GENESIS 43
43
Josef Unau tla Benjamin hen
Aigupta leiah An Kîr Nawlhnâk
1Kanaan ram pâmnâk chu a zual dadauh le, 2Jakob dâwngsung tla khawm nih Aigupta ram ah an va châwk mi fâng khawm an ei dih rawh. Jakob nih a fapa tla sinah, “Kal ule, fâng tâwm tal va châwk nawlh u,” a ti.
3Juda nih a sinah, “Hawng kan chektu nih fâk tak hen kan naupa Benjamin kan sinah kan put lo chun, a mâika ah va a langh kho kan si awtlo zia a sim. 4Hi kan nau hi kan sinah kal ding na siang asi chun kan kal lai le, fâng chu kan va châwk lai. 5Na siang lo asi lam chun kan kal awtlo, a san chu kan naupa kan sinah kan put lo chun a sinah kan va a langh kho awtlo ruangah,” a ti.
6Jakob nih, “Keimah lawksawngnâk ding hen nau dang nan nei mi zei rangah nan va simh êu?” a ti.
7Annih nih an sâng le, “Chu minung nih kan dâwngsungkhur thâwngthâng hawng kan deih le, ‘Nan pa a dam rih ma? Unau dang nan nei rih ma?’ ti hen hawng kan deih mi hi sâng lo kho asi lo, kan nau kan sinah kalpi ding a suak lai ti kan theih bâk mazei?” an ti.
8Juda nih a pa sinah, “Na fa lam hawng kan zûltir ko, kan kal sawm ko lai hi; chu tikah sungvâng hen kan thi lai lo. 9Keimah nih ka nungnâk pêk hen thu ka tiam lai, a thihnâk ruangah a mawh chu keimah nih ka phurh lai. Him tak leh dam ziar hen ka hawng kîrpi lo asi chun, keimah tlûnah mawhnâk um kumza seh. 10Amah ngâk ko lah sele chu a veinihnâk khawm kan hawng tlung nawlh ving lai rawh,” a ti.
11An pa nih an sinah, “Chu hâwi a si rawh mi chu zeitin kan ti lai, asi chun, hi ram ah a um mi thil ṭha chem hi nan vûitun lakah râwn ule, governor chu lâwmman rangah pêk u; thingthlîng turpâng tâwm, khuaitizû tâwm, rimthâw, pistachio leh almon. 12Tangka khawm a leh nih hen put ule, a lânah nan vûitun lakah an khirh na mi ruangah, palh mi dahmawh asi ah. 13Nan naupa chu kalpi ule, hawng kîrpi sawm u. 14Zeizawng tikho Pathian nih lâirêltu dâwt hen an umtir na seh, chu tikah Benjamin leh nan unau dang khawm nan sinah hawng kîr bâk ding hen. Kei lam nih chun ka fa le thlâu ding asi chun ka thlâu ko lai ma chu,” a ti.
15Unau rual tla chu thilpêk ding mi lâwmman leh tangka a lehnih leh Benjamin chu an put le, Aigupta ram leiah chun an kal nawlh rawh. Josef sinah chun an va pêk rawh. 16Josef nih an sinah Benjamin a muh rawh chun, a in ah a to-aw hotu sinah, “Hi minung tla hi ka in ah kalpi na le, ka sinah sûn buh ei na seh. Ran thah ule, timhtuah u,” a ti. 17A sim hâwi hen to-aw tla nih an ti le, a in ah an kalpi na.
18A in ah an kalpi na rawh chun, an ṭih le anna dawn thlo, “In ah hawng kan kalpi mi hi kan hawng tîr liauah kan sâwngkhâwi sungah tangka hawng kan khirh mi ruangah asi lai. Mawhsareh hen hawng kan dêng khup lai le, kan sanatung tla an lâk ver lai le, a sal ah hawng kan siam ding ko rawh,” an ti. 19Churuang chun kawtkâ kiangah a to-aw thuneitu pa sinah chun, 20“Pu, zângfahtê hen hawng kan ngâi piak le, a lânah veikhat fâng châwk ding hen kan hawng rawh. 21Kan tlung leiah lampi ah riak mun kan khuar le, kan vûitun kan samh le, vûitun tlûnah a man zat tangka kan tawng chiau, chu chu kan hawng kîrpi nawlh. 22Tangka dang khawm tam dauh kan hawng put, fâng tam dauh châwk ding hen. Âunih dek tangka kha kan vûitun ah an khumh kan theih loh,” an ti.
23To-aw nih, “Nan lawksawng lah u, ṭih lah u, nan pa Pathian nih nan vûitun lakah a nan siah piak na mi ma chu a! nan tangka chu ka tawng hei,” a ti. Churawhchun, Simeon chu an sinah a kalpi.
24To-aw nih unau rual tla chu in ah a kalpi na le, an kê ṭâwlnâk ding hen tî tla a pêk na. An sanatung tla khawm râwl a pêk piak na. 25A sinah buh ei ding hen a simh na ruangah, Josef sûn ah a hawng tikah lâwmman pêk ding tla an timhtuah zet. 26Josef a hawng tleng rawh chun lâwmman chu a sinah an kalpi le, a mâika ah kûn hen mâi an mûk. 27An dam le dam lo thu tla a deih na le, “Nan pa tarpa thâwngthâng nan ka simh mi kha zeitin a um? A dam ko rih bei?” a ti.
28Annih nih, “Kan pa, na to-aw nau tak chu a dam rih, nung le dam hen a um,” an ti. Chun, a mâika ah an kûn le, mâi an mûk.
29Josef nih a naupa Benjamin a muh rawh chun, “Hi hi a thâwngthâng nan ka simh mi nan naupa a tlum chem mi chu asi ngâk ma chu. Pathian nih mal a nan sâwm seh, ka fapa,” a ti. 30Churawhchun, Josef chu mawhsareh hen a kal ving, a naupa ruangah a thinlung a fâk tuktarâi ruangah a kek awt. Churawhchun, a pindan sungah a va kal le, a ṭap rawh. 31Mâi â phiah le, a hawng suak nawlh le, â sûm rarâm le, buh-an tuah ding hen a simh na. 32Josef rangah dawhkân pakhat an timhtuah le, a unau tla rangah dawhkân dang an timhtuah. Chun, Aigupta ram mi tla chu a dang ê hen buh an ei, Hebrai mi tla chu nau dauh hen an ruat na ruangah. 33A unau tla chu Josef lei hawi hep hen a to tir na le, an kum upat zia hen upachem mi thawk hen a ngâksia chem mi a sang hen an to, chê an ti le, anmah anmah anna zauh. 34Josef dawhkân thawk hen buh chu an pêk na le, Benjamin tingvo chu a leh ngâ hen midang tla ngâk hen a tam dauh. Josef hen an ei hen an din le, an khim rawh.
Currently Selected:
GENESIS 43: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
