Luke 7
7
Jesus kaa miinuwaachihiimaat nitupayuuchimaau utaapachihaakaniyuu
Matthew 8.5-13
1Iskutak Jesus kaa chiish ayimitutahk uyuuh chekwaayuuh e pehtaakut iinuuh ekw kaa ituhtet anite Capernaum kaa ishinihkaateyich ihtaawiniyuu. 2Chii ihtaau maak anit peyakw nitupayuuchimaau naashch e chii saachihaat utaapachihaakan. Mekwaach maak naashch chii aahkusiyuu aniyuu utaapachihaakan chekaat e puunipimaatisiyich. 3Ekw maak uu nitupayuuchimaau iskutak kaa pehtahk taan e itaachimaakanuyich Jesus chii itishahweu Jewa iinuuh kaa niikaanishkuwaayich anite Jesus e ihtaayich chechii nitutamuwaayich chechii pechi miinuwaachihaayich aniyuu utaapachihaakan. 4Iskutak maak uchii naapeuch wetihtaatwaau Jesus naashch taapwe suuhk chii aayihkamiheuch chechii ihtuutamiyich uyeyuu e itaatwaau, “Naashch taapwe suuhk pukuseyihtamihiikuu chechii miinuwaachihaakanuyich utaapachihaakan uu nitupayuuchimaau. Tepicheyihtaakusuu maak chechii ihtuutamuwaakanuut uyeyuu, 5wesh saachiheu nitiiniiminaan kaye nichii ushihtwaakunaan ayimiheukamikuyuu.”
6Ekw Jesus kaa wiichewaat. Iskutak maak piyeshuwaapahtamuwaatwaau aniyuu uwaaskaahiikanimiyuu ekw an nitupayuuchimaau kaa itishahwaat uwiichewaakanh Jesus e ihtaayich chechii itaayich, “Utipeyihchikeu, ekaawii aayimihiisuu, wesh namui nitepicheyihtaakusin chechii pechi piihcheyin niwaaskaahiikan, 7kaye maak namui nitepicheyihtaakusin chechii nituu nachishkaataan. Mikw maak tepiyaahch itweyine chechii miinuwaatisiit nitaapachihaakan kata miinuwaatisiyuu. 8Wesh kaye niya ihtaauch nuuchimaamach e pishichihiikwaau kaye maak ihtaauch shimaakanishach e wiishumakwaau. E itak peyakw shimaakanish ‘Anite ituhte,’ tiiwehch ekute anite e ituhtet. Ekw kutak e itak, ‘Aashtam,’ tiiwehch takushinuu. Ekw kaye kutak e itak nitaapachihaakan, ‘Uu maa ihtuutah,’ eukw aniyuu e ihtuutahk.” 9Iskutak Jesus piyehtahk uyuu naashch taapwe chii maamihchihiikuu utaapwehtamuwiniyuu. Ekw kaa kweschikaapuushtawaat aniyuu kaa nuushuushkaakut kaa itaat, “Chititinaawaau, namui waawaach utah Israelihch eshkw nuuhchi waapamaau awen e ishpish suuhchitaapwehtahk.”
10Iskutak maak miin kaau kaa chiiwetwaau anichii kaa itishahwaakanuutwaau Jesus e ihtaayich, chii waapameuch aniyuu aapachihaakan kaa aahkusiyich e miyu ayaayich.
Uschiniichuu kaa wanishkaanaakanuut nipuwinihch uhchi
11Paatimaa maak Jesus chii ituhteu ihtaawinihch Nain e ishinihkaateyich. Mihchetu aweyuuh kaye uchischinuhamuwaakanh chii wiicheukuu. 12Iskutak kaa utihtahkwaau anite e uhchi piihtukaanuyich aniyuu ihtaawiniyuu chii nachishkaweuch iinuuh e uhchi pimuhtahaayich e chii puunipimaatisiyich naapeu, che nituu chiskashtaatwaau. Ukaawii maak aniyaa naapeu chii peyakuyuu. Eukw maak aniyuu mikw kaa peyakushiikupanen ukusisa an iskweu. Chii mihchetiyuu maak aweyuu e chii wiicheukut e nituu chiskahaakanuyich aniyaa ukusisa. 13Iskutak maak Utipeyihchikeu wiyaapamaat aniyuu iskweu, naashch chii chistimaacheyimeu ekw kaa itaat, “Ekaawii maatuh.” 14Chii naatam aniyuu tehtinikaniyuu kaa taahtinahk ekw maak anichii kaa tahkunihkwaau aniyuu chii chipihchikaapuuch. Ekw Jesus kaa itwet, “Wanishkaa uschiniichuu.” 15Ekw an kaa nipit naapeu kaa uhchi asamitapit, kaa uhchi ayimit ekw Jesus kaau kaa miyaat aniyuu iskweu aniyuu ukusisa.
16Misiwe maak anit kaa tashitwaau awenichii chii sechisuuch ekw kaa chishtaachimaatwaau Chishemanituu e itwetwaau, “Chichii utihtikunuu e chisteyihtaakusit uchischiwehiichesuu. Kaye maak chii itweuch, Chishemanituu pechi wiichiheu utiiniim.” 17Misiwe maak e ispichiskamikaayich Judea aschiiyuu anite maak waaskaa chii pehtaakuniyuu Jesus taan kaa ihtit.
Jesus kaa aayimuumaat John Siikahaahtaacheu
Matthew 11.2-19
18John siikahaahtaacheu uchischinuhamuwaakan chii wiihtamaakuu misiwe chekwaayuu taan kaa ishi ihtuutamiyich Jesus. Ekw John kaa wiishaamaat niishu uchischinuhamuwaakanh. 19Kaa itishahwaat uyuu chechii ishi kakwechimaayich Utipeyihchikeu, “Eukw aa chiya Christ an chipaa takushinikupane maak eshkw che ashuwaapamaauchihtipane kutak chechii takushihk.” 20Ekw maak iskutak wetihtaatwaau Jesus chii iteuch, “John siikahaahtaacheu nipechi itishahukunaan chechii kakwechimitaahch, eukw aa chiya Christ an chipaa pechi itishahwaakanuu maak eshkw che ashuwaapamaauchihtipane chechii takushinit.” 21Mekwaach maak aniyeyuu Jesus chii miinuwaachiheu mihchetu aweyuuh, nanaahkuu e itaaspineyitwaauh, kaye machiahchaahkwa e chii wiiwiitishihwaat kaye e chii ihtuutawaat aniyuuh ekaa kaa waapahtamiyich chechii waapahtamiyich 22Ekw Jesus e nishkweushihaat chii iteu, “Chiiwekw, che wiihtamuwekw John taan kaa ishi waapahtamekw kaye taan kaa ishi pehtamekw. Wiihtamuwaahkw e waapahtamiitwaauh aniyuu ekaa uhchii waapahtamiyich, e pimuhteyich aniyuu ekaa uhchii pimuhteyitwaauh, kaye maak e payehchisiitwaauh aniyuu kaa ayaayich e maayaataniyich e umichiinaanuyich. Kaye e pehtamiyich aniyuu ekaa uhchii pehtamiyich. Kaye miin kaau e wanishkaayich aniyuu kaa nipiitwaau. Kaye miywaachimuwiniyuu e waawiihtamuwaakanuyich aniyuu kaa chistimaatisiyich. 23Shaweyihtaakusuu an awen ekaa che niyehtaaweyimikwe.”
24Iskutak maak kaa chistuhteyich aniyuu John kaa itishahwaat Jesus e ihtaayich ekw Jesus kaa aayimuumaat John anite e mihchetinaanuyich e itwet, “Awen kaa iteyimekw che waapamekw iskutak kaa nituwaapamekw John nete pakwaatiskamikaahch. Mwehch mashkushii taan e itaashtihch mikw anite e ishiiwech e ishi naweyaashtihch ekun e iteyihtaakusit awen naashch e nihiishaakuuchimaakanuut. Ekun aa kaa iteyimekw John e iteyihtaakusit. 25Awen maak kaa iteyimekw che waapamekw. Namui naanituu wii awen e miywaashpisut. Wesh anichii kaa miywaashpisutwaau naashch taapwe weyuutisiyuuch, anite maak chisheuchimaau uwaaskaahiikanimiihch ekute e ihtaatwaau. 26Awen maak uu anite kaa nituwaapamekw. Awen aa e uchischiwehiichesuut. Ehe, chiwiihtamaatinaawaau eukuu uchischiwehiichesuu John, wiya uste iteyihtaakusuu ishpishaat kutak awen kaa uchischiwehiichesuut. 27Eukuu John kaa aayimuumaakanuut anite Chishemanituu utayimuwinihch kaa itashtech,
Nika niikaanitishihwaau awen chechii ayeskuwiihkahk aniyuu meskanaayuu anit che pimuhteut.” 28Jesus maak chii iteu, “Chiwiihtamaatinaawaau, tahtu uchischiwehiichesuuch kaa pimaatisiitwaau namui uste iteyihtaakusuuch taan e iteyihtaakusiyich John siikahaahtaacheu. Yaapach maak an awen maauch nuuhtaash kaa iteyihtaakusit kihchikiishikw chisheuchimaawinihch uste wiya chisteyihtaakusuu ishpishaat John.”
29Misiwe maak aweyuu chii nituhtaakuu Jesus mechim aniyuu maauch kaa machaatisiitwaau kaa iteyimaakanuyich, aniyuu kiipaa kaa maamuushtinamiyich chisheuchimaau shuuliyaayuu kaa itaapatisitwaau. Eukunich uchii kaa nanihiihtamuwaakupanenich aniyuuh taan kaa ishi nituweyihtamiyich Chishemanituu, chii siikahaahtaakuwaakupanenich John. 30Ekw anichii Phariseech kaye anichii kaa chiskutamaachetwaau ayimihewin wiishuwewiniyuu chii aatuweyihtamuweuch aniyuu taan kaa itashumuweyich Chishemanituu. Namui uhchi nituweyihtamuch chechii siikahaahtaakutwaau John.
31Ekw maak Jesus kaa itwet, “Taan e iteyihtaakusitwaau anuhchiish awenichii anuhchiish kaa pimaatisiitwaau. 32Maau e iteyihtaakusitwaau. Mwehch awaashach anite e metuwetwaau wiiwiitamihch ekaa maak chii nanihiiwehiitutwaau taan waa ishi metuwetwaau. E tepwaatitutwaau, e itwetwaau, ‘E niipuunaanuuhch nichii wii ishi metuwenaan e chistuhcheyaahch e ihtiyaahch, namui maak kuuhchi niiminaawaau, kaye nichii nikamunaan e chistimaastaakuhkwaau nikamuwinh namui maak kuuhchi maatuunaawaau.’ 33Iskutak maak John siikahaahtaacheu kaa takushihk namui meshikum uhchi miichisuu, namui kaye uhchi minihkweu shuuminaapuuyuu, chichii itaawaau maak machiahchaahkwa e piihchishkaakut. 34Chii pechi takushinuu Iinuu Ukusisa e miichisut kaye e minihkwet. Chichii itwenaawaau maak, ‘Kanawaapamaahkw maa uu naapeu, nuwach kaa ukaasichimit kaye nuwach wiihchipeu, e uwiichewaakanit umachaatisiyuuh, kaye aniyuuh kaa maamuushtinamiyich Chisheuchimaau shuuliyaayuu kaa itaapatisitwaau.’ 35Anichii kaa taapwehtamuwaatwaau Chishemanituu ukachehtaaweyihtamuwiniyuu kata nuukuhtaauch upimaatisiiwiniwaahch taapwe e cheshtinaateyihtaakuniyich Chishemanituu ukachehtaaweyihtamuwin.”
Jesus kaa tuuminamiyich usith kaa machaatisiyich iskweu
36Jesus peyakwaau chii wiishaamikuu Pharisee Simon e ishinihkaasuyich chechii wiichimiichisuumaat, ekw maak kaa ituhtet anite uwaaskaahiikanimiihch ekw kaa waweyapit. 37Anit maak aniyuu utenaayuu chii ihtaau iskweu naashch e machaatisiit. Iskutak maak an iskweu piyehtahk Jesus e chii wiishaamaakanuyich anit aniyuuh Pharisee wiichiihch chechii miichisuyich, chii ituhteu anite, e chii ituhtataat e miywaashiyich puutayuu e asiniiyuuniyich, e wiihchimaakusiyich tuuminikaniyuu e piihchishtiniyich anit. 38Mekwaach maak Jesus e uhpimeshihk anit e miichisutwaau, an iskweu chii niipuu anite itehche Jesus usitiihch, e maatut. Aniyuu maak e uhchikuwaapit chii nipiyuuhtaaweu Jesus usith. Ekw kaa uchihchiihkunapit ustikwaaniyaapii e aapachihtaat e paahkusitenaat. Kaye maak e uchehtamuwaat kaye e tuuminamuwaat aniyuu e wiihchimaakusiyich tuuminikaniyuu. 39An maak Pharisee kaa wiishaamaat Jesus, iskutak wiyaapamaat aniyuu iskweu aniyuu e ihtiyich chii iteyimeu, “Chipaa chischeyimeu uyuu iskweu e ishpish machaatisiyich kaa taahtinikut taapwe e uchischiwehiichesuukwe.”
40Jesus kaa ayimihiikut e itikut, “Simon, chiwii ititin chekwaan.” Simon kaa itwet, “Chiskutamaachesuu, pechi wiihtamuu chekwaan an.” 41Ekw Jesus kaa tipaachimushtuwaat e itaat, “Chii niishuuch naapeuch e chii masinahamuwaatwaau naapeu shuuliyaayuu. Peyakw an niyaayinwaau mitaahtumitanuu chii masinahamuweu ekw an kutak niyaayinumitanuu. 42Namui maak uhchii taapishtwaakuu taapishkun aniyuu naapeu ekw kaa kaasiisinahamuwaat aniyuu taan chipaa ishpish taapishtwaakuu. Taan maak eukw aniyuuh e niishiyich naapeu uste che saachihiikut.” 43Simon maak chii iteu, “Kiipaa aniyuu maauch mistahii kaa masinahamaakut eukun aniyuu maauch che saachihiikut.” Jesus kaa itaat, “Ehe, taapwe.”
44Ekw aniyuu iskweu kaa kanawaapamaat Jesus ekw kaa itaat aniyuu Simon, “Chiwaapamaau aa uu iskweu taan e ihtit. Kaa pechi piihcheyaan utah chiichihch namui mechim kuuhchi pechi miin nipii chechii chishtaapautaayaan nisith. Wiya maak chii chishtaapautaau nisith uhchikuwaapuwinihch uhchi, kaye chii paahkuham nisith ustikwaaniyaapii e aapachihtaat. 45Kaa pechi piihcheyaan utah namui kuuhchi pechi uchemin, wiya maak namui eshkw uhchi puuniyuu e uchehtahk nisith kaa ishpish pechi piihcheuch. 46Namui kaye kuuhchi tuumiskunen nistikwaan, wiya maak chii pechi tuuminam nisith e wiihchimaakusiyich tuuminikaniyuu. 47Chiwiihtamaatin, aniyuu naashch e saachihiiwet ekut wehchi nuukuniyich mihchetu machihtwaawinh e chii wepeyihtamuwaakanuut. Awen apishiish kaa wepeyihtamuwaakanuut apishiish saachihiiweu.” 48Ekw Jesus kaa itaat aniyuu iskweu, “Chiwepeyihtamaakuun chimachihtwaawinh.” 49Anichii maak kutakach awenichii anit kaa apitwaau, chii maamituneyihtamuch uyeyuu e ititutwaau, “Chekw naapeu uu waawaach chechii wepeyihtamaachet machihtwaawinh.” 50Jesus maak chii iteu aniyuu iskweu, “Chitaapwehtamuwinh chipimaachihiikun. Maachiih maak chiyaameyihtamuwin che ayaayin.”
Currently Selected:
Luke 7: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
