Čơdơ̆ng Phŭn 23
23
HʼSara Djai Laih Anŭn Arăng Dơr Ñu Ƀơi Đang Hmua Makbêla
1HʼSara hmâo hơdip laih sa rơtuh dua pluh thŭn. 2HʼSara djai pơ Kiriat Arba, anŭn jing anih Hêbron, amăng čar Kanaan. Abraham rai djă kơmai kơ HʼSara hăng čŏk hia kơ ñu. 3Giơ̆ng anŭn, Abraham tơgŭ laih anŭn tơbiă đuaĭ mơ̆ng anih drơi jan bơnai ñu hlăk đih, laih anŭn nao laĭ hăng ană tơčo kơnŭng djuai Het:#23:3 Anai jing mơnuih Hitit. 4“Kâo jing sa čô mơnuih tuai hlăk hơdip tơ̆ng krah ƀing gih; rơkâo ƀing gih sĭ brơi kâo sa boh anih pioh dơr atâo amăng lŏn ƀing gih kiăng kơ kâo dưi dơr bơnai kâo.”#Hêb 11:9,13; Bruă 7:16. 5Ană tơčo kơnŭng djuai Het laĭ glaĭ: 6“Ơ khua, rơkâo ih hmư̆ ƀing gơmơi. Ih jing sa čô khua prŏng kơ Ơi Adai dŏ tơ̆ng krah ƀing gơmơi. Brơi ih dơr bĕ mơnuih djai ih amăng sa boh pơsat hiam hloh ƀing gơmơi hmâo. Ƀu hmâo hlơi amăng ƀing gơmơi či hơ-ưi kơ pơsat ƀing gơmơi tơl ƀu brơi ôh kơ ih dơr hĭ pô djai ih anŭn.” 7Abraham tơgŭ, bon kŭp ƀơi anăp ƀing ană plei pla kơ plei anŭn, jing ƀing ană tơčo kơnŭng djuai Het, 8laih anŭn laĭ: “Tơdah ƀing gih mơak brơi kâo dơr pô djai kâo anai tui anŭn rơkâo ƀing gih hmư̆ kâo laih anŭn tơña brơi kâo lŏn Êprôn, ană Sôhar, 9kiăng kơ ñu sĭ brơi par amăng čư̆ Makpêla pơ rơnuč đang hmua ñu. Rơkâo kơ ñu sĭ brơi kâo djơ̆ hăng nua ñu kiăng kơ kâo dưi hmâo anih dơr amăng tơ̆ng krah ƀing gih.”
10Êprôn, mơnuih Hitit, hlăk dŏ ber amăng tơ̆ng krah ƀing ană tơčo kơnŭng djuai Het, laĭ glaĭ kơ Abraham ƀơi anăp ƀing ană tơčo kơnŭng djuai Het, jing ƀơi anăp kơ abih bang mơnuih ƀuh ƀô̆ mơta ƀơi bah amăng jang plei tui anai: 11“Ư ưh, ơ khua, rơkâo ih hmư̆ kâo. Ƀơi anăp ƀing ană plei pla kâo, kâo pha đôč kơ ih đang hmua kâo, laih anŭn ăt pha ih par amăng boh pơtâo dŏ amăng anŭn mơ̆n. Rơkâo ih dơr bĕ pô djai ih pơ anŭn.” 12Abraham bon kŭp ƀơi anăp ƀing ană plei pla kơ plei anŭn, 13laih anŭn laĭ hăng Êprôn, gah anăp kơ ƀing ană plei pla tui anai: “Rơkâo hmư̆ bĕ kâo. Rơkâo ƀing gih brơi kâo kla nua prăk kiăng blơi mă đang hmua anai. Tŭ mă bĕ mơ̆ng kâo tui anŭn kâo dưi dơr atâo bơnai kâo pơ anŭn.” 14Êprôn laĭ glaĭ kơ Abraham: 15“Ơ khua, hmư̆ kâo bĕ. Lŏn anŭn nua ñu truh kơ pă kilôgram ha mơkrah#23:15 Boh hră phŭn: pă rơtuh sêkel. prăk, samơ̆ tơ̆ng krah kâo hăng ih prăk anŭn ƀu hmâo nua yom hơgĕt ôh! Rơkâo ih dơr bĕ atâo bơnai ih amăng anŭn.” 16Abraham tŭ ư hăng Êprôn; laih anŭn ƀơi anăp kơ ană plei pla kơnŭng djuai Het, Abraham kơnăng brơi Êprôn nua prăk kar hăng nua ñu hmâo laĭ laih jing pă rơtuh sêkel, tui hăng boh kơnăng hlăk dŏ yua amăng ƀing mơnuih sĭ mơdrô.
17Tui anŭn, đang hmua Êprôn ƀơi Makpêla, gah ngŏ kơ Mamrê, amăng anŭn hmâo wơ̆t hăng đang hmua hmâo par amăng boh pơtâo laih anŭn wơ̆t hăng abih bang kơyâo pơtâo amăng đang anŭn, 18ră anai jing hĭ laih dram gơnam Abraham ƀơi anăp tơlơi ngă gơ̆ng jơlan kơ ƀing ană tơčo kơnŭng Het, jing abih bang ƀing mơnuih hmâo ƀô̆ mơta ƀơi bah amăng jang plei. 19Tơdơi kơ anŭn, Abraham dơr bơnai ñu jing HʼSara ƀơi par boh pơtâo amăng đang hmua Makpêla, gah ngŏ kơ Mamrê, kiăng laĭ Hêbron, lơ̆m kơ čar Kanaan. 20Tui anŭn, đang hmua amăng anŭn hmâo par boh pơtâo, ană tơčo Het hmâo sĭ hĭ laih brơi Abraham ngă anih dơr atâo.
Currently Selected:
Čơdơ̆ng Phŭn 23: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
