Kufuma 2

Kubabika kwa Mozesi

1Sono munthu yunji wa fuko la Levi wakatora mwanakazi wa fuko leneliri. 2Mwanakazi yura wakaŵa na nthumbo ndipo wakababa mwana mwanarume. Para wakawona kuti mwana ngwa kutowa, wakamubisa kwa myezi yitatu.#Mil 7.20; Heb 11.23 3Kweni para wakatondeka kumubisirizga, wakatora chitete cha marukwa na kuchiphaka phula. Wakaŵikamo mwana mukati mu chitete chira ndipo wakachiŵika mukati mu matete mu mphepete mwa mronga wa Nayelo. 4Mudumbu wa mwana yura wakimilira pataliko kuti wawone icho chingamuchitikira.

5Sono mwana mwanakazi wa Faro wakakhilira ku mronga kuti wakageze ndipo ŵateŵeti-kazi ŵakhe ŵakendanga mu mphepete mwa mronga. Iyo wakawona chitete chira mukati mu matete ndipo wakatuma ŵateŵeti-kazi ŵakhe kuya kachitora. 6Para wakajula, wakawona bonda. Iyo wakaliranga ndipo mwana mwanakazi yura wakaŵa na chitima na iyo ndipo wakati, “Uyu njumoza wa ŵabonda ŵa ŵaHebere.”

7Penepapo mudumbu wakhe wakati ku mwana msungwana wa Faro, “Kasi ndirute kuya kamutorerani mwanakazi muHebere kuti wamulererani bonda?”

8Mwana msungwana wa Faro wakati, “Ruta!” Ndipo mudumbu yura wakaruta kuya kachema nyina wa mwana. 9Mwana msungwana wa Faro wakati kwa iyo, “Tora mwana uyu na kundilerera ndipo ine ndizamkukuripira.” Ntheura mwanakazi yura wakatora bonda na kumulera. 10Wakati wakura mwana, wakiza nayo kwa mwana msungwana wa Faro uyo wakamutora kuŵa mwana wakhe. Ndipo wakamuthya zina lakuti Mozesi#2.10 Mozesi: Zina ili likupulikikwa nga ndi chiHebere kuti, “Kuzuwura”. pakuti wakati, “Chifukwa nkhamuzuwura mu maji.”#Mil 7.21

Mozesi wakuchimbilira ku Midiyani

11Zuŵa limoza Mozesi, wakati wakura, wakaruta uko kukaŵa ŵanthu ŵa fuko lakhe ndipo wakawona umo ŵakaŵagwiriskiranga milimo yinonono. Iyo wakawona muEguputo wakutimba muHebere, yumoza wa ŵabali ŵakhe.#Heb 11.24#Mil 7.23-28 12Wakalaŵiska uku na uku, ndipo wakati wawona kuti kulije munthu, wakamukoma muEguputo yura na kumujimira muchenga. 13Machero ghakhe wakarutaso ndipo wakawona ŵaHebere ŵaŵiri ŵakutimbana. Ndipo wakati kwa uyo wakananga, “Nchifukwa uli ukutimba muHebere munyako?”

14Iyo wakazgora, wakati, “Kasi ndi njani uyo wakakwimika iwe kuŵa wakutiwusa na wakuteruzga ise? Kasi ukukhumba kundikoma nga ndi umo ukakomera muEguputo?” Ntheura Mozesi wakopa ndipo wakaghanaghana kuti, “Nadi, icho nkhachita, chamanyikwa ku ŵanthu.”

15Para Faro wakapulika ichi, wakakhumba kumukoma Mozesi. Kweni Mozesi wakamuchimbira Faro ndipo wakaruta kuya kakhara mu charu cha Midiyani.

Zuŵa limoza Mozesi wakakhara pasi pafupi na chisimi.#Mil 7.29; Heb 11.27

16Musofi wa ku Midiyani wakaŵa ŵana ŵanakazi ŵankhonde na ŵaŵiri. Ŵana aŵa ŵakiza kuti ŵaneghe maji ndipo ŵakazuzga vyakumweramo maji kuti ŵamweske mberere na mbuzi za wiskewo. 17Kweni kukiza ŵaliska ndipo ŵakaŵachimbizga. Penepapo Mozesi wakawuka na kuŵathaska ndipo ŵakamweska mberere zawo. 18Para ŵakawerera kwa wiskewo Rewele, iyo wakaŵafumba kuti, “Nchifukwa uli mwawera luŵiro muhanya uno?”

19Iwo ŵakati, “MuEguputo ndiyo watovwira pakutithaska ku woko la ŵaliska ndipo wangutineghera na maji wuwo na kumweska mberere na mbuzi zithu.”

20Iyo wakafumba ŵana ŵakhe wakati, “Kasi iyo walinkhu? Kasi mwamurekerachi munthu mweneuyu? Muchemani, wize kuti warye chakurya.”

21Ntheura Mozesi wakazomera kukhara na Reweli mweneuyo wakamupa Zipora mwana wakhe kuŵa muwoli wakhe. 22Zipora wakababa mwana ndipo Mozesi wakamuthya Gerishomu, chifukwa wakati, “Ndili mulendo mu charu cha chilendo.”

23Ghakati gharutapo mazuŵa ghanandi karonga wa Eguputo wakafwa ndipo ŵaIsraele ŵakatampha mu uzga wawo, na kulirira wovwiri ndipo kulira kwawo kwa uzga kukakwerera kwa Chiuta. 24Chiuta wakapulika kutampha kwawo ndipo wakakumbuka phangano lakhe na Abrahamu, na Yisake, ndiposo na Yakhobe. #Mut 15.13-14 25Chiuta wakalaŵiska uzga wa ŵaIsraele ndipo wakaŵachitira chitima.

Currently Selected:

Kufuma 2: Tumbuka

Highlight

Copy