Čơdơ̆ng Phŭn 44
44
Kơčok Prăk Amăng Kơsăk Pơdai Benjamin
1Yôsep pơđar kơ pô wai lăng sang ñu tui anai: “Tuh pơbă bĕ gơnam ƀơ̆ng huă amăng kơsăk ƀing mơnuih anai. Hơdôm pă gơñu dưi pơdiăng, tuh brơi bĕ kơ ƀing gơñu hơdôm anŭn, bơ kơ prăk pô hlơi brơi pioh glaĭ bĕ amăng kơsăk pô anŭn. 2Brơi ih pioh bĕ kơčok prăk kâo amăng bah kơsăk pô adơi kluč gơñu, hrŏm hơbĭt hăng prăk ñu blơi pơdai.” Pô wai sang ngă djơ̆ tui hăng tơlơi Yôsep pơđar.
3Ưm mơguah hrơi tơdơi, arăng brơi ƀing adơi ayŏng Yôsep rơbat glaĭ hrŏm hơbĭt hăng aseh kle ƀing gơñu. 4Gơñu tơbiă mơ̆ng plei aka ataih ôh, Yôsep laĭ kơ pô wai sang: “Tañ bĕ kiaŏ tui ƀing mơnuih anŭn; tơ ih kiaŏ hơmao laih, brơi ih laĭ hăng gơñu: ‘Yua hơgĕt ƀing gih ba glaĭ tơlơi sat kơ tơlơi hiam lĕ? 5Ƀu djơ̆ ôh hă anai jing kơčok khua kâo yua kiăng mơñum tơpai laih anŭn pơđaŏ tơlơi hơgơ̆m?#44:5 Hmâo sa hră pơblang so hơđăp thim dơ̆ng: Yua hơgĕt ƀing gih klĕ mă kơčok prăk khua kâo? samơ̆ jơlan anai ƀu hmâo ôh amăng hră phŭn blŭng. Ƀing gih hmâo ngă laih sa tơlơi sat biă mă.’”
6Pô wai sang kiaŏ hơmao ƀing gơñu laih anŭn laĭ hrup hăng tơlơi pơhiăp anŭn. 7Gơñu laĭ glaĭ: “Yua hơgĕt ih laĭ tui anŭn lĕ? Ƀing ding kơna ih ƀu hmâo ngă tơlơi kar hăng anŭn ôh! 8Brơi ih lăng bĕ, mơ̆ng Kanaan ƀing gơmơi ăt djă ba prăk gơmơi hmâo ƀuh laih amăng bah kơsăk gơmơi kiăng ba glaĭ kơ ih, tui anŭn hyư̆m ƀing gơmơi dưi klĕ hĭ prăk ƀôdah mah mơ̆ng sang khua ih? 9Tơdah ih hơduah ƀuh mơnơ̆ng anŭn amăng pô hlơi, pô anŭn khŏm djai yơh, laih anŭn ƀing gơmơi či jing hĭ hlŭn ih.” 10Pô wai sang laĭ: “Ơ, brơi ngă bĕ tui hăng tơlơi ƀing gih pơhiăp. Tơdah hơduah ƀuh kơčok amăng pô hlơi, pô anŭn či jing hĭ hlŭn kâo, bơ kơ ƀing pơkŏn dưi glaĭ rơngai yơh.” 11Tui anŭn, rĭm čô jač mač lưh trŭn kơsăk gơñu ƀơi lŏn laih anŭn pŏk kơsăk gơñu. 12Pô wai sang hơduah kơsem čơdơ̆ng mơ̆ng ayŏng tha truh pơ adơi kluč. Ñu ƀuh kơčok anŭn amăng kơsăk Benjamin. 13Gơñu hek hĭ sum ao gơñu pô, rĭm čô pioh kơsăk ƀơi rŏng aseh kle gơñu, laih anŭn wơ̆t glaĭ pơ plei.
Yôsep kiăng kơ̆ng glaĭ Benjamin amăng čar Êjip
14Tơ Yuđa laih anŭn ƀing ayŏng adơi ñu truh pơ sang Yôsep, Yôsep ăt dŏ pơ sang. Gơñu bon ƀơi anăp Yôsep. 15Yôsep tơña: “Hơgĕt tơlơi ƀing gih hmâo ngă laih? Ƀing gih ƀu thâo ôh hă kâo dưi pơđaŏ tơlơi hơgơ̆m?” 16Yuđa laĭ: “Hơgĕt tơlơi ƀing gơmơi dưi pơhiăp hăng ih lĕ? Hơgĕt tơlơi ƀing gơmơi či bơrơđah anai? Hyư̆m gơmơi dưi pơgang kơ gơmơi pô dơ̆ng? Ơi Adai hmâo pơrơđah laih tơlơi soh ƀing gơmơi. Ră anai, ƀing gơmơi wơ̆t hăng pô arăng hmâo ƀuh laih kơčok amăng kơsăk ñu leng kơ jing hlŭn ih yơh.” 17Samơ̆ Yôsep laĭ: “Kâo ƀu kiăng ngă kar hăng anŭn ôh! Kơnơ̆ng kơ pô arăng hmâo ƀuh laih kơčok amăng kơsăk ñu, pô anŭn đôč či jing hlŭn kâo. Bơ kơ ƀing gih, brơi ƀing gih glaĭ rơnŭk rơnua pơ ama ƀing gih.”
Yuđa rơkâo kơ Yôsep brơi Benjamin dưi glaĭ pơ ama ñu
18Yuđa nao jĕ pơ Yôsep laih anŭn laĭ: “Ơ khua, rơkâo ih pap brơi tơlơi soh ding kơna ih laih anŭn brơi ding kơna ih dưi pơrơđah ƀiă boh pơhiăp. Rơkâo ih anăm tuh tơlơi ih hil ƀơi ding kơna ih ôh, yua kơ ih mơdơ̆ kơnar hăng Pharaôn. 19Hlâo adih ih hmâo tơña laih kơ ƀing ding kơna ih: ‘Ƀing gih dŏ hmâo ama ƀôdah adơi ayŏng dơ̆ng mơ̆?’ 20Ƀing gơmơi laĭ glaĭ kơ ih: ‘Ƀing gơmơi ăt dŏ hmâo ama tha laih anŭn sa čô adơi kluč, ñu tơkeng rai hlăk ama gơmơi tha laih. Ayŏng čơđai anŭn djai laih, hnŭn yơh amăng ƀing ană amĭ ñu kơnơ̆ng dŏ glaĭ hơjăn ñu đôč laih anŭn ama ñu khăp kơ ñu biă mă.’ 21Ih hmâo pơđar laih kơ ƀing ding kơna ih: ‘Ba rai bĕ ñu pơ kâo, kiăng kâo dưi ƀuh ñu.’ 22Gơmơi ăt hmâo laĭ laih mơ̆n hăng ih: ‘Čơđai anŭn ƀu dưi čơlah mơ̆ng ama ñu ôh, yua kơ tơdah ñu čơlah mơ̆ng ama ñu, ama ñu či djai yơh.’ 23Samơ̆ ih laĭ: ‘Tơdah adơi kluč ƀing gih ƀu rai pơ anai hrŏm hăng ƀing gih, ƀing gih ƀu dưi ƀuh ƀô̆ mơta kâo dơ̆ng ôh.’ 24Tơ gơmơi wơ̆t glaĭ pơ ding kơna ih, jing ama ƀing gơmơi, ƀing gơmơi ruai glaĭ kơ ñu khul tơlơi ih hmâo pơhiăp. 25Giơ̆ng anŭn, ama gơmơi laĭ hăng gơmơi: ‘Trŭn nao bĕ, blơi glaĭ ƀiă mơnơ̆ng ƀơ̆ng huă.’ 26Gơmơi laĭ glaĭ: ‘Gơmơi ƀu dưi nao pơ anŭn dơ̆ng ôh. Tơdah hmâo adơi kluč gơmơi nao hrŏm hnŭn kah gơmơi dưi nao; yua kơ gơmơi ƀu dưi bưp ƀô̆ mơta pô anŭn dơ̆ng ôh, tơdah adơi kluč gơmơi ƀu nao hrŏm hơbĭt hăng gơmơi.’ 27Ding kơna ih, ama kâo, laĭ hăng ƀing gơmơi: ‘Ƀing gih thâo laih bơnai kâo hmâo tơkeng brơi kâo dua čô ană đah rơkơi; 28sa čô hmâo rơngiă laih mơ̆ng kâo laih anŭn kâo ăt hmâo laĭ laih: “Sĭt yơh hlô glai hek ƀơ̆ng ñu laih,” yua kơ truh ră anai kâo aka ƀuh glaĭ ñu ôh. 29Tơdah ƀing gih ba pô anai đuaĭ ataih mơ̆ng kâo dơ̆ng, laih anŭn ñu bưp hĭ tơlơi sat truh, tui anŭn ƀing gih ngă brơi kơ pô tha rơma anai rơngot ruă pran jua hăng trŭn nao pơ plei atâo djai.’ 30Tơlơi hơdip ama kâo akă hrŏm hơbĭt hăng tơlơi hơdip adơi kâo. Tui anŭn, tơdah ră anai kâo glaĭ hăng ding kơna ih, ama kâo, samơ̆ ƀu hmâo čơđai anŭn glaĭ hrŏm ôh, 31tui anŭn ama kâo či djai yua kơ ñu ƀu ƀuh ôh čơđai anŭn. Tơdah tui anŭn, ƀing ding kơna ih či ngă brơi kơ ama tha ƀing gơmơi, ăt jing ding kơna ih mơ̆n, rơngot ruă pran jua hăng trŭn nao pơ plei atâo djai. 32Pô ding kơna ih anai hmâo grơ̆ng brơi laih kơ čơđai anŭn, hăng laĭ: ‘Tơdah kâo ƀu ba glaĭ ñu pơ ih ôh, tui anŭn kâo či glăm tơlơi soh nanao ƀơi anăp ih.’ 33Tui anŭn ră anai, rơkâo kơ ih brơi kơ ding kơna ih dưi jing hĭ hlŭn ih hrua brơi kơ čơđai anŭn, laih anŭn brơi čơđai anŭn glaĭ hrŏm hơbĭt hăng ƀing ayŏng ñu. 34Sĭt biă mă yơh, hyư̆m kâo dưi wơ̆t glaĭ pơ ama kâo tơdah čơđai anŭn ƀu glaĭ hrŏm hăng kâo ôh? Ư ưh, kâo ƀu kiăng ƀuh tơlơi sat či truh kơ ama kâo ôh.”
Currently Selected:
Čơdơ̆ng Phŭn 44: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
