Roukos 15
15
15 Ik.
1Orowa, obitta no okai Yaku-etaye utara hemhem, chikokatpak utara hemhem Shinuma nu gusu karange no araki korʼan ruwe ne. 2Awa, Parisee un utara newa kambi-nuye utara newa oromam wa ene itak-hi :— Tan guru anak ne chikokatpak utara tura wa ukoiram no ibe ruwe ne, sekoro itak.
3Orowa, Shinuma nei utara otta tan itak-maukushte-itak ye wa ene itak-hi :— 4Echi utara tumugeta inan guru ka ashikne hotne hitsuji chikoikip koro wa nei okai shinep turainu chiki, shinepesan ikashima wan e ashikne hotne chikoikip kimta ande wa oman hine pa pakno nei aturainup hunara shomoki ya? 5Orowa, apa chiki yaikopuntek wa yaikota koro tapsutu kata ani ruwe ne. 6Orowa, uni un ek koro, nimaraha newa aun utara uwekarire wa orota ene itak-hi :— En tura no yaikopuntek wa en kore, aturainu ku hitsuji chikoikip apa nisa ruwe ne gusu ne na, sekoro itak. 7Echi otta Ku ye, tap korachi yaikokatpak kuni shomoki shinepesan ikashima wan e ashikne hotne oupeka utara gusu kasu no, shine chikokatpak guru yaikokatpak gusu an nupetne ambe anak ne kando oshiketa naa an ruwe ne na.
8Shui, inan shiwentep anak ne drakma wanbe koro wa nei shinep turainu chiki, ratchako uhuika wa so nunuye hine pa pakno irammakaka hunara shomoki ya? 9Orowa, nei ambe pa yakun, koro nimaraha newa aun utara uwekarire wa :— Ku turainu drakma apa gusu en tura no yaikopuntek wa en kore, sekoro itak. 10Tap korachi echi otta Ku ye, chikokatpak an shine guru yaikokatpak chiki Kamui uitekbe kotchaketa nupetne ambe an ruwe ne na.
11Orowa, Shinuma ene itak-hi :— Tu po koro shine ainu an: poniune guru anak ne michi orun ene itakhi :— 12Michi, ku uk kuni ruokakep usaraye wa en kore, ani itak. 13Orowa, korope usaraye wa po utara otta koropare nisa ruwe ne. Pon no shiran koro poniune guru anak ne korobe obitta uwekarire hine tuima moshiri orun oman, aige, nei ita hoiyo wa korope obitta ehochari nisa rawe ne. 14Orowa, obitta eiwange okere chiki nei moshiri ta poro keman hetuku ruwe ne, awa, nei guru gusu eishiramnep an ruwe ne. 15Orowa, shinuma oman wa nei moshiri un shine ainu otta aeyai yatoinere, aige, buta reshpa kuni gusu ekira un aomande nisa ruwe ne. 16Awa, buta e push e wa yaikironnure rusui wa an, orowa, nep ka koropare guru isam ruwe ne. 17Koroka, shinuma yainukara wa ene itak-hi :— Ku goro michi hempak niu ne uitek utara koro wa nei utara kironnu pakno aep koro wa ikashima wa an, awa, kuani teda ku an wa rai etokooiki na! 18Kuani ku hopuni wa ku michi orun ku arapa, aine, ene itak ku ki-hi :— Ku michi, kuani anak ne Kamui epeka no hemhem, e tek samata hemhem, 19katpak ku ki, awa, e poho ari aye kuni ku upak shomo ne: e uitek guru nei no en kara wa en kore, ani ku itak kusu ne na. 20Orowa, shinuma hopuni wa koro michi orun ek nisa ruwe ne. Korota, naa ehangeko no an ita, koro michi anak ne shinuma nukara, aige, erampoken kashpa hine hoyupu wa rekuchi ruiruye wa chopchopse-kara ruwe ne. 21Orowa, poho anak ne shinuma orun ene itak-hi :— Michi, kuani Kamui epeka no hemhem, e tek samata hemhem katpak ku ki: tane e poho ari aye kuni ku upak shomo ne ruwe ne. 22Koroka, michi anak ne usshiune utara orun ene itak-hi :— Tunashi no iyotta pirika amip koro wa ek wa shinuma mire; tek-un-gani teke otta unu, orowa, kema otta keire ushte yan: 23samata, mimush pon beko nimba wa ek wa raige, 24orowa, chi ibe ash wa nuchattek anro: inambe gusu ne yakun, tan ku po anak ne rai wa isam, awa, kanna shiknu wa an: aturainu wa an, awa, kanna apa nisa ruwe ne gusu ne na. Orowa, nei utara yainuchattek heashi ruwe ne. 25Aige, kiyanne guru anak ne toi otta an: awa, shinuma unihi ehange no ek chiki, tunun hawe newa tapkara hura nu nisa ruwe ne. 26Aine, shine usshiune guru hotuyekara wa tap okaibe anak nekon a ambe ne ya? sekoro uwepekennu nisa ruwe ne. 27Orota nei guru ene itak-hi :— E akihi ek an ruwe ne: tashum shomoki no tumashnu wa ek gusu e koro michi mimush ponbeko raigere nisa ruwe ne na, ari itak. 28Koroka, shinuma irushka wa chisei orun ahun shomoki: orowa, koro michi soine wa shinuma ahun kuni onishnishi. 29Koroka, shinuma ese wa koro michi orun ene itak-hi :— Ingarʼan, kuani tan inne pa uturu e otta ku yaishieiwangere nisa, awa, tane pakno e ye ikashpaotte ku otereke ka shomoki; yakka, kuani ku ikatairotke utara tura nuchattek kuni gusu pon yange ne yakka e en kore ka shomoki, 30awa, ochakot utara gusu e korobe etaraka isamka tan e koro poho ek chiki, shinuma gusu mimush pon beko e raige nisa ruwe ne. 31Orota shinuma ene itak-hi :— Ku poho, eani anak ne ramma en tura no an, orowa, nep ku korobe ne yakka obitta e korobe ne ruwe ne. 32E akihi anak rai wa kanna shiknu, aturainu wa kanna-shui apa nisa ruwe ne, tambe gusu, nuchattek hemhem ki, yaikopuntek hemhem ki ambe anak ne, aki kunip ne ruwe tapan na.
Currently Selected:
Roukos 15: AINU
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1897, 2018
