Luuk 18

Luhaaŋ ni seriya diiri sɛɛlii wia

1Yeesu kaa ta sɛɛlii bɛl tɛɛ u hiŋra lugɔ a wesso nɛra n ɔɔ ra suŋŋi wiizi, di gilɛɛ dɔɔ bɔhuaih ba suŋŋaa biini. 2U ŋɔ, “Seriya diiri bɛllɛ faa du bol bɛl. Waa Kɔraawiizi ra ɔm. Waa newee gba ra ɔm. 3Luhaaŋ bɛl ge du a bol di ɔɔ ra ba u be di waa suŋŋuu di ra ŋɔ, ‘Hiiniŋ di n dɔm wibii, ú turgi wichɔgaa la uŋ ɛɛŋ la kim.’

4U vɛɛ guŋ bukpila maa ka wa fɛ nfɛrɛ di ŋɔ u biini, ‘Maa Kɔraawiizi ra ɔm, maa newee gba ra ɔm. 5Ka luhaaŋ naa n ɔɔ ra tɔɔriŋ kennaa, n daŋ hiinuu. Di guŋ lɛi, u daŋ nyaŋ ba wa tɔɔriŋ.’ ”

6Yeesu ŋɔ, “Seriya diiri la faa dɔɔ wichɔgaarɛ werge, ka ii waa nuuwɛ gunla uŋ ŋɔwɛɛ? 7Amɔ, Kɔraawiizi ge wàá hiini banla un lizɛɛ tɛɛ u hiŋ, ba ɔɔ ra yir u sɔŋ saŋa maa, ú ra hiini baa laa? U daŋ sɛɛ laŋŋi baa harbɔɔa? Akai! 8Ií gil n ŋɔ ii be. U daŋ hiini baa manaŋ. Ama di Mìŋ́ Newee Biibaal wa ballɔ, n daŋ huuzi nɛra la n yardimbuu hɛri naabuu naa?”

Farisi ni lampolɛɛri sɛɛlii wia

9Yeesu kaa ta sɛɛlii bɛl, dikuubɛɛwiai, baŋhina faa du denii di ra yir bahinaa nɛnanaa, ka ra gbɛlli ba dɔŋahina. 10U ŋɔ, “Baala banɛɛbuu izee. Bɛl ɛɛ Farisii, bɛl ge ɛɛ lampolɛɛri. Ba maa zuu Kɔraawiizi Dia biini bá jaamuu. 11Denii Farisii la ŋɔ wia ra tɛɛ Kɔraawiizi u biini, ‘Kɔraawiizi, n na jaamiibuu, dikuubɛɛwiai, miŋwaa waa nɛchɔgii ɛɛwɛ lugɔ n dɔŋa newea. Baabuu ɔɔ ra foozi ba dɔŋahina kunaa di ra ɛɛ baa wichɔgaa di ra sɛm. Miŋwaa waa guŋ hiŋ ɛɛwɛ. Maa kaa ɛɛ lugɔ lampolɛɛri naa gba.#Sɛɛ 20:6 12Aŋ vɔɔ nuarɛ bunɛɛ yawa maa biini di lizi kuna bɔra fi bɔkpaŋ n kuna maa biini ra tɛɛ hìŋ́ Kɔraawiizi.’

13Lampolɛɛri la ge chi bɔɔnɛɛ. Waa sɛɛwɛ ú binni chiŋ gba ka willi u nyuu, di lɔ u bampirii dikuu biinichɔg wia, di ŋɔ, ‘N Dɔɔri Kɔraawiizi, wichɔgɛɛrii miŋ. Jaande, suŋ n ni ka gil n wichɔgaa tɛŋ.’ ”

14Yeesu ŋɔ, “Ií gil n ŋɔ ii be. Baala banɛɛ la n wa la ba diini, lampolɛɛri labuu Kɔraawiizi tɛɛ winanaa. Waa Farisi lawaa tɛɛwɛ winanaa, dikuubɛɛwiai, nɛr la maa n na tɔgzi u hiŋ, Kɔraawiizi daŋ kpau tama. Nɛr la maa ge n na kpa u hiŋ tama, Kɔraawiizi daŋ kpau zenni.”

Yeesu n kissi bichalli wia

(Mat 19:13-15; Maak 10:13-16)

15Denii baŋhina kpa ba biifulli gba ba Yeesu be ú kpa u nonee sagzi ba ni. U hiŋra n wa na guŋ, ba ŋɔ bá gilɛɛ ra tɔɔruu guŋ. 16Yeesu yir a bichalli, di ŋɔ ba be, “Ií gil a bichalli ba n be, di gilɛɛ duŋŋi baa. Nɛra la n du kennaa bichalli n duwɛɛ naa, baabuu dɛg Kɔraawiizi Kora biini dui. 17Ií gil n ŋɔ wibii maa tɛɛ ia. Nɛr la maa n wàá sɛɛ Kɔraawiizi Kora wia alugɔ bichala, wàá wer zuu biini maa.”

Dɔɔŋ bɛl wia

(Mat 19:16-30; Maak 10:17-31)

18Baal bɛl faa du de ɛɛ ba nabɔma bɛl. U pɛɛzi Yeesu, “N Nabɔnnanii, ɛrɛɛ ń ɛɛ di wer na miibɔɔ la n waa tunaa dɔɔwɛ lai?” 19Yeesu ŋɔ u be, “Ɛrɛɛ wiarɛ i yiriŋ nabɔnnaniiyɛi? Nɛr maa wàá wer ɛɛ nɛnanii ga tuŋ di Kɔraawiizi bɛŋ lɛi. 20I zum Kɔraawiizi Gbɔgni labuu. Gilɛɛ waa kpu nɛr, gilɛɛ waa sɛm, gilɛɛ waa ŋmɛɛ. Gilɛɛ waa kanni kara. A kpa i mɛɛ ni i maa girme.#Gbɔg 5:16-20 ” 21Baal la ŋɔ, “Annii naa maanii n hiŋ n bichalli maa di wa lii zinaa.”

22Yeesu n wa nuu guŋ, u ŋɔ u be, “Wii bɛllɛ kawɛɛ hiŋ wɔɔ ɛɛwɛ. La ga kpa kuna la maa hiŋ dɔɔwɛ yoo, di kpa a kebee la sunzi nyaara. I daŋ dɔɔ daama Kɔraawiizi be. Ka jaa ba waa hiŋiŋ.” 23Ka baal la n wa nuu guŋ, u biini chɔgi, dikuubɛɛwiai, u faa dɔɔ kunaa werge.

24Yeesu binnuu ka ŋɔ, “A daŋ du kpol dɔɔna be, ka bá wer zuu Kɔraawiizi Kora biini. 25Nyugma ni nɛɛza bɔɔ zuuirɛ duglɛɛ kaali dɔɔŋ ni Kɔraawiizi Kora biini zuui.” 26Banla n nuu guŋ jaa pɛɛzuu, “Amɔ, anɛɛ n niŋ wer na lɛɛi naanɛi?” 27Yeesu ŋɔ, “Wia la newea n ɛɛwɛ ra huhzi, ka Kɔraawiizi daŋ wer ɛɛa.”

28Pitta ŋɔ, “Yaawaa gil yaa kummaanii ka waa hiŋii.” 29Yeesu ŋɔ, “Nɛr la maa n kuu Kɔraawiizi Kora wia gil u bol gɛɛ u diahina gɛɛ u niuna gɛɛ u maawaa ni u mɛɛwaa gɛɛ u biizi, 30u daŋ bir na werge jaa filaŋkennaa, ka bir wa na miibɔɔ la n waa tunaa dɔɔwɛ la u miibɔɔ naa harbɔɔ.”

Yeesu n ŋɔ u siu wia buhorohiŋ

(Mat 20:17-19; Maak 10:32-34)

31Yeesu lizi u hiŋra fidibanɛɛ la, ba bɛŋ, di ŋɔ ba be, “Yaa ra la Jɛrusalɛmnɛ. Denii gunla maa Kɔraawiizi dɔgtɛɛzi n faa sɛbi Mìŋ́ Newee Biibaal wia la ga ɛɛ. 32Nɛra daŋ kpaŋ ga du banla n waa Jus hina ɛɛwɛ nonee biini, bá ɛɛŋ chɛɛtɛ di ɛɛŋ wikuna di puuzi nuuhaari du n ni, 33di lɔɔziŋ ka kpuŋ. Denii hɔpizaa ahoro hɔl ń izi siu biini.”

34Ka Yeesu hiŋra waa u wiŋɔzi la biini nuuwɛ. U suahwɔɔ ba be, ba zum u zɛɛ huhzi.

Nyuŋŋi bɛl n ɛɛ suŋŋi chaai wia

(Mat 20:29-34; Maak 10:46-52)

35Ba jaa ra dugli Jɛriko. Banna ba la di nyuŋŋii soge ŋmɛnikɛrii di ra suŋŋi kebee. 36Uŋ wa nuu nɛkpila la gbɔga banna bɛri u ni la, u pɛɛzi amaniye. 37Ba ŋɔ u be dí, “Yeesu Nazarɛf labuu a kaali de.” 38Nyuŋŋi la lɔ wile di ŋɔ, “Deevid Naana Yeesu, na n sinyɛna.” 39Banla n tɔ see la hau u ni lugɔ u siigi. Ka u vɛɛ ka haa ra yiruu kpegzi ni, “Deevid Naana, na n sinyɛna!” 40Yeesu chi di ŋɔ bá kpau ba u be. Ba kpau ba. Um ballɛ la, Yeesu pɛɛzuu, 41“Bɛɛ i ra nyiŋŋi ń ɛɛ tɛinɛi?” U ŋɔ, “N Dɔɔri, pilli n siwee tɛŋ.” 42Yeesu ŋɔ, “N gillɔɔ i siwee pilli. Hiŋ yardiŋ wiarɛ i siwee pilli la.” Kakpaŋ, u siwee pilli. U jaa hiŋ Yeesu, 43di chɔli Kɔraawiizi ra la. Nɛra la n wa na guŋ, ba ge maa ra chɔli Kɔraawiizi.

Currently Selected:

Luuk 18: vag

Highlight

Copy