ATITI AWM ANGCHEI NAI 39
39
Josepha hawi Potiphar i aju
1Vai ly Ismaela khumichi my Josepha ai Aikupta pri mang y hawi jo iy samrang i yhm y typ nai keung tavailu Potiphar teng y jo u bo. 2Areng my Josepha ai awm hai nai deaungkho y, ni i dawn naira tleirei y eaung hai jojo. Ni ly my i yhmkeung Aikupta khumi i yhm y awm bo.#Amt 7.9 3Areng my Josepha teng y awm hai nai deaungkho y mymy i kalop sa nai tleirei y eaung naira nga nai niu bo. 4Potiphar my khri pa-rei khrei nai y, mymy i kalop sa pi ai nai miseaung lu y khai bo; hunai deaungkho y mymy i yhmtheaung katuichi hawi mymy i yhm y kry ai nai Josepha teng y au nai ne. 5Huna khala i ka-so Areng my Josepha i saho y, huni Aikupta khumi i yhm dengtheung ai py, ni i kalop hawi li hlau kalopchi ai py amtheaung hai bo. 6Potiphar ly Josepha teng y ati cheaungkhangchi kry ai nai au chum nai bo i, my i cha nei nai kahm ny y baly, mymy ly ati sai py dawn bi y leang bo; Josepha ly tleungtlang apheung hawi iy mo hawi parai nai thawndeang leaungrei ne. 7Hunaibaly yhmkeung i aju my Josepha ai ly khrei tahau nai deaungkho y, i ahawi ai nai parawi bo. 8Josepha ly ngai y i, “Khen cham, kai i areng ly cheaungkhangra y kai ai ym nai ne. Mymy ly kai awm nai deaungkho y yhm i atitichi ly dawn ai nai aly by y. 9Yhmkeung my mymy i awm nai yhmtheaung katui ngiereichi kai teng y ang au nai ne. Mymy ly nang leaungrei ai ny y baly, kai teng y au y nai ati sai py by y; huna nai y Tameuh ngai y nai kamngo ly kai mana kasa lawh ai mo?” napi. 10Yhmkeung nu my kani tleirei parawi teu i py, Josepha ly akhi jojo nai ne.
11Na i py kanirei nai khala y, yhm y miseaungchi leaungrei py by y nai neng khala, Josepha ly mymy i kalop sa ai nai yhm y kun bo. 12Yhmkeung nu ly Josepha i baichu kangjiu ai amkhaw cheng iy, “Choh, kai hawi i ahawi sina,” napi. Na i py Josepha ly yhmkeung nu i kiu y baichu kangjiu atli su iy angpreng veng nai ne. 13Yhmkeung nu ly baichu kangjiu ai mymy i kiu y atli su iy angam mang y angpreng veng nai niu baly, 14miseaungchi ai palau iy, “Hi y khen u cham! Hini Hebrai khumi, kai i juvo my hawi nai my ly kaichi ai khumi aniu y nai sa lawh. Mymy ly kai i takun y ang kun iy kai ai pajang ai nai tau lawh: na i py kai athorei my kahang nai ne. 15Ni ly kaimy aeu nai deaungkho y angam mang y angpreng i, mymy i baichu kangjiu ly kai i sahawi y khai su bo,” napi.
16Yhmkeung Potiphar yhm y tym y ryrei ly yhmkeung nu my baichu kangjiu ai ly kry veangveang bo. 17Yhmkeung tym nai khala neampachy my, “Nang i hawi nai Hebrai miseaungcho ly kai i takun theung y kun iy kai ai pajang ai nai tau lawh. 18Na i py kaimy hang nai deaungkho y angpreng veng i, baichu kangjiu ai ly kai sahawi y khai su bo,” nanai amti pi.
19Yhmkeung ly Josepha i tlang tleaung y khri pa-rei kado theu i, 20Josepha ai patiu iy samrang i kado theu hai nai khumichi ai paeung nai theung y paeung jo bo. 21Na i py Areng my Josepha ai awm hai nai deaungkho y amtheaung hai; naibaly theaung kry nai keung teng y mymy ly meimai kahawi nga nai ne.#Amt 7.9 22Theaung kry nai keung my ly theaung tla naichi ai py, theaung theung i kalop cheaungkhangchi sa ai nai py, Josepha teng y au bebe. 23Theaung kry nai keung ly Josepha teng y kalop au nai bo y, mymy ly sai py dawn ai nai ngai bi y leang bo; ati mana nai mo nabaly Areng my Josepha ai awm hai nai deaungkho y, mymy i sa nai tleirei y eaung naira nga hai nai ne.
Currently Selected:
ATITI AWM ANGCHEI NAI 39: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
