Čơdơ̆ng Phŭn 32
32
Yakôp prăp rơmet kiăng bưp glaĭ Êsâo
1Yakôp hlăk rơbat nao amăng jơlan ñu; ƀing ling jang Ơi Adai bưp ñu. 2Tơ ñu ƀuh ƀing anŭn, Yakôp laĭ: “Anai jing kơđông tơhan kơ Ơi Adai!” Yua kơ anŭn ñu pơanăn anih anŭn jing Mahanaim.#32:2 Mahanaim: Anăn anai amăng tơlơi Hêbrơ kiăng laĭ “dua boh kơđông tơhan”.
3Yakôp pơkiaŏ ƀing ding kơna ñu nao bưp ayŏng ñu Êsâo hlâo, ƀơi anih Sêir amăng čar Êđôm. 4Ñu pơtă kơ ƀing gơ̆: “Brơi ƀing gih laĭ hăng Êsâo, khua kâo tui anai; Yakôp ding kơna ih, laĭ tui anai: ‘Kâo hmâo dŏ laih amăng sang Laban laih anŭn dŏ pơ anŭn hlŏng truh pơ hrơi anai. 5Kâo hmâo rơmo, aseh kle, triu, ding kơna đah rơkơi, ding kơna đah kơmơi. Kâo pơkiaŏ mơnuih nao laĭ hlâo hăng ih kiăng kơ ih mơak pran jua tŭ jum kâo.’”
6Ƀing ding kơna glaĭ laĭ hăng Yakôp: “Ƀing gơmơi hmâo nao laih pơ Êsâo, ayŏng ih. Ñu hlăk djă ba pă rơtuh čô tơhan kiăng rai čơkă ih.” 7Yakôp hwĭ bral laih anŭn hyơ̆k bơngơ̆t biă mă. Ñu pơpha ƀing mơnuih amăng sang ñu, khul triu, rơmo, aseh samô jing hĭ dua tơpul. 8Ñu pơmĭn: “Tơdah Êsâo rai laih anŭn kơsung blah tơpul anai, tui anŭn tơpul dŏ glaĭ či dưi klaih.”
9Yakôp iâu laĭ: “Ơ Ơi Adai kơ Abraham, ơi adon kâo hơi! Ơi Adai kơ Isak, ama kâo! Ơ Yêhôwa, jing pô hmâo laĭ laih hăng kâo tui anai: ‘Brơi ih wơ̆t glaĭ bĕ pơ plei pla ih laih anŭn pơ kơnŭng djuai ih. Kâo či ngă hiam kơ ih.’ 10Ih năng lăp yơh hăng tơlơi khăp laih anŭn tơlơi tŏng ten Ñu hmâo pioh brơi laih kơ ƀing ding kơna Ñu. Tơdang rơbat găn ia krong Yurdan ih kơnơ̆ng hmâo sa ƀĕ gai jra đôč, samơ̆ ră anai ih hmâo laih dua tơpul mơnuih laih anŭn dram gơnam anai. 11Ơ Ơi Adai, rơkâo Ih pơklaih kâo mơ̆ng tơngan Êsâo, ayŏng kâo, yua kơ kâo hwĭ ñu či rai taih pơdjai kâo wơ̆t hăng bơnai laih anŭn ƀing ană kâo mơ̆n. 12Samơ̆ Ih Pô yơh hmâo ƀuăn laih hăng kâo: ‘Sĭt Kâo či ngă hiam brơi ih laih anŭn ngă brơi kơnŭng djuai ih lu kar hăng čuah amăng ia rơsĭ, ƀu dưi yap ôh yua kơ ñu lu đơi.’”#Čơd 22:17.
13Yakôp pơdơi mlam pơ anŭn, giơ̆ng anŭn ñu ruah amăng khul mơnơ̆ng ñu hmâo kiăng ngă gơnam pơyơr kơ Êsâo, ayŏng ñu. 14Mơnơ̆ng pơyơr ñu hmâo: Dua rơtuh drơi bơbe ania laih anŭn dua pluh drơi bơbe tơno; dua rơtuh drơi triu ania laih anŭn dua pluh drơi triu tơno; 15klâo pluh drơi aseh samô ania laih anŭn khul ană dŏ mĕm; pă pluh drơi rơmo ania laih anŭn pluh drơi rơmo tơno; dua pluh drơi aseh kle ania laih anŭn pluh drơi aseh kle tơno. 16Ñu jao brơi abih khul hlô anai kơ ƀing ding kơna ñu tui hăng tơpul phara phara laih anŭn pơtă gơñu tui anai: “Brơi ƀing gih nao hlâo kơ kâo, brơi djă pioh sa rơwang ataih tơ̆ng krah tơpul anai hăng tơpul pơkŏn.” 17Ñu pơtă kơ pô nao hlâo kơ abih bang: “Tơ Êsâo, ayŏng kâo, bưp laih anŭn tơña: ‘Hlơi khua ih? Pơpă ih či nao? Khul hlô mơnơ̆ng nao hlâo kơ ih anŭn lơ̆m kơ hlơi?’ 18Brơi ih laĭ glaĭ: ‘Khul hlô mơnơ̆ng anai lơ̆m kơ ding kơna ih, Yakôp. Anai jing gơnam ñu pơyơr kơ khua kâo jing Êsâo; laih anŭn anai nê, ñu pô hlăk rơbat tơdơi kơ ƀing gơmơi.’” 19Yakôp ăt pơtă mơ̆n kơ pô tal dua, pô tal klâo laih anŭn kơ abih bang ƀing mơnuih kiaŏ tui wai khul hlô mơnơ̆ng tui anai: “Tơ ƀing gih bưp Êsâo, brơi ƀing gih mă boh pơhiăp anŭn pơhiăp hăng ñu hŏ, 20laih anŭn laĭ: ‘Anai nê, ding kơna ih jing Yakôp, hlăk rơbat gah klon ƀing gơmơi.’” Yua kơ Yakôp pơmĭn amăng pran jua ñu: “Kâo brơi khul gơnam pơyơr anai nao hlâo kiăng ngă brơi Êsâo rơơ̆ mơ̆ng tơlơi hil, tơdơi kơ anŭn kâo či bưp ƀô̆ mơta; năng ai ñu či tŭ jum kâo hăng tơlơi mơak mơai.” 21Tui anŭn, mơnơ̆ng pơyơr ba nao hlâo, bơ kơ Yakôp đih pơdơi amăng sang khăn.
22Mlam anŭn Yakôp tơgŭ mơ̆ng pĭt, djă ba dua čô bơnai ñu, dua čô ding kơna đah kơmơi laih anŭn sa čô ană rơbat găn ƀơi anih găn ia krong Jabôk. 23Ñu ba ƀing gơñu rơbat găn ia krong hrŏm hăng dram gơnam ñu hmâo.
Yakôp pơkơtư̆ hăng ling jang ƀơi čư̆ Pêniêl
24Tơdang Yakôp dŏ glaĭ hơjăn ñu, hmâo sa čô mơnuih pơkơtư̆ hăng ñu truh kơ sêng brêng mơguah.#Ôsê 12:3-4. 25Tơdang dŏ pơkơtư̆, pô anŭn ƀuh ñu ƀu dưi ôh yua anŭn ñu taih hĭ ƀơi klang tơsŭ Yakôp, ngă tơblư̆ hĭ klang tơsŭ Yakôp. 26Pô anŭn laĭ: “Hrơi rơđah laih, brơi kâo đuaĭ bĕ.” Samơ̆ Yakôp laĭ: “Kâo ƀu brơi ih đuaĭ ôh, tơdah ih ƀu pha brơi tơlơi mơyun hiam kơ kâo.” 27Pô anŭn tơña: “Hlơi anăn ih?” Ñu laĭ glaĭ: “Anăn kâo jing Yakôp.” 28Pô anŭn laĭ: “Anăn ih ƀu djơ̆ jing Yakôp dơ̆ng tah, samơ̆ jing Israel,#32:28 Israel: Anăn anai hmâo dơnai arăng pơđok hrup hăng boh hră Hêbrơ kiăng pia jing “pô pơblah hăng Ơi Adai”. yua kơ ih hmâo pơblah laih hăng Ơi Adai laih anŭn hăng arăng, laih anŭn ih hmâo dưi laih soh sel.”#Čơd 35:10. 29Yakôp tơña: “Laĭ brơi kâo thâo anăn Ih.” Pô anŭn laĭ glaĭ: “Yua hơgĕt ih tơña anăn kâo?” Giơ̆ng anŭn pô anŭn pha brơi tơlơi mơyun hiam kơ Yakôp pơ anŭn.#Phat 13:17-18. 30Yakôp pơanăn anih anŭn jing Pêniêl,#32:30 Pêniêl: Anăn anai hmâo tơlơi arăng pơđok hrup hăng boh hră Hêbrơ kiăng laĭ jing “ƀô̆ mơta Ơi Adai”. laih anŭn pơblang: “Yua kơ kâo hmâo ƀuh laih ƀô̆ mơta Ơi Adai ƀô̆ klă ƀô̆ samơ̆ kâo ăt dŏ hơdip.” 31Tơ ñu rơbat găn Pênuel, yang hrơi ƀlĕ laih, tơkai ñu rơbat đôl hŭp yua kơ klang tơsŭ ñu tơblư̆. 32Yua kơ anŭn, truh pơ hrơi anai ƀing ană Israel ƀu ƀơ̆ng ôh arăt ƀơi pha, ƀơi anih pơtŏ klang tơsŭ, yua kơ pô anŭn hmâo taih laih ƀơi klang tơsŭ Yakôp, ƀơi arăt pha.
Currently Selected:
Čơdơ̆ng Phŭn 32: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
