GENESIS 16
16
Hagar leh Ismael
1Abram nupi Sarai nih fa rerêng a ring piak lo; sikhawmsele, Aigupta mi to-awnu a min Hagar a nei. 2Churawhchun, a nupi nih Abram sinah, “LALPA nih fa a ka neitir lo. Zei rangah ka to-awnu rêng na ihpi lo? Keimah ruangrûl ah fa a ka neih piak lai dahmawh,” a ti. Sarai thusim chu Abram nih rem a ti. 3Churawhchun, a nupisûn rangah Hagar chu a umpi rawh. (Hi hi Abram Kanaan ram ah kum râ a um nûnah mi asi.) 4Abram nih Hagar chu a ihpi le, a râi rawh. A râi ti â theih rawh chun, â sawr le, Sarai rangah a zauhnawmh rawh.
5Churawhchun, Sarai nih Abram sinah, “Hagar nih hawng ka zauhnawmh mi hi nangmah diklo asi. Keimah nih na sinah kan pêk le, chu thawk chun râi hen â theih le a ka zauhnawmh rawh. Nangmah ma na dik dauh keimah, kanna karah Pathian nih lâirêl seh!” a ti.
6Abram nih a sâng le, “Asi ma chu, nangmah thu thu hen a um mi na to-aw asi; na duhzia zawng hen a lakah ti rawh,” a ti. Churawhchun, Hagar chu Sarai nih a nehsawh thlo ruangah a tek rawh.
7LALPA vânmifial nih Hagar chu ramkaro mi lampi Sur leikângah a kal mi tinung va ah a tawng le, 8a sinah, “Hagar, Sarai to-awnu, a zei thawk hen me na hawng, zeiah na kal awt?” a ti.
Anih nih a sâng le, “Ka hotunu thawk hen ka tek mi asi,” a ti. 9Vânmifial nih chun, “Kîr le, a to-awnu va si nawlh ko, 10thlâk tam tak âukhawm rêl châwklo rê hen ka nan pêk lai. 11Fapa na nei lai le, a min ah Ismael#16.11 ISMAEL: Hebrai ah hi min umzia chu ‘Pathian nih a theih,’ tinâk asi. na sak lai, na ngaihsia ruangah na ṭap mi hâu LALPA nih a theih ruangah. 12Sikhawmsele, na fa chu ram Sanatung hâwi hen a um lai le; mikip dotu asi lai, chun, anih khawm mikip nih an do lai. A unau tla lakah mi a dangtê hen a um lai,” a ti.
13Hagar nih a thinlung hen, “Pathian tatak muh hen thusim ding ma asi le?” a ti. Churawhchun, a sinah thusimtu LALPA chu, “Muhtu Pathian asi,” a ti. 14Churuangah asi mi nih, Kades leh Bered karah mi tikhurchawh chu, “Beer-lahai-roi” (Hawng ka Muhtu a Nung Mi Tikhurchawh) an ti mi chu.
15Hagar nih Abram rangah fapa a ring piak le, a min ah Ismael a sak. 16Chu liauah chun Abram chu kum sâwmriat leh kum ruk asi rawh.
Currently Selected:
GENESIS 16: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
