Čơdơ̆ng Phŭn 48
48
Yakôp Hơơč Mơyun Kơ Dua Čô Ană Đah Rơkơi Yôsep
1Tơdơi kơ khul bruă anŭn, arăng laĭ pơthâo kơ Yôsep: “Ama ih ruă.” Tui anŭn, Yôsep ba dua čô ană đah rơkơi ñu Manasê hăng Êphraim nao pơ ama ñu. 2Tơ Yakôp hmư̆ tơlơi arăng laĭ pơthâo: “Yôsep, ană đah rơkơi ih rai čuă ngui ih.” Israel gir tơgŭ dŏ ber ƀơi sưng. 3Yakôp laĭ kơ Yôsep: “Ơi Adai Dưi Kơtang hmâo pơrơđah rai laih anŭn pha brơi tơlơi mơyun hiam kơ kâo ƀơi plei Lus, amăng čar Kanaan.#Čơd 28:13-14. 4Ñu laĭ kơ kâo: ‘Anai nê, Kâo či ngă brơi ih čeh lar đĭ lu lĭn. Kâo či ngă brơi ih jing hĭ sa kơnŭng djuai hmâo lu djuai mơnuih laih anŭn pha brơi kơnŭng djuai ih lŏn čar anai ngă kong ngăn hlŏng lar.’ 5Ră anai, dua čô ană đah rơkơi hmâo tơkeng brơi kơ ih amăng čar Êjip hlâo kơ kâo truh, jing Êphraim laih anŭn Manasê, či lơ̆m kơ kâo kar hăng Ruben laih anŭn Simêôn mơ̆n. 6Bơ kơ ƀing ană ih hmâo tơkeng tơdơi anŭn gơñu či lơ̆m kơ ih. Gơñu či mă tŭ kong ngăn tui hăng anăn dua čô ayŏng adơi gơñu. 7Yua kơ tơdang mơ̆ng Padan wơ̆t glaĭ pơ Kanaan, kâo ruă pran jua tơdang ƀuh HʼRačel djai ƀơi kơtuai jơlan, jĕ Êphrata. Kâo hmâo dơr amĭ ih ƀơi jơlan nao pơ Êphrata, jing Betlêhem.”#Čơd 35:16-19.
8Tơ Israel ƀuh ƀing ană đah rơkơi Yôsep, ñu tơña: “Hlơi ƀing anai?” 9Yôsep laĭ glaĭ: “Anai jing ƀing ană đah rơkơi Ơi Adai hmâo brơi kơ kâo amăng čar anai.” Israel laĭ: “Brơi gơñu rai pơ kâo, kiăng kơ kâo dưi hơơč mơyun kơ gơñu.” 10Yua kơ tha rơma, mơta Israel pôl laih, ƀu thâo ƀuh rơđah ôh. Yôsep ba gơñu nao jĕ Israel. Ñu kwar ƀing gơ̆ laih anŭn čŭm. 11Israel laĭ kơ Yôsep: “Kâo pơmĭn kâo ƀu dưi ƀuh ƀô̆ mơta ih dơ̆ng ôh, samơ̆ ră anai, Ơi Adai brơi kâo ƀuh wơ̆t hăng ană bă ih dơ̆ng.” 12Yôsep pŭ mă dua čô ană đah rơkơi ñu mơ̆ng tơŭt ama ñu, giơ̆ng anŭn ñu bon kŭp ƀơi lŏn. 13Yôsep ba ƀing ană ñu nao jĕ ama ñu. Tơngan hơnuă ñu djă Êphraim ba nao gah iao kơ ama ñu, bơ kơ tơngan gah iao ñu djă Manasê ba nao gah hơnuă kơ ama ñu. 14Samơ̆ Israel yơr tơngan hơnuă ñu laih anŭn ah ƀơi boh akŏ Êphraim, adơi ñu. Laih anŭn ñu ah tơngan iao ñu ƀơi boh akŏ Manasê. Ñu ah pơčuăl tơngan wơ̆t dah Manasê jing ayŏng tha. 15Giơ̆ng anŭn ñu hơơč mơyun brơi kơ Yôsep#48:15 Biă mă ñu, tơdang ñu hơơč mơyun brơi kơ Êphraim laih anŭn Manasê, Yakôp hmâo hơơč mơyun laih brơi kơ Yôsep. laih anŭn laĭ:
“Ơ Ơi Adai,
Pô ơi adon kâo Abraham laih anŭn Isak hmâo kơkuh pơpŭ laih,
Jing Ơi Adai hmâo kiaŏ wai laih kâo
Čơdơ̆ng mơ̆ng hrơi tơkeng hlŏng truh kơ hrơi anai,
16Jing Ling Jang hmâo pơklaih laih kâo mơ̆ng abih bang tơlơi răm ruă,
Rơkâo kơ Ih pha brơi tơlơi mơyun hiam kơ dua čô čơđai anai,
Brơi gơñu tŭ tui anăn kâo
Laih anŭn ơi adon kâo jing Abraham laih anŭn Isak.
Rơkâo ih ngă brơi gơñu lar đĭ lu lĭn ƀơi lŏn tơnah!”
17Tơ Yôsep ƀuh ama ñu ah tơngan hơnuă ƀơi boh akŏ Êphraim, ñu ƀu mơak ôh, hnŭn yơh ñu djă tơngan ama ñu pơplih glaĭ mơ̆ng akŏ Êphraim pioh ƀơi akŏ Manasê. 18Yôsep laĭ kơ ama ñu: “Ơ ama, ƀu djơ̆ tui anŭn ôh. Pô anai jing ană kơčoa, rơkâo kơ ih ah tơngan hơnuă ih ƀơi akŏ ñu.” 19Samơ̆ ama ñu hơngah laih anŭn laĭ: “Ơ dăm, kâo thâo tơlơi anŭn. Manasê či jing hĭ sa djuai mơnuih laih anŭn ñu ăt či prŏng kơtang mơ̆n. Samơ̆ adơi ñu či prŏng hloh laih anŭn kơnŭng djuai adơi ñu či jing hĭ lu boh lŏn čar.” 20Hrơi anŭn, Israel hơơč mơyun brơi kơ dua čô čơđai:#Hêb 11:21.
“Hăng anăn ƀing gih yơh ƀing Israel či hơơč mơyun kơ tơdruă gơñu tui anai:
‘Rơkâo kơ Ơi Adai ngă brơi kơ ih dưi jing kar hăng Êphraim laih anŭn Manasê!’”
Hnŭn yơh, Yakôp pioh Êphraim hlâo kơ Manasê. 21Israel laĭ dơ̆ng hăng Yôsep: “Anai nê, kâo či djai laih, samơ̆ Ơi Adai či dŏ hrŏm hơbĭt hăng ƀing gih, laih anŭn ba ƀing gih wơ̆t glaĭ pơ čar ơi yă ƀing gih. 22Bơ kơ ih, kâo či brơi kơ ih sa črăn prŏng hloh kơ ƀing adơi ayŏng ih, anŭn jing čư̆ Sičem, anih kâo hmâo sua mă laih mơ̆ng tơngan ƀing Amôrit hăng đao gưm laih anŭn hraŏ.”
Currently Selected:
Čơdơ̆ng Phŭn 48: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
