Tơlơi Tơbiă 2

Tơlơi Tơkeng kơ Môis

1Hlăk anŭn hmâo sa čô lơ̆m kơ kơnŭng djuai Lêwi dŏ sa čô đah kơmơi kơnŭng djuai Lêwi. 2#Bruă 7:20; Hêb 11:23.Đah kơmơi anŭn pi kian laih anŭn tơkeng kơ sa čô ană đah rơkơi. Ñu ƀuh gơ̆ jing hiam laih anŭn pơdŏp hĭ gơ̆ amăng klâo blan. 3Tơdang ƀu dưi pơdŏp sui hloh dơ̆ng ôh, ñu mă sa boh bai ngă hăng rơ̆k čok mia hăng čai laih anŭn hăng kơtăk hơngo, ñu pơđih ană nge anŭn amăng bai laih anŭn pioh bai anŭn tơ̆ng krah trang bô ƀơi hang ia krong. 4Amai čơđai anŭn dŏ mơ̆ng ataih kiăng thâo hyư̆m tơlơi či truh kơ ană nge anŭn.

5Hơbia Pharaôn nao pơ ia krong kiăng mơnơi, bơ kơ ƀing đah kơmơi hlŭn rơbat hyu kơtuai hang ia krong. Hơbia ƀuh sa boh bai ngă hăng rơ̆k čok tơ̆ng krah trang bô, ñu pơkiaŏ nao đah kơmơi hlŭn ñu nao mă gơ̆. 6Tơ ñu pŏk bai, ñu ƀuh ană nge, sa čô čơđai đah rơkơi hlăk dŏ hia. Ñu pap kơ gơ̆ laih anŭn laĭ: “Čơđai anai jing sa čô ană Hêbrơ yơh”. 7Amai čơđai anŭn laĭ kơ hơbia Pharaôn: “Ih kiăng mơ̆ kâo nao sem brơi kơ ih sa čô pô rong amăng ƀing đah kơmơi Hêbrơ, kiăng kơ rong čơđai anai brơi kơ ih?” 8Hơbia Pharaôn laĭ glaĭ: “Nao bĕ.” Tui anŭn đah kơmơi dra anŭn đuaĭ nao iâu amĭ čơđai anŭn. 9Hơbia Pharaôn laĭ kơ ñu: “Mă ba bĕ čơđai anai laih anŭn rong ñu brơi kơ kâo, kâo či apah prăk kơ ih.” Tui anŭn đah kơmơi anŭn mă pi glaĭ čơđai hăng rong gơ̆. 10#Bruă 7:21.Tơ čơđai anŭn rai kơprŏng kơhnâo laih, ñu ba nao gơ̆ pơ hơbia. Hơbia mă gơ̆ jing ană ñu laih anŭn pơanăn gơ̆ jing Môis,#2:10 Môis: Anăn anai hmâo dơnai arăng pơđok hrup hăng boh hră Hêbrơ kiăng laĭ jing “mă đĭ mơ̆ng ia”. yua kơ ñu laĭ: “Kâo hmâo yŏng mă laih gơ̆ mơ̆ng ia.”

Môis đuaĭ kơdŏp Pơ Čar Madian

11 # Hêb 11:24. # Bruă 7:23-28. Hmâo sa hrơi, tơ Môis prŏng truh laih, ñu tơbiă nao pơ rơngiao, hơduah sem ƀing ană plei pla ñu laih anŭn ƀuh bruă gleh glăn ƀing gơñu. Ñu ăt ƀuh mơ̆n sa čô mơnuih Êjip taih sa čô mơnuih Hêbrơ jing adơi ayŏng ñu. 12Môis lăng jum dar ƀu ƀuh hlơi hlơi ôh, ñu pơdjai hĭ mơnuih Êjip anŭn mơtam giơ̆ng anŭn dơr pơdŏp hĭ gơ̆ amăng čuah. 13Hrơi tơdơi, Môis tơbiă nao dơ̆ng laih anŭn ƀuh dua čô mơnuih Hêbrơ hlăk pơtaih tơdruă, ñu laĭ hăng pô soh tui anai: “Hyư̆m ngă ih taih gŏp ih lĕ?” 14Pô anŭn laĭ glaĭ: “Hlơi hmâo pơjing ih ngă khua laih anŭn dưi phat kơđi kơ ƀing gơmơi? Djơ̆ mơ̆ ih ăt kiăng pơdjai hĭ kâo kar hăng ih hmâo pơdjai laih mơnuih Êjip anŭn?” Môis hwĭ laih anŭn pơmĭn tui anai: “Sĭt yơh bruă anai arăng hmâo thâo laih.” 15#Bruă 7:29; Hêb 11:27.Pharaôn hmư̆ tơlơi anai ñu hơduah kiăng pơdjai Môis. Samơ̆ Môis đuaĭ kơdŏp mơ̆ng Pharaôn, ñu truh pơ čar Madian. Pơ anŭn ñu dŏ ber jĕ sa boh ia dơmun.

16Khua ngă yang Madian hmâo tơjuh čô ană dra. Ƀing dra anŭn nao pơ ia dơmun sŏ ia tuh pơbă atŏng ia kiăng brơi khul triu ama gơñu mơñum. 17Hmâo sa khul mơnuih wai triu truh puh pơđuaĭ ƀing đah kơmơi anŭn; samơ̆ Môis tơgŭ nao pơgang ƀing đah kơmơi laih anŭn brơi khul triu gơñu mơñum. 18Tơ ƀing đah kơmơi glaĭ pơ sang ama gơñu Rêuel, laih anŭn ama gơñu tơña: “Hyư̆m hrơi anai ƀing gih glaĭ hnuăl đơi?” 19Gơñu laĭ glaĭ: “Hmâo sa čô mơnuih Êjip pơklaih gơmơi mơ̆ng tơngan ƀing wai triu, hloh kơ anŭn dơ̆ng ñu ăt sŏ ia brơi khul triu gơmơi mơñum dơ̆ng mơ̆n.” 20Ama gơñu tơña dơ̆ng: “Ră anai pơpă pô anŭn lĕ? Hyư̆m ngă ƀing gih lui hĭ ñu lĕ? Iâu ñu bĕ, rai huă ƀơ̆ng.” 21Môis mơak dŏ glaĭ hăng Rêuel, laih anŭn ñu brơi Môis dŏ ană đah kơmơi ñu, HʼSêpôra. 22HʼSêpôra tơkeng sa čô ană đah rơkơi, laih anŭn Môis pơanăn ñu Gersôm,#2:22 Gersôm: Anăn anai hmâo dơnai arăng pơđok hrup hăng boh hră Hêbrơ kiăng laĭ jing “mơnuih tuai”. yua kơ ñu laĭ: “Kâo jing sa čô dŏ jưh jang jai amăng čar tuai.”

23Sui tơdơi kơ anŭn, pơtao Êjip djai. Ƀing ană Israel ur krao yua kơ tơlơi ngă hlŭn, gơñu ur krao kiăng hmâo tơlơi djru, tơlơi ur krao gơñu đĭ truh pơ Ơi Adai. 24#Čơd 15:13-14.Ơi Adai hmư̆ tơlơi gơñu ur krao laih laih anŭn Ñu hơdơr glaĭ Kơnol Pơgop Ñu hmâo pơjing laih hăng Abraham, Isak laih anŭn Yakôp. 25Ơi Adai lăng trŭn ƀing ană plei pla Israel laih anŭn thâo tơlơi truh kơ gơñu.#2:25 Sa sŏp hră so hơđăp: pơrơđah Ñu pô brơi kơ ƀing gơñu.

Currently Selected:

Tơlơi Tơbiă 2: JRA2016

Highlight

Copy