Mutendeko 26

Yisake wakuruta ku Gerara na ku Beyeresheba

1Mu charu chira mukaŵaso njara, pa dera pa njara yira yikaŵako kale mu mazuŵa gha Abrahamu. Ndipo Yisake wakaruta ku Gerara kwa Abimeleki karonga wa ŵaFilisiti. 2Sono Fumu yikamuwonekera Yisake ndipo yikati, “Ungakhiliranga ku Eguputo, kweni ukhare mu charu icho nditi ndikuphalire. 3Upanjwe mu charu chino, ndipo nditi ndiŵenge nawe. Nditi ndikutumbikenge chifukwa nditi ndipereke vyaru ivi vyose kwa iwe na ku mphapu yako. Ndifiskenge chirapo icho nkharapa ku ŵawuso, Abrahamu.#Mut 22.16-18 4Nditi ndandaniske mphapu yako nga ndi nyenyezi za kuchanya, ndipo nditi ndipereke ku mphapu yako vyaru ivi vyose. Mu mphapu yako ndimo mafuko ghose gha mu charu ghati ghatumbikikirengemo. 5Ndikutumbikenge chifukwa Abrahamu wakapulikira mazgu ghane na kusunga mazgu ghane, vilayizgo vyane, malangulo ghane na marango ghane.”

6Ntheura Yisake wakakhara ku Gerara. 7Para ŵanthu ŵa kwenekura ŵakamufumba vya muwoli wakhe, iyo wakati, “Ndi mudumbu wane.” Wakopanga kuŵaphalira kuti, “Ndi muwoli wane.” Wakaghanaghananga kuti panyakhe ŵenecharu ŵangamukoma chifukwa cha Rebeka, pakuti wakaŵa wakutowa chomene.#Mut 12.13, 20.2 8Yisake wati wakhara kura nyengo yitali, Abimeleki karonga wa ŵaFilisiti, wakalingizga pa dangazi. Wakalaŵiska kuwaro, ndipo wakawona Yisake wakusoŵera na Rebeka muwoli wakhe. 9Abimeleki wakamuchema Yisake, ndipo wakati, “Nadi, uyo ndi muwoli wako. Chifukwa uli ukuyowoya kuti, ‘Ndi mudumbu wane?’ ”

Yisake wakati kwa iyo, “Chifukwa nkhaghanaghananga kuti panyakhe ndingafwa chifukwa cha iyo.”

10Abimeleki wakati, “Kasi nchinthu uli icho watichitira ise? Yumoza wa ŵanthu ŵane mphanyi wakagona na muwoli wako, ndipo mphanyi ise watitorera mu majuvyo.” 11Ntheura Abimeleki wakachenjezga ŵanthu wose wakati, “Uyo wati wamukhwaske munthu uyu panji muwoli wakhe wati wakomeke.”

12Yisake wakaseŵa mbuto mu charu chira ndipo wakakorora vyakurya vinandi chomene chirimika chira, chifukwa Fumu yikamutumbika. 13Yisake wakaŵa musambazi, ndipo usambazi wakhe ukakulirakulira wakasuka wakaŵa na vyuma vinandi chomene. 14Wakaŵa na mberere na mbuzi, ng'ombe zinandi ndiposo na ŵateŵeti ŵanandi, mwakuti ŵaFilisiti ŵakaŵa nayo na sanje. 15Sono visimi vyose ivyo ŵateŵeti ŵa ŵawiske ŵakajima mu mazuŵa gha Abrahamu, ŵaFilisiti ŵakavijara na kuviwunda na dongo.

16Ndipo Abimeleki wakati kwa Yisake, “Fumako kwa ise, chifukwa waŵa na nkhongono chomene kuruska ise.” 17Yisake wakafumako kura, ndipo wakajintha mahema ghakhe mu dambo la Gerara na kukhara kwenekura. 18Yisake wakajimaso visimi vyeneivyo vikajimika mu mazuŵa gha Abrahamu ŵawiske, chifukwa ŵaFilisiti ŵakavijara Abrahamu wakati wafwa. Wakavithya mazina gheneagho ŵawiske ŵakavithya pakudanga.

19Ŵateŵeti ŵa Yisake ŵakajima mu dambo, na kusanga mbwiwi za maji. 20Ŵaliska ŵa ku Gerara ŵakamba kulimbana na ŵaliska ŵa Yisake ŵakati, “Maji agha ngithu.” Ntheura Yisake wakachithya chisimi chira “Eseki”,#26.20 Eseki: Zina ili likung'anamula kuti, “kulimbana”. chifukwa ŵanthu ŵakalimbana nayo.

21Ŵakajimaso chisimi chinyakhe, naposo pakaŵa kulimbana. Ntheura wakachithya zina la Sitina.#26.21 Sitina: Zina ili likung'anamula kuti, “urwani”. 22Wakafumako kura ndipo wakajima chisimi chinyakhe. Pa ichi pakaŵavye kulimbana. Ntheura wakachithya zina la Rehoboti,#26.22 Rehoboti: Mazgu agha ghakung'anamula kuti, “malo ghasani”. wakati, “Chifukwa sono Fumu yatinozgera malo, ndipo titi tandanenge mu charu.”

23Kufuma penepara Yisake wakakwerera ku Beyeresheba. 24Fumu yikamuwonekera ku usiku wenewura, yikati, “Ine ndine Chiuta wa ŵawuso Abrahamu. Ungopanga, chifukwa ndili nawe ndipo nditi ndikutumbikenge, na kwandaniska mphapu yako, chifukwa cha muteŵeti wane Abrahamu.” 25Ntheura Yisake wakazengapo jochero na kusopa Fumu. Wakajintha hema lakhe pa malo ghara, ndipo ŵateŵeti ŵakhe ŵakajima chisimi penepara.

Phangano pakati pa Yisake na Abimeleki

26Abimeleki wakaruta kwa Yisake kufumira ku Gerara, pamoza na Ahuzati nduna yakhe, na Fikolo murongozgi mukuru wa ŵasilikari ŵakhe.#Mut 21.22 27Yisake wakaŵafumba wakati, “Kasi mwizirachi kwa ine, pakuti mukunditinkha ndipo mwandichimbizga ku kwinu?”

28Iwo ŵakati, “Sono tikuwona nadi kuti Fumu yili nawe. Ntheura taghanaghana kuti paŵe chirapo pakati pa imwe na ise. Tichite phangano na iwe, 29kuti ureke kutichitira uheni, nga ndi umo nase tilije kukusuzgira iwe, nanga nkhukuchitira kanthu kaheni, kweni uweme pera. Tikakuzomerezga kuti urute mu mutende. Sono ndiwe wakutumbikika wa Fumu.” 30Ntheura Yisake wakaŵanozgera chiphikiro, ndipo iwo ŵakarya na kumwa. 31Na machero ghakhe ŵakawuka na mulenje chomene, ndipo ŵakarapa. Yisake wakaŵaperekezga ndipo ŵakapatukana mu mutende.

32Zuŵa leneilo ŵateŵeti ŵa Yisake ŵakiza ndipo ŵakamuphalira za chisimi icho iwo ŵakajima. Iwo ŵakati, “Taghasanga maji.” 33Yisake wakachithya zina lakuti Shiba. Ndicho chifukwa msumba ura ukuchemeka Beyeresheba mpaka sono.

Ŵawoli ŵa chilendo ŵa Esau

34Para Esau wakaŵa wa virimika 40 wakatora Yuditi, mwana wa Beyeri muHiti kuŵa muwoli wakhe, ndiposo na Basemati mwana wa Eloni muHiti. 35Ŵanakazi aŵa ŵakakwenyerezganga chomene mtima wa Yisake na wa Rebeka.

Currently Selected:

Mutendeko 26: Tumbuka

Highlight

Copy