Luglaa 18
18
Kɔraawiizi n ŋɔ nua lugɔ Abraham daŋ lul biibaal wia
1Kɔraawiizi faa ba Abraham benii, di u sogo dugli Mamrɛ daazenaa la u tanti dia dominua, wibaŋkanchirii bɛl, di bɔr wenzoo. 2U ŋɔ u binni, di baala bahoroo chigɛ. U izi chɔ chem ba ni, di togni hɛri jaami baa.#Hib 13:2 3Denii u ŋɔ, “Nabɔnzi, di n wia par ia, ii gilɛɛ waa bɛri ii balii ni. 4Gil ba ɛɛ nii wa tɛɛ ia ií sanzi naazi, ka so daa naa zɛɛ di ra heezi. 5Iiŋ ba ii balii be naa, ií gil n nyiŋŋi diwee tɛɛ ia ií di, di dɔɔ fɔŋŋa di kaa ra la.”
Denii ba ŋɔ u ɛɛ gunla uŋ ŋɔwɛɛ la.
6Awia, Abraham faa bir chɔ zuu u tanti dia biini di ga ŋɔ Saara be, “Ɛɛ paanuu sananaa kookoo tassa bunumbɛl manaŋ, di ɔɔzi paanuu.”#Sitɔ 6:19 7Denii u chɔ zuu u nauna biini, di lau unla n pɔllɛ nɛnnɛ, di kpu tɛɛ u balii ú kuaruu, di daaluu manaŋ. 8Uŋ wa daali a diwee tuŋ, Abraham kpa nail ni waagazi ni a ol yeŋ baŋ daalɛɛ di wa tɛɛ a hɔɔhra. Ba ra di, ka Abraham chi daa bɛl zɛɛ dugli baa.
9Denii ba pɛɛzuu, “Ka lee i haaŋ Saara duɛi?”
Abraham ŋɔ dí u du tanti dia biini.
10Denii Kɔraawiizi ŋɔ, “Keŋ bina saŋa naa dɔŋ, n daŋ bir ba, ka n daŋ waa ba di u lul biibaal.”#Room 9:9
Banna ŋɔ a wiŋɔzi naa, di Saara chigɔ a tanti dia dominua ka ra nuu a maa. 11Abraham ni u haaŋ maa faa jaa zɛŋuu, Saara ge bɛri bie lulaa. 12U faa mam u biini bɔɔiih, di pɛɛzi u hiŋ, “Miŋ zɛŋŋɛ naa, ɛrɛɛ Abraham kaa ɛɛ gil n bɔra sɔɔni, yaa chɔɔi biinei?”
13Denii Kɔraawiizi ŋɔ Abraham be, “Ɛrɛɛ wiarɛ i haaŋ mamɛi? Ɛrɛɛ wiarɛ u ŋɔ lugɔ u zɛŋŋɔɔ, wàá ka wer lul biei? 14Bɛɛ n kpolle Kɔraawiizi ɛɛu huhzɛi?#Mat 19:26 N feloore ŋɔ lugɔ bina saŋa naa n daŋ bir ba. N daŋ waa ba, di i haaŋ Saara lul biibaal.”
15Denii ɔnsii lau Saara, u hɔɔ lugɔ waa mammɛ.
Ka u ŋɔ, “Haa wibii ŋɔwɛɛ, i mammɔɔ.”
Abraham n suŋŋɛɛ tɛɛ Sɔdɔm hina wia
16A baala n wa izee ba kaali, ba chaŋ Sɔdɔm barii di ra la. Abraham ge izi du baa ŋmɛnɛɛ. 17Denii Kɔraawiizi ŋɔ u hiŋ be, “N kpa wia la minna nyiŋŋi n ɛɛ di suah Abraham ni gɛɛ? 18Abraham biizi ni u naanna daŋ ɛɛ hɛrzenaa nɛra, di dɔɔ fɔŋŋa, hɛri nɛra maa ge na hiinaa lii u be.#Lug 12:3; 22:18 19N lizuubuu ú bagli u biizi ni u naanna, bá wer di ra hiŋ n ŋmɛnɛɛ, di ra ɛɛ wia la n deŋlee di dɔɔ wibii. Di ba ra hiŋ guŋ, n daŋ kaa ɛɛ wii la maa ge miŋ ŋɔ nua tɛu la.”
20Denii Kɔraawiizi ŋɔ Abraham be, “N nuuwɔ lugɔ Sɔdɔm ni Gɔmɔra hina ɛɛ wichɔgɛɛraa werge maa, ba wiɛɛlaa maa ge ɛɛ biinikpola wiɛɛlaa. 21Awia, n daŋ tuu ga na, di wibiire gɛɛ? Denii ń jaa zum nɛnnɛ.”
22A baala banɛɛ faa ga Sɔdɔm barii di kaali. Ka Kɔraawiizi waa faa haa du Abraham be. 23Denii Abraham hel u be di ŋɔ, “N Dɔɔri Kɔraawiizi, i daŋ ga chɔgi nɛnanaa ni wichɔgɛɛra maanii gɛɛ? 24Amɔ, di i wa na nɛnanaa lugɔ tokkoanɛɛ ni fi a bolzeŋ biini, ka i daŋ haa chɔguuwaa? Gɛɛ i daŋ gil baa, dikuu a nɛnanaa naa wiai? 25Wibii maa, n zummɔ lugɔ hàá sɛɛ kpu nɛnanaa ni wichɔgɛɛra maa kpau. Akai! Hàá wer ɛɛ guŋ. Di i ɛɛ guŋ, i daŋ tɛr nɛnanaa ni wichɔgɛɛra maa digna. Guŋ wàá wer ɛɛ. A dɛkkɔɔ durnya maa Seriyadiiri n ɛɛ wia la deŋlee.”
26Denii Kɔraawiizi ŋɔ, “Di n ga na nɛnanaa lugɔ tokkoanɛɛ ni fi bolzeŋ Sɔdɔm biini, n daŋ gil a bol maa chɔgaa, dikuu ba wia.”
27Denii Abraham kaa ŋɔ, “N Dɔɔri, miŋ jaa dɔɔ bampirii di faari naa, gil n haa ŋɔ wia tɛi, haali miŋ waa kummaa ɛɛwɛ gba. 28Di ba wa ɛɛ tokkoanɛɛ ni banue, ka i daŋ haa chɔgi a bolzeŋ maa dikuu a nɛra banue wiaa?”
Kɔraawiizi n wa nuu guŋ, u ŋɔ,
“Màá chɔgi baa dikuu a nɛra banue wia.”
29Ka Abraham faa suŋŋuu di la see di ŋɔ, “Ka di ba wa ɛɛ tokkoanɛɛ geu?”
Kɔraawiizi kaa ŋɔ, “Di ba hel guŋ gba, màá chɔgi baa.”
30Abraham bir ŋɔ, “Jaande, n Dɔɔri, gilɛɛ wa gil i baaŋ ra fuuh, ka di ba wa ɛɛ tokko ni kpɔrgɔ geu?”
Kɔraawiizi kaa ŋɔ, “Di ba wa hel guŋ gba, màá sɛɛ chɔguu, di kpu baa.”
31Denii Abraham ŋɔ, “N Dɔɔri, haali miŋ dɔɔ bampirii di haa vɛɛ di ra ŋɔ wia di ra tɛi gba, ka di ba wa hel tokko ge bɛnnɔu?”
Kɔraawiizi haa vɛɛ ŋɔ, “N daŋ kuu a nɛra tokko hiŋ wia di gil ba maa chɔgaa.”
32A tuna, Abraham jaa ŋɔ, “Jaande, n Dɔɔri, gilɛɛ wa gil i baaŋ ra fuuh n ni, ka n kaa ŋɔ wikpaŋ. Ka di ba wa ɛɛ fi ge bɛnnɔu?”
Kɔraawiizi kaa ŋɔ, “N daŋ kuu a nɛra fi hiŋ wia di gil ba maa.” 33Kɔraawiizi n wa ŋɔ annii maa tɛɛ Abraham tuŋ, u jaa kpa u ŋmɛnɛɛ di ra kaali, ka Abraham bir kaali u dia.
Currently Selected:
Luglaa 18: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
