GENESIS 18
18
Abraham sinah Fapa Tiamhnâk
1Lalpa chu Abraham sinah Mamre ah mi thing thenhlimh ah â va langh. Abraham chu a puanin kawtkâ ah sûn nî linh liau chirah a to le, 2â hawi le, chunah chun minung pathum an dîr mi a muh. A muh na kâ hen an sinah a va tek nawh sawm na le; a mêl tual tawngh khet hen a kûn. 3“Pu le tla, zângfahtê hen a dîn lo hen ka in hi lanh lah râm u; hinah nanmah bulsân ding hen ka um ko. 4Nan kê ṭâwlnâk ding hen tî ka va lâk duak lai rih; hi thing tangah a dîn rih râu u. 5Buh khawm tâwm ka nan put piak na lai, nan lam kal lakah tha an neihtir na ding hen; nannih nih ka in pal hen nan ka sunhsak ruangah, kei khawm nih ka nan zulh na bâk mi asi,” a ti.
“Kanna lâwm, kan lungsi” ti hen an leh.
6Abraham chu mawhsareh hen puanin sungah Sari sinah a va kal le, “Khulrang tak hen na sangvut a ṭha chem mi fûn lâk le, tâwm hen em rawh,” a ti. 7Churawhchun, a ran rual leiah a tek phêt le, alâ tê, a no nek hen a bit tel mi a va tleih le, a to-aw â râlring zet mi sinah a pêk. 8Chawpê nûk khal, chaw nûk hâng, a sa leh buh chu chu minung tla mâika ah chun a hunh piak na. Chun, thing tangah amah ngelchel nih an nâwl a zulh na le, an ei rawh.
9Churawhchun, Abraham sinah, “Na nupi Sari zeiah a um?” ti hen an deih.
“Puanin sungah a um ko” ti hen a sâng.
10An lakah mi pakhat nih, “Tu thawk hen a thla kuanâk ah ka hawng kîr nawlh lai le, na nupi Sari nih fapa a nei lai,” a ti.
Sari chu a dunglei ah puanin kawtkâ ah a ngâi nâ le, a um ko. 11Abraham leh Sari chu an tar thlo rawh, Sari chu nunau râitâ khawm a nei lo rawh. 12Sari chu a nih bû hen, “Tu chun ka tar hen ka chelh lo thlo rawh mi, nu leh pa theihnâk lakah ka nuam kho lai ma le; chu lo khawm ah ka pasal tâ nih a tar tuktarâi fâwn rawh,” a ti.
13Churawhchun, LALPA nih Abraham sinah, “Zei rangah Sari nih, ‘Ka tar thlo rawh mi zeitin fa ka nei kho lai a ti le, a nihsuak êu? 14LALPA rangah thil a har mi a um mazei? Ka sim hâwitê hen tu thawk hen a thla kuanâk ah ka hawng kîr nawlh lai le, Sari nih fapa a nei lai,” a ti.
15Sari chu a ṭih ruangah â pheh thlo. “Ka ni lo a,” a ti.
“Na ni kha ta a,” ti hen a sâng.
Sodom Rangah Abraham nih
A Ngiar Piaknâk
16Chu minung tla chu Sodom khua chuanh khonâk ding mun leiah an kal rawh. Abraham khawm lampi simhtu rang ding ah an sinah a kal bâk. 17LALPA nih, a thinlung hen, “Ka thilti ding mi hi Abraham sinah ka pheh awtlo. 18A thlâk tla chu an hawng rokual hen phun chak tak an hawng si lai le, amah ruangah phun zawzawng tla chu mal ka sâwm na lai. 19A fa tla leh a thlâk tla nih ka sinah ê-aw ngâi ding leh diknâk leh repnâk chu zûl ding hen thu a pêk kho na ding hen ka thîm mi asi. An ti mi asi chun, a rangah thil zeizawng ka tiamh mi chu ka ti lai,” a ti.
20LALPA nih Abraham sinah, “Sodom leh Gomorah thu ah phiarnâk hi ṭihnung a kâi thlo le, an sual zia khawm thungâi a fâk. 21Ka va ṭum lai le, hi phiarnâk tla ka theih mi chu a dik leh diklo ka zauh awt,” a ti.
22Churawhchun, minung panih nih an kaltâk le, Sodom khua lei an fûk, sikhawmsele, LALPA lam chu Abraham sinah a um ko. 23Abraham nih LALPA a fûk le, a deih, “Sual nei lo tla chu misual tla lakah na veih sih awt mazei? 24Chu khuapi ah chun sual nei lo mi sâwmnga um na sele khua pumpi na veih lai ma? Chu sâwmnga chu him ding hen na zuah awtlo ma? 25Sual nei lo mi chu sual nei mi hen bang cho hen na thah rîlmâl lai lo. Chu chu ti kho asi lo! Na thah duh rerêng lai lo. Na hei ti bâk chun, sual nei lo mi chu sual nei mi tla hen munkhat hen rêp an si awt, chu hâwi chu ti kho asi lo. Tual tlûn zawzawngah lâirêltu nih rep tak hen ti ding asi ruangah,” a ti.
26LALPA nih, “Sodom khua ah sual nei lo mi sâwmnga ka tawng chun, anmah ruangah khuapi chu ka zuah lai,” ti hen a sâng.
27Abraham nih, “LALPA, râlṭha tak hen na sinah thu ka sim vima mi hi zângfahtê hen a ngaihzia hawng ka thiam piak, kei chu minung salam kasi le, zeikhawm sim khonâk ka nei lo. 28Minung sâwmnga rak silo khawmsele, sâwmli panga tal an va um ko dahmawh. Chu hâwi hen panga hen hawng a zûk khawmsele, an tâwm tuk ti hen khuapi chu na veih awt mazei?” a ti.
LALPA nih, “Sual nei lo mi sâwmli panga ding ka tawng chun khuapi chu ka veih awt loh,” ti hen a sâng.
29Abraham nih, “Sâwmli ding cho khawm an va um ko dahmawh” a ti.
Chunah “Sâwmli ding an um khawm ah ka veih lai loh” ti hen a leh.
30Abraham nih, “LALPA, na thinrun lah le, ka sim nawlh râu lai. Mi sâwmthum ding cho lebang um sele te ne?” a ti.
“Sâwmthum cho khawm si sele ka râwk lai lo” a ti.
31Abraham nih LALPA sinah, “Râlṭha tak hen na sinah thu ka sim vima mi hi zângfahtê hen a ngaihzia hawng ka thiam piak le, kul ding cho va si tâ sele te ne?” a ti.
“Kul ding tawng khawmsele khuapi chu ka veih lai loh,” a ti.
32Abraham nih a sinah, “LALPA, na thinrun lah le, veikhat ka sim nawlh lai rih. Para cho tawng si sele te ne?” a ti.
“Para khawm an um asi chun khuapi chu ka veih lai loh,” a ti.
33Abraham sinah thu a sim thluh nûnah LALPA chu a kal rawh le, Abraham khawm in leiah a kîr rawh.
Currently Selected:
GENESIS 18: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
