Luuk 19

Yeesu ni Zakiɔs wia

1Yeesu ga Jɛriko di ra kaali. 2Baal bɛl ge faa du de. U sɔnnɛ faa Zakiɔs. Waabuu faa ɛɛ lampolɛɛra nabɔma bɛl, di dɔɔ daama werge. 3A Zakiɔs faa ra nyiŋŋi ú na Yeesu, ka uŋ ɛɛ nɛkpurii, nɛra ge kaa chaali werge wia, waa wette u nau. 4Awia, u chɔ la see di ga tinni daa bɛl, ú vii wer nau.

5Yeesu n wa hel daa la, u chi ka taŋŋi u nyuu di binni daa la nyuu ka ŋɔ, “Zakiɔs, ɛɛ manaŋ di wa tuu. N daŋ wa du i dia zinaa.” 6Zakiɔs ɛɛ manaŋ di tuu, di kpogli Yeesu di la u dia. U bɔra sɔɔnuu werge maa.

7Nɛra n wa na guŋ, a waa baa pattɛ, ba ra munni dɔŋa be, “Na! U zuu wichɔgɛɛri benii ú ga di.”

8Denii Zakiɔs izi chiŋ di ŋɔ Yeesu be, “N Dɔɔri, n daŋ bargi n kuna maa bɔra anɛɛ di kpa bɔkpaŋ di sunzi nyaara. Di n dar nɛr maa di lɛɛ u kebee, n daŋ bir tɛu a kebee di jaau guŋ bunaazu.”

9Yeesu ŋɔ u be, “Kɔraawiizi lɛɛi ba dia naa hina benii zinaa, dikuubɛɛwiai, i gba ɛɛ Abraham naana bɛllɛ. 10Mìŋ́ Newee Biibaal ballɔɔ ń wa nyiŋŋi banla n leuwe di lɛɛ baa.”#Ɛzɛk 34:11-16

Saliŋ kebisau sɛɛlii wia

(Mat 25:14-30)

11Nɛra du de di ra nuu u wiŋɔzi la. Awia, Yeesu kaa ta sɛɛlii bɛl, dikuubɛɛwiai, ba faa ra dugli Jɛrusalɛmnɛ, nɛra la ge faa ra fɛ lugɔ Kɔraawiizi Kora la dii daŋ hel kakpaŋ. 12U ŋɔ ba be, “Nɛzeŋ bɛllɛ izee di ra nyiŋŋi u la hɛri bɛl n du bɔɔnɛɛ ú ga lɛɛ kora bɛl wa di. 13U yir u balaa fi, di kpa kebee bɔɔtizi fi bɔnni baa, di ŋɔ, ‘Ií kpa kebee naa ra ɛɛ dɛmɛdɛmɛ mɔɔ ka ń na ba.’ 14A baal bol hina ge hauhbuu, di hum nɛra bá hiŋuu ga ŋɔ lugɔ ba waa nyiŋŋi a baal di kora ba ni.

15U laŋŋɔ ga lɛɛ kora la, ka ba di gil ba yir u balaa la uŋ faa kpa kebee tɛɛ la ú zum tɔna la baŋ nawɛɛ. 16Lugli balii la ba wa ŋɔ, ‘N dɔɔri, i faa tɛmbuu bɔɔtikpaŋ, n ge kpau walmi, di na fi jaa.’ 17U ŋɔ u be, ‘N balnanii, i hummɔɔ nɛnnɛ. I wia n dɔɔ wibii kuntama naa ni naa, n daŋ jaa gil i dɔɔ bola fi ra binni.’

18Nɛɛhiŋ ba wa ŋɔ, ‘N dɔɔri, i faa tɛmbuu bɔɔtikpaŋ, n ge kpau walmi di na bɔɔtizi anue jaa.’ 19U ŋɔ u be, ‘N daŋ gil i ge dɔɔ bola anue ra binni.’

20Bɛl kaa ba wa ŋɔ, ‘N dɔɔri, i bɔɔti labuu keŋ. N kpa yakɔzaa di fɔɔzuu dau, í ra ba, 21dikuubɛɛwiai, n faa ra ɔmiibuu. N zummɔ lugɔ i dɔɔ sikpegiire werge di ra kum bɔr la hiŋ waa duuwe.’ 22U dɔɔri ŋɔ, ‘Balchɔgii! I himmaa nua tɛibuu chɔgri. I zummɔ lugɔ n siwii kpekkoo, anna kum bɔr la miŋ waa duuwe. 23Di gunnɛ, ɛrɛɛ haa n kebee kpawɛɛ tɛɛ kebidaura, di n wa ballɔ, bá wer tɛŋ a kebee tɔna jaai?’

24U ŋɔ banla n chigɛ u be la be, ‘Ií lɛɛ bɔɔti la u be, di kpa tɛɛ bɔɔtizi fi hiŋ la.’

25Ba ŋɔ, ‘Yaa dɔɔri, waa fi dɔɔwɛa?’

26Yeesu ŋɔ, ‘Ií gil n ŋɔ ii be. Nɛr la n dɔɔwɛ, ba daŋ kaa tɛu jaa. Nɛr la n waa dɔɔwɛ ge, u kuntama la gba, ba daŋ lɛɛa u nonii biini. 27N dɔma lawaa, banla n faa waa nyiŋŋi ń di kora ba ni la, ií lauri baa ba, wa kpuuzi baa n see.’ ”

Yeesu n zuu Jɛrusalɛm girme ni wia

(Mat 21:1-11; Maak 11:1-11; Jɔɔn 12:12-19)

28Yeesu n wa ta sɛɛlii la tuŋ, u lɛɛ see ra la Jɛrusalɛm. 29Uŋ gaa dugli Bɛtfaji ni Bɛtani di wa hel Ɔlivizi Bizeŋ la, u hum u hiŋra banɛɛ 30di ŋɔ ba be, “Ií ga zuu boljiga naa n du see naa. Di ii wa zuuwɔ, ii daŋ na kaupɔl bɛl baŋ haa waa tinnɛɛ mɔɔ baŋ vɔɔu chiŋŋi de. Ií puruu wa tɛŋ. 31Di nɛr maa wa pɛɛzi ia dí ɛrɛɛ wiarɛ ii ra puruuwei, ii daŋ ŋɔ u be lugɔ ii Dɔɔrii ra nyiŋŋuu.”

32Denii banla uŋ hummɛ la zuu a bol, di ga na gunla maa uŋ ŋɔwɛɛ la. 33Ba ra pur kaupɔl la. Banna puruu la, a kaupɔl hina pɛɛzi baa dí ɛrɛɛ wiarɛ ba ra puruuwei? 34Ba ŋɔ, “Yaa Dɔɔrii ra nyiŋŋuu.”

35Ba kpau ba Yeesu be, di kpa ba wɛjɛzi bɔg a kaupɔl, ka kpa Yeesu soŋŋi u ni ba ra la. 36Banna la la, ba yaa ba wɛjɛzi pɛ ŋmɛnɛɛ, u ra vol a ni.#2Koo 9:13 37Banna tuu giŋgimii di ra dugli Jɛrusalɛm la, Yeesu hiŋra kpila la maa bɔra sɔɔni baa ba jaa ra chɔli Kɔraawiizi kpegzi ni di ra ŋɔ wizenaa la maa baŋ nawɛɛ la wia, 38di ra ŋɔ, “Koori naa n kpa Kɔraawiizi sɔŋ ra ba naa, u nuu sumaa! Bampirsɔna ni girme du banla maa n du Kɔraawiizi be labuu.”#Yira 118:26

39Farisizi baŋhina du a nɛra biini di wa ŋɔ Yeesu be, “Yaa Nabɔma, ŋɔ ii hiŋra be bá siigi.”

40Yeesu ŋɔ, “Ií gil n ŋɔ ii be. Di ba faa siigɔɔ, ka bia naa daŋ faa ra pogzi.”

Yeesu n wiiwe Jɛrusalɛm wia

41Baŋ jaa wa hel bolzeŋ la, Yeesu kuu a bol hina wia ra wii, 42di ra ŋɔ, “Di ii vii zummɔ zinaa gba gunla iin niŋ ɛɛ di wer na bampirsɔna, ii daŋ vii ɛɛ guŋ, ka ii siwee tɔɔgɔɔrɛ. 43Hɔpizii bɛl ra bau bol naa hina dɔma n niŋ wa ma teli a bol koŋlii ni di baruu tɔ baa bá lii huhzi, 44ka chɔgi diini ni bol hina maa. Bii maa wàá ka hɔŋ u dɔŋ ni. Annii maa daŋ ɛɛ dikuu Kɔraawiizi n ba ii be ú wa hiini ia ka ii zumuu huhzi wia.”

Yeesu n la Kɔraawiizi Dia wia

(Mat 21:12-17; Maak 11:15-19; Jɔɔn 2:13-22)

45Denii Yeesu zuu Kɔraawiizi Dia ra duŋŋi kunyoora,#Mat 21:12-16 46ka ŋɔ ba be, “Ba sɛbɔɔrɛ, ‘Ba daŋ yir n Dia wiijaami Dia.’#Aiza 56:7 Ka iawaa kpau birgi kuŋfooza sognibɔr.”

47Yeesu du Kɔraawiizi Dia la hɔpizibii maa di ra bagli nɛra. Kɔraawiizi Kizeehina Nabɔnzi, Kɔraawiizi Hɔnzunna ani a bol nabɔnzi ra ɛɛ ania bá zum gunla ban niŋ ɛɛ wer kpuu. 48Ka ba waa zum gunla maa ban niŋ ɛɛ, dikuu u wiŋɔzi la n zuu nɛra la suma werge maa wia.

Currently Selected:

Luuk 19: vag

Highlight

Copy