Kufuma 1

ŴaIsraele ŵakuŵachitira nkhaza mu Eguputo

1Agha ndi mazina gha ŵana ŵa Yakhobe awo ŵakaruta ku Eguputo pamoza na wiskewo Yakhobe, waliyose na mbumba yakhe:#Mut 46.8-27 2Rubeni, Simiyoni, Levi na Yuda, 3Isakara, Zebuloni na Benjamini, 4Dani, Nafutali, Gadi na Ashere. 5Ŵa mphapu ya Yakhobe wose pamoza ŵakaŵa 70.#1.5 70: Bayibolo linyakhe la kale likuti 75 (muwone Mil 7.14). Yosefe mwana wakhe wakaŵa kuti wali ku Eguputo kale.

6Mukukhara mu zinyengo, Yosefe wakafwa, ndipo ŵana ŵanyakhe wose pamoza na muwiro ura nawo ŵakafwa. 7Kweni ŵa mphapu yawo ŵakababana na kwandana chomene. Iwo ŵakaŵa ŵanandi na ŵankhongono chomene mwakuti charu chikazura na iwo.#Mil 7.17

8Sono karonga muphya uyo kuti wakamumanya Yosefe chara, wakamba kuwusa charu cha Eguputo.#Mil 7.18 9Ndipo wakati ku ŵanthu ŵakhe, “Wonani ŵaIsraele mbanandi ndipo mbankhongono kuruska ise. 10Tiyeni tiŵachenjerere, mzire ŵandane. Para nkhondo yatizira, iwo ŵasazgikanenge na ŵarwani ŵithu ndipo ŵarwenge nase nkhondo na kufuma mu charu.”#Mil 7.19 11Ntheura ŵakaŵamikira ŵakuru ŵakuŵalaŵirira mwakuti ŵaŵasuzgenge na milimo yinonono. Ndipo ŵaIsraele wakamuzengera Faro misumba ya Pitomu na Ramesesi yakusungiramo vyakurya. 12Kweni apo ŵakaŵasuzganga chomene ntheura, ŵaIsraele wakandananga chomene na kutandazgikira kosekose. Ntheura ŵaEguputo ŵakamba kuŵatinkha na kopa chomene ŵaIsraele. 13Ndipo ŵakaŵateŵeteska ŵaIsraele mwa nkhaza. 14Wakachitiska kuti umoyo wa ŵaIsraele uŵe wakuŵaŵa na milimo yinonono pakuŵawumbiska njerwa na mu milimo yakupambanapambana yose ya mu minda. Mu milimo yawo yose yinonono, ŵaEguputo ŵakaŵateŵeteska ŵaIsraele mwa nkhaza.

15Ntheura karonga wa Eguputo wakuyowoya ku ŵazamba ŵa ŵaHebere awo mazina ghawo ŵakaŵa Shifura na Puva kuti, 16“Para mukuzambika ŵanakazi ŵa ŵaHebere, muŵawonenge apo ŵagona. Usange ndi mwana mwanarume, mumukomenge, kweni usange ndi mwana mwanakazi, mumureke waŵe wa moyo.” 17Kweni ŵazamba ŵara ŵakaŵa ŵakopa Chiuta ndipo ŵakachita chara ivyo karonga wa charu cha Eguputo wakaŵalangulanga. Ŵakaŵareka ŵana ŵanarume kuŵa ŵamoyo. 18Ntheura karonga wa Eguputo wakachema ŵazamba ŵara ndipo wakaŵafumba kuti, “Nchifukwa uli mwachita ichi? Nchifukwa uli mwareka ŵana ŵanarume kuŵa ŵamoyo?”

19Ŵazamba ŵara ŵakazgora Faro kuti, “Ŵanakazi ŵa ŵaHebere kuti ŵakuyana na ŵanakazi ŵa ŵaEguputo chara. Iwo mbankhongono ndipo ŵakubaba pambere ŵazamba ŵandafike.” 20Ntheura Chiuta wakaŵachitira makora ŵazamba ŵara ndipo ŵaIsraele ŵakandana na kuŵa ŵanandi chomene na ŵankhongono. 21Ndipo chifukwa chakuti ŵazamba ŵara ŵakopa Chiuta, iyo ŵakaŵapa zimbumba.

22Penepapo Faro wakapereka languro ili ku ŵanthu ŵakhe: Mwana mwanarume yose uyo wababika ku mwanakazi muHebere waponyeke mu mronga wa Nayelo, kweni mwana yose uyo ndi mwanakazi, mumureke waŵe wa moyo.#Mil 7.19

Currently Selected:

Kufuma 1: Tumbuka

Highlight

Copy