panabang ya it ki Jose
16Nakaꞌbut duꞌut balay it adiꞌ ngayti i baritaꞌ nga namagꞌabut i mga sulsug ni Jose. Nasagyaan it adiꞌ baw mga katimbang ya. 17Inaat it adiꞌ ngayti si Jose, “Aaten muy mga sulsug mu ngayan nga dawa-dawaꞌen nay mga pirisiꞌen nira baw idluꞌ na duꞌun it mga ramu-ramu nira ka mapanaw nat muliꞌ duꞌut Canaan. 18Ka ireg ku, pabayaꞌen nira situt aken i amaꞌ mi baw kumpur sira nga kaꞌanakan, muꞌsa na. Begayan ku sira it magayen nga rugar nga taꞌidan nira. Suwituꞌun ku sira gasiꞌ it magayeng pangaꞌen.
19Aaten mu gasiꞌ sira nga tumaban nat mga karitun nga garing situ, isaꞌun may masakayan it mga babay baw mangaꞌwaꞌ nira ka pisiꞌen na niray amaꞌ mi ka paꞌandaꞌ na situt Egipto. 20Ega na inayangen nira i mga kusas nira duꞌun nga kaꞌilangan nga matuduꞌ ka gantiyan kut magagayen nga garing situt Egipto.”
21Siyunud nga muꞌsa it mga anak ngayti ni Israel i iting inaat. Binggayan na sira ni Jose it mga karitun, uyun kat inaat ngayti it adiꞌ, baw piyabalunan paꞌ sira it makaꞌen nira duꞌut pagpanawan nira. 22Kada esat kanira, binggayan ni Jose it pakayan. Temed limang dubli i pakayan nga ibinggay yat ki Benjamin baw may pirak paꞌ nga tulung gatus. 23Baw may ipiyataban gasiꞌ ni Jose duꞌut amaꞌ ya. Sang puluꞌ nga lalaki nga kaꞌasnoꞌan i piyapirisiꞌnan ya it muꞌsang magagayen nga bagay nga garing duꞌut Egipto. Sang puluꞌ gasing babay nga asno i piyapirisiꞌnan yat tirigu, tinapay baw beken pang pangaꞌen isaꞌun may mabalun it mga amaꞌ ya nga mapanaw nga paꞌaduꞌun nat Egipto ngayti. 24Ta it alistu nay muꞌsa, piyapanaw na ni Jose i mga sulsug ya ngayti. Piyabalunan ya gasiꞌ it ampang ya nga magꞌaat, “Iyan ayaw kamut daꞌe-daꞌegen asat dalan.”
25Ta egay beken, namagpanaw na siray muliꞌ duꞌut Canaan, duꞌut amaꞌ nira ngayti nga si Jacob nga magꞌeꞌlat it kanira nga namari ngayti duꞌut Egipto. 26Pagꞌabut nira, itiyuturan nira nga muꞌsa duꞌun it amaꞌ nira ngayti. Maat nira, “Amaꞌ, palan egen naga si Jose! Kanya palan i manigpamaalaꞌ ngayan duꞌun it muꞌsang Egipto.” Ega nakariꞌe-riꞌeng si Jacob. Subuk ega pagpamayaꞌnen yay iting sugid. 27Temed iyan inusay na duꞌut kanya i muꞌsang tugun ni Jose baw naltegan ya nay mga karitun ngayti nga ipiyataban ni Jose nga pasakayan it kanira it paꞌandaꞌ ngayti, simnagya na i nakem ya. 28Yanay naꞌampang ni Israel, maat ya, “Pagpamayaꞌnen ku na! Egen palan i anak ku nga si Jose. Paꞌaduꞌun aku nat kanya isaꞌun makitaan ku naga kanya parabir aku matay.”
Nagꞌandaꞌ na si Israel duꞌut Egipto
[Mga 1677 B.C.]
Currently Selected:
Genesis 45: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
