Lucas 11

Panulduꞌ pasar it panalangin

[Mateo 6:9-13; 7:7-11]

1Ta, may esang aldaw, nga duꞌun sira na Jesus it esang rugar, nga magpanalangin kanya. Pagkatupus ya, maat it sang kataawan nga alagad ya, “Ampuꞌan, in mapakay tulduꞌan mu naga kami it manalangin, subung it binwat ni Juan it kanya nga mga alagad.”

2Katubag si Jesus, maat ya, “Ta, atkaytu i magayen nga panalangin mi.

‘Amaꞌ, bantugun baw kilalaen nga ega babasta-bastaen i ngaran mu.

Pagꞌangutun namen nga madaliꞌ na mabut i pagꞌadiꞌan mu nay muꞌsang katataawan.

3Pagꞌangutun namen gasiꞌ nga aldaw-aldaw begayan kami it magkakaꞌen namen.

4Pasinsiyaen mu naga i mga kasalaꞌan namen, ka pasinsiyaen namen naga gasiꞌ i mga magkasalaꞌan sinit amen.

Baw pagꞌangutun namen asat imu nga ega naga ipaꞌintulut mu nga masukdanan kami it subraꞌ na.’”

5Paꞌugdun paꞌ ni Jesus, maat ya, “Alimbawa beteꞌ may esat imyu nga maꞌaduꞌun it iba-iba ya it lubuk nat delem. Pagꞌabut ya, maat ya, ‘Bilaꞌ, barang maski tulung batu nga tinapay mabgayan mu aku. 6Ka may miyabut nga esang iba-iba ku nga magpanaw-panaw. Ta, daꞌgay itarakan kut kanya.’

7Temed ta, katubag i pagꞌangutan ya ngayti nga duꞌun it seled it balay. Maat ya, ‘Ega na sasawun mu aku, ka napasꞌanan ku nay talaꞌep, baw magliliꞌtid kami na it mga ana-anak ku. Ta ega na mapakay nga magbangun aku paꞌ nga mamgay it imu it kaꞌilangan mu ngayan.’ 8Matuud tu talagay iꞌaat ku ngaytu, nga maski ega na magꞌireg kanya magbangun in sabap it pagꞌiba-iba nira, takaꞌ sabap it talagang magpaꞌungaꞌ-ungaꞌ na i magꞌangut ngayti, aypaꞌ ka magbangun nagay iba-iba ya, ka begayan naga kanya it pagꞌengden ya ngayti.

9Aypaꞌ ituy ipagꞌaat kut imyu. Temegel kamu it mangut duꞌun it Ampuꞌang Diyus, ka siguradu yan nga begayan ya kamu. Tegel-tegelan mit tumulus duꞌut kanya i pagkaꞌilanganen mi, ka tabangen ya kamu nga maparagan mi. Paꞌungaꞌ-ungaꞌ kamu it pasleden kat adapan ya, ka talagang sumambung kanya. 10Sabap pagbegayan ya i kumpur magꞌangut. Magkaparag i iyan nga magtulus. Baw talagang sambungan i kumpur magpaꞌungaꞌ-ungaꞌ it pasleden.

11Ka kamu nga mga amaꞌ, unu, dukul i ibgay mi it anak mi nga magꞌangut it sedaꞌ? 12Unu yan, bangkunawa i ibgay mi in tiꞌlug i pagꞌangutun? 13Ta, in kamu nga makasalaꞌan, magkaꞌrut naga megay it magagayen nga bagay kat mga anak mi, daꞌga subraꞌ na i Amaꞌ mi nga duꞌut langit? Talagang ibgay ya i Espiritu Santo ya kat matuud nga magꞌangut duꞌun it kanya.”

Kakayaan ni Jesus, garing duꞌun it Espiritu Santo, ega garing duꞌun it ki Satanas

[Mateo 12:22-30; 12:43-45; Marcos 3:20-27]

14Kaꞌsa may maraꞌe-raꞌet nga inimugaw ni Jesus nga magpabuyun it esang lalaki. Ta, pagkaꞌimugaw, nakaꞌampang nay lalaki ngayti. Naliluꞌ i kadakel it taw nga nakamuya kayti. 15Temed may beken nga magꞌaat, “Si Beelzebub#11:15 Si Beelzebub, esa gasing ngaran ni Satanas. bayan nga pagbayaꞌen it maraꞌe-raꞌet i minggay it kakayaan ya ngayan nga magkaꞌimugaw it maraꞌe-raꞌet.” 16Iyan beken gasiꞌ, kusukda-sukdanan nira si Jesus, aypaꞌ ka miyangut sira nga paltegan it tandaꞌanan nga pasar duꞌun it langit.

17Temed magkaꞌrutan ni Jesus i pamagpikiren nira ngayti. Aypaꞌ ka maat yat kanira, “Maski unu nga kaꞌadiꞌan nga ega urunyun ka magkuntraꞌ-kuntraꞌen i mga sinakepan ya, simpri ega maneꞌteꞌ. Atkayan nagay mabetangan it maski unu nga pamalay-balay. Basta nabagiꞌ-bagiꞌ ka magdaꞌe-daꞌegen i taw ya, simpri ega yan maneꞌteꞌ. 18In beteꞌ si Satanas, pagꞌimugawun ya i mga pagsasakpen ya nga maraꞌe-raꞌet, daꞌga diri ya naga i pagkuntraꞌen ya? Ta, magꞌuꞌunu maneꞌteꞌ i kaꞌadiꞌan ya? Daꞌga ega? Aypaꞌ ega mapakay i pagꞌaaten mi nga magkaꞌimugaw akut mga maraꞌe-raꞌet sabap it binggayan aku ni Beelzebub it itu nga kakayaan.

19Temed in beteꞌ matuud nga magꞌimugaw akut maraꞌe-raꞌet kat kakayaan ni Beelzebub, ta ari garing it kakayaan it mga manigsunud mi nga magkapangimugaw naga it maraꞌe-raꞌet? Siray magkapamatuud nga talagang nagkamaliꞌ kamu. 20Ta, kayti, in magꞌimugaw akut mga maraꞌe-raꞌet kat keseg it guna it Ampuꞌang Diyus, daꞌga baꞌ nangangaꞌulugan nga miyabut na situt imyu i kaꞌadiꞌan it Ampuꞌang Diyus ngaytu?

21Ka basta esang taw nga makseg baw rangkap it basiꞌ i tumandaꞌ it balay ya, simpri ega basta-basta maꞌilang i mga kusas ya. 22Temed in abutun it subraꞌ paꞌ nga makseg baw daꞌgen kanya, simpri maꞌagaw nay basiꞌ ya nga pagsarigan ya baw isari nat pamgay i mga kusas ya nga naꞌagaw gasiꞌ.

23Talagang iyan ega magkampiꞌ it aken, ipagpabetang ku nga magpakikuntraꞌ it aken. Baw iyan ega magtabang it aken it magtulus it katataawan, kanya i magpaneꞌag-teꞌag it kanira.

24In beteꞌ may limiꞌwan nga maraꞌe-raꞌet duꞌun it esang taw nga pagpapulpugun ya, buwat it maraꞌe-raꞌet ngaytu, subuk magluꞌug-luꞌug lamang duꞌun it rugar nga kapupuyangtan, ka magtulus it papulpugun ya siꞌ. Ta in egay maparagan ya, ‘Aaꞌ daꞌga,’ maat ya, ‘paꞌuliꞌ aku naga duꞌun it pagpapulpugun ku ngayti.’ 25Bawnga abutan ya, maꞌanuꞌan yang ega pay nakapasubli it kanya nga beken, lamang subung na it balay nga paglilimpiyuꞌun na baw pagꞌaꞌaturun na. 26Aypaꞌ buwaten ya, mapanaw siꞌ ka mangumbinyu it pitu nga mga kaꞌibaan ya nga maraꞌe-raꞌet paꞌ it kanya, ka kaꞌibaan ya nat papulpug siꞌ. Aypaꞌ baraꞌan it iyan nga taw, subraꞌ paꞌ nga rumaꞌe-raꞌet i kabetangan ya.”

27Ega paꞌ natupus i pagꞌampangen ngayti ni Jesus, may esang babay nga nanggaꞌmaran duꞌun it kadadaklan ngayti, nga magꞌaat, “Talagang magkasagya i babay ngayan nga nagbeteng it imu baw nagpaduduꞌ!”

28Temed timnubag si Jesus, nga magꞌaat, “Yay matuud, subraꞌ pang magkasagya i magpagneg it ampang it Ampuꞌang Diyus baw pagsunudun ya.”

In unuy inaat ni Jesus duꞌun it mga magꞌangut it tandaꞌanan nga pasar duꞌun it langit

[Mateo 12:38-42]

29Iyan sigi na nga abut it taw, miyampang si Jesus nga magꞌaat, “Mga taw kayti, talagang maraꞌe-raꞌet i adat. Ka magꞌangut sira it tandaꞌanan nga pasar duꞌut langit. Takaꞌ ega yan i ipalteg it kanira, in daꞌga iti na, ipiyagladawan ngayti nga nalabayan it prupitaꞌ ngaytit tagnaꞌ nga si Jonas. 30Ka in magꞌuꞌunu binwat nga tandaꞌanan si Jonas kat mga taga Ninive nga tiyaꞌgan it kanya, aku nga Taga Langit nga Ipiyanganak it Taw, atkayan naga kat kayti na ngaytung timpu it mga taw. 31Kat aldaw nga ipangukuman, basulun kamu yan it babay nga nagꞌadiꞌ duꞌun it Seba it tagnaꞌ paꞌ. Sabap talagang alaid nga banar i piyanawan ya, garing duꞌut banwa ya, ka ireg ya nga matantuwan i ega basta-bastang kasepsep it adiꞌ nga si Solomon. Temed kayti, may situ nat imyu nga subraꞌ paꞌ nga mabantug it ki Solomon, temed daꞌkamu kupagneg. 32Subung naga i mga taga Ninive ngaytit tagnaꞌ. Ka in asan nat aldaw nga ipangukuman, basulun nira yan kamu nga mga taw it kayting timpu. Sabap kanira, nagsinguliꞌ, langkuy inindiꞌan niray kasalaꞌan, pagkagneg nirat pangadal ni Jonas. Temed ta, kayti may situ nat imyu nga subraꞌ paꞌ nga mabantug it ki Jonas ngayti, temed daꞌkamu magsinguliꞌ.”

Panulduꞌ ni Jesus pasar it eyag

[Mateo 5:15; 6:22-23]

33Bawnga maat siꞌ ni Jesus, “Egay magpagket it tidaw bawnga itaguꞌ u sukruban it alupan. In daꞌga iduꞌun ya talaga it dadaꞌtunan, nga maltegan it mamagseled i eyag ya. 34Dedemdemen mi tu, nga mata mu i bilang tidaw it bilug. In egay dipirinsiya it mata mu, simpri maꞌyag i muꞌsang panleteg mu. Temed in may dipirinsiya it mata mu, simpri madlem na nga madlem i panleteg mu. 35Aypaꞌ kaꞌilangan nga magꞌintur ka, ka barang eyag ngayan nga pagsisiguruun mu na, barang sayan kadleman paꞌ, ka barang ega paꞌ naꞌyagan i pikir mu pasar it kaꞌirgan it Ampuꞌang Diyus. 36Temed basta pikir mu ngaytu, naꞌyagan na it Ampuꞌang Diyus, aypaꞌ ega nay madlem ya. Talagang maꞌyag i muꞌsang pangaꞌgenan mu, nga subung it pagsasakpen nga banar it eyag it esang masgu nga tidaw.”

Pagbasulun ni Jesus i mga Pariseo baw mga manigpaꞌyag it urdin

[Mateo 23:1-36]

37Iyan natupus nay pangadal ngayti ni Jesus, inimbitar kanya it esang Pariseo nga duꞌut kaniray pangaꞌnan. Ta, egay beken, miyayaꞌ si Jesus ka mangaꞌen duꞌun. 38Temed naliluꞌ i Pariseo ngayti ka kimnaꞌen it ega nangugas si Jesus it alima, nga uyun it siyubli-subli nira nga panulduꞌ.

39Temed mampang i Ampuꞌan nga si Jesus, maat ya it Pariseo ngayti, “Kamu nga mga Pariseo, subung kamu it esang taw nga pagꞌugasan ya, kat liꞌwan lamang it iꞌimnan baw karung. Temed damil duꞌut seled, pagpataꞌnan ya lamang. Ka paglimpiyuꞌun mi i bilug mi, temed kat nakem mi, punung-punuꞌ it panlupig baw karaꞌe-raꞌetan. 40Ka in daꞌga kaꞌengel-engel mi na, daꞌga baꞌ iyan minwat it bilug mi, yanaga i minwat it nakem? Simpri ireg ya limpiyuꞌ i muꞌsa. 41Aypaꞌ imbis nga adat nga malupig, mamgay kamut masagyay nakem it ildaw mi duꞌun it mga makukuriꞌ. Ta, magbaraꞌ nayan nga subuk limpiyuꞌ kamu na nga matuud.

42Subrang makuriꞌ i magꞌaꞌareg it imyu, mga Pariseo. Pagsunudun mit magayen i urdin nga ibgay mi it Ampuꞌang Diyus i ikasang pulung bagiꞌ it mga luwak mi, nga maski mga panraragiꞌ it pangaꞌen. Temed paglipaten mi i piyakamataꞌas nga ipiyagꞌurdin ya, iyan buwat nga mataldeng baw pagmaꞌal duꞌun it Ampuꞌang Diyus. Kaꞌilangan talaga nga buwaten mi i matataꞌas ngaytu, baw ipasigi mi nagay pagsunud mi it mga beken nga inaat.

43Subrang makuriꞌ i magꞌaꞌareg it imyu, mga Pariseo. Ka iyan i kaꞌiꞌirgan mi nga adungan in duꞌun it papagsambaan, mga araꞌdungan nga pagpaꞌdungan it mga matataꞌas. Baw kasasagyaan mi nga pagsaluduꞌan in duꞌun it mataawun nga mga rugar.

44Subrang makuriꞌ i magꞌaꞌareg it imyu, ka kabilangan mi, subung it lebeng nga egay imandaꞌan. Aypaꞌ ka magkasalyaan it mga taw it kapanaw ka egay uru-urut nira. Ta atkayan naga, nga magkaduraꞌitan i mga taw it karaꞌe-raꞌetan kat nakem mi, ka tanud nira, mataldeng kamu kat panleteg it Ampuꞌang Diyus.”

45May miyampang nga esang manigpaꞌyag it urdin. Maat ya, “Manigtulduꞌ, kat iyan nga inampang mu, pati kami, pagtibabaꞌen mu na.”

46Katubag si Jesus, maat ya, “Subrang makuriꞌ i magꞌaꞌareg it imyu gasiꞌ, mga manigpaꞌyag it urdin. Sabap kat panulduꞌ mi, subuk magbetek kamu it pagdakulaꞌen na nga betek nga ipagpapasaꞌan mit mga taw nga daꞌna kaya nga pagpasaꞌnen. Temed maski andidiꞌsing it alima mi, ega ireg mi nga ipadiꞌkit nga tumabyang kamu.

47Subrang makuriꞌ i magꞌaꞌareg it imyu. Ka mabakas nga arandeman i ipagpabwat mi duꞌun it limbengan it mga prupitaꞌ nga siyarit imatay it mga kagiyaringanan mi. 48Iyan ngayan nga buwat mi, magpamatuud nga uyun kamu duꞌun it binwat ngaytit mga kagiyaringanan mi. Ta, sabap it sira i minimatay it mga prupitaꞌ, kamu, pagpabakasen mi nay mga lebeng nira. 49Aypaꞌ ka matuud talagay inaat it Ampuꞌang Diyus kat ega basta-bastang kasepsep ya, nga maat ya, ‘May papaꞌaduꞌunun ku it kanira nga mga prupitaꞌ baw mga apustul, nga iyan beken pangimatayen nira, pakuriꞌan nira i beken.’ 50Aypaꞌ kat pabetang-betang it Ampuꞌang Diyus, mabut it imyu i panriga sabap it muꞌsa ngaytung mga inimatay nga prupitaꞌ garing it pagguna it banwa, 51nga gimnaring duꞌun it ki Abel nga uꞌna-uꞌnang inimatay it tagnaꞌ paꞌ, miyabut duꞌun it pagꞌimatay it ki Zacarias, nga inimatayan it kanya, duꞌun it piyagtengaꞌan it kabalayan it Templo baw papangantengan nga duꞌun it piyakakamaꞌyagan ya. Eeꞌ baꞌ, matuud i ipagꞌaat ku ngaytut imyu, nga kamung mga Judio it kayting timpu i abutun it panriga sabap it muꞌsa ngaytu.

52Subrang makuriꞌ i magꞌaꞌareg it imyu, mga manigpaꞌyag it urdin. Sabap iyan kamatuudan nga garing duꞌut Ampuꞌang Diyus, ega kupamayaꞌnen mi, baw ipagtaguꞌ mi paꞌ duꞌun it katataawan. Kabilangan mi, subung it esang taw nga ega kusled duꞌut balay, baw inawaꞌ yay gunsiꞌ isaꞌun egay kasled nga beken.”

53Ta, garing sikayti, talagang miyereꞌeret na nga banar i iseg it mga manigpaꞌyag it urdin baw mga Pariseo. Aypaꞌ ka pagkagaring ni Jesus duꞌut balay ngayti, pagsariyen na kanyat ingkut pasar it dakel-dakel na nga mga bagay. 54Ka egay beken nga antap it nakem nira, sigapulun kanya kat mga pagꞌampangen ya.

Currently Selected:

Lucas 11: TBWONT

Highlight

Copy