John 4
4
Jesus kaa ayimihaat iskweuh Samariahch kaa uhchiyich
1Phariseech chii pehtamuch etituu e mihchetiyich aweyuu e nuushuushkuwaayich Jesus eyuu maak etituu wiya e mihchetiyich aweyuu e siikahaahtuwaat e ishpish John. 2Mikw maak namayeu wiya Jesus kaa siikahaahtaachet, uchischinuhamuwaakanh aniyuu kaa siikahaahtaacheyich. 3Iskutak piyehtahk Jesus e ayimitutawaakanuut, chii nakatam Judea aschiiyuu ekw Galilee aschiihch miin kaa ituhtet. 4Chipaa shaapuhtaweshkam maak Samaria aschiiyuu anite Galileehch e wii ituhtet.
5Iskutak maak anite Samaria aschiihch e ihtaat, chii utihtam ihtaawiniyuu Sychar e ishinihkaateyich. Peshuch maak utah uyuu ihtaawiniyuu ekut kaa ihtakuniyich aniyuu nihtaauchihchikan aschiiyuu aniyaa Jacob kaa miyaat ukusisa Joseph. 6Chii ihtakun anit uhtahiipaan, Jacob uhtahiipaan chii ishinihkaateu. Naashch maak chii ayeskuhteu Jesus, kaa ati waweyapit peshuch anit uhtahiipaanihch. Wiyesh chii aapihtaachiishikaayiche.
7Naanaacheshiish maak, iskweu, Samaria aschiihch e uhchiit chii pechi kwaapicheu. Jesus kaa itaat aniyuu iskweu, “Pechi miih maa nipiih chechii minihkweyaan.” 8Namui mekwaach uhchi ihtaayuuh Jesus uchischinuhamuwaakanh aniyuu wesh anite ihtaawinihch chii ituhteyuuh miichimiyuu e chii nituu utinamiyich.
9Naashch maak chii kushkupayuu an iskweu aniyuu kaa itikut Jesus ekw kaa itaat, “Jewa naapeu chiya. Niya maak Samaria iskweu niya. Chekwaan wehchi nituweyihtaman chechii minihiitaan.” Namui mitun uhchi papiskaateuch Jewa iinuuch aniyuu iinuuh anite Samaria aschiihch kaa uhchiyich, eukw uyuu wehchii itwet uyuu an iskweu.
10Chii iteu maak Jesus aniyuuh iskweu, “Chischeyihtamuuhpane chekwaayuu e wii miiwet Chishemanituu kaye chischeyimiyin awen e aawiyaan, chiya chipaa kakwechimin chechii minihiitaan. An maak kaa pimaachihiiwemakahch nipii eukun an chipaa minihiitin.”
11Ekw an iskweu kaa itwet, “Namui chitayaan aschihkw chechii kwaapahiikaacheyin kaye an nipii mista yaaunaakun anite niihtaahch, taanite maak che uhtahaman an nipii kaa pimaachihiiwemakahch. 12Weskach anite utaahch chitaanische waahkumaakanuu Jacob chichii miikunuu uyuu uhtahiipaaniyuu. Chii minihkweu uyuu nipiiyuu kaye ukusisa ekw maak umaanishchaanishimh ekut kaa uhchi minihkweyich. Uste aa chiya chititeyimisun ishpish wii aniyaa chitaanische waahkumaakanuu Jacob.”
13Jesus maak chii iteu, “Awen kaa minihkwet uyuu nipiiyuu utah, miin chika paahkutaahtam. 14Awen maak che minihkwekwe aniyuu nipiiyuu che miyak chechii minihkwet, namui wiiskaat miin chika uhchi paahkutaahtam. Wesh an nipii che miiweyaan kata piihchishkaakuu muyaam e uhchi muuschichuuniyich kata ishinaakuniyuu, eukw maak uu kaa pimaachihiiwemakahch nipii anit chechii uhchi ayaat awen kaachiche pimaatisiiwiniyuu minihkwete.”
15An iskweu kaa itaat, “Pechi miih uu nipii, ekw maak namui miin nihtaa nika uhchi paahkutaahten kaye namui miin nihtaa nika uhchi pechi takushin utah chechii pechi kwaapicheyaan.”
16Jesus kaa itaat aniyuu iskweu, “Maachiih, nituwaapam chinaapem. Peshuu utah.”
17Kaa itwet an iskweu, “Namui nuunaapemin.” Ekw Jesus kaa itaat, “Chitaapwen an kaa itweyin ekaa unaapemiyin. 18Niyaayin naapeuch shaash chichii ayaawaauch kaye maak an naapeu anuhchiish kaa wiichimat, yaapach namayeu an chinaapem. Kuiskw chititwen an kaa itweyin.”
19Ekw an iskweu kaa itaat, “Ekun e iteyimitaan muyaam uchischiwehiichesuu chiya. 20Aanische chiwaahkumaakanuuch chii takushinuuch e pechi nituu nuuchiishtuwaatwaau Chishemanituu utah wachiihch. Chiyawaau maak Jewa iinuuch muush ekun e itweyekw, mikw anite Jerusalemihch ekute chechii nuuchiishtuwaakanuut Chishemanituu.”
21Jesus kaa itaat, “Taapwehtuuh, chika ispayuu eshkw Kuuhtaawiinuu ekaa che uhchi nuuchiishtuwaakanuut utah wachiihch maak anite Jerusalemihch. 22Chiyawaau Samaria kaa uhchiyekw, chinuuchiishtuwaawaau Chishemanituu aat maak ekaa chischeyimekw. Niyaan Jewa iinuuch, nichischeyimaanaan Chishemanituu an kaa nuuchiishtuwachiht. Wesh anite Jewa iinuuch e ihtaatwaau ekute che uhchipayihch misiwe awen chechii pimaachihaakanuut. 23Wesh shaash peshunaakun, kaye ekun shaash e ispayihch, anichii chihchiwe kaa nuuchiishtuwaatwaau Uhtaawiimaau, ahchaahkuwinihch kaye taapwewinihch ishi nuuchiishtuweuch. Eukw uyuu e ishi nituweyimaat aweyuu chechii ishi nuuchiishtaakut Kuuhtaawiinuu. 24Ahchaahkuu Chishemanituu ekw anichii kaa nuuchiishtuwaatwaau yaaitei ahchaahkuwinihch kaye taapwewinihch chipaa ishi nuuchiishtuweuch.”
25Ekw an iskweu kaa itaat aniyuuh Jesus, “Nichischeyihten aniyuuh Chishemanituu che pechi itishahwaat che takushiniyich. Christ ishinihkaasuyuuh. Takushihke maak misiwe chekwaayuu chika wiihtamaakunuu.”
26Ekw Jesus kaa ishi nishkweushihaat, “Eukun niya, niya kaa ayimihiitaan.”
27Ekut kaa uhchi takushiniyich Jesus uchischinuhamuwaakanh, naashch maak chii kushkupayuuch e waapamaatwaau Jesus e ayimihaayich aniyuu iskweu. Yaapach maak namui waachipeyakw uhchi kakwechimeuch chekwaayuu wehchi ayimihaayich aniyuu iskweu kaye namui uhchi kakwechimeuch chekwaayuu kaa aayimuutamiyich.
28Ekw an iskweu kaa nakatahk aniyuu ukwaapikaakan, kaa chiiwet anite utihtaawinihch ekw kaa itaat aniyuu iinuuh anite kaa ihtaayich. 29“Aashtamukw. Che waapamekw an naapeu kaa pechi wiihtamuut misiwe taan kaa ihtuuch. Namayeu kaakaye eukuu Christ aniyuu chipaa pechi itishahweu Chishemanituu.” 30Ekw anichii iinuuch kaa wiiwiitwaau anit ihtaawinihch kaa nituu nituwaapamaatwaau Jesus.
31Mekwaach maak uu, Jesus uchischinuhamuwaakanh chii wii aayihkamihiikuu, “Chischinuhamaachesuu, miichisuu,” e itikut.
32Jesus kaa itaat, “Nitayaan wesin miichim ekaa chischeyihtamekw.”
33Ekw kaa kakwechimitutwaau, “Chii petuweu kaakaye awen chekwaayuu chechii miichiyich.”
34Jesus kaa itaat, “Chechii ihtuutamuch utiteyihtamuwin an kaa pechi itishahuut kaye chechii chiishihtaauch aniyuu kaa ishi nituweyimit chechii ihtuutamuch eukun an mwehch nimiichim e iteyihtamaan. 35Chititwenaawaau, ‘Neu piisim ekw yaakw chechii maamuushtinikanuuhkwaauh nihtaauchihchikanh.’ Mikw maak niya, chititinaawaau, nete maa yaakwaau iitaapikw. Mwehch e ishinaakuhch anite kaa nihtaauchihchikaanuuhch shaash e chiishi nihtaauchihkwaau aniyuuh nihtaauchihchikan ekw maak mikw che maamuushtinikanuuhkwaauh, ekun mwehch che ishinaakusitwaau anichii awenich che taapwehtahkwaau miywaachimuwiniyuu pehtahkwaawenich. 36An kaa maamuushtinahk aniyuu nihtaauchihchikanh chiishiihkawaakanuu. Mwehch an awen kaa wiichihaat aweyuu chechii ayaayich kaachiche pimaatisiiwiniyuu ekun e ishinaakusit. Ekw maak an kaa nihtaauchihchet kaye an kaa maamuushtinahk aniyuu nihtaauchihchikanh taapishkun che miyeyihtahkwaau wesh taapishkun chii aapatisuuch. 37Taapwaanuu kaa iinaanuuhch, ‘Peyakw chikaa nihtaauchihcheu ekw an kutak che maamuushtinahk aniyuu nihtaauchihchikanh.’ 38Shaash kutakach chii nihtaauchihcheuch kaye chii mista aapatisuuch anite kaa nihtaauchihchikaanuyich. Ekw maak e itishahuutakuch chechii maamuushtinamekw aniyuu nihtaauchihchikan. Namayeu chiya kaa nihtaauchihcheyin mikw maak yaapach chiwiichihiikuwaan aniyuu kaa itaapatisitwaau.” Ekun kaa itaat Jesus uchischinuhamuwaakanh.
39Mihchetu Samaria iinuuch anit aniyuu ihtaawiniyuu kaa uhchiitwaau chii taapweyimeuch Jesus. Wesh chii iteu an iskweu, “Misiwe nichii wiihtamaakw taan kaa pechi ihtuuch.” 40Iskutak anichii iinuuch anite Samaria aschiihch kaa uhchiitwaau kaa pechi nituwaapamaatwaau Jesus anite uhtahiipaanihch, chii aayihkamiheuch chechii ihtaayich anit e ihtaatwaau. Niishu chiishikaau maak chii ihtaau Jesus anite.
41Mihchetu maak awenich chii taapweyimeuch Jesus, iskutak piyehtawaatwaau taan kaa itweyich. 42Kaa itaatwaau aniyuu iskweu, “Ekw maak tiyaapwehtuwachiht, niyaan wechiihch e chii pehtawachiht, namui mikw chiya e chii itweyin. Ekw maak chiyeshtinaateyihtamaahch wiya eukw chechii pimaachihaat misiwe aweyuuh.”
Jesus kaa miinuwaachihaat chisheuchimaau aapachihaakanh ukusiyuuh
43Iskutak maak niishu chiishikaauh kaa ihtaat Jesus anite Samaria aschiihch, ekw anite Galilee aschiihch kaa ituhtet. 44Wesh chii itweche Jesus, “Namui chisteyimaakanuu uchischiwehiichesuu anite aniyuu aschiiyuu kaa uhchiit.” 45Iskutak maak kaa takushinit anite Galilee aschiihch, anichii iinuuch anite kaa wiichitwaau naashch chii miyeyihtamuch e waapamaatwaau. Kaye wiyawaau chii ituhtewaakupanenich Jerusalemihch mekwaach kaa makushaanuyich anite, misiwe maak chii waapahtamuweuch taan kaa ihtiyich anite.
46Ekw miin kaau kaa ituhtet anite Canahch Galilee aschiihch kaa ihtakuhch ihtaawin, anite kaa ihtuutahk nipiiyuu chechii shuuminaapuuniyich. Ekut kaa ihtaat naapeu e uchimaaut. An uchimaau chii ihtaayuuh ukusisa, e aahkusiyich, anite maak Capernaum ihtaawinihch chii ihtaayuuh mekwaach. 47Iskutak piyehtahk an uchimaau e chii takushiniyich Jesus anite Galilee aschiihch, anite Judea aschiihch e uhtuhteyich, chii nituwaapameu ekw kaa aayihkamihaat chechii ituhteyich anite Capernaumihch, chechii nituu miinuwaachihaayich aniyuu ukusisa, wesh shaash chekaat namui uhchi pimaatisiyuu. 48Chii itikuu maak Jesus, “Namui nihtaa chika uhchi wii taapwehtenaawaau paatish waapamiyekwe maamishkaach waapahtiiwewinh e waapahtiiweyaan kaye e ihtuutamaan e maamishkaateyihtaakuhkwaauh chekwaayuuh.”
49Ekw an naapeu kaa ishi nishkweushihaat, “Utipeyihchikeu, aashtam maa pechi ituhte niwaaskaahiikanimihch eshkw ekaa puunipimaatisiit nikus.”
50Ekw Jesus kaa ishi nishkweushihaat, “Maachiih nituu chiiwe, chikaa pimaatisiyuu wesin chikus.” Chii taapwehtam maak taan kaa itaakanuut an naapeu, ekw kaa chiiwet. 51Mekwaach maak e ishpishipayit e chiiwet, chii nachihiikuu aniyuu utaapachihaakanh ekw kaa itikut, “Shaash miyu pimaatisiyuu chikus.”
52Ekw an naapeu kaa kakwechihcheyimut taan kaa ishpishichiishikaayich anit kaa uhchi miyu pimaatisiyich aniyuu ukusisa. Ekw kaa itaakanuut, “Utaakushihch, e ishkwaapihtaachiishikaayich ekut kaa puunipayiyich e chishiteunikusiit.” 53Ekw an naapeu kaa chischisit ekun nihaau kaa ishpishichiishikaayich kaa itikut Jesus, “Chika pimaatisiyuu wesin chikus.” Ekut maak kaa uhchi taapwehtahk kaye misiwe aweyuu anit e peyakuteusiit ekut kaa uhchi taapwehtamiyich.
54Eukw maak uyuu niishwaa kaa maamishkaach ihtit Jesus e takushinit anite Galilee aschiihch, anite Judea aschiihch e uhtuhtet.
Currently Selected:
John 4: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
