Čơdơ̆ng Phŭn 25
25
Abraham dŏ HʼKêtura
(I Čih 1:32-33)
1Abraham dŏ sa čô bơnai pơkŏn dơ̆ng anăn gơ̆ HʼKêtura. 2Ñu tơkeng brơi kơ Abraham: Simran, Jôksan, Mêdan, Madian, Isbak, laih anŭn Sua. 3Jôksan jing ama kơ Sêba laih anŭn Dêdan. Ană tơčo Dêdan jing kơnŭng Asurim, Lêtusim laih anŭn Lêumim. 4Ƀing ană đah rơkơi Madian hmâo: Êpha, Êpher, Hanôk, Abida laih anŭn Êlda. Abih bang ƀing mơnuih anai jing kơnŭng djuai HʼKêtura.
5Abraham jao abih bang gơnam ñu hmâo kơ Isak. 6Samơ̆ tơdang ñu dŏ hơdip, ñu pơpha gơnam kơ ƀing ană đah rơkơi kơ ƀing bơnai hơjŭng ñu laih anŭn pơkiaŏ gơñu nao dŏ pơ kwal lŏn gah ngŏ, ataih mơ̆ng Isak, pô jing ană phŭn ñu.
Abraham djai
7Abraham hmâo hơdip sa rơtuh tơjuh pluh rơma thŭn. 8Abraham luč pran laih anŭn djai tơdang thŭn ñu tha laih, hrăp mơak amăng tơlơi hơdip, laih anŭn dưi wơ̆t glaĭ hăng ƀing ơi adon ñu. 9Dua čô ană đah rơkơi ñu jing Isak hăng Ismael hmâo dơr laih ñu amăng par boh pơtâo Makpêla, ƀơi đang hmua Êprôn, ană đah rơkơi Sôhar, mơnuih Hitit, gah ngŏ kơ Mamrê. 10Anŭn jing đang hmua Abraham hmâo blơi glaĭ mơ̆ng ană tơčo Het. Arăng dơr Abraham ƀơi anŭn hrŏm hơbĭt hăng bơnai ñu HʼSara.#Čơd 23:3-16. 11Tơdơi kơ Abraham djai, Ơi Adai tuh tơlơi mơyun hiam kơ Isak, ană đah rơkơi ñu. Isak dŏ giăm ia dơmun Bêrlahairoi.
Kơnŭng djuai Ismael
12Anai jing kơnŭng djuai Ismael, ană đah rơkơi Abraham, tơkeng rai mơ̆ng HʼAgar, ding kơna đah kơmơi kơ HʼSara, mơnuih Êjip. 13Anai jing anăn kơ ƀing ană đah rơkơi Ismael, dă dăp tui hăng hrơi tơkeng kơ ƀing gơñu: Nêbaôt jing ană kơčoa Ismael, tŏ tui jing Kêdar, Atbêel, Mipsam, 14Misma, Duma, Masa, 15Hadat, Têma, Jêtur, Napis, laih anŭn Kêdêma. 16Anai jing ƀing ană đah rơkơi Ismael laih anŭn anăn kơ ƀing gơñu, pơanăn tui hăng anăn plei laih anŭn anih gơñu pơdơ̆ng sang khăn. Anŭn jing pluh dua khua kơnŭng djuai gơñu. 17Ismael hơdip truh kơ sa rơtuh klâo pluh tơjuh thŭn, tơĭ pran laih anŭn djai, dưi wơ̆t glaĭ hrŏm hăng ƀing ơi adon ñu. 18Kơnŭng djuai ñu dŏ amăng čar Hawila truh pơ čar Sur, gah ngŏ kơ Êjip, anăp nao gah Asiri. Gơñu hơdip amăng tơlơi pơkơdơ̆ng glaĭ hăng abih bang ƀing adơi ayŏng ñu.
Êsâo hăng Yakôp
19Anai jing kơnŭng Isak, ană đah rơkơi Abraham. Abraham tơkeng Isak. 20Hlăk ñu pă pluh thŭn, Isak dŏ kơ HʼRêbêka, ană đah kơmơi Bêthuel laih anŭn jing adơi Laban, gơñu jing mơnuih Aram, čar Padan Aram.#25:20 Padan Aram jing čar Mêsôpôtami. 21Isak kơwưh rơkâo kơ Yêhôwa brơi kơ bơnai ñu yua kơ bơnai ñu ƀu hmâo ană. Yêhôwa mă tŭ tơlơi ñu rơkâo anŭn yơh HʼRêbêka pi kian. 22Samơ̆ ƀing ană nge amăng lăm kian ñu pơklư̆ tơdruă gơñu, ñu laĭ: “Yua hơgĕt tơlơi anai truh kơ kâo?” Giơ̆ng anŭn ñu tơña kơ Yêhôwa. 23#Rôm 9:12.Yêhôwa laĭ:
Dua boh lŏn čar hlăk dŏ amăng kian ih,
Laih anŭn dua kơnŭng djuai mơ̆ng kian ih či pơkah pơpha;
Djuai anai či kơtang hloh kơ djuai pơkŏn,
Laih anŭn pô prŏng či mă bruă kơ pô anĕt.
24Tơ truh hrơi đih apui, sĭt biă mă ñu hmâo tơkeng kơmar. 25Pô tơbiă hlâo jing mriah, blâu djŏp kơ drơi jan ñu kar hăng ao dai ngă hăng blâu, yua anŭn yơh pơanăn hĭ gơ̆ jing Êsâo.#25:25 Êsâo: Anăn anai kiăng laĭ nao kơ Sêir, jing čar tơdơi anai ƀing ană tơčo Êsâo dŏ; “Sêir” hmâo dơnai arăng pơđok hrup hăng boh hră amăng tơlơi Hêbrơ kiăng pia “hmâo lu blâu”. 26Tơdơi kơ anŭn, pô adơi ăt tơbiă rai, tơngan ñu djă kơđôl Êsâo yua kơ anŭn yơh pơanăn hĭ gơ̆ jing Yakôp.#25:26 Yakôp: Anăn anai hmâo dơnai arăng pơđok kar hăng boh hră amăng tơlơi Hêbrơ kiăng laĭ “kơđôl tơkai”. Hlăk dua čô čơđai hmâo tơkeng rai, Isak hmâo năm pluh thŭn laih.
Êsâo sĭ hĭ tơlơi dưi kơ pô jing ană kơčoa
27Tơ dua čô čơđai anŭn prŏng đĭ, Êsâo jing hĭ sa čô mơnuih hyu loa rơgơi, khăp hyu kiaŏ amăng đang hmua, samơ̆ Yakôp jing sa čô mơnuih rơiăt krĕp, khăp dŏ pơ sang đôč. 28Isak khăp kơ Êsâo lu hloh yua kơ ñu khăp ƀơ̆ng mơnơ̆ng glai, samơ̆ HʼRêbêka khăp kơ Yakôp lu hloh.
29Hmâo sa hrơi, tơdang Yakôp hlăk rơyă tơpŭng, Êsâo glaĭ mơ̆ng đang hmua, rơpa biă mă. 30Êsâo laĭ kơ Yakôp: “Ih pha kâo ƀơ̆ng mơnơ̆ng hơgĕt mriah mriah anŭn ƀiă đa, yua kơ kâo hlăk rơpa biă mă!” Yua kơ anŭn arăng iâu Êsâo jing Êđôm.#25:30 Êđôm: Boh hră anai hmâo dơnai arăng pơđok hrup hăng boh hră amăng tơlơi Hêbrơ kiăng pia jing “mriah”. 31Yakôp laĭ: “Brơi ih sĭ bĕ tơlơi dưi kơ pô jing ană kơčoa kơ kâo hlâo kah.” 32Êsâo laĭ: “Kâo jĕ či djai laih, hơgĕt tơlơi tŭ yua kơ kâo mơ̆ng tơlơi dưi jing ană kơčoa dơ̆ng?” 33Yakôp laĭ: “Tui anŭn brơi ih ƀuăn rơ̆ng hlâo bĕ.” Êsâo ƀuăn rơ̆ng mơtam laih anŭn sĭ hĭ tơlơi dưi kơ pô jing ană kơčoa brơi kơ Yakôp.#Hêb 12:16. 34Giơ̆ng anŭn Yakôp pha Êsâo ƀơ̆ng ƀañ laih anŭn tơpŭng rơtak. Ƀơ̆ng huă giơ̆ng, Êsâo tơgŭ laih anŭn rơbat đuaĭ.
Tui anŭn yơh, Êsâo hmâo mưč hĭ tơlơi dưi kơ pô jing ană kơčoa.
Currently Selected:
Čơdơ̆ng Phŭn 25: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
