THEU NAI 7
7
1 Areng my Mosi teng y, Aikupta samrang i mo y nang ly Tameuh kamta py, ngamjo Aron ly nang i jeng y thui ai nai amo kamta py, kaimy lawm hai ai. 2Kaimy kang thui pi nai ngierei Aron teng y amti pi ai nai tla; ngamjo Aron my Israela chengchi Aikupta pri i theu ai nai samrang teng y hnei ai nai tla. 3-4Na i py kai ly samrang i paleung katang hai ai i, nang i leu tangai ai ny y. Aikupta pri y ka-jei awm parai nai rengrang tlaichi kapatei i py, pathi lawh y ai. Huna nai khala Aikupta pri y kai i sa thai naira patei iy, mipuichi tlang tleaung y pajeng naira len parai nai katym hai ai. Hunaibaly kai i khumi Israela cheng bawibawichi ai Aikupta pri i nai kapahawi ai. #Ataw 7.36 5Huna nai Aikupta chengchi ai kai i kiu pheu iy, Israelachi ai kapatheu nai khala, kai ly Areng ne, nanai Aikupta chengchi pany u ai,” napi. 6Mosi nini Aron ly Areng i leu pei nai kamta, samrang teng y thui pi bo. 7Samrang teng y thui pi nai neng khala Mosi ly saneng vui tajarei, Aron ly saneng vuitaja takaw thomrei awm nai ne.
Aron i cheaungvawi
8Naibaly Areng my Mosi nini Aron teng y, 9“Samrang my, ‘kai ym ai nai rengrang ka-ma-ra patei pi,’ ang napi lawh baly Aron teng y, ‘nang i cheaungvawi samrang i mo y aphi,’ tapi; huni cheaungvawi ly pavui lawm ai mang,” napi. 10Hunaibaly Mosi nini Aron ly Areng i leu pei nai kamta samrang teng y chei hawi bo. Aron ly samrang hawi ni i bangtangchi i mo y cheaungvawi aphi i, huni cheaungvawi ly pavui lawm vui bo. 11Huna nai khala samrang ly ni i khumi kachengchi hawi atam kakawpchi ai palau i, nichi py huni ka-tawm khyp sa u teang nai ne. 12Nichi py cheaungvawi aphi u teang i pavuichi lawm teang. Na i py Aron i pavui my huni khumichi i pavuichi ai pajawn chauchau vui bo. 13Samrang ly Areng my thui yb nai kamta paleung tang i, Mosi nini Aron i leu py tangai pi y nai ne.
Aikupta pri y pajengra tym hai nai
Thi Lawn hai nai
14Naibaly Areng my Mosi teng y, “Samrang ly paleung kyhchaw nai deaungkho y Israela chengchi theu ai nai pei y. 15Samrang ly khawn mang y Naing tavo y satla nai khala, nang ly ni teng y chei; pavui lawm nai cheaungvawi syn naimy tavo peang y ni hawi avum ai nai ajeng yb ba. 16Samrang teng y, ‘Hebrai chengchi i Areng Tameuh my, kai i khumichi ai daichi ka-vym y kai ai chiu ai nai chei hai, nanai thui pi ai nai kai ai ang pato nai ne; na i py nang ly vai khrairei tangai pi y lawh be. 17Samrang awi, Areng i leu pei nai ly ‘Kai ly Areng ne,’ nanai vai, kai i sa nai molam y nang pany ai, ang napi. Kai ly hini cheaungvawi hawi Naing tavo tui y pakhau baly, tui ly thi lawm be ai. #Amt 16.4 18Tavo theung i ngochi ly dei ai i, tavo jeungrei kaveaung mui nai deaungkho y, Aikupta khumichi ly huni tui nei pajau ai ny y,’ nanai samrang teng y thui pi,” napi.
19Naibaly Areng my Mosi teng y, “Nang ly Aikupta pri y awm nai tavo katheang kalen, tuikan hawi ang-chi salo y cheaungvawi hawi lilei sy; hunaibaly pri verei i tui ly thi lawn be iy dengkeaung tui kadengra hawi lengseaung laawmchira i tui bawibawichi py thi lawm vui ai,’ nanai thui pi,” napi.
20Naibaly Mosi nini Aron ly Areng my leu pei nai kamta sa hawi nai ne. Aron ly samrang hawi bangtangchi i mo y cheaungvawi syn naimy tavo tui y pakhau i, tavo tui ly thi lawm be bo. 21Tavo theung i ngochi ly dei bo; tui ly khri pa-rei mui nai deaungkho y Aikupta khumichi ly huni tui nei thai y nai ne. Aikupta pri meingtym tleirei y thi kawi na bo. 22Naibaly Aikupta pri atam kakawpchi py huna nai kamta sa u teang; samrang ly paleung tangra i Areng my thui pi nai kamta Mosi nini Aron i leu tangai y i, Israela chengchi ai patheu pi y. 23Samrang ly huni atitichi ai ati sai py ny y nai kamta palawn iy, mymy i yhm mang y vawi vui nai ne. 24Aikupta khumichi ly tavo tui nei pajau y nai deaungkho y, tuikan tai u bo.
25 Areng my tavo ai thi lawm hai nai ly kani saryhrei ne.
Currently Selected:
THEU NAI 7: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
