Luke 20
20
Taan kaa ishi kakwechimaakanuut Jesus
Matthew 21.23-27; Mark 11.27-33
1Peyakwaau Jesus e chischinuhamuwaat aniyuuh iinuuh anite chisheayimiheukamikuhch kaye e waawiihtahk miywaachimuwiniyuu aniyuuh kaa niikaanapiitwaau ayimiheuchimaauh ekw maak aniyuuh kaa chiskutamaacheyitwaauh wiishuwewiniyuu kaye aniyuuh kaa niikaanishkuwaayich iinuuh chii pechi nituwaapamikuu, 2ekw kaa itikut, “Wiihtamuunaan maa, chekwaan wehchi ihtuutaman uu kaa ihtuutaman. Awen kaa itashumisk uu chechii ihtuutaman.” 3Jesus maak chii nishkweushiheu e itaat, “Chika kakwechimitinaawaau chekwaan. Nishkweushihiikw maak. 4Awen kaa itashumaat John siikahaahtaacheu chechii siikahaahtuwaayich aweyuuh, Chishemanituu aa maak naapeu.” 5Chii machipayuuch maak anit wiyawaau e itwetwaau, “Itweyihkwe, ‘Chishemanituu chii itikuu,’ chika itikunuu, ‘chekwaan maak wehchi ekaa uhchi taapwehtawekw.’ 6Maak itweyihkwe, ‘Naapeu kaa itashumikut aniyuu kaa ihtit,’ ekw uchii iinuuch utah kaa ihtaatwaau chika nipahiikunuuch e paahpimusinaatahuutahkwaau. Wesh mitun taapweyimeuch John e chii uchischiwehiichesuyich.” 7Kaa nishkweushihaatwaau Jesus e itwetwaau, “Namui nichischeyimaanaanh aweyuu kaa itashumikut John chechii siikahaahtuwaat aweyuuh.” 8Jesus kaa itaat, “Kaye niya namui chika uhchi wiihtamaatinaawaau awen kaa pechi itashumit uu chechii ihtuutamaan.”
Kaa nihtaauchihchetwaau kaa tipaachimaakanuutwaau
Matthew 21.33-46; Mark 12.1-12
9Jesus kaye chii wiihtamuweu uyuu chiskutamaacheu tipaachimuwiniyuu e itaat, “Naapeu chii ushihtaau shuuminaahtikw nihtaauchihchikan aschiiyuu, ekw pitamaa kaa pachishtishuwaatahk aweyuuh chechii naanaakachihtamaakut. Ekw kaa chistuhtet, waahiyuu e ihtakuniyich aschiiyuu kaa ituhtet. Chii itaapichiyuu maak. 10Iskutak maak wetihchipayiyich che maamuushtinikanuuyikwaau aniyuuh miinisha anit mistikuhch kaa nihtaauchihkwaau chii itishahweu peyakw utaapachihaakan chechii nituwaapamaayich aniyuuh kaa naanaakachihtaayitwaau aniyuu utaschii chechii miikut wiya taan chipaa ishi ayaau. Mikw maak anichii kaa naanaakachihtaatwaau aniyuuh nihtaauchihchikanh chii kushiihkaweuch aniyuu aapachihaakanh kaau kaa chiiwetishihwaatwaau e pishikuhteyich. 11Ekw an kaa tipiyeusiit aniyuu nihtaauchihchikan aschiiyuu miin kutak aapachihaakanh chii itishahweu. Mikw maak anichii kaa naanaakachihtaatwaau aniyuuh nihtaauchihchikanh yaapach chii kushiihkaweuch aniyuu, kaye chii maayeyimeuch ekw kaa chiiwetishihwaatwaau e pishikuhteyich. 12Ekw an kaa tipiyeusiit aniyuu nihtaauchihchikan aschiiyuu miin kutak aapachihaakanh kaa itishahwaat. Anichii maak kaa naanaakachihtaatwaau eukw ekw uyuu kaa mishwaakanihkaataatwaau, ekw maak kaa wiiwepinaatwaau. 13Ekw an kaa tipiyeusiit aniyuu nihtaauchihchikan aschiiyuu chii maamituneyihtam taan chipaa chii ihtuu. Chek kaa iteyihtahk, ‘Nika itishahwaau niya tipiiwe nikus kaa saachihak. Chika chisteyimeuch waapamaatwaawenich.’ 14Eukw maak kaa ihtit. Anichii kaa naanaakachihtaatwaau iskutak wiyaapamaatwaau chii itituuch, ‘Eukw uyuu an kuuchimaaminuu ukusisa. Uyuu nihtaauchihchikan aschiiyuu wiya chika aashuumiyaakanuu. Nipahaataau. Ekw maak uyuu utaschii chiyaanuu che tipiyeusiyuuhkw.’ 15Ekw maak kaa wiiwiitishinaatwaau anit uhchi shuuminaahtikw nihtaauchihchikan aschiihch kaa nituu nipahaatwaau.”
Ekw Jesus kaa kakwechimaat aniyuuh kaa tipaachimushtuwaat, “Taan maak che ihtuutawaat an uchimaau aniyuu kaa naanaakachihtaayich unihtaauchihchikanh.” 16“Kiipaa che chiiwet an uchimaau che nipahaat aniyuuh naapeu ekw che miyaat kutak aweyuu chechii naanaakachihtaayich aniyuu nihtaauchihchikanh.” Iskutak maak anichii iinuuch piyehtahkwaau uyuu, chii iteuch, “Kamaa ekaa wiiskaat chii ispayihch uu.” 17Chii kanawaapameu maak ekw kaa itaat, “Taan e itwemakahch maak Chishemanituu utayimuwinihch kaa itashtech,
Chii aataweyimeuch kaa waaskaahiikanihchetwaau aniyuu asinii chihchiwe e aapatisiyich e chiihcheyaayich.” 18Kaa ati itwet miin Jesus, “Awen maak tahkuhchipayite aniyuu asinii chika piikushin, ekw maak an asinii pahchishinite aweyuu e ihtaayich mitun chika piisiskaweu muyaam yekaau che ishinaakusiyich.”
Chipaa chiishiihkawaakanuu aa Chisheuchimaau
Matthew 22.15-22; Mark 12.13-17
19Anichii maak kaa chiskutamaachetwaau wiishuwewiniyuu ekw maak anichii kaa niikaanapitwaau ayimiheuchimaauch tiiwehch chii wii maakuneuch Jesus. Wesh chii chischeyimeuch wiyawaau e chii aayimuumikutwaau kaa wiihtamiyich aniyuu chischinuhamaacheu tipaachimuwiniyuu. Mikw maak namui uhchi maakuneuch e chii kushtaatwaau aniyuu iinuuh. 20Ekw mikw kaa naanaakachihtaatwaau che ishpish miyupayich chechii maakunaatwaau. Chii itishahweuch maak naapeuh anite Jesus e ihtaayich memehch chechii ishi kakwechimaatwaau, e wii naanituu pisiiwiyaatwaau chechii itweyich chekwaayuu chechii uhchi maakunaatwaau. Ekw maak chii maakunaatwaawenich ekw anite chipaa ituhtaheuch Rome chisheuchimaau e ihtaayich, aniyuu chipaa wiyaaskunikuyuu. 21Ekw maak uchii naapeuch kaa kakwechimaatwaau Jesus e itaatwaau, “Chischinuhamaacheu, chichischeyimitinaan chekwaan e itweyin kaye taan e ishi chiskutamaacheyin e taapwemakahch. Kaye chichischeyimitinaan misiwe peyakunihch e iteyimitwaau awenichii, kaye misiwe peyakunihch taapwe e ishi chiskutamuutwaau Chishemanituu utiteyihtamuwiniyuu chechii ishi pimaatisiitwaau. 22Ekw maak netuweyimitaahch chechii wiihtamuyaahch, itashteu aa wiishuwewinihch Rome chisheuchimaau chechii miyaakanuut aniyuu shuuliyaayuu kaa chiishiihkamiyich aweyuu.”
23Jesus maak chii chischeyimeu e wii pishiiwiikut, ekw kaa itaat, “Chekwaan wehchi wii pechi kakwechihiyekw. 24Pechi waapahtiikw shuuliyaawaapiskw. Awen maak utaashtamuhkw e nuukuniyich anit kaye awen aniyuu utishinihkaasun kaa masinaateyich.” Ekw maak kaa itwetwaau, “Rome chisheuchimaau Caesar aniyuu utaashtamuhkw kaye wiya anit masinaasuu.” 25Jesus chii iteu, “Miyaahkw chisheuchimaau Caesar taan aniyuu wiya tepiyeusiit, kaye maak miyaahkw Chishemanituu taan aniyuu wiya tepiyeusiit.” 26Anit maak e waapamikutwaau iinuu, namui uhchii ihtuutaweuch chechii wanipayiyich chekwaayuu e itweyich ati chechii uhchi maakunaatwaau. Naashch chii miskaateyihtamihiikuuch taan kaa ishi nishkweushihiikutwaau, ekw namui miin uhchi chistuuch.
Jesus kaa kakwechimaakanuut e wanishkaanuyich nipuwinihch uhchi
Matthew 22.23-33; Mark 12.18-27
27Chii pechi naatikuu maak Jesus Sadduceeh. Eukw uchii ekaa uhchi taapwehtahkwaau che wanishkaanaakanuyich eshkw aniyuu kaa nipiitwaau. Ekw maak kaa wii naanituu kachescheyihtahkwaau taan e iteyihtamiyich Jesus uyeyuu, 28kaa itaatwaau, “Chischinuhamaacheu, Moses chii masinaham uyuu wiishuwewiniyuu kaa itashteyich, ‘Nipite naapeu, e ihtaayich maak wiichiskweu, ekaa maak uhchi ayaawewaakwenich awaasha, an naapeu wiichishaan chipaa wiichimeyuu aniyuuh wiichiskweu. Ekw maak ayaawaayichen awaasha mwehch wiya aniyaa naapeu e utawaashiimit chipaa ishinaakuniyuu.’ ” 29Ekw miin uyuu kaa ishi wiihtamuwaatwaau Jesus anichii naapeuch, “Peyakwaau e chii ihtaatwaau niishwaashch naapeuch, e chii wiichishaanihtutwaau. Ekw an maauch chesheiniyuut kaa niipuut, chek kaa puunipimaatisiit ekaa uhchi ayaawaat awaasha. 30Ekw maak an kaa uhchi taahchiskawaat aniyuu ustes eukw an miin kaa wiichimaat aniyaanaa ustes wiichiskwewiyuu. Kaye maak wiya chek chii puunipimaatisiyuu ekaa uhchi ayaawaat awaasha. 31Ekw miin an e uhchi taahchiskawaat kaa wiichimaat aniyaa wiichishaan wiichiskwewiyuu. Kaye maak wiya chek chii puunipimaatisiyuu ekaa uhchi ayaawaat awaasha. Ekun pisikw kaa ispayitwaau uchii niishwaashch wiichishaanimaauch, paatish misiwe niishwaashch e tashitwaau kaa wiichimaatwaau aniyuu peyakw iskweu, namui maak waachipeyakw uhchi ayaaweuch awaasha. 32Ekw chek an iskweu kaa nipit. 33Ekw maak iskutak utihchipayihche chechii wanishkaatwaau anichii kaa nipitwaau, awen che wiichiskweut aniyuu iskweu, wesh misiwe chii unaapemuu aniyuu niishwaashch naapeu.”
34Ekw Jesus kaa itaat, “Mekwaach anuhchiish e pimaatisiinaanuuhch, naapeu ekw maak iskweu niipuuch maak niipuuhaakanuuch, 35mikw maak anite niishtamihch iskutak utihchipayihche che wanishkaanaakanuutwaau anichii kaa tepicheyihtaakusitwaau miin chechii pimaatisiitwaau, namui chika uhchi ihtakun e niipuunaanuuhch kaye e niipuuhiiwaanuuhch. 36Wesh mwehch enchilich chika iteyihtaakusuuch uchii namui wiiskaat chika chii puunipimaatisiyuuch. Chishemanituu utawaashiimitutaakuuch anichii che wanishkaatwaau. 37Moses chii waapahtiiweu e taapwehtahk miin e pimaatisiyich kaa nipiitwaauh. Wiihtaakun anite Chishemanituu utayimuwinihch Moses kaa waapahtahk muyaam e ishkwaateyich niipisiyaahtikuhch. Ekut waahtaakuhch kaye Moses e chii ishinihkaataat Utipeyihchikeu,
Abraham Uchishemanituum, eukun aniyuu yaapach Uchishemanituumiwaau Isaac ekw maak Jacob.
Uyuu maak naapeu shaash namui uhchi pimaatisiyuu uyuu mekwaach kaa itwet Moses. 38Namui Uchishemanituumitutaakuu Chishemanituu aniyuu kaa nipiyich aweyuuh mikw aniyuu kaa pimaatisiyich. Misiwe pimaatisiyuu iteyimeu Chishemanituu aweyuu, aniyuu eshkw kaa pimaatisiyich utah aschiihch kaye aniyuu shaash kaa nipiyich.”
39Pasch maak anichii kaa chiskutamaachetwaau wiishuwewiniyuu chii itweuch, “Chischinuhamaacheu, miywaau an kaa itweyin.” 40Namui maak miin awen uhchi kuchihtaau chechii kakwechimaat Jesus chekwaayuu.
Aweyuu e ukusiitutaakut Christ, Chishemanituu maak Chisheuchimaau David
Matthew 22.41-46; Mark 12.35-37
41Chii itweu maak Jesus, “Chekwaayuu wehchi itwetwaau awenichii aniyuuh Christ che pechi itishahwaat Chishemanituu anite che uhchiskaanesiyich David e ihtaayich. 42David maak uyuu e chii ishi masinahamukupane anite unikamuwinihch,
Utipeyihchikeu chii iteu Nitipeyihchikemh, ute pechi apih nihiiwinihch, 43paatish chii ashpashihiikwaawenich anichii kaa uhkaatiskwaau. 44Mechim David ‘Nitipeyihchikem’ chii ishinihkaateu Utipeyihchikeu. Taanite maak chechii uhchi ukusiitutawaat.”
Yaakwaamiishtuwaahkuch anichii wiishuwewiniyuu kaa chiskutamaachetwaau
Matthew 23.1-36; Mark 12.38-40
45Mekwaach maak e pehtaakut misiwe aniyuu iinuu, Jesus chii iteu aniyuu uchischinuhamuwaakan, 46“Yaakwaamiishtuwaahkuch anichii kaa chiskutamaachetwaau wiishuwewiniyuu wesh nituweyihtamuch chechii chisteyimaakanuutwaau. Miyeyihtamuch e pushchishkahkwaau kaa chinwekaniyikwaau akuhpa, kaye miyeyihtamuch e utinischenaakanuutwaau anite e mihchetinaanuyich. Kaye nituweyihtamuch anite maauch e paihtepitwaau chechii apihaakanuutwaau ayimiheukamikuhch, kaye e makushaanuyich chechii apihaakanuutwaau anite e uchimaaupinaanuyich. 47Utinamuweuch kaye misiwe taan e ishi tipiyeusiyich kaa paahpeyakuyitwaauh iskweuh kaye maak e ayimihaatwaau chineush ayimihaauch, mikw maak ayimihehkaasuch uyuu e ihtitwaau. Eukunich maak uchii ushte che aahkwaateyihtaakuniyich taan che ishi wiyaaskunikutwaau Chishemanituuh.”
Currently Selected:
Luke 20: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
