Mutendeko 31

Yakhobe wakuchimbira kwa Labani

1Sono Yakhobe wakapulika kuti ŵana ŵa Labani ŵakayowoyanga kuti, “Yakhobe watora vyose ivyo vikaŵa vya ŵadada ndipo wasanga chandulo cha usambazi wose uwu mu ivyo vikaŵa vya ŵadada.” 2Ndipo Yakhobe wakawona kuti Labani wakamulaŵiskanga na chitemwa nga mphakudanga chara.

3Penepapo Fumu yikamuphalira Yakhobe kuti, “Werera ku charu cha ŵasekuru ŵako na ku ŵabali ŵako, ndipo ine ndamukuŵa nawe.”

4Ntheura Yakhobe wakatuma munthu kuti ŵakacheme Rakelo na Leya kuti ŵakumane nayo ku thengere uko kukaŵa mskambo. 5Iyo wakati kwa iwo, “Nkhuwona kuti wiskemwe kuti wakundilaŵiska na chitemwa nga ndi umo wakachitiranga pakudanga chara. Kweni Chiuta wa ŵadada waŵa nane. 6Mukumanya kuti ndamuteŵetera wiskemwe na nkhongono zane zose. 7Ndipouli wiskemwe wandipusika ndipo njombe yane wasintha mpaka kakhumi, kweni Chiuta wakamuzomerezga chara kuti wandipweteke. 8Usange Labani wakatenge, ‘Za mathotomathoto ndizo ziti ziŵenge njombe yako’, mberere na mbuzi zose zikababanga za mathotomathoto. Ndipo usange wakatenge, ‘Za midyeleredyelere ndizo ziti ziŵenge njombe yako.’ Mberere na mbuzi zose zikababanga za midyeleredyelere. 9Ntheura Chiuta wakatora viŵeto vya wiskemwe na kundipa ine.”

10“Pa nyengo iyo mberere na mbuzi zikumithira, ine nkhalota ndipo nkhawona kuti ŵapepe awo ŵakakweranga pa mberere na mbuzi, ŵakaŵa ŵa midyeleredyelere, ŵa mathotomathoto, na ŵa maŵangamaŵanga. 11Penepapo mungelo wa Chiuta wakayowoya nane mu maloto wakati, ‘Yakhobe’ ndipo ine nkhati, ‘Ndine pano.’ 12Iyo wakati, ‘Inuska maso ghako ndipo uwone. Ŵapepe awo ŵakukwera pa mskambo ŵa midyeleredyelere, ŵa mathotomathoto na ŵa maŵangamaŵanga. Pakuti ndawona vyose ivyo Labani wakukuchitira iwe. 13Ine ndine Chiuta uyo wakakuwonekera ku Betele, uko ukaphakazga mafuta pa mzati kuŵa chikumbusko na kurapa kwa ine. Sono wuka ufumemo mu charu ichi na kuwerera ku charu icho ukababikirako.’ ”#Mut 28.18-22

14Rakelo na Leya ŵakamuzgora wakati, “Kasi tichali na phande panji chiharo kufuma mu nyumba ya ŵadada? 15Kasi ŵakutizgora ise nga mbalendo chara? Iwo ŵali kutiguliska, ndipo wali kugwiriskira nchito ndarama izo zikaperekeka pa ise. 16Usambazi wose uwo Chiuta wafumyako ku ŵadada ŵithu, ngwa ise na ŵana ŵithu. Ntheura sono chitani, chose icho Chiuta wamuyowoyerani.”

17Ntheura Yakhobe wakawuka ndipo wakakwezga ŵana ŵakhe na ŵawoli ŵakhe pa ngamila. 18Wakakhwema viŵeto vyakhe vyose, na vyose ivyo wakasanga mu Padani Aramu, kuti warutenge kwa wiske Yisake mu charu cha Kanani. 19Labani wakati waruta kuya kasenga maweya ya mberere na mbuzi zakhe, Rakelo wakiba ŵachiuta ngoza ŵa mu nyumba ya wiske. 20Yakhobe wakamupusika Labani muAramu pakureka kumuphalira kuti wati wamurekenge. 21Iyo wakachimbira na vyose ivyo wakaŵa navyo. Wakawuka na kwambuka mronga wa Yufurate, ndipo wakarazgira ku charu cha mapiri gha Gileyadi.

Labani wakurondezga Yakhobe

22Pa zuŵa la chitatu Labani wakaphalirika kuti Yakhobe wachimbira. 23Labani wakatora ŵabali ŵakhe pamoza nayo, na kurondezga Yakhobe kwa mazuŵa ghankhonde na ghaŵiri ndipo wakamurondezga pafupiko waka nayo kufika ku charu cha mapiri gha Gileyadi. 24Kweni Chiuta wakiza kwa Labani muAramu mu maloto na usiku, ndipo wakati kwa iyo, “Chenjera, ureke kuya kayowoya kwa Yakhobe nanga ndi lizgu liweme panji liheni.” 25Labani wakaya kamusanga Yakhobe. Sono Yakhobe wakaŵa kuti wajintha hema lakhe mu charu cha mapiri chira. Labani nayo na ŵabali ŵakhe ŵakajintha mahema mu charu cha mapiri cha Gileyadi.

26 Labani wakati kwa Yakhobe, “Kasi wachitirachi ntheura pakuti undipusike na kutora ŵana ŵane ŵanakazi nga mbamikori awo ŵayoreka na nkhondo? 27Chifukwa uli ukachimbira waka ku ubende na kundipusika, ndipo ulije na kundiphalira? Undiphalirenge mphanyi nkhakuperekezga mwakukondwa na zisumu, pakulizga kalimba na bango. 28Ndipo ukarekerachi kundizomerezga kuti ndilayirane na ŵazukuru ŵane na ŵana ŵane? Ukachichita chinthu cha kupusa. 29Ndili nazo nkhongono zakukuchitira uheni. Kweni Chiuta wa ŵawuso wanguyowoya mu usiku uwo waruta, wanguti, ‘Chenjera, ureke kuya kayowoya kwa Yakhobe nanga ndi lizgu liweme panji liheni.’ 30Nkhumanya kuti ukenera nadi kuwukako chifukwa wakhumbisiska kuwerera kukwinu. Kweni kasi nchifukwa uli ukiba ŵachiuta ŵane ŵa mu nyumba?”

31Yakhobe wakamuzgora Labani wakati, “Ine nkhopanga chifukwa nkhaghanaghananga kuti mundipokenge ŵana ŵinu mwa nkhongono. 32Yose uyo mumusangenge kuti wali na ŵachiuta ŵinu wati wakomeke. Panthazi pa ŵabali ŵithu, murongore icho nchinu cheneicho ndili nacho, ndipo mutore.” Kweni Yakhobe wakamanya chara kuti ndi Rakelo uyo wakiba ŵachiuta ŵara.

33Ntheura Labani wakanjira mu hema la Yakhobe, na mu hema la Leya, ndiposo na mu hema la ŵateŵeti-kazi ŵaŵiri ŵara, kweni wakaŵasanga ŵachiuta ŵakhe chara. Ndipo wakati wafuma mu hema la Leya, wakanjira mu hema la Rakelo. 34Sono Rakelo pa nyengo iyi wakatora ŵachiuta ŵara na kubisa mukati mu chiskaro chakuŵika pa ngamila, ndipo wakakharapo. Labani wakapenja mu hema lose kweni kuti wakaŵasanga chara. 35Rakelo wakaŵaphalira ŵawiske wakati, “Sekuru wane, mureke kukwiya pakuti ndareka kuwuka panthazi pinu, chifukwa ndili makora chara nga ndi umo kukuŵira na ta ŵanakazi.” Ntheura wakapenjapenja kweni kuti wakaŵasanga chara ŵachiuta ŵara.

36Penepapo Yakhobe wakakaripa, ndipo wakamuchenya Labani wakati, “Kasi ndamunangirani vichi? Kasi kwananga kwane ndi nkhu, apo mwandilonda na kutukutwa kwa ntheura. 37Nangauli mwapenjeseska mu ŵakatundu ŵane wose, kasi mwasangamo icho nchinu? Icho mwachisanga muchiŵike panthazi pa ŵabali ŵane na ŵabali ŵinu, mwakuti ndiwo ŵapumule mrandu pakati pa ise ta ŵaŵiri. 38Ndakhara namwe virimika 20. Mberere na mbuzi zinu zanakazi kuti zili kuphorozapo chara, ndiposo ndindaryepo mberere zanarume za mu miskambo yinu. 39Iyo yikaparurika na vikoko kuti nkhiza nayo kwa imwe chara, kweni nkhaharizgirapo ndekha. Mukandipa mrandu para zikibika na muhanya panji na usiku. 40Ntheura ndimo nkhaŵira. Na muhanya chithukivu chikandocha, ndipo na usiku nkhasuzgika na chiwuvi. Tulo nato tukawukamo mu maso ghane 41chifukwa cha ŵana ŵinu ŵanakazi ŵaŵiri aŵa. Nkhateŵeta pakuliska mberere na mbuzi zinu virimika vinkhonde na chimoza. Ndipouli njombe yane mwasintha kakhumi. 42Warekenge kuŵa nane Chiuta wa ŵadada, Chiuta wa Abrahamu, Chiuta mweneuyo Yisake wakamopa, mphayi mukandiwezga waka wambula kanthu. Chiuta wakalaŵiska suzgo yane na milimo ya mawoko ghane, ndipo usiku uwo wajumpha wangumuchenyani.”

Phangano pakati pa Yakhobe na Labani

43 Labani wakamuzgora Yakhobe wakati, “Ŵana ŵanakazi aŵa mbane, ŵana ŵawo nawo mbane, mberere na mbuzi zose nzane, na vyose ivi ukuviwona nvyane. Kweni kasi ndingachitachi muhanya uno ku ŵana aŵa ŵanakazi panji ku ŵana ŵawo awo ŵali kubaba? 44Ntheura iwe na ine, zanga tichite phangano, kuti liŵe ukaboni pakati pa ine na iwe.”

45Penepapo Yakhobe wakatora libwe na kulimika kuŵa chikumbusko. 46Yakhobe wakaŵaphalira ŵabali ŵakhe kuti ŵawunganye mawe. Iwo wakatora mawe na kuwunjika mulu. Ndipo wakaryera chakurya pa mphepete pa mulu wa mawe ghara. 47Labani wakawuthya mulu ura Yegara Sahaduta,#31.47 Yegara Sahaduta: Mu chiAramayiki, mazgu agha ghakung'anamula kuti, “mulu wa ukaboni”. kweni Yakhobe wakawuthya Galede. 48Labani wakati, “Mulu wa mawe agha ndi ukaboni pakati pa ine na iwe muhanya uno. Ndicho chifukwa malo ghara ghakathika Galede.” 49Chikumbusko chira chikathyikaso Mizipa, chifukwa Labani wakati, “Fumu ndiyo yiŵe msungiliri pakati pa iwe na ine, para tili kutali yumoza na munyakhe. 50Para uti uŵasuzge ŵana ŵane ŵanakazi, panji para uti utoreso ŵawoli ŵanyakhe pa dera pa ŵana aŵa, nanga uli ine kuti ndamkumanya chara, kumbuka kuti, Chiuta ndi kaboni pakati pa ine na iwe.” 51Sono Labani wakamuphalira Yakhobe kuti, “Wona mulu uwu wa mawe na chikumbusko ichi, ivyo ndimika pakati pa ine na iwe.” 52Mulu wa mawe agha na chikumbusko ichi ndi ukaboni uwo ukuti, “Ndizamkujumphapo chara pa mulu uwu wa mawe pakwiza kwa iwe na nkhondo, ndiposo nawe kuti wizamkujumphapo chara pa mulu wa mawe agha, nanga ndi chikumbusko ichi, pakwiza kwa ine na nkhondo. 53Chiuta wa Abrahamu, Chiuta wa Nahoro, Chiuta wa ŵasekuru, ndiyo weruzge pakati pithu.” Ntheura Yakhobe wakarapira mwa Chiuta uyo wiske Yisake wakamopanga. 54Sono Yakhobe wakapereka sembe pa phiri lira, ndipo wakachema ŵabali ŵakhe kuti ŵarye chakurya. Ŵakati ŵarya, ŵakagona penepara pa phiri. 55Na machero ghakhe na mulenje, Labani wakawuka, wakavumbatira ŵazukuru ŵakhe na ŵana ŵakhe ŵanakazi pakuŵalayira, ndipo wakaŵatumbika. Ntheura Labani wakawukapo na kuwerera ku kwakhe.

Currently Selected:

Mutendeko 31: Tumbuka

Highlight

Copy