ATITI AWM ANGCHEI NAI 22
22
Tameuh my Abraham teng y Isaka ai talam ai nai leu pei nai
1Kanirei nai khala, Tameuh my Abraham ai cham ai nai ngai i mymy ly “Abraham!,” nanai palau. Abraham my, “Ne, kai hi y awm!” napi.#Heb 11.17–19
2Huna nai khala Tameuh my, “Nang i chapo leaungrei awm khyh nai, nang khrei keh nai chapo Isaka ai lo ly Moria pri y chei. Kaimy kang patei nai mawi salo y nang i chapo ai kai teng y apathyp,” napi.#2 Neng 3.1 3Pa-nyh kani khawn angthodyh Abraham ly apathyp ai nai i vui theng acheaung iy keaungngo kano kasau tleaung y tang i, mymy hawi vanrei Isaka ai py, miseaung leaung nyhrei ai py hawi; Tameuh my thui pi nai meingtym mang y amsa u bo. 4Pa-thom kani y Abraham ly khen i, huni meingtym ai palo parai naira y niu. 5Naibaly mymy ly miseaungni teng y, “Keaungngo kano kasau hawi hi y awm hawi jo. Kai hawi deaungdi ly huni mang y chei iy Tameuh ai chiu pajau baly nangni teng y kang vawi hawi ali teang ai mang,” napi.
6Abraham my Isaka ai ly theng apu hai i, mymy ly mai hawi acho syn. Nini ly tako hawi nai thym kha y, 7Isaka my, “Ngaai,” nanai palau.
Mymy ly “Ati mo deang awi?” napi.
Isaka my, “Mai hawi theng ly syn bo, na i py apathyp ai nai beram ly ma y mo?” nanai deng.
8Abraham my, “Tameuh my sai sairei ka-vo dawn pi ai mang,” napi. Naibaly nini ly vanrei tako hawi bi bo.
9Nini ly Tameuh my thui pi nai meingtym y tym nai khala Abraham ly maicham sa i salo y thengchi khai rym bo. Mymy ly chapo ai kawmrang iy maicham tleaung i theng salo y theng nai ne.#Jak 2.21 10Ni ai padei ai nai mymy ly acho aphiu bo. 11Hunai thym khala Areng i kani pri amtaw thau naimy kani mang dengdairei, “Abraham, Abraham!” nanai palau.
Mymy ly “Areng, kai hi y awm,” nanai pathang.
12Kani pri amtaw thai naimy, “Deaungdi cho ai no pei moh; ni ai ati sai py so hai moh. Vai nang ly Tameuh i leu tangai, tahm py khai, nanai kang pany bo. Ati mana nai mo nabaly nang ly nangmy i chapo leaungrei awm khyh nai ai pasai y nai deaungkho y ne,” napi.
13Abraham ly khen aki prei i, beram katai harei kabeng aleng theung taki y ave thleng nai niu. Naibaly mymy ly chei iy patiu i chapo i jeng y leng patlum nai talam bo. 14Abraham my huni meingtym ai ly “Areng my ang sa pi rym nai,” #22.14 ang sa pi rym nai; ti y baly niu, nanai sai ne. nanai amyn pathi bo. Vaini khrairei khumichi my, “Areng i mawi salo y mymy ly ang sa pi rym ai,” nanai thui u jojo nai ne.
15 Areng i kani pri amtaw thai naimy kani mang dengdairei tlen pa-nyh Abraham ai palau bi nai ly 16“Kai, Areng my leu kang pei; kai ly nang ai khri pa-rei amtheaung hai ai. Nang ly kaimy kang pei nai chapo leaungrei awm khyh nai ai malawn py, kai teng y talam ai nai pasai y nai deaungkho y, #Heb 6.13–14 17nang i kangpreangchi ly pangli spryh hawi kani mang i ka-sichi kamta kang peung hai ai. Nang i kangpreangchi ly mychi i paleung ka-echi ai eaung pajau ai.#Heb 11.12 18Nang ly kai i leu tangai nai saho y, nang i kangpreangchi ai amtheaung hai nai kamta, khaileaung pri y awm nai khumi cheng cheaungkhangchi my py, amtheaung naira nga ai nai kai teng y takeng u ai,” napi.#Ataw 3.25 19Naibaly Abraham ly mymy i miseaungni teng y chei ali teang i, mymy i awm nai meingtym Beraseba mang y vawi u ali teang bo.
Nahora i kangpreangchi
20Kra y nai sala y Abraham ly amnau Nahora i aju Milaka my deaungdi leaung tajarei tapen, nanai thai bo: 21Uz ly chalu ne, Buza ly amnau ne, Kemuela ly Aram i ampo ne. 22Keseda, Hazo, Pildash, Jidlaph hawi Bethuelachi i ampo ne; 23Bethuela ly Rebeka i ampo ne. Milaka my Nahora i vui deaungdi leaung tajarei tapen pi. Nahora ly Abraham i amnau ne. 24Nahora i aju katheang Reumah my Tebah, Kaham, Tahash hawi Maakachi ai tapen nai ne.
Currently Selected:
ATITI AWM ANGCHEI NAI 22: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
