Tơlơi Tơbiă 28
28
Sum Ao Ƀing Khua Ngă Yang
(Tơb 39:1-31)
1“Mơ̆ng tơ̆ng krah ană plei pla Israel, brơi ih ruah Arôn, ayŏng ih laih anŭn ƀing ană đah rơkơi ñu: Nadap, Abihu, Êlêasar laih anŭn Ithamar, dưm gơñu jing bruă khua ngă yang kơ Kâo.
2Brơi ih tơčoh brơi sum ao rơgoh hiam hmâo tơlơi pơpŭ laih anŭn kơdrưh kơang brơi kơ Arôn ayŏng ih. 3Brơi ih pơtă brơi kơ abih bang ƀing mơnuih hmâo tơlơi kơhnâo bruă, jing ƀing mơnuih Kâo hmâo pha brơi tơlơi thâo thaĭ, tơčoh sum ao brơi kơ Arôn, kiăng kơ pơyơr pioh ñu amăng bruă khua ngă yang kơ Kâo. 4Anai jing kơdrăp sum ao gơñu khŏm tơčoh: Hnal băk ƀơi tơda, êphot, ao phyung, ao amăng lăm hmâo kơteh, mŭk laih anŭn hơdrăng kơiăng. Hnŭn yơh, gơñu tơčoh kơdrăp sum ao rơgoh hiam brơi kơ Arôn laih anŭn kơ ƀing ană đah rơkơi ñu, kiăng kơ gơñu ngă bruă khua ngă yang kơ Kâo. 5Gơñu či tơčoh kơdrăp sum ao hăng mrai hơbuă, hrĕ mah, mrai mơtah, mrai mriah huč laih anŭn mriah jŭ.”
Êphot
(Tơb 39:2-7)
6“Gơñu či tơčoh êphot hăng tơlơi bruă kơhnâo hiam hăng hrĕ mrai hơbuă, hrĕ mah, mrai mơtah, mrai mriah huč laih anŭn mriah jŭ. 7Hmâo dua ară bơnal gom bra pơklep ñu amăng dua gah êphot; tui anŭn êphot lir hrŏm hơbĭt. 8Ară bơnal hruă êphot ăt tơčoh ñu hrup hăng tơčoh êphot mơ̆n laih anŭn gơnam arăng ngă ñu ăt kar hăng gơnam arăng ngă êphot mơ̆n, kiăng laĭ hăng hrĕ mrai hơbuă, hrĕ mah, mrai mơtah, mrai mriah huč laih anŭn mrai mriah jŭ. 9Brơi ih ăt mă dua asar boh pơtâo ônik laih anŭn kơčar ƀơi anŭn anăn ƀing ană đah rơkơi Israel: 10năm anăn ƀơi boh pơtâo ônik anai, năm anăn ƀơi boh pơtâo ônik adih, tơtroai tui hăng hrơi tơkeng kơ gơñu. 11Brơi ih kơčar anăn ƀing ană đah rơkơi Israel ƀơi dua asar boh pơtâo ônik anŭn tui hăng bruă mơnuih kơčar mơnơ̆ng kơđŏm ngă, giơ̆ng anŭn kơčar amăng gơnă kơčar ngă hăng mah. 12Ih či akă dua asar boh pơtâo ônik anŭn ƀơi dua mơnal gom bra êphot, jing kar hăng khul asar boh pơtâo ônik pơhơdơr kơ ƀing ană đah rơkơi Israel. Arôn či djă anăn gơñu ƀơi dua gah bra ñu ƀơi anăp Yêhôwa kar hăng sa tơlơi pơhơdơr. 13Brơi ih ăt ngă gơnă kơčar hăng mah. 14Laih anŭn dua ară añŭ ngă hăng mah rơgoh pơpăl hrup hăng hrĕ kuĭ, giơ̆ng anŭn pơklep hĭ dua ară añŭ anŭn amăng gơnă kơčar.”
Hnal băk ƀơi tơda
(Tơb 39:8-21)
15“Brơi ih ăt ngă sa pŏk hnal băk ƀơi tơda kơ tơlơi phat kơđi hăng tơlơi kơhnâo bruă. Brơi ngă ñu kar hăng ih hmâo laih êphot, jing hăng mrai hơbuă, mrai mah, mrai mơtah, mrai mriah huč, mriah jŭ. 16Hnal băk ƀơi tơda hmâo rup mơta thar laih anŭn tơčoh dua tal, glong ñu sa gam, găn ñu sa gam. 17Brơi ih pơƀlir ƀơi hnal băk ƀơi tơda hăng pă pruĕ boh pơtâo yom: pruĕ tal sa jing sardôn, tôpas, êmêrôt; 18pruĕ tal dua jing êskabuk, saphir, diamôn, 19pruĕ tal klâo jing ôpal, agat, amêtis; 20pruĕ tal pă jing bêril, ônik, jaspidi. Abih bang boh pơtâo anŭn brơi ih kơčar gơñu amăng gơnă kơčar ngă hăng mah. 21Abih bang mrô boh pơtâo anŭn jing pluh dua asar, bơkơnar anăn ƀing ană đah rơkơi Israel; ƀơi rĭm boh pơtâo anŭn arăng či kơčar anăn kơ sa čô amăng pluh dua kơnŭng djuai Israel, hrup hăng arăng kơčar boh kơđŏm.
22Brơi ih ngă brơi hnal băk ƀơi tơda khul hrĕ añŭ ngă hăng mah rơgoh pơpăl hrup hăng hrĕ bră. 23Ngă dua gơwang hăng mah laih anŭn pơ̆ng dua gơwang anŭn amăng dua akiăng hnal băk ƀơi tơda. 24Brơi ih čŭt dua ară hrĕ añŭ mah amăng dua gơwang ƀơi akiăng gah ngŏ kơ hnal băk ƀơi tơda, 25Bơ kơ akŏ gah adih kơ dua ară hrĕ añŭ akă hĭ ñu ƀơi gơnă kơčar, laih anŭn akă ñu gah anăp hnal gom bra êphot. 26Brơi ih ăt ngă dua boh gơwang ngă hăng mah pơkŏn dơ̆ng laih anŭn pơ̆ng gơñu ƀơi dua akiăng gah yŭ kơ hnal, gah lăm êphot. 27Laih anŭn brơi ngă dơ̆ng dua boh gơwang pơkŏn ngă hăng mah, akă ƀơi gah yŭ kơ bơnal gom bra êphot, ƀơi anih tơkuh gah ngŏ ară bơnal hruă êphot. 28Giơ̆ng anŭn arăng či yua sa ară hrĕ mơtah akă khul gơwang hnal băk ƀơi tơda hăng khul gơwang êphot; tui anŭn mơnal băk ƀơi tơda đom klep ƀơi ară bơnal hruă, ƀu kleh đuaĭ ôh mơ̆ng êphot. 29Tui anŭn tơ mŭt amăng Anih Rơgoh Arôn či băk ƀơi tơda anăn ƀing ană đah rơkơi Israel ƀơi hnal băk ƀơi tơda kơ tơlơi phat kơđi hrup hăng sa tơlơi pơhơdơr nanao ƀơi anăp Yêhôwa. 30#Yap 27:21; Mơñă 33:8; Êsr 2:63; Nêh 7:65.Brơi ih sĭt pơklep bĕ Urim laih anŭn Thumim#28:30 Urim laih anŭn Thumim: jing dua mơta gơnam ƀing khua ngă yang juăt yua amăng bruă pơlông lăng kiăng dưi thâo tơlơi Ơi Adai kiăng. Wơ̆t dah tui anŭn, ƀing ta thâo ôh hyư̆m hơdră gơñu yua mơnơ̆ng anŭn. ƀơi hnal băk ƀơi tơda kơ tơlơi phat kơđi, kiăng kơ gơñu či dŏ ƀơi tơda Arôn tơ ñu nao ƀơi anăp Yêhôwa. Yua kơ anŭn, ƀơi anăp Yêhôwa, Arôn či djă ba nanao tơlơi phat kơđi ƀing ană đah rơkơi Israel ƀơi tơda ñu.”
Ao phyung laih anŭn khul sum ao pơkŏn
(Tơb 39:22-31)
31“Brơi ih ăt tơčoh ao phyung êphot hăng mơnal ia mơtah soh sel. 32Tơ̆ng krah ao khŏm ƀŏk sa bluh pơmŭt akŏ, hmâo lem jum dar, hrup hăng tơkuai ao pơsơi kiăng kơ ƀu tơĭ hĭ ôh. 33Ƀơi jih ao brơi ih akă khul boh pom granat mơtah, mriah huč, mriah jŭ, hăng khul boh driao mah anĕt sĭt tui jih ao, 34rĭm kơ sa asar boh driao mah sĭt pơmŭt sa asar boh pom granat, ngă kar hăng anŭn tơl jum dar jih ao. 35Rĭm wơ̆t Arôn ngă yang, ñu či buh ao anŭn; tơ ñu mŭt ƀôdah tơbiă mơ̆ng Anih Rơgoh ƀơi anăp Yêhôwa, dơnai boh driao mah či mơñi; yua mơ̆ng anŭn Arôn ƀu či djai ôh.
36Brơi ih ăt ngă sa pŏk plăk anĕt hăng mah rơgoh, laih anŭn kơčar ƀơi anŭn, hrup hăng arăng kơčar boh kơđŏm, khul boh hră: ‘RƠGOH HIAM KƠ YÊHÔWA’ 37Brơi ih akă plăk anĕt anŭn ƀơi mŭk hăng sa ară hrĕ mơtah gah anăp mŭk. 38Plăk anŭn či dŏ ƀơi athơi Arôn laih anŭn Arôn či glăm ba abih bang tơlơi soh hơgĕt djơ̆ kơ mơnơ̆ng pơyơr rơgoh kơ ană plei pla Israel hmâo pơyơr laih. Plăk anŭn či dŏ nanao ƀơi athơi Arôn, kiăng kơ ană plei pla dưi hmâo tơlơi tŭ ư ƀơi anăp Yêhôwa.
39Brơi ih mơñam sa blah ao amăng lăm hăng mrai hơbuă, sa blah mŭk ăt hăng mrai hơbuă mơ̆n laih anŭn sa ară hơdrăng kơiăng kơteh.
40Brơi ih ăt mơñam brơi ƀing ană đah rơkơi Arôn ao amăng lăm, hơdrăng kơiăng laih anŭn mŭk; brơi ih ngă brơi kơ gơñu hmâo tơlơi pơpŭ laih anŭn tơlơi kơdrưh. 41Brơi ih mă khul sum ao anŭn buh brơi kơ Arôn, ayŏng ih laih anŭn ƀing ană đah rơkơi ñu. Brơi ih truač bĕ ia jâu kơ gơñu, pơjao bruă laih anŭn pơyơr gơñu kiăng kơ gơñu ngă bruă khua ngă yang kơ Kâo. 42Brơi ih tơčoh brơi bĕ kơ gơñu sum amăng lăm hăng bơnal hơbuă, kiăng kơ gom hơgơ̆m hĭ mơ̆ng kơiăng truh pơ pha. 43Arôn hăng ƀing ană đah rơkơi ñu či buh sum anŭn rĭm wơ̆t mŭt amăng Sang Khăn Pơƀŭt ƀôdah nao jĕ kơƀang ngă yang kiăng kơ mă bruă amăng Anih Rơgoh; hwĭ dah gơñu pơsoh gơñu pô laih anŭn djai. Anŭn jing tơlơi juăt hlŏng lar kơ Arôn laih anŭn kơ kơnŭng djuai ñu.”
Currently Selected:
Tơlơi Tơbiă 28: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
