Čơdơ̆ng Phŭn 16
16
HʼAgar Hăng Ismael
1Hlăk anŭn, HʼSarai, bơnai Abram, ăt aka ƀu tơkeng ană ôh. Ñu hmâo sa čô ding kơna đah kơmơi mơnuih Êjip, anăn gơ̆ HʼAgar. 2HʼSarai laĭ hăng Abram: “Anai nê, Yêhôwa ƀu brơi kâo tơkeng ană. Tui anŭn, brơi ih đih hơbĭt hăng pô ding kơna đah kơmơi kâo, năng ai mơ̆ng ñu yơh kâo či hmâo ană.” Abram ngă tui hiăp HʼSarai laĭ. 3Tơdơi kơ pluh thŭn Abram hơdip amăng čar Kanaan, HʼSarai, bơnai Abram, ba nao pô ding kơna đah kơmơi ñu, mơnuih Êjip, anăn gơ̆ HʼAgar pơ rơkơi ñu kiăng jing bơnai kơ rơkơi ñu. 4Ñu đih hơbĭt hăng HʼAgar, laih anŭn HʼAgar pi kian. Tơ HʼAgar thâo ñu hmâo pi kian laih, HʼAgar mưč kơ HʼSarai khua ñu. 5HʼSarai laĭ kơ Abram: “Yua mơ̆ng ih yơh HʼAgar hmâo mưč kơ kâo.#16:5 Dưi pơblang dơ̆ng mơ̆n: Tơlơi soh anai ih khŏm glăm yơh!. Kâo hmâo jao ding kơna đah kơmơi kâo amăng tơda ih, laih anŭn tơdang ñu thâo ñu hmâo pi kian, ñu mưč kơ kâo. Rơkâo kơ Yêhôwa phat kơđi kơ kâo hăng ih!” 6Abram laĭ kơ HʼSarai: “Anai nê, pô ding kơna anŭn dŏ amăng tơngan ih, ih kiăng ngă hyư̆m pă tui hluai ih.” HʼSarai ngă pơtơnap kơ HʼAgar tơl ñu khŏm đuaĭ kơdŏp mơ̆ng HʼSarai.
7Ling jang Yêhôwa bưp ñu ƀơi ia krong amăng tơdrŏn tač, ƀơi jơlan glaĭ pơ Sur, 8laih anŭn laĭ: “Ơ HʼAgar, ding kơna đah kơmơi HʼSarai, mơ̆ng pă ih rai, laih anŭn ih či nao pơpă?” Ñu laĭ glaĭ: “Kâo đuaĭ kơdŏp mơ̆ng HʼSarai, khua kâo.” 9Ling jang Yêhôwa laĭ tui anai: “Brơi ih wơ̆t glaĭ bĕ pơ khua ih, laih anŭn tui gưt kơ ñu.” 10Ling jang Yêhôwa laĭ dơ̆ng: “Kâo či ngă brơi kơnŭng djuai ih đĭ kơyar lu hloh dơ̆ng, lu tơl kơ ƀu dưi yap.” 11Ling jang laĭ:
“Anai nê, ih hlăk pi kian laih anŭn či tơkeng sa čô ană đah rơkơi,
Brơi ih pơanăn bĕ ñu jing Ismael#16:11 Ismael: Amăng boh pơhiăp ƀing Hêbrơ boh hră anai kiăng laĭ: “Ơi Adai dŏ hmư̆”.
Yua kơ Yêhôwa hmâo hmư̆ laih tơlơi ih iâu kơwưh kơ Ñu.
12Čơđai anŭn či jing kar hăng sa drơi aseh kle glai,
Tơngan ñu či pơkơdơ̆ng glaĭ hăng abih bang mơnuih,
Laih anŭn tơngan abih bang mơnuih či pơkơdơ̆ng glaĭ ñu.
Ñu či dŏ amăng anih pơkơdơ̆ng glaĭ hăng abih bang adơi ayŏng ñu.”
13Ñu iâu Yêhôwa, Pô hmâo pơhiăp laih hăng ñu, jing “Ơi Adai Pô hmâo lăng ƀuh kâo” yua kơ ñu laĭ: “Ƀu djơ̆ ôh hă amăng anih anai yơh kâo hmâo ƀuh laih pô hmâo lăng ƀuh kâo?” 14Yua kơ anŭn yơh, ia dơmun anai arăng či iâu jing ia dơmun Bêrlahairoi;#16:14 Bêrlahairoi: kiăng pia: Pô Hơdip Hlŏng Lar hmâo pap laih kơ kâo. ñu dŏ kơplah wah plei Kadês hăng plei Bêret.
15HʼAgar tơkeng brơi kơ Abram sa čô ană đah rơkơi, laih anŭn Abram pơanăn ană anŭn jing Ismael.#Gal 4:22. 16Tơdang HʼAgar tơkeng Ismael brơi kơ Abram, hlăk anŭn Abram hmâo sapăn pluh năm thŭn laih.
Currently Selected:
Čơdơ̆ng Phŭn 16: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
