ATITI AWM ANGCHEI NAI 46
46
Jakob hawi mymy i yhm dengtheungchi Aikupta pri y ang pyn nai
1Jakob ly mymy i vawnsai ngiereichi angvei iy khuleaung amsa i, Beraseba meingtym y tym baly, ampo Isaka i Tameuh teng y kapathypra talam bo. 2Huni vum ni i paleung mei y niu nai Tameuh my, “Jakob, Jakob!” nanai palau.
“Areng awi, kai ly hi y awm,” nanai pathang.
3Tameuh my, “Kai ly Tameuh ne, ngampo i Tameuh ne: nang ly Aikupta pri mang y chei ai nai jei moh; hu y nang i kangpreangchi ai kaimy khumi cheng kalen lawm hai ai. 4Kai ly nang hawi vanrei Aikupta pri mang y chei ai. Kaimy kypkyp ly nang i kangpreangchi ai hini pri y kang hawi ali teang ai. Nang dei nai neng tym pa-rei Josepha my ang kry ai,” napi.
5Naibaly Jakob ly Beraseba i dengdairei theu bo; chapochi ly ampo Jakob, mychi i ajuchi hawi cho chanauchi ai samrang Pharao my pato pi nai ka-richi atang hai bo. 6Nichi ly Aikupta pri mang y ang pyn nai khala y, Kanan pri y awm nai thym khala i nga nai yhmtheaungchi hawi tawnbawichi py syn u. Jakob ly my i kangpreang bawibawi ai mymy hawi vanrei:#Ataw 7.15 7mymy i chapo chaniuchi, katuchi hawi yhm dengtheung bawibawichi ai Aikupta pri y hawi nai ne.
8Jakob hawi vanrei Aikupta pri mang y ang pyn nai yhm dengtheungchi ly hinichi ne; Chapo kalen keh Ruben hawi 9Ruben i chapochi ly Hanoh, Pallu, Hezaron hawi Karami, 10Simeon hawi ni i chapochi ly Jemuela, Jamin, Ohad, Jakin, Zohar hawi Kanan cheng neampachy i tapen nai Saula ne. 11Levi hawi ni i chapochi ly kerashon, Kohath hawi Merarichi ne. 12Juda hawi ni i chapochi ly Era, Onan, Selah, Perez hawi Zerahchi ne. Huni theung i chapo Era hawi onan ly Kanan pri y dei vui bo. Pezer i chaponi ly Hezron hawi Hamula ni ne. 13Isakhar hawi ni i chapochi ly Tola, Puah, Jasub hawi, Simronchi ne. 14Zebulun hawi ni i chapochi ly Sered, Elon hawi Jaleelachi ne. 15Hini khumichi ly Mesopotamia pri y awm nai khala y Leah i tapen pi nai Jakob i chapochi hawi katuchi ne; chaniu Dinah ai kati y naimy, Leah dengdairei kangpreangchi ly phaipalyh leaung thomrei ne.
16Kad hawi ni i chapochi ly Zephon, Haki, Shuni, Ezabon, Eri, Arod hawi Arelichi ne. 17Aser hawi ni i chapochi ly Imnah, Isavah, Isavi, Beria hawi mychi i tuicho Serah ne. Beria i chaponi ly Hebera hawi Malkhiela ni ne. 18Hini leaung holai tariureichi ly Labana i chaniu Leah i miseaungnu Zilpah my tapen pi nai Jakob i kangpreangchi ne.
19Jakob i aju Rakeli i chapo leaung nyhrei ly Josepha hawi Benjamin ne. 20Aikupta pri y awm nai khala y Josepha ly chapo leaung nyhrei Manase hawi Ephraim nini ai nga nai ne. Huni ly Heliopoli mary i pathyp pi nai keung Potiphera i chaniu Asenath my tapen pi nai ne.#AA 41.50–52 21Benjamin i chapochi ly Bela, Bekera, Asabela, Kera, Naaman, Ehi, Rosh, Mupim, Hupim hawi Aradchi ne. 22Hini leaung holai palyhreichi ly Rakeli my Jakob i vui tapen pi nai kangpreangchi ne.
23Dan hawi ni i chapo Hushim. 24Naphtali hawi ni i chapochi ly Jazeela, Kuni, Jeza hawi Shilemchi ne. 25Hini leaung saryhreichi ly Ampo Labana my Rakeli i vui pei nai miseaung nu Bilaha my Jakob i vui tapen pi nai kangpreangchi ne.
26Jakob i lengngochi ai kati y naimy Aikupta pri y vawi nai Jakob i kangpreangchi ly leaung vui tariu saryh tariurei awm. 27Aikupta pri y Josepha i nga nai chapo leaung nyhrei ai kati baly, Aikupta pri y Jakob vawi nai khala y leaung vui saryhrei awm khypkhyp nai ne.#Ataw 7.14
Jakob hawi ni i dengtheungchi Aikupta pri y tym nai
28Jakob ly Josepha ai Kosen meingtym y mymychi hawi ka-vum sa ai nai Josepha teng y Juda ai pato man bo. Nichi ly Kosen meingtym y tym u nai ne. 29Josepha ly ampo hawi avum ai nai Kosen meingtym mang y ka-ri hawi chei bo. Ampo hawi avum nai khala, Josepha ly ampo ai takawi iy kra parai pa-rei my vo nai ne. 30Jakob ly Josepha teng y, “Kai ly nang i meimai niu iy nang heng jo nai py pany nai deaungkho y, vai kai ly dei i py paleung anyp bo,” napi.
31Naibaly Josepha my amjochi hawi ampo i takhra yhm dengtheungchi teng y, “Kaimy samrang teng y Kanan pri y awm nai kai i ampo i yhm dengtheungchi hawi, kai i amjochi ly kai teng y ang tym u bo, kanapi ai. 32Nichi ly beram typ nai keungchi ne iy, tawnbawichi kry ai nai tla. Nichi ly beramchi, mi-ichi hawi awm nai vawnsai bawibawichi syn u bo, nanai kathui pi ai. 33Samrang my nangchi ai ang palau iy nangchi ly ati kalop sa u mo? nanai ang deng baly; 34Kaichi ly amsi pajochi deung i dengdai vaini khrairei, beram hawi sichi khawn u nai ne, nanai thui pi. Huna khala naini nangchi ai Kosen meingtym y awm ai nai ang pei ai,” nanai thui pi bo. Aikupta khumichi ly beram typ nai keungchi ai paso nai deaungkho y, Josepha my huna nai kamta thui hai nai ne.
Currently Selected:
ATITI AWM ANGCHEI NAI 46: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
