Kufuma 12

Jando la chiphikiro cha Paska

1 Fumu yikati kwa Mozesi na Aroni mu charu cha Eguputo,#Lev 23.5; Kup 9.1-5, 28.16; Mar 16.1-2 2“Mwezi uno uti uŵenge mwezi wakudanga. Ndiposo uti uŵenge mwezi wakudanga kwa chirimika kwa imwe. 3Yowoyani ku mpingo wose wa ŵaIsraele kuti: Pa zuŵa la khumi la mwezi uno, munthu waliyose wajitorere mwana-mberere kwakuyana na nyumba za ŵawiskewo, nyumba na nyumba mwana-mberere. 4Usange ŵa mu mbumba yimoza mbachoko kuti ŵarye mwana-mberere, panji zinyani, ŵakwenera kusangana na ŵazengezgani ŵawo mwana-mberere yura pakupenda chigaŵa chimoza icho munthu yumoza wangarya. 5Mwana-mberere uyo muti mujitorere wakwenerera kuŵa mwanarume wa chirimika chimoza, wambula kalema wakufuma ku mberere panji mbuzi. 6Mwana-mberere uyo mumusunge mpaka pa zuŵa la 14 la mwezi weneuwo. Ndipo mpingo wose na Israele wizakakome ŵana-mberere ŵawo na mise. 7Penepapo ŵizakatorepo ndopa zinyakhe na kuphaka mu mphepete mwa muryango uku na uku ndiposo na pa mphanjizgo ya pa muryango wa nyumba iyo ŵakuryeramo. 8Usiku wenewura, ŵizakarye nyama yakocha pamoza na chingwa chambula chirungo ndiposo na mphangwe yakuŵaŵa. 9Mungaryanga yiŵisi panji yakuphika kweni yakocha pa moto. Mutu yakhe, malundi ghakhe na vya mukati vyakhe navyo muwoche pa moto. 10Mungarekangapo na yimoza kufika na mulenje. Usange mwarekapo kufika na mulenje mukwenera kocha pa moto. 11Ndipo mukaryenge ntheura, mukaryenge luŵiroluŵiro uku mwajiphinya mumaluwunda ghinu, mwavwara viryato ku malundi ghinu, ndiposo mwakorera ndodo zinu ku mawoko ghinu. Ichi nchiphikiro cha Fumu.

12“Pakuti ndizamkudumula mu charu cha Eguputo mu usiku wenewura, na kukoma ŵana wose ŵa uŵere mu Eguputo kwamba ŵana ŵa ŵanthu mpaka ŵana ŵa vyakuŵeta. Nditi ndilange ŵachiuta wose ŵa Eguputo. Ine ndine Fumu. 13Ndopa izo zamkuŵa chimanyikwiro kwa imwe pa nyumba izo mwamkukharamo. Para nkhuwona ndopa ndizamkumujumphani. Ndipo chilengo ichi chakukoma kuti chamkumukhwaskani chara para nkhutimba ŵaEguputo. 14Zuŵa ili lamkuŵa chikumbusko kwa imwe ndipo mwamkulisunga nga ndi zuŵa la chiphikiro cha Fumu. Mu miwiro yinu yose mulisungenge nga ndi dango kwa muyirayira.”#Kuf 23.15, 34.18; Lev 23.6-8; Kup 28.17-25; Mar 16.3-8

Chiphikiro cha chingwa chambula chirungo

15“Mu mazuŵa ghankhonde na ghaŵiri mukaryenge chingwa chambula chirungo. Pa zuŵa lakudanga mukawuskengemo chirungo mu nyumba zinu. Pakuti yose uyo wati warye chilichose icho chili na chirungo kufuma pa zuŵa la kwamba mpaka pa zuŵa la chinkhonde na chiŵiri, wizamkuwuskikamo mu ŵaIsraele. 16Pa zuŵa lakudanga mukaŵenge na ungano wakupatulika ndiposo na zuŵa la chinkhonde na chiŵiri. Mlimo ureke kuchitika pa mazuŵa agha, kweni mlimo wa chakurya pera ndiwo uchitike. 17Ndipo mukwenera kusunga chiphikiro ichi cha chingwa chambula chirungo, chifukwa pa zuŵa leneliri ndipo nkhafumyira mawumba ghinu mu charu cha Eguputo. Ntheura mukwenera kulisunga zuŵa ili mu miwiro ghinu ghose nga ndi dango kwa muyirayira. 18Mu mwezi wakudanga, pa zuŵa la 14 la mwezi, pa nyengo ya mise, mukaryenge chingwa chambula chirungo mpaka pa zuŵa la 21 na mise la mwezi weneuwo. 19Pa mazuŵa ghankhonde na ghaŵiri mureke kusangika chirungo mu nyumba zinu. Pakuti yose uyo wati warye chilichose icho chili na chingwa wamkuwuskikako mu mpingo wa ŵaIsraele manyi ndi mulendo panji mwenecharu. 20Mungaryanga kanthu kachirungo chara. Kose uko mukukhara, mukaryenge chingwa chambula chirungo.”

Paska lakudanga

21Ntheura Mozesi wakachema ŵarara wose ŵaIsraele na kuti kwa iwo, “Rutani mukajisankhire ŵana-mberere panji mazinyani kwakuyana na mbumba zinu ndipo mukome kuti waŵe wa chiphikiro cha Paska. 22Mutore khunje la hisopo na kulibizga mu ndopa izo zili mu beseni ndipo muphake pa mphanjizgo ya pa muryango ndiposo na mu mphepete mwa muryango uku na uku. Paŵavye munthu wafumire kuwaro kwa nyumba yakhe kufikira na mulenje. 23Pakuti Fumu yizamkwendamo na kukoma ŵaEguputo. Para yizamkuwona ndopa izo zili pa mphanjizgo ya pa muryango ndiposo na mu mphepete mwa muryango uku na uku yizamkujumphilira muryango ura. Fumu yizamkumuzomerezga chara mungelo wakhe wakukoma kunjira mu nyumba zinu na kumukomani.#Heb 11.28 24Sungilirani kaluso aka nga ndi dango kwa imwe na kwa ŵana ŵinu kwa muyirayira. 25Para mwamkunjira mu charu icho Fumu yili kupangana kumupani mukasungenge kaluso aka. 26Ndipo para ŵana ŵinu ŵamkumufumba kuti, ‘Kasi kaluso aka kakung'anamula vichi?’ 27Imwe mukati, ‘Ndi sembe ya Paska la Fumu, pakuti yikathaska nyumba za ŵaIsraele mu Eguputo apo yikakomanga ŵaEguputo, kweni yikajumphilira waka pa nyumba zithu.’ ”

Penepapo ŵaIsraele wakasindama na kumulambira. 28Ntheura ŵaIsraele ŵakaruta na kuya kachita nga ndi umo Fumu yikalangulira Mozesi na Aroni.

Nyifwa za ŵana ŵa uŵere

29Na usiku pakati Fumu yikakoma ŵana wose ŵa uŵere mu charu cha Eguputo kwamba mwana wa uŵere ŵa Faro, uyo wati wakharenge pa chizumbe chakhe, mpaka mwana wa uŵere wa ŵaumikori uyo wakaŵa mu gadi la mdima. Ŵana wose ŵa uŵere ŵa vyakuŵeta nawo ŵati ŵafwe.#Kuf 4.22-31 30Faro, ŵateŵeti ŵakhe wose, na ŵaEguputo wose ŵakawuka na usiku pakati ndipo kukaŵa chitengero chikuru mu Eguputo chifukwa mukaŵavye nyumba nanga njimoza umo mukaŵavye ŵakufwa. 31Usiku wenewura, Faro wakachema Mozesi na Aroni na kuti kwa iwo, “Wukani, fumanimo mu ŵanthu ŵane, mose imwe na ŵaIsraele murutenge kuya kalambira Fumu nga ndi umo mwanguyowoyera. 32Torani mberere na mbuzi zinu na ng'ombe zinu nga ndi umo mwayowoyera, murutenge. Ndipo munditumbike na ine wuwo.”

33ŴaEguputo ŵakachichizga ŵaIsraele kuti ŵafumemo mu charu mwa luŵiroluŵiro pakuti wakati, “Mzire tose tifwe waka.” 34Ntheura ŵaIsraele ŵakatora nthimphwa yawo yambula kusazgako chirungo, mbale zawo zakukonkheramo, na kuvungirizga mu salu ndipo wayegha pa viŵegha vyawo. 35ŴaIsraele ŵakachita kwakuyana na mazgu gha Mozesi ndipo ŵakaromba ku ŵaEguputo vitowelo vya siliva na vya golide na vyakuvwara.#Kuf 3.21-22 36Ndipo Fumu yikachitiska kuti ŵaEguputo ŵakondwe nawo ŵaIsraele. Ndipo ŵakaŵapa ivyo ŵakaviromba. Ntheura ndimo ŵaIsraele ŵakaŵaphangira ŵaEguputo vyuma vyawo.

ŴaIsraele ŵakufuma mu Eguputo

37ŴaIsraele ŵakwenda pasi, ŵanarume pera kwambula kusazgirako ŵanakazi na ŵana ŵakukwana 600,000 ŵakawuka ulendo wawo kufumamo mu Ramesesi kuya ku Sukoti. 38Mpingo ukuru wa ŵanthu ŵa mitundu yinyakhe nawo ukaruta pamoza na ŵaIsraele ndiposo na vyakuŵeta vinandi chomene, mberere na mbuzi na ng'ombe. 39Ŵakaphika vingwa vipapati vyambula chirungo vya nthimphwa iyo ŵakafuma nayo mu Eguputo. Iwo ŵakawura kuŵikamo chirungo chifukwa ŵakachimbizgika kufuma mu Eguputo, ndipo wakatondeka kuziwurika nanga nkhunozgera mpako wa pa nthowa.

40Nyengo iyo ŵaIsraele ŵakakhalira mu Eguputo yikaŵa virimika 430.#Mut 15.13; Gal 3.17 41Ndipo pa umaliro wa virimika 430, pa zuŵa lenelira, mafuko ghose gha Fumu ghakafumamo mu charu cha Eguputo. 42Ukaŵa usiku uwo Fumu yikachezera kufumya ŵaIsraele mu charu cha Eguputo. Ntheura ndiwo usiku weneuwo ŵaIsraele wose wakuchezerera pakuyilindizga Fumu miwiro na miwiro.

Marango gha Paska

43 Fumu yikati kwa Mozesi na kwa Aroni, “Marango gha Paska ndi agha: Mulendo wareke kuryako, 44kweni muzga waliyose uyo wali kugulika na ndarama wangaryangako para iyo wakotoreka. 45Munthu uyo ngwa kupanjwa na muteŵeti waganyu ŵangaryako. 46Yikwenera kuryekera mu nyumba yimoza. Mureke kufumyira kuwaro nyama yinyakhe, ndipo mureke kuphyora viwangwa vyakhe.#Kup 9.12; Yoh 19.36 47Fuko lose la Israele likwenera kusunga ichi. 48Usange mulendo uyo wakukhara namwe wakukhumba kuchitira Fumu chiphikiro cha Paska, ŵanarume wose ŵa mu nyumba yakhe ŵakwenera kukotoreka. Penepapo ndipo wasendererenge na kuchita chiphikiro cha Paska, ndipo ŵati ŵaŵenge nga ndi ŵenecharu. Kweni munthu wambula kukotoreka, wareke kuryako. 49Kuŵenge dango limoza pera pa mwenecharu na mulendo uyo wakupanjwa namwe.” 50ŴaIsraele wose ŵakachita nga ndi umo Fumu yikalangulira Mozesi na Aroni. 51Mu zuŵa lenelira Fumu yikaŵafumiska ŵaIsraele mu charu cha Eguputo mu viwuru vyawo.

Currently Selected:

Kufuma 12: Tumbuka

Highlight

Copy