Yôhan 11

Tơlơi Djai Lasar

1Hmâo sa čô mơnuih ruă anăn ñu Lasar, plei Bêthani, jing plei HʼMari hăng amai ñu HʼMart.#Luk 10:38-39. 2HʼMari anŭn yơh jing pô hmâo pik ia klôñ ƀâu hiam ƀơi tơkai Khua Yang laih anŭn sut tơkai Khua Yang hăng ƀuk ñu. Ayŏng ñu Lasar dŏ ruă.#Yô 12:3. 3Tui anŭn dua adơi amai ñu pơkiaŏ mơnuih nao laĭ pơthâo kơ Yêsu hăng laĭ: “Ơ Khua, pô Ih khăp dŏ ruă.”

4Samơ̆ tơ Yêsu hmư̆ tơlơi anŭn, Ñu laĭ: “Tơlơi ruă anai ƀu truh kơ djai ôh, samơ̆ yua kơ tơlơi guh kơang kơ Ơi Adai, kiăng kơ Ană Ơi Adai dưi hmâo tơlơi ư-ang yua kơ tơlơi anŭn.”

5Yêsu khăp kơ HʼMart, HʼMari adơi ñu, laih anŭn Lasar. 6Tơ Ñu hmư̆ Lasar dŏ ruă, Ñu dŏ glaĭ dua hrơi dơ̆ng pơ anih Ñu hlăk dŏ anŭn. 7Giơ̆ng rơgao hĭ dua hrơi anŭn Ñu laĭ kơ ƀing ding kơna Ñu: “Brơi ƀing ta wơ̆t glaĭ pơ tring Yuđa dơ̆ng.”

8Ƀing ding kơna Ñu laĭ: “Ơ Nai, ƀing ană Yuđa phrâo kiăng glŏm Ih hăng boh pơtâo, hyư̆m Ih kiăng wơ̆t glaĭ pơ anŭn dơ̆ng lĕ?”

9Yêsu laĭ glaĭ: “Ƀu djơ̆ ôh hă hmâo pluh dua mông amăng sa hrơi? Tơdah hlơi pô rơbat hlăk tơhrơi ñu ƀu tơhnač ôh, yua kơ ñu ƀuh tơlơi bơngač lŏn tơnah anai. 10Samơ̆ tơdah ñu rơbat amăng mlam, ñu či tơhnač, yua kơ tơlơi bơngač ƀu dŏ amăng ñu ôh.” 11Giơ̆ng Yêsu pơhiăp tui anŭn, Ñu laĭ dơ̆ng kơ ƀing gơ̆: “Lasar giăng mah ƀing ta pĭt yơh, samơ̆ Kâo nao kiăng râo mơdưh ñu.”

12Ƀing ding kơna laĭ: “Ơ Khua, tơdah ñu pĭt, sĭt ñu či suaih yơh.”

13Yêsu pơhiăp kơ tơlơi gơ̆ djai yơh, samơ̆ gơñu pơmĭn Yêsu pơhiăp kơ tơlơi pĭt pơdơi đôč. 14Tui anŭn Yêsu pơhiăp klă rơđah kơ gơñu: “Lasar djai yơh; 15samơ̆ yua kơ ƀing gih yơh Kâo mơak yua kơ Kâo ƀu dŏ pơ anŭn ôh, kiăng kơ ƀing gih dưi đaŏ. Brơi ƀing ta nao pơ ñu bĕ.”

16Thômas, anăn pơkŏn dơ̆ng Didim,#11:16 Didim: kiăng laĭ ƀă kơmar. laĭ kơ ƀing ding kơna pơkŏn: “Brơi kơ ƀing ta nao hrŏm hơbĭt hăng Ñu bĕ kiăng kơ ƀing ta dưi djai hrŏm hơbĭt hăng Ñu mơ̆n.”

Yêsu Jing Tơlơi Hơdip Glaĭ Laih Anŭn Tơlơi Hơdip

17Tơ Yêsu truh, Ñu thâo kơ Lasar dŏ amăng pơsat pă hrơi laih. 18Plei Bêthani ataih mơ̆ng plei Yêrusalem, năng ai klâo kilômet.#11:18 Boh hră phŭn blŭng: pluh rơma stat 19Hmâo lu ƀing ană Yuđa nao pơ HʼMart hăng HʼMari kiăng pơalum ƀing gơ̆ yua kơ ayŏng gơñu djai.

20Tơ HʼMart hmư̆ Yêsu rai, gơ̆ đuaĭ nao bưp Ñu tơdang HʼMari dŏ pơ sang. 21HʼMart laĭ kơ Yêsu: “Ơ Khua, tơdah hmâo Ih pơ anai ayŏng kâo ƀu djai ôh. 22Samơ̆ wơ̆t ră anai kâo thâo hơgĕt tơlơi Ih rơkâo kơ Ơi Adai, Ơi Adai či brơi kơ Ih.” 23Yêsu laĭ kơ gơ̆: “Ayŏng ih či hơdip glaĭ.”

24HʼMart laĭ kơ Ñu: “Kâo thâo kơ gơ̆ či hơdip glaĭ amăng tơlơi hơdip glaĭ ƀơi hrơi đŭt tơdơi.”

25Yêsu laĭ kơ gơ̆: “Kâo jing tơlơi hơdip glaĭ laih anŭn tơlơi hơdip. Hlơi pô đaŏ kơ Kâo, ñu či hơdip, wơ̆t dah ñu djai laih; 26Laih anŭn hlơi pô dŏ hơdip đaŏ kơ Kâo, ñu ƀu či djai ôh. Ih đaŏ tơlơi anŭn mơ̆?”

27HʼMart laĭ glaĭ: “Sĭt, Ơ Khua, kâo đaŏ Ih jing Yang Krist, Ană Ơi Adai, Pô khŏm rai amăng lŏn tơnah.”

Yêsu Hia

28Giơ̆ng kơ HʼMart laĭ tơlơi anai, gơ̆ nao iâu HʼMari adơi ñu, hăng hiăp pơhač: “Nai rai pơ anai yơh, Ñu iâu ih.” 29Tơ HʼMari hmư̆ tơlơi anŭn, gơ̆ tơgŭ mơtam hăng nao pơ Yêsu. 30Hlăk anŭn Yêsu aka mŭt amăng plei ôh, samơ̆ Ñu ăt dŏ ƀơi anih HʼMart hmâo bưp Ñu. 31Tơ ƀing ană Yuđa amăng sang dŏ pơalum HʼMari ƀuh gơ̆ ječ meč hăng tơbiă nao, gơñu đuaĭ tui gơ̆, mĭn dah gơ̆ nao čŏk hia pơ pơsat.

32Tơ HʼMari truh pơ anih Yêsu dŏ laih anŭn ƀuh Ñu, HʼMari glŏm ñu pô ƀơi tơkai Yêsu hăng laĭ: “Ơ Khua, tơdah hmâo Ih pơ anai, ayŏng kâo ƀu djai ôh.”

33Yêsu ƀuh HʼMari hia, laih anŭn ƀing ană Yuđa rai hrŏm hơbĭt hăng HʼMari ăt hia kar kaĭ mơ̆n, Ñu rơngot hơning hăng glưh pran jua. 34Ñu tơña: “Pơpă anih ƀing gih dơr gơ̆?”

Ƀing anŭn laĭ glaĭ kơ Ñu: “Ơ Khua, rai lăng bĕ.”

35Yêsu hia. 36Tui anŭn ƀing ană Yuđa laĭ: “Lăng bĕ, Ñu khăp biă mă kơ Lasar!”

37Samơ̆ hmâo đơđa amăng ƀing gơñu laĭ: “Pô anai hmâo pơsuaih laih mơnuih bum mơta, hyư̆m Ñu ƀu dưi ôh hă ngă brơi pô anai ƀu djai?”

38Sa wơ̆t dơ̆ng Yêsu glưh pran jua hăng nao pơ pơsat. Pơsat anŭn jing sa boh par, hmâo boh pơtâo kơđơ̆l hĭ. 39Yêsu pơđar: “Tơglung lui hĭ bĕ boh pơtâo anai.”

HʼMart jing adơi kơ pô djai anŭn laĭ: “Ơ Khua, ƀâu brŭ laih yơh, yua kơ ñu dŏ pơ anai pă hrơi laih.”

40Yêsu laĭ kơ HʼMart: “Hyư̆m kâo aka laĭ hăng ih ôh hă, tơdah ih đaŏ ih či ƀuh tơlơi guh kơang Ơi Adai?” 41Tui anŭn gơñu tơglung hĭ boh pơtâo anŭn. Yêsu angak mơta hăng laĭ: “Ơ Ama, kâo bơni hơơč kơ Ih yua kơ Ih hmâo hmư̆ laih Kâo. 42Kâo thâo Ih hmư̆ Kâo nanao, samơ̆ Kâo laĭ tơlơi anai yua kơ ƀing mơnuih dŏ jum dar anai, kiăng kơ gơñu dưi đaŏ kơ Ih Pô hmâo pơkiaŏ rai Kâo laih.” 43Giơ̆ng Yêsu pơhiăp tui anŭn, Ñu iâu kraih tui anai: “Ơ Lasar, tơbiă bĕ!” 44Mơnuih djai tơbiă rai yơh, tơkai tơngan gơ̆ arăng pŏn hăng khăn, ƀô̆ Ñu arăng gom hăng sa blah khăn. Yêsu laĭ kơ gơñu: “Yaih brơi ñu bĕ, hăng brơi gơ̆ rơbat.”

Tơlơi Črŏng Sai Kiăng Pơdjai Yêsu

(Mat 26:1-5; Mar 14:1-2; Luk 22:1-2)

45Hmâo lu ƀing ană Yuđa nao ngui pơalum HʼMari, hmâo ƀuh laih bruă Yêsu ngă, gơñu đaŏ kơ Yêsu. 46Samơ̆ đơđa amăng ƀing anŭn nao pơ ƀing Pharisi hăng ră ruai brơi gơñu hơdôm tơlơi Yêsu hmâo ngă laih. 47Tui anŭn, ƀing khua ngă yang prŏng hăng ƀing Pharisi iâu pơƀŭt ƀing khua phat kơđi hăng laĭ: “Hơgĕt ƀing ta či ngă? Yua kơ pô anai ngă lu tơlơi mơsêh mơyang biă mă. 48Tơdah ƀing ta lui Ñu ăt ngă dơ̆ng, tui anŭn abih bang mơnuih či đaŏ kơ Ñu, laih anŭn ƀing Rôm či rai pơrai hĭ anih rơgoh hiam ƀing ta hăng pơdjai hĭ kơnŭng djuai ƀing ta.”

49Samơ̆ sa čô amăng ƀing gơñu, anăn ñu Kaip jing khua ngă yang prŏng hloh thŭn anŭn, laĭ kơ gơñu: “Ƀing gih ƀu thâo hluh sa mơta tơlơi ôh. 50Ƀing gih ƀu thâo hluh ôh hă hiam hloh kơ ƀing gih hmâo sa čô mơnuih djai yua kơ abih bang ƀing ană plei hloh kơ abih bang kơnŭng djuai či răm rai.” 51Ñu pơhiăp tơlơi anŭn ƀu djơ̆ tui hăng tơlơi pơmĭn ñu pô ôh, samơ̆ yua kơ ñu jing khua ngă yang prŏng hloh thŭn anŭn, ñu laĭ lui hlâo kơ Yêsu či djai yua kơ abih bang kơnŭng djuai ană Yuđa, 52ƀu djơ̆ kơnơ̆ng kơ kơnŭng djuai ană Yuđa đôč ôh, samơ̆ ăt kiăng pơƀŭt glaĭ abih bang ƀing ană Ơi Adai hlăk bra hyu tar ƀar jing hĭ sa phung.

53Mơ̆ng hrơi anŭn ƀing khua ngă yang črŏng sai hơduah jơlan kiăng pơdjai Yêsu. 54Yua kơ anŭn yơh, Yêsu ƀu dưi hyu hăng tơlơi rơngai dơ̆ng ôh tơ̆ng krah ƀing ană Yuđa, samơ̆ mơ̆ng anih anŭn Ñu nao pơ plei Êphraim jĕ tơdrŏn tač; laih anŭn Ñu dŏ pơ anŭn hrŏm hơbĭt hăng ƀing ding kơna Ñu.

55Hrơi Phĕt Tơlơi Găn ƀing ană Yuđa jĕ truh, laih anŭn hmâo lu mơnuih mơ̆ng tring phara nao pơ plei Yêrusalem kiăng pơrơgoh gơñu pô hlâo kơ Hrơi phĕt Tơlơi Găn. 56Gơñu hơduah sem Yêsu, laih anŭn tơdang gơñu dŏ dơ̆ng amăng sang kơkuh pơpŭ, gơñu bơlaĭ tơdruă: “Hyư̆m ƀing gih pơmĭn? Yêsu ƀu či rai ôh hă kơ tơlơi phĕt anai?” 57Ƀing khua ngă yang prŏng hăng ƀing Pharisi hmâo pơtă laih hlơi pô thâo anih Yêsu dŏ, brơi pô anŭn laĭ brơi kơ gơñu thâo, kiăng kơ gơñu dưi mă čaŏ Yêsu.

Currently Selected:

Yôhan 11: JRA2016

Highlight

Copy