Yoannes 18

18 Ik.

1Yesu tap okai itak ye okere chiki, koro koikara utara tura no samaketa toi an Kedron ani aye nai kush, awa, Shinuma koikara utara tura nei toi otta ahun nisa ruwe ne. 2Orowa, Yesu ekoshi Youdas ne yakka nei ushike eraman: Yesu kanna-kanna koro koikara utara tura no nei ushike orun arapa nisa ruwe ne gusu ne na. 3Awa, Youdas anak ne Kamui kora kenru esapane utara newa Parisee un utara orowa no tumikoro utara shine ikiri hemhem, uitek utara hemhem koro wa, ratchako hene, shune-ni hene, eshipopkep hene ani wa nei ushike orota ek nisa ruwe ne. 4Tambe gusu, Yesu anak ne yai otta hetuku kusu ne obitta no okaibe eraman hine nei utara otta oman wa orota ene itak-hi :— Inan guru echi hunara ya? ari itak. 5Orota, Nazaret kotan un Yesu, sekoro nei utara ese wa itak. Kuani ne, ani nei utara otta Yesu ye nisa ruwe ne. Orowa, Shinuma ekoshi Youdas ne yakka nei okai utara tura no ash wa an ruwe ne. 6Tambe gusu, nei utara otta, Kuani ne, ani Yesu itak chiki, nei utara koroka paye wa shiri kata hachiri nisa ruwe ne. 7Tambe gusu, shui, nei utara otta, — Inan guru echi hunara ya? ari Shinuma nu. Orota, Nazaret kotan un Yesu ne, sekoro nei utara ye nisa ruwe ne.

8Yesu ene ese-hi :— Kuani ne, ari echi nure ash: awa, tambe gusu, echi utara En hunara yakun, tan okai utara oyakta payere yan, ari itak: 9tambe anak ne, — Aokai En kore utara tumuge un shinen ka Ku turainu shomoki, sekorʼan itak auweomare kuni gusu an ap ne ruwe ne. 10Orowa, Simon Petros anak ne emush koro wa an gusu etaye wa Kamui kora kenru esapane guru koro usshiune guru tauge wa shimon kisaraha meshpa nisa ruwe ne na. Nei usshiune guru kon reihei anak ne Marukos ne ruwe ne. 11Tambe gusu, Petros otta Yesu ene itak-hi :— E koro emush shirika oro omare yan: En otta Ku Michi kore itangi shomo Ku iku kusu ne ya? ari itak.

12Orowa, nei tumi-koro utara ikiri hemhem, esapane guru hemhem, auitek utara hemhem anak ne Yesu tupetupe wa, 13hoshiki no Annas otta tura wa paye; Annas anak ne nei paha ta Kamui kora kenru iyotta esapane guru Kaiapa koro Michi ne ruwe ne gusu ne na. 14Orosama, nei Kaiapa anak ne utara shirihine shine ainu rai kusu ne kunip ne an orushpe ani Yudea un utara otta esanniyo wa ye a guru ne ruwe ne.

15Orowa, Simon Petros newa moshima an shine koikara guru Yesu osh paye nisa ruwe ne. Nei koikara guru anak ne Kamui kora kenru iyotta esapane guru otta aeamkiri wa an, awa, Yesu tura no nei Kamui kora kenru esapane guru koro tumbu otta ahun: 16koroka, Petros anak ne soita apa samaketa ash kane an. Tambe gusu, nei esapane guru otta aeamkiri wa an moshima an koikara guru anak ne soine wa apa epungine matkachi otta ye wa Petros ahunge nisa ruwe ne. 17Tambe gusu, apa epungine matkachi anak ne Petros otta ene itak-hi :— Eani ne yakka tan guru koro koikara guru e ne ruwe ne, ari ye. 18Shomo, sekoro, shinuma itak. Aige, ausshiunere utara newa uitek utara anak ne paspas ani abe are wa nei ushiketa roshki wa okai nisa ruwe ne; me an ruwe ne gusu abe kuru korʼan ruwe ne: orowa, Petros ne yakka nei utara tura no ash wa abe kuru wa an shiri ki.

19Orowa, Kamui kora kenru iyotta esapane guru anak ne Yesu koro koikara utara gusu hemhem, koro epakashi gusu hemhem Shinuma otta inu nisa ruwe ne. 20Orota Yesu ene ese-hi :— Anu no moshirʼotta Ku ye; otta obitta no okai Yudea un utara uwekarapa Uwekarapa chisei ta hemhem, Kamui kora kenru ta hemhem Ku epakashnu nisa ruwe ne: arorokishne no nep ne yakka Ku ye shomoki ruwe ne na. 21Hemanda gusu En otta E nu ya? Orota Ku ye utara otta Ku ye orushpe nu yan; ingarʼan, nei utara anak ne Ku ye itak eraman ruwe ne, ari itak. 22Orowa, Shinuma tan okaibe ye okere chiki; samaketa ash wa an shine uitek guru anak ne kuwa ani Yesu shirikik hine ene itak-hi :— Nei no Eani Kamui kora kenru iyotta esapane guru ko-ese ya? 23Orota Yesu ene ese-hi :— Wenbe Ku ye a chiki, nei wenbe gusu paweteshu ki wa en kore yan; koroka, pirikap nei yakun, hemanda gusu, eani En shirikik ya? ari itak. 24Tambe gusu, atupetupe wa an wa Annas anak ne Kamui kora kenru iyotta esapane guru Kaiapa otta Shinuma omande nisa ruwe ne na.

25Orowa, Simon Petros anak ne ash wa abe kuru korʼan ruwe ne. Tambe gusu, — Eani ne yakka Shinuma koro koikara guru shomo e ne ruwe he an? otta utara itak. Shinuma eshikashke wa, Kuani anak shomo, sekoro itak. 26Kamui kora kenru iyotta esapane guru koro usshiune guru shinen anak ne, koro kisara Petros meshpa guru iriwak ne wa, — Eani nei toi otta e an shiri ku nukara shomoki ya? ari itak. 27Tambe gusu, Petros shui eshikashke: orowa, nani niwatori chikap hau kon nisa ruwe ne na.

28Tambe gusu, utara anak ne Kaiapa orowa no Yesu tura wa ipishi tumbu otta ahunge: awa, aro-kunnei-wano ne; orowa, nei utara anak ne iteki yaituru-ushte, koroka, Kamakush marapto ibe kuni gusu, yaikota ipishi tumbu otta ahup shomoki nisa ruwe ne. 29Tambe gusu, Pirato anak ne soine wa nei utara otta ene itakhi :— Tan guru gusu nekon a eiyonnuppa ambe ani echi ki ya? ari itak. 30Nei utara ese wa orota ene itak-hi :— Tan guru wen-buri koro guru shomo ne chiki, e otta Shinuma ekoshi ash shomoki kusu ne, sekoro itak. 31Tambe gusu, Pirato anak ne nei utara otta ene itak-hi :— Echi utara yaikota tan guru uk wa echi koro tuitak nei no koipishi yan, ari itak. Orota nei Yudea un utara ene itak-hi :— Inan guru ne yakka chi utara raige ash kuni ambe anak ne ikashpaotte oterekep ne, ari itak: 32tambe anak, nekon a rai ambe ani Shinuma ekot ya sekoro Yesu ye wa epeka no an itak auweomare kuni gusu an orushpe ne ruwe ne.

33Tambe gusu, Pirato anak ne shui nei ipishi tumbu otta ahun wa Yesu hotuyekara, orowa, otta ene itakhi :— Eani anak ne Yudea un utara shikkashima guru E ne ruwe he an? ari itak. 34Yesu ene ese-hi :— Eani yaikota tap ambe e ye ya? moshima utara En gusu tambe e nure ya? sekoro itak. 35Pirato ene ese-hi :— Kuani anak ne Yudea un guru Ku ne ya? E koro heru utara hemhem, Kamui kora kenru esapane utara hemhem en otta E ekoshi nisa ruwe ne: Nekon a ambe E ki ruwe he an? ari itak. 36Yesu ene ese-hi :— Ku goro moshiri anak ne tan moshirʼumbe shomo ne: Ku goro moshiri anak ne tan moshirʼumbe ne yak anak iteki Yudea un utara a en ekoshi kani ne Ku uitek utara tumi-koro korʼan kusu ne na: koroka, tane Ku goro moshiri anak te orowa no shomo ne ruwe ne, ari itak. 37Tambe gusu, orota Pirato ene itak-hi :— Yakun, Eani anak ne Moshiri shikkashima guru E ne ruwe he an? Yesu ene ese-hi :— Moshiri shikkashima guru Ku ne ani e ye ruwe ne. Tambe gusu A en shikore ruwe ne, tambe gusu moshirʼotta Ku ek ruwe ne, sonep gusu paweteshu Ku ki kuni gusu ne na. Nen ne yakka sonep orowa no an guru auak ne Ku hawe nu ruwe ne, ari itak. 38Orota, sonep anak ne nekon a ambe ne ya? ari Pirato ye nisa ruwe ne.

Pirato tap okaibe ye okere chiki, shui soine wa Yudea un utara otta ene itak-hi :— Nei guru otta chikokatpak ku nukara shomoki ruwe ne. 39Koroka, Kamakush marapto ta echi gusu shine ainu Ku honnere buri echi otta an ruwe ne: Yudea un utara Shikkashima guru ku honnere kuni echi kon rusui ya? ari itak. 40Tambe gusu, shui nei utara hawe ashte wa ene itak-hi :— Tan guru shomo, koroka Barabbas un kore, ari itak. Barabbas anak ne niwen no iki ikka guru ne ruwe ne.

Currently Selected:

Yoannes 18: AINU

Highlight

Copy