Čơdơ̆ng Phŭn 20
20
Abraham Hăng Pơtao Abimêlek
1Mơ̆ng anŭn, Abraham trŭn nao pơ anih Nêgep, ñu dŏ tơ̆ng krah Kadês hăng Sur. Tơdang dŏ jang jai pơ Gêrar, 2Abraham pơhiăp hăng arăng kơ HʼSara, bơnai ñu tui anai: “Ñu jing adơi kâo.” Yua kơ anŭn, Abimêlek, pơtao Gêrar, pơđar brơi HʼSara rai.#Čơd 12:13; 26:7. 3Samơ̆ tơdang mlam, Ơi Adai pơrơđah rai laih anŭn laĭ hăng Abimêlek amăng tơlơi rơpơi: “Ih či djai yua kơ pô đah kơmơi ih hmâo mă anŭn. Ñu hmâo laih rơkơi.” 4Pơtao Abimêlek aka đih hrŏm hăng ñu ôh hnŭn yơh ñu laĭ: “Ơ Khua Yang, Ih či pơrai hĭ mơ̆ sa kơnŭng djuai ƀu hmâo ngă soh ôh? 5Ƀu djơ̆ ôh hă Abraham Pô yơh hmâo laĭ hăng kâo: ‘Ñu jing adơi kâo’? Laih anŭn ƀu djơ̆ ôh hă pô đah kơmơi anŭn mơ̆n hmâo laĭ: ‘Anŭn jing ayŏng kâo’? Kâo ngă tơlơi anai hăng pran jua tơpă laih anŭn hăng pran jua rơgoh.” 6Ơi Adai pơhiăp dơ̆ng hăng pơtao amăng tơlơi rơpơi: “Kâo thâo ih ngă tơlơi anŭn hăng pran jua tơpă. Yua kơ anŭn, Kâo pô yơh hmâo khă găn laih ih ngă soh hăng Kâo, laih anŭn ƀu brơi ih bơ̆t djơ̆ đah kơmơi anŭn. 7Ră anai, jao glaĭ bĕ đah kơmơi anŭn kơ rơkơi ñu, yua kơ rơkơi ñu jing sa čô pô laĭ lui hlâo, ñu či iâu laĭ brơi kơ ih laih anŭn ih či dưi dŏ hơdip. Samơ̆ tơdah ih ƀu ba glaĭ, brơi ih thâo ih hăng abih bang ƀing mơnuih lơ̆m kơ ih sĭt či djai yơh.”
8Abimêlek tơgŭ mơ̆ng ưm, ñu iâu pơƀŭt abih bang ƀing ding kơna ñu, ruai glaĭ abih tơlơi anŭn hăng tơlơi rơđah rơđong. Abih mơnuih leng kơ hwĭ tơtư̆. 9Giơ̆ng anŭn, Abimêlek iâu Abraham rai laih anŭn laĭ: “Hơgĕt ih hmâo ngă laih kơ ƀing gơmơi? Kâo ƀu hmâo ngă hơgĕt soh hăng ih ôh, samơ̆ ih hmâo ngă brơi kâo hăng abih lŏn čar khŏm ngă soh prŏng kar hăng anŭn? Ih hmâo ngă laih kơ kâo sa tơlơi ƀu năng lăp ngă ôh.” 10Abimêlek tơña dơ̆ng kơ Abraham: “Hơgĕt tơlơi ih kiăng tơl ih ngă tui anŭn?” 11Abraham laĭ glaĭ: “Kâo ngă tui anŭn yua kơ kâo pơmĭn dah anih anai năng ai ƀu hmâo hlơi thâo hwĭ pơpŭ kơ Ơi Adai ôh. Năng ai yua kơ bơnai kâo gơñu či pơdjai hĭ kâo. 12Sĭt yơh ñu jing adơi kâo, adơi sa čô ama phara amĭ; samơ̆ kâo hmâo mă dŏ ñu jing hĭ bơnai. 13Tơdang Ơi Adai ngă brơi kâo tơbiă đuaĭ mơ̆ng sang ama kâo, kâo hmâo laĭ hăng ñu: ‘Anai jing tơlơi ih pơrơđah tơlơi ih khăp kơ kâo: Pơpă anih ƀing ta nao, brơi ih laĭ kâo jing ayŏng ih.’”
14Pơtao Abimêlek ba rai triu, rơmo, ding kơna đah rơkơi đah kơmơi brơi kơ Abraham, laih anŭn ba glaĭ HʼSara, bơnai ñu kơ ñu. 15Pơtao Abimêlek laĭ: “Anai nê, lŏn kâo dŏ ƀơi anăp ih, dŏ bĕ pơpă anih ih kiăng dŏ.” 16Giơ̆ng anŭn pơtao laĭ kơ HʼSara: “Anai nê, kâo hmâo brơi kơ ayŏng ih sa rơbâo prăk; anai jing sa pŏk bơnal gom ƀô̆ mơta ƀing mơnuih dŏ hăng ih, laih anŭn arăng či yap ih jing mơnuih tơpă klă.” 17Abraham iâu laĭ kơ Ơi Adai laih anŭn Ñu pơklaih brơi kơ Abimêlek, bơnai ñu laih anŭn ƀing ding kơna đah kơmơi ñu kiăng kơ gơñu dưi tơkeng ană bă. 18Hlâo kơ anŭn, yua kơ HʼSara, bơnai Abraham yơh, Yêhôwa hmâo ngă brơi kơ abih bang ƀing đah kơmơi amăng sang pơtao Abimêlek ƀu dưi tơkeng ană.
Currently Selected:
Čơdơ̆ng Phŭn 20: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
