Matthew 17
17
Jesus kaa miiskutuunaakusit
Mark 9.2-13; Luke 9.28-36
1Kutwaashch chiishikaau maak ishpish ekw Jesus kaa ituhtahaat Peter, James ekw maak John anite e ishpatinaayich wachiyuu mikw wiyawaau chechii ihtaatwaau. 2Mekwaach maak e kanawaapamaatwaau aniyuu Jesus utaashtamuhkuyuu chii kweschinaakuniyuu, muyaam piisimuhch chii ishpish chiihkaayaashtuweyuu kaye uchekwaanimh naashch taapwe chii piyekasch waapekaniyuuh mitun e waashtuweyikwaau chii ishinaakuniyuuh. 3Chii uhchi waapameuch maak Moses ekw maak Elijah e ayimihaayich aniyuu Jesus. 4Ekw Peter kaa itaat aniyuu Jesus, “Utipeyihchikeu, nuwach miyeyihtaakun utah chechii ihtaawaauhchipane. Naheyihtamane, nika ushihtaanaan nishtu tipinuushimunh, paahpeyakw che ayaayekw, chiya, Moses ekw maak Elijah.”
5Mekwaach maak eshkw e ayimit, kaskawanishkwa naashch e waasusuyich chii pechi akuchiniyuu anit tipiskuuch ishpimihch e ihtaatwaau, anite maak kaskawanishkuhch chii uhchi pehtaweuch aweyuu e itweyich, “Eukw uu Nikus kaa saachihiik, kaye naashch kaa naniheyihtamihiit. Nituhtawaahkw.”
6Iskutak maak anichii chischinuhamuwaakanich piyehtahkwaau aniyuu pehtaakusuwiniyuu, chii sechisuuch. E ishpish sechisitwaau maak chii utahtaamuunipayihuuch anite aschiihch. 7Ekw Jesus kaa pechi nituwaapamikutwaau, ekw kaa taahtinikutwaau e itikutwaau, “Pisikuukw ekaawii kushtaachikw.” 8E tastasaapitwaau maak namui aweyuu uhchi waapameuch mikw Jesus chii peyakukaapuuyuu.
9Mekwaach maak e pinisuwetwaau aniyuu wachiyuu, Jesus chii itikuuch yaaitei ekaa che wiihtamuwaatwaau aweyuu uyuu waapahtiiwewiniyuu kaa waapahtahkwaau paatish chii wanishkaanaakanuyichen Iinuu Ukusisa nipuwinihch uhchi.
10Ekw anichii chischinuhamuwaakanich kaa kakwechimaatwaau aniyuu Jesus, “Chekwaayuu wehchi itwetwaau anichii kaa chiskutamaachetwaau wishuwewiniyuu, niishtam Elijah che takushiniyich eshkw ekaa takushiniyich Christ, an kaa wiyaapamikut Chishemanituu.”
11Ekw Jesus kaa itaat, “Taapwe Elijah niishtam chika takushinuu, misiwe chekwaayuu ekaa kuiskunaakuniyich che kuiskunaakuhtaat. 12Mikw maak chiwiihtamaatinaawaau shaash miin e chii takushinit Elijah mikw namui uhchi nisituunaakuu iinuu. Mikw maak waa ihtuutuwaatwaau chii ihtuutaweuch. Ekun maak mwehch che ishpish wiisacheyihtamihaatwaau Iinuu Ukusisa.”
13Iskutak maak kaa pehtahkwaau anichii chischinuhamuwaakanich shaash miin e chii takushiniyich Elijah ekw kaa chischeyihtahkwaau eukw aniyuu John siikahaahtaacheu kaa aayimuumaakanuyich.
Jesus kaa miinuwaachihaat naapesha machiahchaahkwa e chii piihchishkaakuyich
Mark 9.14-29; Luke 9.37-43
14Iskutak maak kaau wetihtaatwaau aniyuu iinuu, naapeu chii pechi nituwaapameu aniyuu Jesus, e utisepayihut anit e ihtaayich e itaat, 15“Utipeyihchikeu, chistimaacheyim nikus. Uchipitikuu maan, naashch nanehkaateyimuu wesh mihchetwaau maan machishtawepayiyuu ishkutehch kaye mihchetwaau pakashtawepayiyuu nipiihch mekwaach aniyuu e uchipitakut. 16Aat maak nichii ituhtatuwaauch chichischinuhamuwaakanich, namui uhchii miinuwaachiheuch.”
17Jesus maak chii iteu aniyuu iinuu anit kaa ihtaayich, “Chiyawaau iinuuch anuhchiish kaa pimaatisiyekw ekaa kaa ayaayekw taapwehtamuwin kaye ekaa kaa kweskaatisiyekw, taan che ishpish ihtaayaan utah e ihtaayekw yaakw chechii nisituhtamekw. Taan che ishpish ashuwaapamitakuch ekw chechii ayaayekw taapwehtamuwin. Peshuwaahkw an naapesh.” 18Jesus maak chii chistahamuweu aniyuu machiahchaahkwa e itaat chechii nakataayich aniyuu naapesha. Tiiwehch maak chii wiiwiyuu an machiahchaahkw ekw kaa ati miinuwaatisiit an naapesh.
19Ekw aniyuu uchischinuhamuwaakan kaa pechi nituwaapamikut pahkaan kaa ituhtahiikut ekw kaa itikut, “Taanite wehch ekaa uhchii wiiwiitishihuuchiht an machiahchaahkw.”
20Ekw Jesus kaa itaat, “Kiipaa an ekaa ishpishaach chitaapwehtamuwinawaau. Taapwe chititinaawaau aat mikw apishaashiche chitaapwehtamuwin muyaam e ishpish apishiishit shuumin mastart kaa ishinihkaasut ishpishaache, wachii chika chii itashuwaaten, ‘Nete ishi aahchikaapuu.’ Chika pishichihiikuun maak. Mikw chekwaan waa ihtuutaman chika chii ihtuuten ayaayine taapwehtamuwin. 21Ekw maak mikw ayimihaate awen ekut mikw chechii wiiwiyich uyuu kaa iteyihtaakusiyich machiahchaahkwa. Namui miin ihtakuniyuu taan chechii ihtit awen.”
Jesus miin kaa aayimuutahk che nipahaakanuut
Mark 9.30-32; Luke 9.43-45
22Iskutak maak misiwe anichii chischinuhamuwaakanich kaa pechi nishtuwiitwaau anite Galileehch, Jesus chii iteu, “Shaash wiipach chika pachishtinaakanuuch iinuuch taan waa ihtuutuwaatwaau chechii ihtuutuwaatwaau Iinuu Ukusisa. 23Chika nipahaakanuu, mikw maak nishtu chiishikaau ishpish ekw che wanishkaat nipuwinihch uhchi.” Naashch maak chii macheyihtamuch anichii chischinuhamuwaakanich iskutak piyehtawaatwaau aniyuu e itweyich.
E chiishiihkaasunaanuuhch chisheayimiheukamikuhch
24Iskutak Jesus ekw maak aniyuu uchischinuhamuwaakan tekushihkwaau anite Capernaum, anichii kaa maamuushtinahkwaau shuuliyaayuu anite chisheayimiheukamikuhch che ishi aapataniyich chii pechi nituwaapameuch aniyuu Peter e itaatwaau, “Pachishtinam aa chichiskutamaachesiimuwaau aniyuu shuuliyaayuu anite chisheayimiheukamikuhch chipaa ishi aapataniyuu.”
25Ekw Peter kaa itaat, “Ehe.” Iskutak maak Peter e ati piihchet aniyuu waaskaahiikaniyuu, eshkw ekaa chii itaat chekwaayuu Jesus chii kakwechimikuu e itikut, “Simon, taan e iteyihtaman chiya. Awen chipaa miyeu shuuliyaayuu aniyuu Chisheuchimaau utah aschiihch kaa ihtaayich. Utawaashiimh aa e ihtaayich chipaa uhchipayiyuu shuuliyaayuu maak kutak aweyuuh e ihtaayich.”
26Ekw Peter kaa itaat, “Aniyuuh kiipaa kutak aweyuuh e ihtaayich chipaa uhchipayiniyuu.” Ekw kaa itikut Jesus, “Kiipaa miiskuch namui utawaashiim chika uhchi pachishtinamiyuuh shuuliyaayuu. 27Ekw maak namui kiipaa nituweyihtakuun niya chechii pachishtinamaan shuuliyaau anite chisheayimiheukamikuhch ishi. Mikw maak namui chika uhchi wii chishuwaahaanuuch anichii iinuuch. Ekush maak chikaa pachishtinenaanuu shuuliyaau. Naasipe maak nete che pakashtawehaman kiskanaapii. An maak niishtam names che uchikwaatat che utinat, anite maak utuunihch chika miskuwaayuu shuuliyaanaapiskwa, chika ishpishaau anit taapishkun e niishiihkw taan chipaa ishi pachishtinenaanuu shuuliyaau. Che ituhtataayin nete chisheayimiheukamikuhch che pachishtinaman an chipaa ishpish chiishiihkaasunaanuu.”
Currently Selected:
Matthew 17: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
