Tơlơi Tơbiă 15
15
Tơlơi Adoh Môis
1Hlăk anŭn Môis hăng ană plei pla Israel adoh sa tơlơi adoh tui anai kơ Yêhôwa:#Bơrđ 15:3.
“Kâo adoh bơni kơ Yêhôwa,
Yua kơ Ñu glong hloh kơdrưh kơang;
Ñu hmâo glŏm trŭn pơ ia rơsĭ
Aseh laih anŭn ƀing gai aseh.
2Yêhôwa jing tơlơi kơtang laih anŭn jing tơlơi adoh kâo:#Adoh 118:14; Êsai 12:2.
Ñu jing pô pơklaih kâo.
Ñu jing Ơi Adai kâo, kâo pơpŭ bơni kơ Ñu;
Jing Ơi Adai kơ adon kâo, Kâo kơkuh pơpŭ kơ Ñu.
3Yêhôwa jing sa čô tơhan;
Anăn Ñu jing Yêhôwa.
4Ñu hmâo glŏm trŭn rơdeh aseh laih anŭn abih tơhan Pharaôn amăng ia rơsĭ;
Ƀing khua kơhnâo rơgơi ƀing gơñu hmâo trăm trŭn laih amăng Ia Rơsĭ Mriah.
5Hlŭng dlam hmâo lŏp hĭ gơñu.
Gơñu trăm amăng atur ia rơsĭ dlam kar hăng sa boh pơtâo trăm.
6Ơ Yêhôwa! Tơngan gah hơnuă Ih hmâo tơlơi dưi.
Ơ Yêhôwa! Tơngan hơnuă Ih glit pơphač hĭ ƀing ayăt Ih.
7Hăng tơlơi kơdrưh kơang prŏng prin,
Ih taih pơglưh lui ƀing ayăt.
Ih hil kơ gơñu kơtang tit,
Čuh pơrai gơñu kar hăng adrăng rơ̆k.
8Săp jua mơ̆ng amăng adŭng ih ngă brơi ia pơƀŭt glaĭ.
Khul hơnoh ia pơdơ̆ng đĭ kar hăng sa pơnăng păng.
Ia dlam jing hĭ pler khăng tơ̆ng krah ia rơsĭ.
9Ƀing ayăt laĭ tui anai: ‘Kâo kiaŏ tui; kâo či hơmao ƀing gơñu;
Kâo či pơpha mơnơ̆ng plah mă.
Kâo či pơhrăp tơlơi kâo kiăng.
Kâo suă đao, tơngan kâo či pơrai hĭ gơñu.’
10Ih hmâo bluh jua laih, ia rơsĭ lŏp sir hĭ gơñu.
Gơñu trăm trŭn kar hăng sa boh lik amăng ia dlam juar.
11Ơ Yêhôwa! Amăng abih bang yang, hmâo hlơi kar hăng Ih?
Hlơi dưi bơkơnar hăng Ih, ư-ang amăng tơlơi rơgoh.
Lăp kơ hwĭ pơpŭ laih anŭn pơ-ư pơ-ang.
Ngă lu bruă hơgơ̆m yom?
12Ih hmâo yơr tơngan hơnuă,
Lŏn hmâo lun hĭ gơñu laih.
13Hăng tơlơi khăp Ih čông ba ană plei pla Ih hmâo song glaĭ;
Ih hmâo yua tơngan mơyang Ih ba gơñu glaĭ pơ anih dŏ rơgoh Ih.
14Ƀing djuai mơnuih hmư̆ tơlơi anŭn leng kơ hwĭ tơtư̆,
Tơlơi hwĭ bral ngă kơ ană plei pla Philistin.
15Ƀing khua Êđôm rŭng răng;
Ƀing kơtang Môap tơtư̆ yơ̆ng;
Abih bang ană plei pla Kanaan leng kơ hwĭ bral.
16Tơlơi hwĭ krip laih anŭn hyưt pưt truh kơ gơñu.
Ơ Yêhôwa! Yua kơ tơlơi dưi mơyang mơ̆ng tơngan Ih.
Gơñu kơmlô kar hăng boh pơtâo, tơl ană plei pla găn laih;
Tơl ană plei pla Ih song mă găn hĭ.
17Ơ Yêhôwa! Ih ba ană plei pla anŭn mŭt laih anŭn brơi gơñu dŏ ƀơi čư̆ kong ngăn Ih.
Jing anih Ih hmâo prăp rơmet kiăng pơjing anih Ih dŏ.
Ơ Khua Yang! Anŭn jing sang kơkuh pơpŭ rơgoh, tơngan Ih hmâo pơdơ̆ng.
18Yêhôwa či wai lăng hlŏng lar nanao.”
19Tơ aseh, rơdeh aseh laih anŭn ƀing gai aseh Pharaôn hmâo trŭn amăng ia rơsĭ, Yêhôwa ba ia rơsĭ gom lŏp hĭ gơñu. Samơ̆ ană plei pla Israel rơbat tơ̆ng krah ia rơsĭ prŏng hrup hăng ƀơi lŏn thu.
Tơlơi Adoh HʼMariam
20Hlăk anŭn pô laĭ lui hlâo đah kơmơi HʼMiriam, amai Arôn, tơngan ñu djă sa boh hơgơr pah, laih anŭn abih bang ƀing đah kơmơi nao hrŏm hơbĭt hăng ñu leng kơ djă hơgơr pah yŭn suang. 21HʼMiriam adoh tui anai:
“Adoh bơni bĕ kơ Yêhôwa
Yua kơ Ñu pô glong hloh kơdrưh kơang.
Ñu hmâo glŏm trŭn laih
Aseh, ƀing tơhan gai aseh amăng ia rơsĭ.”
Ƀing Israel amăng tơdrŏn har
(15:22 – 40:38)
Ia Phĭ Pơ Mara
22Tơdơi kơ anŭn Môis ba ană plei pla Israel tơbiă mơ̆ng Ia Rơsĭ Mriah, nao pơ tơdrŏn har Sur. Gơñu rơbat abih klâo hrơi amăng tơdrŏn har, samơ̆ ƀu hmâo ƀuh ia ôh. 23Tơ gơñu truh pơ lŏn Mara, yua kơ ia pơ Mara phĭ hnŭn yơh ƀing gơñu ƀu dưi mơñum ôh; yua kơ anŭn yơh anih anai hmâo anăn jing Mara.#15:23 Mara: Boh hră anai amăng tơlơi Hêbrơ kiăng laĭ jing “phĭ”. 24Ană plei pla pơhiăp brŏk kơ Môis: “Hơgĕt gơmơi či mơñum?” 25Môis kơwưh rơkâo kơ Yêhôwa. Ñu kơčrâo brơi Môis sa ƀĕ kơyâo kơ ñu, ñu mă glŏm hĭ amăng ia laih anŭn ia jing hĭ mơmih.
Ƀơi anai yơh Yêhôwa pơdơ̆ng tơlơi juăt laih anŭn tơlơi phiăn kơ ană plei pla laih anŭn ăt ƀơi anai mơ̆n Ñu pơlông lăng pran jua ƀing ană Israel. 26Yêhôwa laĭ: “Tơdah ƀing gih kơčăng hmư̆ boh pơhiăp Yêhôwa Ơi Adai ƀing gih, ngă tơlơi tơpă ƀơi anăp Kâo, pơđing tơngia hmư̆ khul tơlơi pơtăn laih anŭn djă pioh abih tơlơi juăt Kâo. Kâo ƀu či pơtruh kơ ƀing gih sa mơta tơlơi ruă ôh amăng khul tơlơi ruă Kâo hmâo pơtruh amăng ană plei pla Êjip. Kâo jing Yêhôwa pô pơsuaih brơi tơlơi ruă ƀing gih.”
27Giơ̆ng anŭn, ană plei pla Israel nao truh pơ Êlim anih hmâo pluh dua roh ia krong laih anŭn tơjuh pluh phŭn gol, ană plei pla jưh anih jĕ khul hơnoh ia.
Currently Selected:
Tơlơi Tơbiă 15: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
