John 3
3
Jesus ekw maak Nicodemus
1Chii ihtaau naapeu Nicodemus e ishinihkaasut, Pharisee chii itapuu kaye eukun an peyakw kaa niikaanishkuwaat Jewa iinuuh. 2Peyakwaau maak e tipiskaayich chii nituwaapameu Jesus ekw kaa itaat, “Chischinuhamaachesuu, chichischeyimitinaan chiya chischinuhamaachesuu e chii pechi itishahuusk Chishemanituu. Wesh namui awen chika chii ihtuutam aniyuu maamishkaach ihtuwin chiya kaa ihtuutaman ekaa wiichihiikute Chishemanituu.”
E nituweyihtaakuhch miin chechii pimaatisiit awen
3Jesus kaa itaat, “Kuiskw chiwiihtamaatin, namui awen chika chii waapahtamuweu Chishemanituu uchisheuchimaawiniyuu paatish miin pimaatisiite.”
4Ekw Nicodemus kaa itaat, “Taanite miin chechii uhchi pimaatisiit awen shaash e chiishi nihtaauchit. Namui miin chika chii piihcheweu ukaawiih uspayaayihch miin chechii pimaatisiit.”
5Jesus kaa itaat, “Kuiskw chiwiihtamaatin, namui awen chika chii piihcheu Chishemanituu uchisheuchimaawiniihch paatish nipiihch kaye Ahchaahkuwinihch uhchi pimaatisiite 6Misiwe chiniichihiikunuuch e ihtaatwaau chichii uhchi ayaanaanuu uu wiyaas pimaatisiiwin. Mikw maak kaa payehchisiit ahchaahkw e ihtaat uhchi ekut wehchi ayaayihkw Ahchaahkw pimaatisiiwin. 7Ekaawii maamishkaateyihtamihiikw uu e ititaan e nituweyihtaakusiyin miin chechii pimaatisiyin. 8E yuutihch, mikw anite waa ishiiwech ekute e ishiiwech. Pehtaakun e yuutihch namui mikw chischeyihtaakun taanite nihaau wehchipayihch kaye taanite e ispayihch an e yuutihch. Ekun maak mwehch e ishinaakusit Kaa payehchisiit Ahchaahkw, namui chichischeyimaanuu aweyuu miin che miyaat pimaatisiiwiniyuu.”
9Nicodemus maak chii iteu, “Taanite maak chechii uhchi ispayihch uu.”
10Ekw Jesus kaa itaat, “Chiya eukw peyakw kaa chisteyimaakanuut chiskutamaachesuu utah Israelihch, yaapach aa namui chinisituhtuun uu kaa itweyaan. 11Kuiskw chiwiihtamaatin. Nitaayimuutenaan taan e ishi chischeyihtamaahch kaye taan kaa ishi waapahtamaahch namui maak yaapach waachipeyakw chiwii taapwehtuunaan. 12Namui chitaapwehtuunaawaau e wiihtamaatakuch taan e ispayihch utah aschiihch. Taanite maak chechii uhchi taapwehtamekw wiihtamaatakuche taan e iteyihtaakuhch anite kihchikiishikuhch. 13Namui maak awen uhchi uhpiskaau kihchikiishikuhch ishi mikw Iinuu Ukusisa kihchikiishikuhch kaa uhtuhteyich.”
Taanite chechii uhchi ayaat awen kaachiche pimaatisiiwiniyuu
14Mwehch aniyuu kaa ihtit aniyaa Moses mekwaach pakwaatiskamikaahch kaa ihtaatwaau kaa chikamuhaat chinepukuhkaan mistikuhch misiwe aweyuu chechii waapamaayich, ekun mwehch che ihtuutuwaakanuyich Iinuu Ukusisa. 15Ekw maak misiwe awen kaa taapweyimaat che ayaat kaachiche pimaatisiiwiniyuu. 16Wesh Chishemanituu e ishpish chii saachihaat misiwe aweyuu utah aschiihch chii miiweu kaa peyakushiyich Ukusisa, misiwe aweyuuh kaa taapweyimaayich ekaa chechii nishuunaatisiyich maak chechii ayaayich kaachiche pimaatisiiwiniyuu. 17Wesh Chishemanituu chii pechi itishahweu Ukusisa utah aschiihch chechii pimaachihaayich aweyuuh namui wii chechii pechi nishuuwanaachimaayich.
18An maak awen che taapweyimaakwe Ukusisimaauh namui chika uhchi nishuuwanaachimaakanuu, an maak awen ekaa che taapeyimaakwe shaash nishuuwanaachimaakanuu wesh namui taapweyimeu aniyuu Chishemanituu kaa peyakushiyich Ukusiyuuh. 19Waashtewin chii pechi pachishtinaakanuu utah aschiihch mikw maak uste chii iteyihtamuch awenichii wanitipiskusiiwinihch chechii ishi pimaatisiitwaau ishpish wii waashtewinihch chechii ishi pimaatisiitwaau wesh chii machaatisiyuuch. Eukw maak uyuu che uhchi wiyaaskunaakanuutwaau. 20An maak awen kaa machaatisiit uhkaatam aniyuu waashtewiniyuu namui wii naatam wesh namui nituweyihtam chechii nuukuniyich umachaatisiiwin anite e waashteyich. 21Mikw maak an awen taapwewinihch kaa ishi pimaatisiit anite e waashteyich ihtaau ekw maak e nuukuniyich taan e ishi nanihiihtuwaat Chishemanituu.
John siikahaahtaacheu kaa wiihtahk Jesus e aawiyich Christ
22Anite Judea aschiihch chii ituhteu Jesus uchischinuhamuwaakan e wiicheukut. Ekute anite kaa ihtaatwaau, Jesus maak chii siikahaahtaacheu. 23Kaye wiya John chii siikahaahtaacheu anite Aenon, namui waahyuu anit uhchi Salimihch wesh naashch chii mishaayuu nipiiyuu anite. Muush chii nituwaapamikuu aweyuu e nituweyihtamiyich chechii siikahaahtuwaat, chii siikahaahtuweu maak. 24Eukw uyuu kaa ihtit John eshkw ekaa uhchi maakunaakanuut.
25Pasch maak aniyuuh John uchischinuhamuwaakanh ekw maak kutakach Jewa iinuuch chii machipayuuch e aayimuutahkwaau ayimihewin payehchihiiwewiniyuu. 26Chii nituwaapameuch John ekw kaa itaatwaau, “Chischinuhamaachesuu, an naapeu taapishkun kaa ihtaayekw anite waapanuutaahch an Jordan siipiihch, an kaa aayimuumat, anuhchiish kaye wiya siikahaahtaacheu kaye misiwe aweyuuh nituwaapamikuu.”
27John maak chii nishkweushiheu e itaat, “Namui awen chika chii ayaau chekwaayuu paatish Chishemanituu iteyimikute chechii ayaat. 28Chiyawaau maak chichii pehtuunaawaau uu kaa itweyaan, ‘Namayeu niya an Christ mikw maak nichii pechi niikaanitishihukuun niya chechii aayimuumak.’ 29Muyaam uschinaapewaan wiya tipeyimeu aniyuu uschiskwewaan. Aniyuu maak uwiichewaakanh an uschinaapewaan, aniyuu kaa wiichihiiweyich ashuwaapamikuu che ishpish takushinit kaye miyeyihtamiyuu iskutak piyehtaakut. Ekun maak mwehch kaye niya e ishpish miyeyihtamaan shaash e ihtaat an kaa pechi itishahukut Chishemanituu. 30Iteyihtaakuniyuu maak wiya etituu chechii ati chisteyimaakanuut ekw niya wetaach ekaa chechii ishpish chisteyimikuyaan.”
An kihchikiishikuhch kaa uhchiit
31Wesh an ishpimihch kaa uhtuhtet eukw an maauch e ispeyihtaakusit. An aschiihch kaa uhchiit, aschiihch ishi pimaatisiyuu, kaye aschiiyuu aayimuutam. An awen kihchikiishikuhch kaa uhchiit wiya maauch ispeyihtaakusuu. 32Wiihtam taan kaa ishi waapahtahk kaye taan kaa ishi pehtahk anite kihchikiishikuhch mikw maak namui aweyuuh taapwehtaakuu. 33An awen kaa utinamuwaat taan e itweyich ekut e nuukuniyich e taapwehtahk Chishemanituuh e taapweucheyihtaakusiyich. 34An kaa pechi itishahukut Chishemanituu iteu taan e ishi miikut Chishemanituuh chechii itwet kaye mitun tekash piihchishkaakuu Chishemanituu Utahchaahkuyuuh. 35Uhtaawiimaau saachiheu Ukusisimaau. Chii miyeu misiwe chekwaayuu chechii wiishuwaatamiyich. 36An maak awen kaa taapweyimaat Ukusisimaau ayaau kaachiche pimaatisiiwiniyuu, ekw an awen ekaa kaa nanihiihtuwaat Ukusisimaau namui chika uhchi ayaau kaachiche pimaatisiiwiniyuu. Chishemanituu utaahkuyuwesuwiniyuu chika maahtakushkaakuu.
Currently Selected:
John 3: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
