THEU NAI 10
10
Akhutama theu hai nai
1-2Naibaly Areng my Mosi teng y, “Nang ly samrang teng y chei ly kai ly rengrang nairachi Aikupta khumichi teng y patei ai nai py, nichi teng y patei pi nai rengrang naichi satang nangmychi katu chanauchi teng y thui pi thai ai nai py, kai ly samrang hawi ni i bangtangchi ai paleung tang hai nai ne. Kai ly Areng ne, nanai nangchi bawibawi pany u ai,” napi.
3Mosi nini Aron ly samrang teng y chei i ni teng y, “Hebrai chengchi i Areng Tameuh my, ‘Kai i khumichi ly kai ai chiu u ai nai molam y nang ly akhi veangveang ai bo a?,’ ” napi. 4Nang akhi veangveang ai na baly khawndam nang i pri theung y akhutama kanghu theu hai ai. 5Huni akhutamachi ly khaileaung aniu y pa-rei peung na ai i, ji tla nai khala y phra bawi y nai ngiereichi cha krai ai. Keung bawibawichi py cha krai ai. 6Nang i samrang yhmchi, bangtangchi i yhmchi hawi, nang i khumichi i yhm bawibawichira py akhutama kawi be ai. Hini ly amsi pajochi deung y niu vai y nai taham kasi ne, nanai Hebrai chengchi i Areng Tameuh my leu ang pei,” napi. Naibaly Mosi ly samrang teng i nai theu vui bo.
7Samrang i bangtangchi my samrang teng y, “Hini khumi ly achi ai patang hai veangveang ai bo a? Israela chengchi ly nichi i Areng Tameuh teng y chiu ai nai chei u sy. Nang i Aikupta pri phra nai pany y nai sai a?” nanai takeng u bo.
8Naibaly samrang my Mosi nini Aron ai palau teang bi i, nini teng y, “Nangchi i Areng Tameuh ai chiu ai nai chei u. Na i py chei ai naichi ly amichi mo?” nanai deng.
9Huna nai khala Mosi my, “Areng teng y apathyp nai pawi kasa u ai i, kaichi i miteaung, deaungdi, cho chanau hawi mi-i, beram, si kanghu bawibawichi hawi be ai nai tla,” nanai pathang.
10Samrang my, “Nangchi ly neampachychi hawi deaungdichi ai hawi ai nai kang pei y, nanai kai ly Areng teng y vaineng abeu bo! Nangchi ly tavai tiu ai tau u nai teu. 11Hunai kamta so u moh! Nangchi i Areng ai chiu ai nai teu, na baly neampachochi phai chei u khyh sy,” napi i, samrang ly mymy mo i nai Mosi nini Aron ai paryh vui bo.
12Naibaly Areng my Mosi teng y, “Aikupta pri y akhutamachi theu ai nai nang i kiu pheu; akhutamachi tym iy ji tla hai nai kamthum phra bawi y nai keungchi cha pawn ai mang,” napi. 13Hunaibaly Mosi ly mymy cheaungvawi pheu i, Areng my huni kani kheng vumtorei nisi mang ali aho hai; khawn khutawi baly huni nisi ali kamrawi y akhutamachi tym hai miuh nai ne. 14Huni akhutama kanghuchi ly pri verei y kawi na bo. Huna tanrei nawi nai akhutama kanghuchi ly jangni py awm vai y, vai mo mang py awm vai ai ny y.#Amt 9.2–3 15Akhutamachi ly khaileaung aniu y na pa-rei kawi bo; akhutama kanghuchi ly ji my taphra nai kamthum keung hawi athaichi cha nai ne. Aikupta pri verei i dengkeaung keung katheang kalenchira i ngam by y na bo.
16Huna nai khala samrang ly Mosi nini Aron ai palau kaliki i, “Kai ly nangni hawi nangchi i Areng Tameuh i mo y kamngo sa bo. 17Vai hini tlenrei nai ly Kai i kamngo pahen kyh ly dei ai nai pa-rei pajengra i nai lawi hai pi ai nai, nang i Areng Tameuh teng y kai i vui chiu so pi,” napi. 18Naibaly Mosi ly samrang teng i nai theu iy, Areng teng y chiu sa pi. 19Areng my pathang pi i, nisi ali aho nai ly nidym ali aho hai vui bo. Naibaly akhutama kanghu ly Aikupta pri verei y ha py by y pa-rei pangli kamsen mang y hm pawn i dei bebe bo. 20Na i py Areng my samrang i paleung tang cheng nai deaungkho y, Israela chengchi ai chei ai nai pei y taleang bi nai ne.
Khuveng theu hai nai
21Naibaly Areng my Mosi teng y, “Aikupta pri y khri pa-rei vengthi na ai nai, nang i kiu ly kani mang y pheu,” napi. 22Mosi ly kani mang y kiu pheu i, Aikupta pri y kani thomrei veng cheng bo.#Sam 105.28; Amt 16.10 23Aikupta khumichi ly leaung leaungrei aniu y nai deaungkho y, kani thomrei sala ly mymychi yhm i nai asyh-aryh thai y na pa-rei my awm. Na i py Israela chengchi i awm nai mang y ly khuveng theu hai y leang.
24Huna nai khala samrang ly Mosi ai palau teang bi i, “Areng ai chiu ai nai chei u; nangchi i neampachychi hawi cho deaungdichi py nang hawi vanrei Areng ai chiu ai nai chei u teu. Na i py nangchi i beramchi, mi-ichi hawi sichi ly hi y khai u jo, syn u moh,” napi.
25Mosi my, “Kaichi ly Areng Tameuh teng y bomverei leng patlum nai apathyp ai i, tawnbawichi syn y baly avo y. 26Hunai deaungkho y kaimychi i tawnbawi kanghuchi syn keng ai nai tla ai; kaichi ly tawnbawichi ai vawi takhra iy Areng teng y apathyp ai nai tla ai. Na i py huni meingtym y tym khala naini, mani tawnbawi ly mymy teng y apathyp ai nai tla ai mo, nanai pany pajau ai,” napi.
27 Areng ly samrang ai paleung tang hai cheng nai deaungkho y, Israela chengchi ai chei ai nai pei y bi nai ne. 28Ni ly Mosi teng y, “Kai i mei ka-niu i nai theu la! Nang ai niu bi moh sy! Kang niu bi nai kani y ly kang padei vui ai!” napi.
29Huna nai khala Mosi my, “Nang i leu pei nai kamta kai ai niu ali bi y leang bo mang,” napi.
Currently Selected:
THEU NAI 10: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
