JOHAN 6

Thong Pangaw Looh Dangnaw

(Mat 14.13-21; Mar 6.30-44; Luk 9.10-17)

1Tukoute Jesu tuh Tiberias Rili a ci hae paw Galilee Rili khuraw lang a zua. 2Jesu nynh ngeccih hae tungvaw a raepaw muihsahnaw kha a muih hae keiccuze ccungccaw zapi nynh a zui hae. 3Jesu tuh mua vawlan kae zah a zuitu hae ryte a haung hae. 4Judah hae poi athuapaw Kawtaw Poi tuh anae vae. 5Jesu nynh ngawdo zah amaw kalan oun cceih hae paw ccungccaw zapi kha he a muih tuh Filip kha, “E ccungccaw hae nynh a ae lan hae paw sanlou kha teilangmou ah re cih oh?” a cipya. 6E bya hynh Filip kha syntawtua khylan nynh a ho, pawccecize a cyi lanpaw kha amaw nynh phe a nypaw nynh thua. 7Filip nynh, “Hynh-e hae milu raveih nynh sanlou beihtaraw ccite a mue nawlan hae denari phuapia za ning mee re lan zemah zaw lan khyh,” a cipya. 8A zuitu lu kheit athuapaw Simon Peter a neitawpaw Andru nynh, 9“Barli sanlou phe pangaw te ngasaw taraw zaw ning a hoipaw imuapaw hein kya mang um; thuasalama hynhzeih ccungccaw hanlan azaw cih zawtou?” a cipya. 10Jesu nynh, “Ccungccaw hae kha haungsah oh,” a ci. Tuin kya lonua patae asae, tukeiccuze mih balynte thong pangaw loukaw acih hae paw ccungccaw hae tuh a haung hae. 11Jesu nynh sanlou kha lah zah lungtuabya a ho koute tuin kya a haung hae paw kha a nee hae. Tuhawte ngasaw kha mah ccungccaw hae nynh a ry hae zeih a nee hae. 12Ccungccaw hae phe a byn hae te Jesu nynh a zuitu hae kha, “Alaepaw a eihpaw kha azo khyh nawlan ccakhung oh,” a cipya hae. 13Tukeiccuze a aepaw ccungccaw hae kyate alaepaw kha ccakhung hae zah barli sanlou phe pangaw kya-e a eihpaw alaepaw tuh kee haw lae ning phe abeih. 14Jesu nynh a raepaw muihsahnaw kha tuh-e ccungccaw hae nynh he a muih hae tuh, “E paw tuh lae vawlan yn thua cih a ci hae paw profeh ccaccing nynh thua,” a ci hae.

15Ccungccaw hae tuh oun thua cih hae zah amaw kha siapharan lang yn nangse vae cih hae cipaw kha Jesu nynh a ny keiccuze a makhaete mua lang zya bua a cceih.

Jesu Tui vawlan A Cceih

(Mat 14.22-33; Mar 6.45-52)

16Zete yn thua tuh a zuitu hae tuh rili kalan a cceihbung hae. 17Kohlung lungkhu lang tee hae zah Kapernaum khua lang rili kha a zua hae. Phe moh vae zah Jesu tuh mih kalan thua loh khyh. 18Khise yn tho keiccuze tuileih a tho. 19Minmin nynh kohlung kha me thum me pali loukaw cia he a zaw hae te, Jesu tuh rili vawlan yn cceih zah kohlung kalan yn naekupaw kha a muih hae tuh a rih hae. 20Thuasalama Jesu nynh minmin kha, “Kamaw nynh ka thua, rih nan oh,” a cipya hae. 21Te Jesu tuh kohlung lungkhu lang lungtuate teesah hae zah, kohlung tuh a ccia rynaw hae varang langkhe sosoh mawte phe a thua.

Vaawlang e Sanlou

22Awkhualan khe rili khuraw lang um hae paw ccungccaw hae nynh tuin kya kohlung ccangkheit kyalya nynh a um cipaw kha a ny hae; te Jesu tuh a zuitu hae ryte kohlung kalan teebua khyh cipaw te zuitu hae lalouh nynh a cceih hae cipaw kha mah a ny hae. 23Tuhzemah Tiberias khua langte oun cceihpaw ccangpaw kohlung hae tuh Bawipaw nynh lungtuabya a ho koute sanlou a la aenaw hae hmin pe oun thua hae. 24Ccungccaw hae nynh Jesu te a zuitu hae tuh tuin kya um khyh hae cipaw kha a muih hae keiccuze minmin mah kohlung lungkhu lang tee hae zah Jesu kha ccung khylan Kapernaum khua lang a cceih hae.

Jesu tuh Hiinnaw Sanlou

25Minmin nynh Jesu kha rili khuraw langkhe muih hae zah, “Sazae, hohtuhmou hein kya na thua?” cite a khia hae. 26Jesu nynh, “Byaccaccing kae hopya oh, nanning nynh muihsahnaw hae na muih oh keiccuze kae hynh nae ccung khyh oh, sanlou na ae oh zah nae vueso keiccu nynh nae ccung oh. 27Arohthyapaw looh hanlan ryalah nan oh, Ccungccaw Ccapaw nynh nanning ae pya cih oh paw zungzae hiinnaw hanlan atynpaw looh elang ryalah oh; pawccecize Paaw Pachia nynh amaw kha tazeih phe khia vae paw nynh thua,” a ci. 28Minmin nynh, “Pachia nynh a rypaw ryalaw kae law nawlan, pawmou kae cyih cih?” cite a khia hae. 29Jesu nynh, “Pachia nynh a rypaw ryalaw tuh, amaw nynh a sawpaw kha na zyn lan oh paw kha nynh athua,” cite a khung hae. 30Tukeiccuze minmin nynh, “Kaening nynh kae muih zah nang kha kae zyn nawlan, paw muihsahnaw mou nae raepah cih? Paw rya mou na lah cih? 31‘A ae lan hae paw sanlou kha vaawlang te Pachia nynh a pya hae,’ cite azeiku hawte, kae minpaaw hae nynh manna kha ramkaw kya a ae hae,” a ci hae.#Exo 16.4, 15; Sam 78.24 32Jesu nynh, “Byaccaccing kae hopya oh, Moses nynh vaawlang e sanlou kha ae pya khyh oh; ka Paaw nynh vaawlang e sanlou ccaccing kha ae pya oh. 33Pawccecize Pachia kya-e sanlou tuh vaawlang te yn rungbung zah laephi ccungccaw hae kalan hiinnaw a pyatupaw nynh thua,” a cipya hae. 34Minmin nynh, “Bawipaw, tuh-e sanlou tuh zungzae oun pya,” a ci hae.

35Jesu nynh, “Kae tuh hiinnaw sanlou nynh ka thua. Ka kalan yn cceihpaw ccungccaw tuh a vuelaw boi vae lan khyh, kae yn zynpaw tuh a tuihaw boi vae lan khyh. 36Thuasalama nanning nynh phang nae muih oh zemah nae zyn khyh oh cite kae hopya vae oh. 37Paaw nynh yn pyapaw ccungccaw hae balyn nynh ka kalan oun cceih cih hae; ka kalan yn cceihpaw ccungccaw tuh kharouh ka dee boi lan khyh. 38Pawccecize kae tuh kamaw rynaw kha cyi khylan vaawlang te kae rungbung khyh, kae yn sawtupaw rynaw cyi khylan nynh kae rungbung. 39Kae yn sawtupaw nynh a rynaw tuh, kae yn pyapaw ccungccaw hae balyn kha lu kheit san zosah leite, nyathya nin kya thoosah lan hae paw nynh thua. 40Ka Paaw nynh a rypaw tuh, Ccapaw kha muih zah a zynpaw miakaw nynh zungzae hiinnaw a hoi nawlan hae nynh thua; nyathya nin kya minmin kha ka thoosah cih hae,” a ci.

41“Kae tuh vaawlang te yn rungbungpaw sanlou nynh ka thua,” cite a ho keiccuze Judah hae tuh a ccohkuh hae. 42Minmin nynh, “E paw tuh Josef ccapaw Jesu thua khyh tou? A paaw te a nung tuh ah ny oh paw khaw? Pawtemou, ‘Kae tuh vaawlang te kae rungbungpaw,’ a ciku?” a ci hae. 43Jesu nynh, “Naemaw te naemaw laku ccohkuh nan oh. 44Kae yn sawtupaw Paaw nynh a soih khyh lanze hum ccungccaw sanmah ka kalan thua kho lan khyh, ka kalan yn cceihpaw ccungccaw kha nyathya nin kya ka thoosah cih. 45‘Minmin balyn tuh Pachia nynh a ccangpya hae paw athua cih hae,’ cite profeh hae ccauh kya azeikuh. Paaw kya-e kha thae zah a ccangkuhpaw miakaw tuh ka kalan oun cceih hae.#Isa 54.13 46Pachia kyate yn thuapaw aning nynh Paaw kha a muih, aning laelan hum ccungccaw nynh san Paaw kha muih khyh. 47Byaccaccing kae hopya oh, a zynpaw ccungccaw tuh zungzae hiinnaw a hoi. 48Kae tuh hiinnaw sanlou nynh ka thua. 49Nae minpaaw hae nynh ramkaw kya manna kha a ae hae, thuasalama a chih hae. 50Vaawlang te yn rungbungpaw sanlou a aepaw miakaw tuh chih lan khyh hae. 51Kae tuh vaawlang te yn rungbungpaw ahiinpaw sanlou nynh ka thua. Humhung zemah e sanlou a aepaw tuh zungzae a hiin cih; kae nynh laephi hiinnaw hanlan ka pya lanpaw sanlou tuh ka saw nynh thua,” cite a hopya hae.

52Tukeiccuze Judah hae nynh, “Pawtemou e ccungccapaw nynh a saw kha aening ae lan oun pya kho cih?” cite mimaw te mimaw laku thawte a eikuh hae. 53Jesu nynh, “Byaccaccing kae hopya oh, Ccungccaw Ccapaw a saw kha na ae khyh oh zah a chii kha na nia khyh oh ze, nae kya hiinnaw na hoi khyh oh. 54Humhung zemah ka saw kha ae zah ka chii a neihpaw tuh zungzae hiinnaw a hoi, tuh-e paw tuh nyathya nin kya ka thoosah cih; 55pawccecize ka saw tuh looh ccaccing thua zah ka chii tuh niapaw ccaccing nynh thua. 56Ka saw kha ae zah ka chii a neihpaw tuh ka kya um zah kae mah a kya ka um. 57A hiinpaw Paaw nynh kae hynh yn saw zah Paaw liate kae ka hiin hawte, kae yn aepaw ccungccaw tuh kamaw liate a hiin cih. 58E tuh vaawlang te yn rungbungpaw sanlou nynh thua, nae minpaaw hae nynh manna sanlou kha mang a ae hae pite a chi hae hawte thua khyh; e sanlou a aepaw tuh zungzae a hiin cih,” a cipya hae. 59E hynh Jesu nynh Kapernaum khua sinakok kya a ccangpya lya hae nynh a ho.

Zungzae Hiinnaw Bya

60A zuitu hae patae nynh tuh-e bya he a thae hae tuh, “E ccangpyanaw tuh myarya aru, hum nynh mou a thaethya kho cih?” a ci hae. 61A zuitu hae nynh tuh-e kong a ccohku hae paw kha Jesu nynh he a nyh tuh minmin kha, “E bya nynh nae lung ae thangsah oh tou? 62Ccungccaw Ccapaw nynh langmaw a umtynaw lang a kaethungpaw kha na muih oh ze pawte athua cih? 63Hiinnaw a pyatu tuh Muisaw nynh thua, pynsaw tuh ccungkia khyh; nae kya ka hopaw bya hynh muisaw thua zah hiinnaw mah athua. 64Thuasalama nanning laku a zyn leipaw abang a um,” a cipya hae. Pawccecize Jesu nynh atakaw lya mawte a zyn lei hae paw tuh hum hae nynh athua hae cipaw te hum nynh amaw kha a phee cih cipaw kha phe a ny vae. 65Jesu nynh, “Hynh-e keiccuze ka Paaw nynh a ua khyh lanze hum sanmah ka kalan thua kho lan khyh cite phe kae hopya vae oh,” a ci.

66Tuin ccyh kyate a zuitu hae patae tuh nulang ki hae zah amaw ryte cceihkheih vae khyh hae. 67Tukeiccuze Jesu nynh zuitu hae lu haw lae ning kha, “Nanning so na cceihbua ry oh tou?” a cipya hae. 68Simon Peter nynh, “Bawipaw, hum kalan mou kae cceih cih? Nang nynh zungzae hiinnaw bya na hoi.#Mat 16.16; Mar 8.29; Luk 9.20 69Nang tuh Pachia kyate yn thuapaw Mi Thyaa nynh na thua cipaw kaening nynh kae zyn zah kae ny,” a cipya. 70Jesu nynh, “Nanning lu haw lae ning hynh kamaw nynh kae po khyh oh tou? Tuhzemah nanning lakuze lu kheit tuh satan nynh thua,” a ci. 71A honuathepaw tuh Simon Iskariot ccapaw Judas nynh thua; pawccecize aning tuh lu haw lae ning kyaze lu kheit mang athua pite Jesu kha a phee cih paw nynh thua.

Currently Selected:

JOHAN 6: ZB16

Highlight

Copy