Yohane 21

Yesu wakuwonekera ŵasambiri ŵakhe ŵankhonde na ŵaŵiri

1Pamanyuma pa vyeneivi, Yesu wakajivumbulaso ku ŵasambiri mu mphepete mwa nyanja ya Tiberiya. Ndipo wakajivumbula ntheura. 2Ŵakaŵapo ndi aŵa: Simoni Petrosi Tomasi (wakuchemeka Didimo), Nataniyele wakufumira ku Kana mu Galileya, ŵana ŵa Zebediya, ndiposo ŵasambiri ŵanyakhe ŵaŵiri, ŵakaŵa pamoza. 3Simoni Petrosi wakati ku ŵanyakhe, “Ine ndamkuroŵa somba.”

Ŵanyakhe ŵakamuzgora ŵakati, “Na ise wuwo tikuruta nawe.” Ntheura ŵakaruta ŵakaya kanjira mu ngaraŵa. Kweni usiku ura kuti ŵakakora kanthu chara.#Luk 5.5 4Para dazi likafumanga waka, Yesu wakimilira pa mlima, kweni ŵasambiri ŵakamumanya chara kuti ndi Yesu. 5Penepapo Yesu wakati kwa iwo, “Mwa ŵana, kasi muli na somba?”

Ŵakamuzgora ŵakati, “Yayi.”

6Yesu wakati kwa iwo, “Ponyani mukwawu winu ku maryero kwa ngaraŵa, ndipo muti muzisange somba.” Ntheura ŵakaponya mukwawu wawo, ndipo sono ŵakatondeka kuwuguzira mu ngaraŵa chifukwa cha unandi wa somba.#Luk 5.6

7Penepapo musambiri uyo Yesu wakamutemwanga wakati kwa Petrosi, “Ndi Fumu!” Apo Simoni Petrosi wakati wapulika kuti ndi Fumu, wakavwara laya lakhe la kuwaro, pakuti wakavura chifukwa cha nchito, ndipo wakadukira mu maji kufuma mu ngaraŵa. 8Kweni ŵasambiri ŵanyakhe ŵakenda mu ngaraŵa kwiza ku mlima uku ŵakuguza mukwawu uwo ukazura na somba. Kuti ŵakaŵa patali na mlima chara, pakaŵa ka mtunda ka mamita 100. 9Ŵakati ŵafika pa mlima, ŵakawona moto wa makara, na somba yaŵikika pachanya, na chingwa. 10Yesu wakati kwa iwo, “Zani nazo somba zinyakhe izo mwakora waka.”

11Simoni Petrosi wakanjira mu ngaraŵa, wakaguzira mukwawu pa mlima wakuzura na somba zikuruzikuru, somba zira unandi wakhe zikaŵa 153. Nanga zikaŵa zinandi ntheura, kweni kuti mukwawu ukaparuka chara. 12Yesu wakati kwa iwo, “Zaninge murawuke.” Kweni na yumoza wa ŵasambiri ŵakakangarizga kumufumba kuti, “Kasi ndimwe njani?” Chifukwa ŵakamanya kuti ndi Fumu. 13Ntheura Yesu wakiza ndipo wakatora chingwa wakaŵapa, somba nazo wakachita ntheura pera.

14Iyi yikaŵa nyengo ya chitatu kuti Yesu wajirongore ku ŵasambiri ŵakhe, wakati wawuka ku ŵakufwa.

Liskanga mberere zane

15Para ŵakati ŵamara kurawuka, Yesu wakati kwa Simoni Petrosi, “Simoni mwana wa Yohane, kasi ukunditemwa ine kwakuruska aŵa?”

Petrosi wakazgora wakati, “Inya Fumu. Mukumanya kuti nkhumutemwani.”

Yesu wakati kwa iyo, “Leranga twana-mberere twane.” 16Yesu wakayowoyaso nayo kachiŵiri, “Simoni mwana wa Yohane, kasi ukunditemwa?”

Petrosi wakati kwa iyo, “Inya Fumu. Mukumanya kuti nkhumutemwani.”

Yesu wakati kwa iyo, “Liskanga mberere zane.” 17Yesu wakayowoyaso nayo kachitatu wakati, “Simoni mwana wa Yohane, kasi ukunditemwa?”

Petrosi wakaŵa na chitima chifukwa Yesu wakayowoya nayo kachitatu kuti, “Kasi ukunditemwa?” Ntheura Petrosi wakati kwa iyo, “Fumu, mukumanya vyose. Mukumanya kuti nkhumutemwani.”

Yesu wakati kwa iyo, “Leranga mberere zane. 18Inya, inya nadi, nkhumunenerani kuti para ukaŵa muwukirano, ukajivwarikanga lamba wako na kuruta kose uko ukakhumbanga. Kweni para wachekura, wamkunyoroska mawoko ndipo munthu yunji ndiyo wamkukuvwarika lamba mu chiuno na kuruta nawe kose uko iwe undakhumbeko.” 19(Yesu wakayowoya ichi kurongora mtundu wa nyifwa iyo Petrosi wati wachindikire nayo Chiuta.) Ntheura Yesu wakati kwa Petrosi, “Rondezga ine.”

Yesu na musambiri munyakhe

20Petrosi wakang'anamuka, ndipo wakawona musambiri uyo Yesu wakamutemwa wakuŵarondezga mumanyuma, ndi mweneuyo wakeghamira pafupi na chifuŵa cha Yesu, pa chakurya cha mise na kuti, “Fumu, kasi ndi njani uyo wati wamwenderaninge mphiska?”#Yoh 13.25 21Para Petrosi wakamuwona musambiri yura, wakafumba wakati, “Fumu, kasi uyu nanga?”

22Yesu wakati kwa iyo, “Usange ine ndingakhumba kuti wakhalirire wamoyo ndisuke ndize kasi nkhachichi kwa iwe? Rondezga ine.”

23Mazgu ghakatandazgika kosekose mu ŵasambiri kuti musambiri uyu wati wafwe chara. Kweni ndipouli Yesu kuti wakamuyowoyera kuti wareke kufwa chara, kweni wakati, “Usange ndingakhumba kuti munthu uyu wakhalirire wamoyo ndisuke ndize, kasi nkhachichi kwa iwe?”

24Uyu ndiyo musambiri mweneuyo wakaviwona vinthu ivi ndipo ndiyo wali kuvilemba. Tikumanyaso kuti ukaboni wakhe ngwa unenesko.

Umaliro

25Kweni viliposo vinyakhe vinandi ivyo Yesu wakachita. Usange vyose vilembekenge, nkhupima kuti mphanyi charu ichochene changuŵavye malo ghakuŵikamo mabuku agho ghati ghalembekenge.

Currently Selected:

Yohane 21: Tumbuka

Highlight

Copy