Genesis 50
50
1Siyakem ni Jose i amaꞌ ya ngayti it magsusgaw baw piyamalkan ya. 2Bawnga isingkat ya it mga manigꞌubaꞌubat ya nga balsamuun i miyatay ngayti nga amaꞌ ya nga si Israel. Aypaꞌ biyalsamu nira i bilug it miyatay ngayti. 3Epat nga pulung aldaw i kaꞌlay it iting buwat ka iyan i kanira nga adat. Pitung puluꞌ nga delem i pinlawan it muꞌsang taga Egipto.
4Pagkatupus it pulaw ngayti, inaat ni Jose i mga beken nga katimbang it adiꞌ ngayti. Maat ya, “Parigaan mit sumugid i adiꞌ ta. 5It pan-gun ni Amaꞌ parabir kanya natay, piyasumpa ya aku. Maat ya, ‘Matay aku na. Kaꞌilangan duꞌun nagay lebngan mu it aken, it ipiyagꞌareg ku nga kalelbengan nga duꞌut Canaan.’ Aypaꞌ angutun mi asan it kanya in unu, mapakay kanya nga paꞌaduꞌun aku daꞌan, ka duꞌun nagay lebngan kut ki Amaꞌ. Pagkalbeng ku, muliꞌ aku yan nga lagi situ.”
6Pagkasugid duꞌut adiꞌ ngayti, inaat ya si Jose, “Unuka ega mapakay? Mapanaw ka lamang ka ilbeng mu kanya duꞌun, subung nat isiyumpa mu it kanya.”
7Aypaꞌ naꞌaduꞌun nat Canaan na Jose nga nanlebeng nat amaꞌ nira ngayti. Miyayaꞌ it ki Jose ngayti nga manlebeng i muꞌsang katimbang it adiꞌ ngayti, mga matataꞌas i katengdanan nira, baw mga mabebeꞌgat nga ginuꞌu duꞌut banwa nga Egipto. 8Miyayaꞌ gasiꞌ i muꞌsa kat pamalay-balay ni Jose. Puꞌsay mga sulsug ya ngayti, muꞌsa bang kaꞌanakan it miyatay ngayti, magbabayaꞌ nga tanan. Yamanay natuduꞌ duꞌut Gosen, magꞌarigra it dedekeyeꞌ nga mangaꞌwaꞌ baw mga ayep nira. 9May mga karitun baw may magsasakay it kabayuꞌ. Talagang dakel sira nga pagtaw i napanaw.
10Pagꞌabut nira duꞌut Goren Atad nga adeꞌdeng it danum it Jordan, namagrenren sira. Duꞌun kayti, singgawan nira siꞌ i miyatay ngayti nga amaꞌ na Jose it sang lingguꞌ i kaꞌlay, it ega basta-bastang surugawan. 11Pagkamuya it mga Cananeo it iti ngayting binwat, maat nira, “Masyadu palan i kasmek it mga taga Egipto ngaytu nga mamagsugaw.” Aypaꞌ ka piyangaranan i sikaytiꞌen it Abel-mizraim.
12Aypaꞌ siyunud it mga anak ni Jacob i pan-gun it amaꞌ nira ngayti. 13Tiyaban nira duꞌut Canaan i miyatay ngayti nga amaꞌ nira ka duꞌun nagay limbengan, it kubkub ngayti nga duꞌut lugtaꞌ nga pagpangaranat Macpela ngayti nga adeꞌdeng it lansangan it Mamre, nga inalang ni Abraham duꞌut ki Efron nga Heteo, ka buwaten nga kalelbengan. 14Pagkalbeng nira it amaꞌ nira ngayti, nagpaꞌuliꞌ nga lagi si Jose duꞌun it Egipto, sang siraan naga it mga sulsug ya baw puꞌsa it mga mamagbabayaꞌ ngayti it nanlebeng, subung nat inaat ni Jose duꞌut adiꞌ ngayti.
Piyaꞌimbeng ni Jose i nakem it mga sulsug ya ngayti
15Garing it pagpatay it amaꞌ nira ngayti, libeg i pikiran it mga sulsug ngayti ni Jose. Maamaatan sira, “Barang tu magꞌiseg pat aten si Jose. Barang belsen ta nat binwat ta ngayan it kanya.” 16Binwat nira, may piyapaꞌaduꞌun nira it ki Jose nga manugid it magꞌaat, “Parabir natay i amaꞌ ta, may inaat ya nga isugid asat imu, 17nga maat ya, ‘Pagꞌangutun ku bayan, Jose, nga pasinsiyaen mu naga i mga sulsug mu it karaꞌe-raꞌetan nira ngayti nga binwat nira ngayan it imu.’ Aypaꞌ,” maat siꞌ i tugun nira, “magpasanguꞌ-sanguꞌ kami nga banar it imu nga pasinsiyaen mu naga kami nga manigsirbi nagat Ampuꞌang Diyus it amaꞌ ta.” Pagkagneg ni Jose kayti, nakasgaw siꞌ kanya.
18Bawnga naꞌaduꞌun nga muꞌsa it ki Jose i mga sulsug ya ngayti ka nanluud duꞌut adapan ya it magsusuꞌsub na duꞌut lugtaꞌ. Maat nira, “Kami ngaytu nga muꞌsa, mga uripen mu na.”
19Temed maat ni Jose, “Ayaw kamut iꞌlam nga belsen ku kamu, adimaat Ampuꞌang Diyus aku. 20Sabagay, maraꞌe-raꞌet talaga i binwat mi ngaytut aken, temed kat pabetang-betang it Ampuꞌang Diyus, kagayenan i liꞌwan ya, ka dakel i taw nga magkaribri it puyanget. 21Aypaꞌ ayaw kamu nat iꞌlam. Akuy baalaꞌ it imyu baw mga anak mi.” Pagkagneg nira kayti it kaꞌildawan ngayti nga ampang ya, yapay gayen it nakem nira.
Pan-gun baw pagpatay ni Jose
[Mga 1606 B.C.]
22Naneꞌteꞌ na na Jose baw mga sulsug ya ngayti duꞌut Egipto. Inabut kanya it idad nga sang gatus baw sang pulung taꞌun. 23Naꞌbutan paꞌ si Jose it mga apuꞌ ya nga anak ni Efraim. Baw maski apuꞌ-tuꞌud ya nga anak ni Maquir nga anak it anak ya ngayti nga si Manases, nasakbut ya nagat pagkasakit.
24Iyan atnakayti i kagurang ni Jose, maat yat mga sulsug ya ngayti, “Siguru daꞌku naytu paꞌlayen situt banwa. Temed maski na, ayaw kamut kasusa ka tarimaen kamu naga it Ampuꞌang Diyus, baw paꞌuliꞌen kamu naga duꞌut banwa nga isiyanggup it Ampuꞌang Diyus it mga apuꞌ ta nga si Abraham baw si Isaac, atnagay amaꞌ ta ngaytu nga si Jacob.” 25Pagkaꞌampang ya kayti, ipiyan-gun ya it mga sulsug ya i buwaten nira in matay na kanya. Maat yat kanira, “Isumpa mi situt aken nga in mabut nay timpu nga ildawan kamu nat Ampuꞌang Diyus nga makaꞌuliꞌ kamu na duꞌut Canaan, garing situt itu nga banwa, tabanen mi naga i mga tuꞌlang ku.”
26Ta, natay na nga matuud si Jose. Yanayti i idad ya, sang gatus baw sang puluꞌ ngayting taꞌun. Biyalsamu i bilug ya parabir kanya ipiyagriꞌrung, uyun kat adat duꞌun it Egipto ngayti.
Currently Selected:
Genesis 50: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
