GENESIS 39
39
Josef leh Potiphar Nupi
1Ismael murui nih Josef chu Aigupta ah an kalpi le, lal tangah mi hotu pakhat, lal umnâk mun vêngtu tla lakah hotu Potiphar sinah an zuar. 2LALPA chu Josef sinah a um le, a sul-le-lam tluang tak hen a siam. A hotupa Aigupta ram mi in ah a um le, 3Josef sinah LALPA a um hen thilti zawzawngah dingchangnâk a pêk mi a muh. 4Potiphar nih thungâi a lawmh le, amah nâwl zulhtu bîk ah a siam; churuangah a insungkhur ah a neih zawzawngah hotu ah a siam. 5Chu thawk hen chun Josef ruangah LALPA nih Aigupta mi dâwngsung leh a thilneih zawzawng, phâisen mi leh in lei mi khawm mal a sâwm piak. 6Potiphar nih thil zeizawng chu Josef zauhkhenh ding hen thu a neitir hep le, a buh ei ding cho lo chu amah nih zeikhawm thu a nei lo.
Josef chu a dingdawng a ṭha hen a mêl khawm a ṭha. 7A nehnûntê chun, a hotupa nupi nih Josef chu a mêldî le, munkhat it ding hen a sâwm. 8Anih nih a êl le a sinah, “Zauhnik, ka pu nih a in sung khur mi a neih zeizawng zeikhawm theihnâk a nei loh, keimah a hawng ka rinh ver ruangah. A neih zawzawngah hotu ah hawng ka siam rawh. 9Amah hen bang cho hen hi in ah hin thuneitu ah hawng ka siam, nangmah cho lo chu ka kut ah ap lo mi zeikhawm a um lo, zeitin kha bang hâwi thil diklo ti hen Pathian tlûnah thilsual ka ti kho lai?” a ti. 10Nisiar hen Josef rangah a sâwm khawmsele, a ihpi duh rerêng lo.
11Nikhat chu Josef chu in sungah rianṭuan ding hen a va lût le, in ah chun to-aw âukhawm an um lo. 12A hotunu nih a puan aih lakah a tleih le, “Ka sinah hawng it,” a ti. Sikhawmsele, a tleih mi puan chu a siah thlap le, lênglei ah a tek ving. 13A puan a mâk thlap le, a tek ving mi a muh rawh chun, 14lênglei ah a va suak le, a in ah mi to-aw tla chu a kawh na le, an sinah, “Zauhnik u hi! Hi Hebrai mi ka pasal nih kan in ah a hawng put mi nih hawng kan siarlo zia hi, in kardang sungah a hawng lût le, tleihrêm ding hawng ka awt, a fâk kho rirî hen ka âu le; 15ka âu hâu ah ka kiangah a puan a mâk thlap le, lênglei ah a suak ving,” a ti.
16A hotunu nih a pasal in leiah a hawng lânlo chu puan chu a kil ko. 17Churawhchun, chu thu chu a pasal a simh: “Hebrai sal hinah na siah mi kha in kardang sungah a hawng lût le, nehsawh ding hawng ka awt. 18Ka hawng âu chiam rawh chun a tek le, lênglei ah a suak le a puan a mâk thlap,” a ti.
19Josef hotupa chu thungâi a thinthawk le, 20Josef chu a tleih le, lal tla tângnâk rêngin ah a khumh le, chunah chun a um rawh. 21LALPA chu Josef sinah a um le, mal a sâwm; churawhchun rêngtlâk vêngtu nih a lawmh thlo. 22Josef chu rêngtlâk zawzawng hotu ah a siam le, rêngin ah thilti ding mi lakah hotu ah a siam. 23LALPA chu Josef sinah a um le, thil a ti mi zawzawng lakah dingchangnâk a pêk ruang chun rêngtlâk vêngtu khawm nih Josef rangah a rinh hep.
Currently Selected:
GENESIS 39: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
