Luglaa 19

Sɔdɔm ni Gomoora chɔgaa wia

1Bɔr n wa duanɛɛ, mɛlikazi anɛɛ la ba Sɔdɔm, di Lɔt sogo a bolzeŋ dominuuzeŋ. Uŋ wa na baa, u izi chem ba ni di togni hɛri di willi u nyuu, 2ka ŋɔ, “N dɔɔra, ii wa zuu n dia sanzi ii naazi ka chɔɔ, bɔ́r chaani ii feli kpa di ra la.”

A mɛlikazi bir ŋɔ, “Akai, yaa daŋ chɔɔ a bol bossibaaŋ.”

3Ka Lɔt haa vɛɛ ka ra ŋɔ dí ba la u dia ga chɔɔ. Denii ba jaa wa sɛɛ, ba nuu maa kpa la u dia. Ban laŋŋɛ la, u daali diwee, di ɔɔzi paanuu la n waa yiisi dɔɔwɛ jaa, di tɛɛ baa.

4Baŋ wa diwee tuŋ ka ŋɔ ba chɔɔ, denii bolzeŋ Sɔdɔm baala maa, nabɔnzi ni bichalli maa chaali wa bar Lɔt dia, 5di ra pogzi di ra ŋɔ, “Lee baala la n ballɛ ba wa chɔɔ i dia la duɛi? Gil ba lii ya lau baa nyiŋŋi alugɔ haana.”

6Denii Lɔt lii lau u dominua tɔ, 7ka ŋɔ, “N dammuzi, ii gilɛɛ ɛɛ keŋ wichɔgaa naa. 8N dɔɔ biihaana banɛɛrɛ baŋ waa baala zummɛ. Ií gil n lau baa wa tɛɛ ia, ií ɛɛ baa gunla maa iinna nyiŋŋi. Ka ií gilɛɛ waa ɛɛ baala naa wiimaa, dikuubɛɛwiai, ba ɛɛ n hɔɔhraa, ba sɔnchɔgii chugimbuu.”

9Ka ba ra pogzi di ra ŋɔ, “Kaali de! Anɛɛ hinnɛi? Yaa gillɔɔ i so yaa be, i jaa ra nyiŋŋi i ra bagli yaa gunla yaa n ninna ɛɛ! Yaa daŋ jaa tɔɔrii werge maa kaali gunla yaa n niŋ vii tɔɔri baala naa.” Denii ba jaa kiiri hel Lɔt dominua, di tau, ka ra nyiŋŋi bá chɔgi u gbera. 10Banna ɛɛ gunla, a mɛlikazi pilli a gbera, di tɛr Lɔt du dia biini ka lawuu tɔ, 11ka gil a nɛra maa nyuŋŋi, ba waa kaa wer bá na a dominua di zuu.

Lɔt n lii Sɔdɔm wia

12Denii ba jaa pɛɛzi Lɔt, “I haa dɔɔ lulla baŋhinaa a bolzeŋ naa biiniaa? Gil ba ni i diahina maa lii a bol naa biini, 13dikuubɛɛwiai, yaa daŋ chɔgi a bol naa maa nyaamm. A bol wichɔgaa ni ba biinikpola la hel Kɔraawiizii, u hum yaa ŋɔ ya wa chɔgi u maa.”

14Awia Lɔt lii ga ŋɔ baala la n na tee u biihaana la be, “Ií lii a bolzeŋ naa manaŋ. Kɔraawiizi ra nyiŋŋuu u chɔgi u maa.” Ka u hilazi hiŋ faa fɛ lugɔ u ra duau.

15Bɔr n waa chaani, a mɛlikazi faa ra ŋɔ Lɔt be kpegzi ni lugɔ ú lau u haaŋ ni u biihaana banɛɛ la bá lii manaŋ. Di guŋ lɛi, a bolzeŋ chɔgaa hiŋ daŋ huuzi ba gba. 16Lɔt faa haa ra di hɔɔzi, ka a mɛlikazi lauri u ni u haaŋ ni u biizi nonee, di tɛrgi baa lii a bolzeŋ biini, dikuubɛɛwiai, Kɔraawiizi faa suŋ baa waa ninɛɛ. 17A mɛlikazi bɛl ŋɔ ba be, “Ií ra chɔ di lɛɛ iihinaa. Ií gilɛɛ waa binni har gɛɛ di waa chi lɛl biini! Ií chɔ di ra la giŋgimee nyuuni. Di guŋ lɛi, ii daŋ siuzi!”

18Ka Lɔt ŋɔ, “Akai, n dɔɔra, ií gilɛɛ gil ya ɛɛ guŋ! 19Ii suŋ n ninɛɛ werge maa di lɛɛ n miibɔɔ. Ka màá wer chɔ la a giŋgimee nyuuni. Màá wer hel de mɔɔ ka a hɛhchɔg naa wa huuziŋ di kpuŋ. 20Ií na, boljiga bɛllɛ dugli ɛŋ la. Ií gil n chɔ la de, di na n hiŋ.”

21Denii a mɛlika ŋɔ, “N sɛɛ i suŋŋaa hinnɛ. Màá ka chɔgi a boljiga hiŋ waa. 22Ama, a hahzi, màá wer ɛɛ wiimaa di haa de helle lɛi.” Dikuu Lɔt n yiruu boljiga wiarɛ ba dau a bol sɔŋ Zoa.#19:22 Zoa zɛɛrɛ Jiga.

23Wiizi faa futtɔɔ di ra tinni mɔɔ ka Lɔt haa hel a bol. 24Denii Kɔraawiizi faa gil niŋ ni jilbi lii chiŋ, di wa fuuh Sɔdɔm ni Gɔmɔra maa. 25U faa chɔgi bola naabuu ani aŋhina n faa du a kɛraa maa, a newea, a daazi ani a hɛri kummaanii faa dimme. 26Ama, Lɔt haaŋ waa faa vɛɛwɔɔ ka bir binni har, dikuu guŋ wia, u faa birgi yazi, di chi lugɔ ligii.

27Hɔɔŋ wa pizɛɛ chɔɔzimpikke ni, Abraham hahzi di la bɔr la u ni Kɔraawiizi n faa chigɛ di ra ŋɔ wia la. 28Denii u binni Sɔdɔm ni Gɔmɔra barii ani lɛl la maa, di na nyɔɔzi n na lii a hɛri maa guŋ kuull alugɔ kunzeŋ n na fuuh. 29Ama, Kɔraawiizi faa liizi Abraham wiarɛ, di lɛɛ Lɔt waa lii a hɛhchɔg la uŋ faa kpawɛɛ ta a bola ni la biini.

Lɔt ni u biihaana wia

30Lɔt faa lii Zoa dikuu unna ɔm de hina wia, u ni u biihaana banɛɛ la faa gaa zuu bii bɛl bɔɔ n du giŋgimee nyuuni. 31A hɔl bɛl u biihambinabɔma hiŋ ŋɔ u niwee be, “Yaa mɛɛ ra zɛŋuu, baal maa ge waa hoo bɔnnaa yemmaa yaa n niŋ yuu di lul biizi. 32Awia, gil ya tɛu siŋ ú nyɔɔ dɛɛzi, yaa nuu chɔɔ di lul biizi.” 33Awia, a hɔl hiŋ hamuŋa ni, ba gil u nyɔɔ siŋ dɛɛzi, u biinabɔma la zuu u nuu chɔɔ. Ka u mɛɛwaa zummɛ lugɔ u chɔɔ u be ka izi gba.

34Hɔɔŋ wa pizɛɛ, a biinabɔma hinla ŋɔ u niwee la be, “N ni yaa mɛɛ dɛɛ chɔɔwɔɔ. Awia, gil ya kaa gil u kaa dɛɛzi zinaa hamuŋa ge gba. Di u wa dɛɛzɔɔ, í ge zuu i nuu chɔɔ. Di a guŋ ɛɛwɔ la, yaa lula daŋ choŋŋi nɛnnɛ.” 35Too, a hamuŋa hiŋ ba kaa gil u nyɔɔ siŋ dɛɛzi, u niwee la ge zuu, u nuu chɔɔ. U ge gba n zuuwɛ u nuu chɔɔ la, uŋ wa izee di u mɛɛ waa zummɛ. 36Kenne a ɛɛ, ba mɛɛ hiŋ faa du ba maa banɛɛ hizi. 37Aŋ ɛɛ gunla, u biihambinabɔma la wa ŋɔ u lul, di lul biibaal, ba dau u sɔŋ Moab. Waabuu faa wa birgi Moab hɛri hina naabaal. 38U niwee hiŋ ge n wa lullɛ, u ge ɛɛ biibaal. U dau u sɔŋ Bɛn Ami. Waabuu faa wa birgi Ammɔn hɛri hina naabaal.

Currently Selected:

Luglaa 19: vag

Highlight

Copy