ATITI AWM ANGCHEI NAI 50
50
1Josepha ly ampo i tlang tleaung y tabiu iy khri pa-rei vo naimy ampo i meimai y panam bo.#AA 47.29–31 2Naibaly Josepha ly ampo i veu ai veaung y pa-rei asi sa ai nai leu pei. 3Veu veaung y pa-rei kani vui palyhrei asi y padeung u bo. Aikupta khumichi ly Jakob ai kani vui saryhrei vo hai nai ne.
4Paleung kasi vo tangam nai rym nai khala y, Josepha my samrang i miteaung kehchi teng y, “Pahen parai naimy samrang teng y satang thai hai pi kyh; 5Ngaai my ang taviu nai ly “Kai dei baly Kanan pri y mymy i sa yb nai tapreaung y veu pavum ba, nanai leu ang pei nai ne. Hunai deaungkho y pahen parai naimy, ngaai i veu ai pavum ai nai pei kyh, pavum pajau baly kang vawi ali teang ryp ai, nanai thui pi u kyh,” napi.
6Josepha my leu taviu nai kamta miteaung kehchi ly samrang teng y thui pi nai khala, samrang my, “Nang i ngampo teng y leu adeu nai kamta chei ly ngampo ai up ba,” napi.
7Hunaibaly Josepha ly ampo ai pavum ai nai chei bo. Samrang i miteaung kehchi py, samrang yhm i miteaung kehchi py, Aikupta pri i lu sa nai miteaung kehchi py mymy hawi vanrei abang u nai ne. 8Josepha i yhm dengtheungchi, mymy i amjochi, ampo i yhm dengtheung bawibawichi hawi my i miso bawibawichi py, mymy hawi vanrei chei u teang nai ne. Nichi i cho deaungdichi, beramchi, mi-ichi, sichi naini Kosen y awm u jo. 9Keaungngo ka-richi, keaungngo atang nai risachi py, abang u nai deaungkho y khumi mipui khri pa-rei nawi parai nai ne.
10Nichi ly Jordan tavo nisi mang Atad napi nai choh ati nai meingtym y tym u nai khala y, paleung si nai vo hang u bo; huni meingtym Josepha my Jakob i vui kani saryhrei paleung si vo tangam nai pawi sa pi nai ne. 11Huni meingtym y awm u nai Kanan khumichi my Atad choh ati naira y khumichi i vo hang nai niu u nai khala nichi my, “Aikupta khumichi khri pa-rei vo tangam u na ly!” nanai thui u. Hunai deaungkho y Jordan tavo nisi mang i huni meingtym ai Abela Mizraim, #50.11 Abel Mizraim: Hebrai leu y “Aikupta khumichi i vo tangam naira” nanai sai ne. nanai amyn pathi bo.
12Hunaibaly Jakob i chapochi ly ampo my leu taviu nai kamta, 13ampo i veu ai Kanan pri mang y angjeaung u iy, Hiti cheng Ephron teng i Abraham my van nai khaileaung meingtym, Mamre nisi mang i Makapela y up u bo.#Ataw 7.16 14Josepha ly ampo ai up pajau bo nabaly, mymy hawi vanrei amjo amnauchi py, veu pavumra y abang nai khumi bawibawichi py, Aikupta pri mang y vawi ali teang bo.
Josepha ly amjo amnauchi ai paleung pahawi nai
15Ampo dei nai bo y Josepha i amjo amnauchi my, “Achi ly Josepha i tlang tleaung y patang naira tym hai nai molam y, vawitheung tha lawh na a? nanai jei pahui bo. 16Hunai deaungkho y nichi ly Josepha teng y savai pato i, 17“Kaichi ly nang i tlang tleaung y sa tamang nai deaungkho y pahen kyh ba,” nanai takeng ai nai ngaai my dei y rai khala ang taviu yb nai ne. Huna nai y ngaai i ym nai Tameuh i miseaung kaichi i sa tamang nai pahen kyh ba,” nanai thui hai bo. Josepha ly huna nai amti pi nai leu thai nai khala khri pa-rei vo bo.
18Naibaly Josepha i amjo amnauchi ly ni teng y chei u nai, ni i mo y lu meung naimy chiu u iy, “Nang i miseaung kaichi ly nang i mo y kang tym u bo,” napi.
19Na i py Josepha ly amjochi teng y, “Jei u reng moh; kai ly Tameuh i meingtym y awm nai ny y leang. 20Nangchi my kai i tlang tleaung y hawi y nai sa u teu i py, Tameuh my vaini khumi bawibawichi heng thai ai nai ka-vo sa pi nai teu bo. 21Nangchi ati sai py jei ai nai by y leang. Kaimy nangchi hawi nangchi i cho chanauchi ai kang kry pi ai mang,” napi. Huna nai kamta Josepha ly amjo amnauchi ai paleung khaw hai nai leu thui pi iy paleung pahawi nai ne.
Josepha dei nai
22Josepha ly Aikupta pri y ampo i yhm dengtheungchi hawi vanrei awm iy, mymy ly saneng chungvai atlo horei baly dei bo. 23Mymy ly Ephraim i chanauchi hawi katuchi ai niu nai pa-rei heng. Mymy ly Manase i chapo Makhira i chanauchi ai py tapawm ai nai nga nai ne. 24Josepha ly amjo amnauchi teng y, “Kai ly dei ai bo; kai by y i py Tameuh my nangchi ai ang kry takengkei ai. Nangchi ai hini pri i dengdairei ang patheu iy, Abraham, Isaka, Jakobchi teng y pei ai adeu nai pri mang y ang pahawi ai,” napi. 25Naibaly Josepha ly mymy i khumichi teng y, “Tameuh my nangchi ai huni pri y ang pahawi nai khala, nangchi hawi vanrei kai i hiu py syn ai, nanai kai teng y leu adeu u,” napi iy vaineng abeu hai bo.#Theu 13.19; Josua 24.32; Heb 11.22 26Naibaly Josepha ly saneng chungvai atlo horei awm baly, Aikupta pri y dei bo. Nichi my veaung y pa-rei asi sa iy, kheaung theung y khai me bo.
Currently Selected:
ATITI AWM ANGCHEI NAI 50: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
