Luuk 17

Wichɔgaa wia

(Mat 18:6-7; 21—22; Maak 9:42)

1Yeesu ŋɔ u hiŋra be, “Gunla maa, ka wia daŋ ɔɔ du de di gil nɛra ra leu. Ka wiarɛ niŋ huuzi nɛr la maa n niŋ gil a du de la. 2Di ba faa kpa namzeŋ vɔɔ sag u baŋaa, di kpau ha muuzeŋ biini, u gunnɛ niŋ bɔ uŋ haa du de, di ra dar bichalli naa dɔŋa bá ra leu. 3Ií ra du iihinaa tau.

Di i dɔŋhiŋ waa ɛɛi wichɔgaa, ŋɔ u be ú gilɛɛ kaa ɛɛ guŋ. Di u biini chɔkkɔ dikuu a wia, gil tɛu.#Mat 18:15 4Di u ɛɛi wichɔgaa buniidaanɛɛ hɔpizikpaŋ biini, ka ba i be ge buniidaanɛɛ, di wa ŋɔ, ‘Gaafura, n ɛɛ wichɔgaarɛ,’ gil tɛŋ. Gil tɛu.”

Yarda wia

5Yeesu hiŋra la ŋɔ u be, “Hiini yaa ya wer yardii jaa.”

6Ba dɔɔri ŋɔ, “Di ii dɔɔ yarda, haali u mɛg mastad bii n du jigajiga gunla, ka ii daŋ wer ŋɔ daa naa be, dí ú wigzi la ga chɔɔzi u hiŋ muuzeŋ biini, ú sɛɛ i nua la kakpaŋ.

Balii huma wia

7Di ii bɛl maa dɔɔ u balii, u ra par u koo gɛɛ u ra binni u peeza ni, di u balii hiŋ wa lii pir ba, wàá ŋɔ u be dí u ba wa so diiribɔr ra di. 8Akai! U daŋ ŋɔ u be dí u ga daali u diwee tɛu. Di u wa daalɔɔ tuŋ, ú kirsi ba wa hiinuu a diwee diiribɔr, ú di tuŋ mɔɔ ka haa la ga nyiŋŋi u himmaa diwee di. 9Too. U dɔɔri daŋ jaamuu dikuu uŋ ɛɛ gunla uŋ ŋɔ ú ɛɛ la gɛɛ? Akai! 10Ii ge gba, di ii wa ɛɛ gunla maa Kɔraawiizi n ŋɔ ií ɛɛ la, ií ra ŋɔ, ‘Yaa ɛɛ baljagazii. Huma la un tɛɛ yaa ŋɔ ya ra hum la, a bɛnnɛ yaa hum la.’ ”

Bɔchɔgaa hina fi chaai wia

11Yeesu n na la Jɛrusalɛm la, u ga Samaria ni Galilii hɛssi baambaaŋ 12wa zuu bol bɛl. Bɔchɔgaa hina fi wa chem u ni ka chi bɔɔnɛɛ, 13di ŋɔ kpegzi ni, “Yaa Dɔɔri Yeesu, na yaa sinyɛna.”

14Uŋ wa na baa, u ŋɔ, “Ií la Kɔraawiizi kizeehina la be, di ga kpa iihinaa bagli baa, bá na gunla ii bɔrahɔna n duwɛɛ.” Ba ra la. Banna la la, ba wiila la tuŋ ba ni.

15Denii ba bɛl n wa nawɛɛ lugɔ u nyaagɔɔrɛ, u bir di ra la Yeesu be, di ra chɔli Kɔraawiizi kpegzi ni, 16di wa giŋŋi Yeesu see di kpa u siwee di pi u naazi see di ra jaamuu. A bɔchɔgaa hiŋ ge faa ɛɛ Samaria hinuurɛ.

17Yeesu pɛɛzuu, “Nɛra fi lɛi n chaa laa? Ka kabɛl la du lee? 18Amɔ, bɛl maa waa wette ú bir ba wa chɔli Kɔraawiizi, di hɔɔhri naa bɛŋ lɛiyaa?” 19Denii Yeesu ŋɔ u be, “Izi ra la. Hiŋ yardiŋ wiarɛ i nyaagi la.”

Kɔraawiizi Kora balaa wia

(Mat 24:23-28, 37-41)

20Farisizi ba Yeesu be wa pɛɛzuu saŋa la Kɔraawiizi Kora dii la n niŋ hel. U ŋɔ, “Ii siwee wàá na wiimaa ii wer zum lugɔ Kɔraawiizi Kora dii ra heluu. 21Ba wàá wer ŋɔ lugɔ Kɔraawiizi Kora la du bɔnnaabuu gɛɛ u du endenii. Akai! Kɔraawiizi tenna di u Koraa ii biine.”

22Yeesu kaa ŋɔ u hiŋra be, “Saŋa bɛl daŋ wa hel, ií ra nyiŋŋi werge maa lugɔ ii ni Mìŋ́ Newee Biibaal vii wer du de hɔpizikpaŋ bɛŋ gba, ka ii wàá na guŋ. 23Baŋhina daŋ ŋɔ ii be, ‘U du ende’ gɛɛ ‘U du bɔnnaabuu,’ ka ií gilɛɛ wa hiŋ baa ra la de. 24Di Mìŋ́ Newee Biibaal balaa wa hello, màá suah ba. N balaa daŋ ɛɛ lugɔ dooŋ n nyɛgzɛɛ, di chaani chinchiŋ maa la. 25Mɔɔ ka annii wa ɛɛ, n daŋ di tɔɔrɔɔ werge, filaŋkeŋ hina naa vɛɛŋ ha.

26Gunla baŋ faa ra ɛɛ Noowa saŋa la, gunnɛ bá ɛɛ saŋa la Mìŋ́ Newee Biibaal balaa hɔpizaa la.#Lug 7:23 27Noowa saŋa la, nɛra faa ra diu, di ra nyɔɔ siŋ, di ra paagi haana, di ra yuu janna guŋŋ wa hel hɔpizii la Noowa n zuu muugberzeŋ la ka dooŋ ba, nii wa su di di ba maa.

28Gunnɛ a faa kaa ɛɛ Lɔt gba saŋa la. Ba faa ra diu di ra nyɔɔ, di ra yauzi kuna di ra yoo kuna ge di ra duu di ra ma diini. 29A hɔl la Lɔt n lii Sɔdɔm biini la, niŋ ni jilbi lii chiŋ chol hɛri fuuh ba maa.#Lug 19:24

30Gunnɛ á ɛɛ hɔpizii la Mìŋ́ Newee Biibaal n niŋ kaa wa ba, bá naŋ la. 31Di a hɔpizii wa hello, di nɛbɛl du sal ka u kuna du dia biini, ú gilɛɛ kaa wàá tuu ŋɔ ú paagi u kuna la kaali. Di bɛl du koo, ú gilɛɛ kaa wa bir ra ba bol. 32Ií ra liizi gunla n ɛɛ Lɔt haaŋ la.#Lug 19:26 33Nɛr la maa n niŋ gil u miibɔɔ wia aah u siwii, wàá na u hiŋ. Ka nɛr la maa n niŋ gil u miibɔɔ wia ha, waabuu niŋ na u hiŋ. 34Ií gil n ŋɔ ii be. Baala banɛɛ daŋ chɔɔ bɔkpaŋ á hamuŋa ni, ń wa kpa bɛl ka ka bɛl ge. 35Haana banɛɛ daŋ du nam nyuu ra nam, ń wa kpa bɛl kaali ka ka bɛl. 36Baala banɛɛ daŋ du koo ra par, ń wa kpa bɛl kaali ka ka bɛl.”

37Ba pɛɛzuu, “Yaa Dɔɔri, lee?”

Yeesu ŋɔ, “Bɔr la kunsiwii n chɔɔwɛ, denii duuni ra chaali.”

Currently Selected:

Luuk 17: vag

Highlight

Copy