Mutendeko 28

1Ntheura Yisake wakamuchema Yakhobe, wakamutumbika ndipo wakamulangula wakati, “Ungatoranga mwanakazi wakufuma mu ŵaKanani. 2Wuka, ruta ku Padani Aramu ku mbumba ya Betuwele, wiske wa ŵanyoko. Ukatore mwanakazi kwenekura, yumoza wa ŵana ŵa Labani mudumbu wa ŵanyoko. 3Chiuta Mwenenkhongono zose wakutumbike, wachite kuti ubabane na kukwandaniska mwakuti uŵe mzinda wa ŵanthu ŵanandi. 4Wakutumbike iwe na mphapu yako, nga ndi umo wakatumbikira Abrahamu, mwakuti uhare charu icho Chiuta wakapereka kwa Abrahamu mwenemumo ukukharamo sono nga ndi wakupanjwa.”#Mut 17.4-8 5Ntheura Yisake wakamutumizga Yakhobe ku Padani Aramu, kwa Labani mwana wa Betuwele muAramu, mudumbu wa Rebeka, ŵanyina ŵa Yakhobe na Esau.

Esau wakutora mwanakazi munyakhe

6Sono Esau wakawona kuti Yisake wamutumbika Yakhobe, ndiposo wamutuma ku Padani Aramu, kuya katora muwoli kwenekura. Wakawonaso kuti wamutumbika na kumulangula kuti wareke kutora muwoli mu ŵaKanani. 7Ndiposo wakawonaso kuti Yakhobe wapulikira ŵawiske na ŵanyina na kuruta ku Padani Aramu. 8Penepapo Esau wakawona kuti ŵanakazi ŵa ku Kanani kuti ŵakamukondweska Yisake chara. 9Ntheura Esau wakaruta kwa Ishimaele, mwana wa Abrahamu, ndipo kusazgirapo pa ŵawoli ŵakhe wakatoraso Mahalati mwana wa Ishimaele mudumbu wa Nebayoti.

Maloto gha Yakhobe pa Betele

10 Yakhobe wakawukako ku Beyeresheba, ndipo wakaruta ku Harani. 11Wakafika pa malo ghanji ndipo wakakhara penepara usiku ura chifukwa dazi likanjira. Wakatorapo limoza la mawe gha pa malo gheneghara kuŵa musamiro ndipo wakagona tulo pa malo gheneghara. 12Wakalota kuti makwerero ghafuma pasi pa charu kuya kafika kuchanya ndipo wakawona ŵangelo ŵa Chiuta ŵakukwera na kukhira mu gheneagho.#Yoh 1.51 13Fumu yikimilira pachanya pa makwerero ghara, yikati, “Ine ndine Fumu, Chiuta wa ŵawuso, Abrahamu na wa Yisake. Nditi ndikupenge iwe na mphapu yako charu icho wagonapo.#Mut 13.14-15 14Mphapu yako yizamkwandana nga ndi fuvu la charu. Ŵamkutandazgika kosekose, ku manjiliro gha dazi, ku mafumiro gha dazi, ku mpoto na ku mwera. Mafuko ghose gha mu charu ghamkutumbikikiramo mwa iwe na mphapu yako.#Mut 12.3, 22.18 15Ine ndili nawe, nditi ndikusungilirenge kose uko ukuruta, ndipo ndizamkukuwezgeraso mu charu ichi. Ndizamkukusida chara ndisuke ndichite icho ndakuyowoyera.”

16Yakhobe wakawuka mu tulo ndipo wakati, “Nadi Fumu yili mu malo ghano. Ine kuti ndangumanya chara.” 17Sono iyo wakofiwa wakati, “Nako nkhofya kwa malo ghano! Iyi nadi ndi Nyumba ya Chiuta, ndiposo ndi chipata cha kuchanya.”

18Yakhobe wakawuka na macherochero chomene, wakatora libwe ilo likawa musamiro na kulijintha kuŵa chikumbusko ndipo wakathirapo mafuta. 19Wakaghathya malo ghara zina la Betele. Kweni pakudanga zina la msumba likaŵa Luzi. 20Yakhobe wakarapa wakati, “Usange Chiuta waŵenge nane na kundisunga mu ulendo wane uwu, ndipo usange wandipenge chakurya na vyakuvwara, 21mwakuti ndiwerereso ku nyumba ya ŵadada mu chimango, apo ndipo Fumu yiti yiŵe Chiuta wane. 22Libwe ili, leneili ndalijintha nga nchikumbusko lamkuŵa Nyumba ya Chiuta, ndipo mu vyose ivyo mukundipa nditi ndipereke kwa imwe chigaŵa cha khumi.”

Currently Selected:

Mutendeko 28: Tumbuka

Highlight

Copy