Mutendeko 29

Yakhobe wakufika kwa Labani

1 Yakhobe wakarutilira ulendo wakhe, ndipo wakafika mu charu cha ŵanthu ŵa ku mafumiro gha dazi. 2Wakati walaŵiska, wakawona miskambo yitatu yagona mu mphepete mwa chisimi. Mberere na mbuzi zira ŵakazimweskanga maji ghakufuma mu chisimi cheneicho. Pachanya pa chisimi pakaŵa libwe likuru. 3Para mskambo wose wa mberere na mbuzi ukawunjikana penepara, ŵaliska ŵakagadabulangapo libwe pa chisimi na kuzimweska maji mberere zira. Para zamwa, wakaŵikangaso libwe lira mu malo ghakhe pachanya pa chisimi.

4Yakhobe wakaŵafumba ŵaliska ŵara wakati, “Mwa ŵabali ŵane, kasi kukwinu ndi nkhu?”

“Ndise ŵa ku Harani.”

5Yakhobe wakafumbaso wakati, “Kasi mukumumanya Labani mwana wa Nahoro?”

Iwo ŵakati, “Tikumumanya.”

6Wakaŵafumbaso wakati, “Kasi wali makora?”

Iwo ŵakati, “Wali makora ndipo wonani Rakelo, mwana wakhe mwanakazi yura wakwiza na mberere na mbuzi.”

7Iyo wakati, “Wonani, kuchali muhanya pakati, ndiposo kuti ndi nyengo yakuti muwerere na vyakuŵeta chara. Muzimweske maji mberere na mbuzi ndipo murute nazo kuya kaziliska.”

8Kweni iwo ŵakati, “Tingachita chara kwambula kuti mberere na mbuzi zose zawunjikika pamoza, ndiposo kwambula kuti tagadabulapo libwe pachanya pa chisimi. Apo pera ndipo tingazimweska.”

9Wachali kuyowoya nawo, Rakelo wakiza na mberere na mbuzi za wiske, pakuti ndiyo wakaziliskanga. 10Para Yakhobe wakamuwona Rakelo, mwana wa Labani mudumbu wa ŵanyina, wakagadabulapo libwe pachanya pa chisimi, ndipo wakamweska mberere na mbuzi za Labani. 11Yakhobe wakamuvumbatira Rakelo, ndipo wakalira mwakutumphuska mazgu. 12Iyo wakamuphalira Rakelo wakati, “Ndine mwana wa Rebeka, mudumbu wa ŵawuso.”

Ntheura Rakelo wakachimbira kuya kaŵaphalira ŵawiske. 13Para Labani wakapulika uthenga wa Yakhobe mwana wa mudumbu wakhe, wakachimbilira kuya kakumana nayo. Wakamuvumbatira na kumufyofyontha ndipo wakaruta nayo ku nyumba yakhe. Yakhobe wakamwandulira Labani vyose ivi vikachitika. 14Ndipo Labani wakati kwa iyo, “Nadi, ndiwe wa ndopa yane.” Ntheura Yakhobe wakakhara nayo mwezi umoza.

Yakhobe wakuteŵeta kuti watore Rakelo na Leya

15 Labani wakati kwa Yakhobe, “Nchakwenerera chara kuti unditeŵetere waka, pa chifukwa chakuti ndiwe wa ndopa yane. Undiphalire, kasi njombe yako yiŵenge vichi?” 16Labani wakaŵa na ŵana ŵasungwana ŵaŵiri. Murara wakaŵa Leya, ndipo munung'una wakhe wakaŵa Rakelo. 17Leya wakaŵa na maso#29.17 maso: Ŵanyakhe ŵakughang'anamula mazgu agha kuti Leya wakaŵa na maso ghaweme chomene kweni kuti wakaŵa wakutowa chara, apo Rakelo ŵakutowa chomene. ghambula kulaŵiska makora. Kweni Rakelo wakaŵa wakutowa chomene.

18Yakhobe wakamutemwa Rakelo. Ntheura wakati, “Nditi ndimuteŵeterani virimika vinkhonde na viŵiri kuti nditore Rakelo mwana winu muchoko.”

19Sono Labani wakati, “Nkhuweme kuti ndimupereke kwa iwe kwakuruska kuti ndimupereke ku munthu munyakhe kharanga nane.” 20Ntheura Yakhobe wakateŵeta virimika vinkhonde na viŵiri kuti watore Rakelo, ndipo vikawoneka kwa iyo nga ndi mazuŵa ghachoko waka chifukwa cha kumutemwa.

21Sono Yakhobe wakati kwa Labani, “Mundipe mwana winu kuti nditorane nayo, chifukwa nyengo yane yakwana.” 22Ntheura Labani wakanozgera chiphikiro, ndipo wakawunjika pamoza ŵanthu wose ŵa pa malo ghara. 23Kweni na usiku Labani wakatora Leya na kwiza nayo kwa Yakhobe, ndipo Yakhobe wakagona na Leya. 24(Labani wakapereka Zilipa muteŵeti-kazi wakhe kwa Leya kuti waŵe muteŵeti-kazi wakhe.) 25Na machero ghakhe kukati kwacha, Yakhobe wakawona kuti mwanakazi yura ndi Leya. Ntheura wakamufumba Labani wakati, “Kasi nchichi icho mwandichitira? Asi nkhamuteŵeteraninge kuti nditore Rakelo? Kasi mwandipusikirachi?”

26Labani wakati, “Kuti ndimo ghaliri marango ghithu chara, kutengweska munung'una pambere mwana wa uŵere wandatengwe. 27Ulindizge danga yisuke sabata ya chikondwerero cha ukwati yimare, ndipo nditi ndikupe na munyakhe wuwo usange wanditeŵetera virimika vinyakheso vinkhonde na viŵiri.”

28Yakhobe wakachita ntheura. Wakalindizga yikasuka sabata ya chikondwerero cha ukwati yikamara, ndipo Labani wakamupa Rakelo kuti waŵe muwoli wakhe. 29(Labani wakapereka Biliha muteŵeti-kazi wakhe kwa Rakelo kuti waŵe muteŵeti-kazi wakhe.) 30Ntheura Yakhobe wakagona nayo Rakelo nayoso ndipo wakamutemweska kwakuruska Leya. Yakhobe wakamuteŵetera Labani virimika vinyakhe vinkhonde na viŵiri.

Ŵana ŵa Yakhobe

31Para Fumu yikawona kuti Leya wakamutemwa chara, yikazomera kuti wababenge ŵana, kweni Rakelo wakaŵa chumba. 32Leya wakaŵa na nthumbo ndipo wakababa mwana mwanarume. Wakamuthya zina lakhe Rubeni#29.32 Rubeni: Zina ili likupulikikwa nga ndi chiHebere kuti, “kuwona mwana mwanarume” ndipo “wawona visuzgo vyane”. chifukwa wakati, “Pakuti Fumu yalaŵiska pa suzgo lane. Nadi sono mufumu wane wati wanditemwenge.” 33Wakaŵaso na nthumbo na kubabaso mwana mwanarume ndipo wakati, “Chifukwa Fumu yapulika kuti ine nkhutemwaka chara, ndimo yandipiraso mwana munyakhe mwanarume.” Ntheura mwana yura wakamuthya zina lakhe Simiyoni. 34Wakaŵaso na nthumbo na kubabaso mwana mwanarume ndipo wakati, “Sono nyengo iyi mufumu wane wati waskepereranenge nane, chifukwa ndamubabira ŵana ŵanarume ŵatatu.” Ntheura wakamuthya zina lakhe Levi. 35Wakaŵaso na nthumbo na kubabaso mwana mwanarume, ndipo wakati, “Pa nyengo iyi, nditi ndiyirumbe Fumu.” Ntheura wakamuthya zina lakhe Yuda. Ndipo wakareka kubaba.

Currently Selected:

Mutendeko 29: Tumbuka

Highlight

Copy