THEU NAI 13
13
Chapo chalu ai vui takhra nai
1 Areng ly Mosi teng y, 2“Chapo chalu ngierei ly kai i vui khai takhra ai nai tla; Israela chengchi i chapo chalu ngierei hawi tawnbawi cho chuluchi ngiereichi py kai i vui ne,” napi.#Kati 3.13; Lk 2.23
Tako angbo abawi y nai pawi
3Naibaly Mosi my Israela chengchi teng y, “Areng ly pahen naira len parai nai hawimy, nangchi miseaung achei nai Aikupta pri i dengdairei, nangchi ai pahawi nai kani ai pany u; huni kani y angbo abawi nai tako cha ai nai tlo y. 4Nangchi ly Abiba napi nai angchei i lo theung i, hini kani y Aikupta pri i dengdairei theu u nai ne. 5Areng ly Kanan cheng, Hiti cheng, Amori cheng, Hivit cheng hawi Jebusi chengchi awm nai pri nangchi teng y pei ai, nanai nangchi i amsi pajochi hawi leu adeu hai typ bo. Mymy pahawi iy nangchi ly cha nei ai nai takang y iy, paitiu khuta hawi nai pri y tym u nai khala, saneng tleirei angchei i lo tleaung y, hini ly sa u jojo ai nai tla. 6Kani saryh tym pa-rei angbo abawi y nai tako cha chum baly, saryh kani y Areng ai tahm khai nai pawi sa ai nai tla. 7Kani saryh ryrei ly angbo abawi nai tako cha ai nai tlo y; nangchi i pri meingtym tleirei y angbo hawi angbo abawi nai tako awm moh sy. 8Huni Pawi sa amteaung nai kani y nangchi i chapochi teng y, ‘Aikupta pri i dengdairei achi theu nai khala, Areng my rengrang tlai sa pi nai sai pany jo nai pawi ne,’ nanai thui pi pachai ai nai tla. 9Areng ly sa thai naira len parai nai hawimy nangchi ai, Aikupta pri i dengdairei patheu nai deaungkho y, nangchi ly Areng i reita leu pei nai ai thui aninau ai nai pawi ly nangchi i kiu, ti y baly nangchi i lukatira y akawm nai ka-ma-ra sai sairei kamta, nangchi ai pany hai jo ai. 10Saneng tleirei hini kani tym baly pawi sa u jojo ai nai tla.
Chapo chalu
11“Areng ly nangchi hawi nangmychi i amsi pajochi teng y, pei ai nai adeu kheng nai Kanan pri y kang pahawi ai. Huni pri y tym nai khala, 12nangchi i tapen nai chapo chalu ngierei ly Areng teng y talam u ai nai tla. Nangchi i tawnbawi cho chalu katai ngierei py Areng i vui talam ai nai tla;#Theu 34.19–20; Lk 2.23 13na i py keaungngo kano kasau cho chalu katai, beram cho katai hawi angtheung iy atleu ai nai tla. Huna nai sa ai nai ngai y baly keaungngo kano kasau cho kaneaung khei vui ai nai tla. Nangmychi i chapo chaluchi ai py vang hawi atleu teang ai nai tla. 14Khawnvai kani y nang i chapo my, ‘Ati mana nai y hina nai sa lawh mo?,’ nanai angdeng lawh baly, ‘Areng ly sa thai naira len parai nai hawimy, achi ai Aikupta pri y miseaung achei naira i nai ang pahawi nai ne. 15Aikupta samrang ly paleung tang cheng iy achi ai theu ai nai pei y nai khala, Areng ly Aikupta pri i khumichi hawi tawnbawichi i cho chalu ngierei ai padei pi pawn bo. Huni molam y tawnbawi cho chalu ngierei ai ly Areng teng y apathyp nai ne; na i py achi chapo chalu ngierei ai ly vang hawi atleu teang nai ne. 16Areng ly sa thai naira len parai nai hawimy, achi ai Aikupta pri i dengdairei ang pahawi nai deaungkho y, hini pawi ly nang i kiu y akhen nai, ti y baly lu kati y abyn nai ka-ma-ra kamta ne i, nangchi ai pany hai jo nai ne,’ nanai thui pi ai nai tla,” napi.
Tamai angjawi hawi maiteaung khai pi nai
17Aikupta pri i samrang my Israela chengchi ai theu ai nai pei khala, Tameuh ly Philistin pri mang takoleu ai nai nichi ai pahawi y leang; huni lam ly kasa teu i py, Tameuh my, “Philistinchi hawi tavai atiu lawh baly paleung phra u ai i, nichi ly Aikupta pri mang y ali teang ai, nanai pany nai ne. 18Hunaibaly nichi ai daichi ka-vym lam mang dengdairei, pangli Kamsen ai ka-kawi ka-mi tako hai prei nai ne. Israela chengchi ly tavai atiu ai nai tavai ateaung kangym amthyp u bo.
19Josepha my Israela chengchi teng y leu taviu kheng nai kamta, Mosi ly Josepha i hiuchi syn nai ne; Josepha my, “Tameuh my nangchi ai atleu nai khala y, kai i hiuchi ai hi i nai syn u ai nai tla,” nanai leu taviu kheng bo. #AA 50.25; Josua 24.32
20Israela chengchi ly Sukkoth mary dengdairei khuleaung amsa u i, daichi ka-vym khujyh i Etham mary y tai u. 21Nichi ai pahawi nai thym y, Areng my kani thun y ly tamai angjawi hawi nichi i mo y lam patei i, vum y ly maiteaung kangvang hawi mo mang y to pi bo. Huna nai kamta vum kani thun nichi ly khuleaung chei thai nai ne. 22Kani thun y ly kani khengrei tamai angjawi my pahawi i, vum y ly maiteaung my nichi i mo mang lam patei pi jojo nai ne.
Currently Selected:
THEU NAI 13: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
