Mutendeko 40

Yosefe wakung'anamulira maloto gha ŵakayidi

1Yikati yarutapo nyengo, murara wa awo ŵakanozganga vyakumwa pamoza na uyo wakaphikanga vingwa kwa karonga wa ku Eguputo, wakanangira sekuru wawo, karonga wa ku Eguputo. 2Faro wakaŵakwiyira nduna zakhe ziŵiri zira, murara wa awo ŵakanozganga vyakumwa na murara wa awo ŵakaphikanga vingwa. 3Ntheura wakaŵakaka na kuŵaŵika mu gadi mu nyumba ya murara wa chivikiriro, mwenemumo Yosefe wakasungikanga. 4Murara wa chivikiriro yura wakaŵaŵika mu mawoko gha Yosefe kuti waŵapwererere na kuŵasungilira. Ndipo ŵakakhara mu gadi kwa nyengo yitali.

5Usiku umoza ŵanthu ŵaŵiri ŵara, wakunozga vyakumwa na wakuphika vingwa vya karonga wa ku Eguputo, ŵeneawo wakasungika mu gadi, ŵakalota maloto. Waliyose wa iwo wakalota maloto ghakhe, gha kang'anamuliro kakhe na kakhe. 6Na machero para Yosefe wakiza kwa iwo, wakasanga kuti ŵakaŵa ŵakwenjerwa chomene. 7Ntheura wakafumba nduna za Faro zira, zeneizo wakaŵa nazo mu gadi mu nyumba ya sekuru wakhe wakati, “Kasi mwawonekerachi ŵa chitima muhanya uno?”

8Iwo ŵakati kwa iyo, “Tangulota maloto, ndipo kulije wakuting'anamulira.” Yosefe wakaŵaphalira wakati, “Chiuta yekha ndiyo wakupereka mahara ghakung'anamulira maloto. Ndiphalirani maloto ghinu.”

9Ntheura murara wakunozga vyakumwa wakamwandulira Yosefe maloto ghakhe. Iyo wakati, “Mu maloto ghane, nkhawona khuni la mpheska panthazi pane. 10Pa khuni la mpheska ili pakaŵa minthavi yitatu. Likati lamba kusunda, likaŵa na maluŵa, ndipo pamanyuma pakhe makunje ghakaŵa na mpheska zakuphya. 11Nkhombo ya Faro yikaŵa mu woko lane. Ine nkhatora mpheska zira na kukamira mu nkhombo ya Faro, na kupereka kwa Faro.”

12Penepapo Yosefe wakati kwa iyo, “Kung'anamulira kwakhe ndi uku: minthavi yitatu yira ndi mazuŵa ghatatu. 13Ghandajumphepo mazuŵa ghatatu, Faro wati wakuwuskemo mu gadi, na kukwezgera pa nchito yako. Iwe wamkupereka nkhombo kwa Faro mu woko lakhe, nga ndi umo ukachitiranga para ukaŵa wakunozga vyakumwa vyakhe. 14Kweni ukandikumbuke para kwamkukuŵira makora. Nkhuŵeya, ukandichitire lusungu, pakuphara vya ine kwa Faro, mwakuti wandifumiskemo mu nyumba iyi. 15Chifukwa, nadi nkhachita kwibika waka kufuma mu charu cha ŵaHebere. Nanga ndi kuno wuwo ndilije kuchita kanthu kakuti ŵandiŵikire mu gadi la mdima.”

16Para murara wa ŵakuphika vingwa wakawona kuti kang'anamuliro kakaŵa kaweme, nayo wakati kwa Yosefe, “Mu maloto ghane, nkhawona kuti pa mutu wane pali vidunga vitatu vya vingwa vipapati. 17Mu chidunga cha pachanya mwanguŵa vingwa vya mtundumtundu ivyo vikuphikikira Faro, kweni viyuni vyaryanga vingwa kufuma mu chidunga pachanya pa mutu wane.”

18Yosefe wakamuzgora wakati, “Kung'anamula kwakhe ndi uku: viseru vitatu vira ndi mazuŵa ghatatu. 19Ghandajumphepo mazuŵa ghatatu, Faro wati wakuwuskemo mu gadi, na kukupayika pa khuni, ndipo viyuni vyamkurya nyama yako.”

20Pa zuŵa la chitatu, leneilo likaŵa la kukumbukira kubabika kwakhe, Faro wakazinozgera chiphikiro nduna zose. Wakawuskamo mu gadi murara wa ŵakunozga vyakumwa na murara wa ŵakuphika vingwa na kuŵaŵika panthazi pa nduna zakhe.

21Wakamuwezgeraso pa nchito yakhe murara wa ŵakunozga vyakumwa yura, ndipo iyo wakamba kuperekaso nkhombo kwa Faro. 22Kweni murara wa ŵakuphika vingwa wakamupayika, nga ndi umo Yosefe wakang'anamulira maloto ghawo. 23Ndipouli murara wa ŵakunozga vyakumwa kuti wakamukumbuka Yosefe chara, kweni wakamuruwa.

Currently Selected:

Mutendeko 40: Tumbuka

Highlight

Copy