Yôhan 8
8
Đah Kơmơi Klĕ Pyu
1Yêsu đĭ nao pơ Čư̆ Ôliwơ. 2Ưm mơguah, Yêsu wơ̆t glaĭ pơ sang kơkuh pơpŭ dơ̆ng. Abih bang ƀing ană plei leng kơ nao pơ Ñu. Laih anŭn Ñu dŏ ber pơtô ƀing gơ̆. 3Ƀing nai pơtô tơlơi juăt hăng ƀing Pharisi ba rai sa čô đah kơmơi arăng hmâo mă tơdang gơ̆ klĕ pyu hăng pioh ñu dŏ ƀơi tơ̆ng krah mơnuih lu, 4hăng laĭ kơ Yêsu: “Ơ Nai, đah kơmơi anai arăng hmâo mă ñu tơdang ñu dŏ klĕ pyu. 5Amăng tơlơi juăt Môis pơtă brơi ƀing ta khŏm glŏm boh pơtâo pơdjai hĭ pô ngă kar hăng tui anŭn. Bơ Ih hyư̆m Ih laĭ kơ tơlơi anŭn?”#Lêwi 20:10; Mơñă 22:22-24. 6Gơñu laĭ tui anŭn kiăng lông lăng Yêsu kiăng kơ hmâo tơlơi dưi phong kơ Ñu. Yêsu tơkui čih hăng čơđeng Ñu ƀơi lŏn. 7Yua kơ ƀing anŭn tơña nanao kơ Ñu dơ̆ng, dŏ tơña lu tơlơi, Ñu angak mơta hăng laĭ: “Hlơi amăng ƀing gih jing mơnuih ƀu hmâo tơlơi soh ôh, brơi ñu blŭng hlâo mă boh pơtâo glŏm đah kơmơi anai.” 8Giơ̆ng anŭn Yêsu tơkui čih ƀơi lŏn dơ̆ng. 9Tơ gơñu hmư̆ tơlơi anŭn, gơñu ƀrư̆ ƀrư̆ pha drơi pha đuaĭ, ƀing tha đuaĭ hlâo. Yêsu dŏ glaĭ hơjăn Ñu hăng đah kơmơi hlăk dŏ dơ̆ng ƀơi anăp Ñu anŭn. 10Yêsu angak mơta hăng laĭ kơ đah kơmơi anŭn: “Pơpă ƀing pơčŭt kơ ih lĕ? Ƀu hmâo hlơi klă kơđi kơ ih ôh hă?”
11Đah kơmơi anŭn laĭ: “Ơ Khua, ƀu hmâo ôh.”
Yêsu laĭ: “Kâo kŏn klă kơđi ih lơi. Nao bĕ, anăm ngă soh dơ̆ng ôh.”#8:11 Đơđa Hră Ơi Adai Pơhiăp so đưm laih anŭn tơlơi pơblang blŭng hlâo hloh ƀu hmâo ôh tơlơi ră ruai anai (7:53 – 8:11); đơđa hmâo ƀơi hnal tuč Yôhan 21:24; đơđa hmâo ƀơi hnal tuč Luk 21:38; sa hră pơkŏn ƀơi hnal tuč Yôhan 7:36.]
Yêsu Jing Tơlơi Bơngač Kơ Lŏn Tơnah
12Yêsu pơhiăp dơ̆ng hăng ƀing gơñu: “Kâo jing tơlơi bơngač kơ lŏn tơnah, hlơi pô đuaĭ tui kâo ñu ƀu či rơbat amăng tơlơi kơnăm mơmŏt ôh, samơ̆ či hmâo tơlơi bơngač kơ tơlơi hơdip.”#Mat 5:14; Yô 9:5.
13Ƀing Pharisi laĭ kơ Ñu: “Ih ngă gơ̆ng jơlan kơ Ih pô, tơlơi Ih ngă gơ̆ng jơlan anŭn ƀu jing sĭt ôh.”#Yô 5:31.
14Yêsu laĭ glaĭ: “Wơ̆t dah Kâo ngă gơ̆ng jơlan mă Kâo pô, tơlơi Kâo ngă gơ̆ng jơlan jing sĭt, yua kơ Kâo thâo mơ̆ng pơpă Kâo rai hăng pơpă anih Kâo nao; samơ̆ ƀing gih ƀu thâo ôh mơ̆ng pă Kâo rai ƀôdah pơpă anih Kâo nao. 15Ƀing gih phat kơđi tui hăng mơnuih đôč, bơ Kâo ƀu hmâo phat kơđi kơ hlơi hlơi ôh. 16Samơ̆ wơ̆t dah Kâo phat kơđi, tơlơi Kâo phat kơđi jing sĭt, yua kơ Kâo ƀu phat kơđi hơjăn Kâo đôč ôh, samơ̆ Kâo hrŏm hơbĭt hăng Ama Pô hmâo pơkiaŏ rai laih Kâo. 17Amăng tơlơi juăt ƀing gih hmâo čih laih, dua čô ngă gơ̆ng jơlan kah jing sĭt.#Mơñă 19:15. 18Kâo ngă gơ̆ng jơlan pơsĭt kơ Kâo pô laih anŭn Ama jing Pô hmâo pơkiaŏ rai Kâo ăt ngă gơ̆ng jơlan pơsĭt kơ Kâo mơ̆n.”
19Tui anŭn gơñu tơña kơ Yêsu: “Pơpă Ama Ih?”
Yêsu laĭ glaĭ: “Ƀing gih ƀu thâo krăn Kâo ôh, ăt ƀing gih ƀu thâo krăn Ama Kâo lơi. Tơdah ƀing gih thâo krăn Kâo, ƀing gih ăt thâo krăn Ama Kâo mơ̆n.”
20Yêsu pơhiăp khul tơlơi anai amăng anih pioh hip pơyơr prăk, tơdang Ñu pơtô amăng sang kơkuh pơpŭ. Samơ̆ ƀu hmâo hlơi pô mă čaŏ Ñu, yua kơ mông Ñu aka truh ôh.
Ƀing Gih Ƀu Dưi Nao Ôh Pơ Anih Kâo Nao
21Yêsu laĭ kơ gơñu dơ̆ng: “Kâo či nao, ƀing gih či sem Kâo, samơ̆ ƀing gih či djai amăng tơlơi soh ƀing gih. Anih Kâo nao, ƀing gih ƀu dưi nao ôh.”
22Yua kơ anŭn yơh ƀing khua ană Yuđa laĭ: “Hyư̆m, Ñu či pơdjai Ñu pô hă, yua kơ Ñu laĭ: ‘Anih Kâo nao ƀing gih ƀu dưi nao ôh?’”
23Yêsu laĭ glaĭ: “Ƀing gih tơbiă rai mơ̆ng gah yŭ, bơ Kâo trŭn rai mơ̆ng glong. Ƀing gih tơbiă mơ̆ng lŏn tơnah anai, bơ Kâo ƀu tơbiă rai mơ̆ng lŏn tơnah anai ôh. 24Anŭn yơh, yua hơgĕt Kâo hmâo laĭ laih kơ ƀing gih, ƀing gih či djai amăng tơlơi soh ƀing gih; yua kơ tơdah ƀing gih ƀu đaŏ ôh Kâo jing Pô Kâo Jing, ƀing gih či djai amăng tơlơi soh ƀing gih pô.”
25Gơñu tơña kơ Yêsu: “Hlơi Ih jing?”
Yêsu laĭ glaĭ: “Hrup hăng Kâo hmâo laĭ laih hăng ƀing gih mơ̆ng phŭn blŭng. 26Kâo hmâo lu tơlơi kiăng laĭ djơ̆ kơ ƀing gih laih anŭn lu tơlơi kiăng phat kơđi kơ ƀing gih; samơ̆ Pô hmâo Pơkiaŏ rai laih Kâo jing sĭt, laih anŭn Kâo pơhaih brơi kơ lŏn tơnah hơgĕt tơlơi Kâo hmâo hmư̆ laih mơ̆ng Ñu.”
27Gơñu ƀu thâo hluh ôh Yêsu pơhiăp tơlơi anŭn laĭ nao kơ Ama brơi kơ gơñu. 28Yua kơ anŭn, Yêsu laĭ kơ gơñu: “Tơ ƀing gih yol đĭ Ană Mơnuih hăng glong, hlăk anŭn ƀing gih či thâo yơh Kâo Jing Pô Kâo Jing, hăng thâo Kâo ƀu ngă hơgĕt tơlơi mơ̆ng tơlơi dưi Kâo pô ôh, samơ̆ Kâo kơnơ̆ng pơhiăp tui hăng hơgĕt tơlơi Ama hmâo pơtô brơi. 29Pô hmâo pơkiaŏ rai Kâo ăt dŏ hrŏm hăng Kâo. Ñu ƀu lui Kâo dŏ hơjăn ôh, yua kơ Kâo nanao ngă khul tơlơi bơmơak kơ Ñu.”
30Yua kơ Yêsu pơhiăp hơdôm tơlơi anŭn, hmâo lu mơnuih đaŏ kơ Ñu.
Tơlơi Sĭt Či Pơrơngai Ƀing Gih
31Hnŭn yơh Yêsu laĭ hăng ƀing ană Yuđa đaŏ laih kơ Ñu: “Tơdah ƀing gih dŏ kơjăp nanao amăng boh pơhiăp Kâo, sĭt ƀing gih jing ding kơna Kâo. 32Ƀing gih či thâo tơlơi sĭt laih anŭn tơlơi sĭt či pơrơngai ƀing gih.”
33Ƀing ană Yuđa laĭ glaĭ: “Gơmơi jing ană tơčo Abraham, laih anŭn gơmơi aka ngă djơ̆ hlŭn kơ arăng ôh. Hyư̆m tơlơi Ih laĭ: ‘Ƀing gih či dưi jing rơngai’?”#Mat 3:9; Luk 3:8.
34Yêsu laĭ glaĭ: “Kâo laĭ sĭt biă mă kơ ƀing gih, hlơi pô ngă soh ñu jing hlŭn kơ tơlơi soh. 35Hlŭn ƀu dŏ nanao amăng sang ôh samơ̆ ană dŏ nanao amăng sang. 36Tui anŭn tơdah Ană pơrơngai ƀing gih, ƀing gih či jing rơngai sĭt yơh. 37Kâo thâo ƀing gih jing ană tơčo Abraham; samơ̆ ƀing gih sem hơduah kiăng pơdjai hĭ Kâo, yua kơ boh pơhiăp Kâo ƀu hmâo ôh anih amăng pran jua ƀing gih. 38Kâo pơhiăp khul tơlơi Kâo ƀuh mơ̆ng Ama Kâo, samơ̆ ƀing gih ngă tui hơgĕt tơlơi ƀing gih hmư̆ mơ̆ng ama ƀing gih.”
39Gơñu laĭ glaĭ: “Abraham jing ama ƀing gơmơi.”
Yêsu laĭ: “Tơdah ƀing gih jing ană Abraham, ƀing gih či ngă tơlơi Abraham hmâo ngă laih. 40Samơ̆ ră anai ƀing gih sem hơduah kiăng pơdjai hĭ Kâo, pô hmâo pơhiăp laih tơlơi sĭt kơ ƀing gih, anŭn jing tơlơi Kâo hmâo hmư̆ laih mơ̆ng Ơi Adai. Abraham ƀu hmâo ngă khul bruă tui anŭn ôh. 41Ƀing gih hlăk dŏ ngă khul tơlơi ama ƀing gih ngă.” Gơñu laĭ: “Ƀing gơmơi ƀu djơ̆ ană ƀă pôm ôh. Gơmơi kơnơ̆ng hmâo sa čô Ama đôč, jing Ơi Adai.” 42Yêsu laĭ: “Tơdah Ơi Adai jing Ama ƀing gih, ƀing gih či khăp yơh kơ Kâo, yua kơ Kâo rai mơ̆ng Ơi Adai, laih anŭn ră anai Kâo dŏ pơ anai. Kâo ƀu rai mơ̆ng tơlơi dưi Kâo pô ôh, samơ̆ Ơi Adai hmâo pơkiaŏ rai Kâo. 43Yua hơgĕt ƀing gih ƀu thâo hluh ôh tơlơi Kâo pơhiăp? Yua kơ ƀing gih ƀu anăm hmư̆ ôh boh pơhiăp Kâo. 44Ƀing gih tơbiă rai mơ̆ng ama ƀing gih jing Yang Sat, laih anŭn ƀing gih kiăng ngă tui hăng tơlơi ama ƀing gih kiăng. Mơ̆ng blŭng hlâo ñu jing laih pô pơdjai mơnuih, ñu ƀu dŏ amăng tơlơi sĭt ôh yua kơ tơlơi sĭt ƀu dŏ amăng ñu ôh. Tơdah ñu pơhiăp ƀlor jing ñu pơhiăp tui hăng kơnuih ñu, yua kơ ñu jing pô ƀlor hơđăp amơĭ laih anŭn ñu jing ama kơ tơlơi ƀlor. 45Samơ̆ yua kơ Kâo pơhiăp tơlơi sĭt, hnŭn yơh ƀing gih ƀu đaŏ kơ Kâo ôh. 46Hlơi pô amăng ƀing gih dưi črâo tơlơi soh Kâo ngă? Tơdah Kâo pơhiăp tơlơi sĭt, yua hơgĕt ƀing gih ƀu đaŏ kơ Kâo? 47Hlơi pô tơbiă rai mơ̆ng Ơi Adai, ñu hmư̆ boh pơhiăp Ơi Adai. Ƀing gih ƀu hmư̆ ôh tơlơi pơhiăp anŭn, yua kơ ƀing gih ƀu tơbiă rai mơ̆ng Ơi Adai ôh.”
Yêsu Hăng Abraham
48Ƀing ană Yuđa laĭ kơ Yêsu: “Gơmơi laĭ Ih jing mơnuih Samari hăng pô hmâo yang sat ngă, anŭn ƀu djơ̆ ôh hă?”
49Yêsu laĭ glaĭ: “Kâo ƀu djơ̆ yang sat ngă ôh; Samơ̆ Kâo pơpŭ kơ Ama Kâo, laih anŭn ƀing gih ƀu pơpŭ kơ Kâo ôh. 50Kâo ƀu sem hơduah tơlơi ư-ang kơ Kâo pô ôh. Hmâo laih Pô sem hơduah kơ tơlơi anŭn laih anŭn jing Pô phat kơđi. 51Sĭt biă mă Kâo laĭ kơ ƀing gih, tơdah hlơi pô gưt boh pơhiăp Kâo ñu ƀu či djai ôh.”
52Ƀing ană Yuđa laĭ: “Ră anai gơmơi thâo kơ Ih jing sa čô yang sat ngă. Abraham djai laih, ƀing pô laĭ lui hlâo ăt djai laih mơ̆n, samơ̆ Ih laĭ: ‘Tơdah hlơi pô gưt kơ boh pơhiăp Kâo ñu ƀu či djai ôh!’ 53Ih jing Pô prŏng hloh kơ Abraham, ama gơmơi pô hmâo djai laih mơ̆? Laih anŭn ƀing pô laĭ lui hlâo ăt djai laih mơ̆n. Hlơi Ih pơmĭn Ih jing?”
54Yêsu laĭ glaĭ: “Tơdah Kâo pơ-ư pơang kơ Kâo pô, tơlơi ư-ang kơ Kâo pô anŭn jing đôč đač. Ama Kâo yơh jing pô pơ-ư pơang Kâo. Kơ Pô anŭn ƀing gih hmâo laĭ laih jing Ơi Adai kơ ƀing gih. 55Ƀing gih ƀu thâo krăn Ñu ôh, samơ̆ Kâo thâo krăn Ñu. Tơdah Kâo laĭ Kâo ƀu thâo krăn Ñu ôh, Kâo ăt pơhiăp ƀlor kar hăng ƀing gih mơ̆n; samơ̆ Kâo thâo krăn Ñu sĭt, hăng djă pioh boh pơhiăp Ñu. 56Abraham ama ƀing gih hơ̆k mơak biă mă čang rơmang dưi ƀuh rơnŭk Kâo. Ñu hmâo ƀuh laih hăng hơ̆k kơdơ̆k biă mă.”
57Ƀing Yuđa laĭ kơ Ñu: “Ih aka hmâo rơma pluh thŭn ôh, hyư̆m Ih ƀuh Abraham laih hă?”
58Yêsu laĭ glaĭ: “Sĭt biă mă Kâo laĭ kơ ƀing gih, hlâo kơ hmâo Abraham, hmâo Kâo laih.”
59Hnŭn yơh gơñu mă boh pơtâo kiăng glŏm Yêsu; samơ̆ Yêsu sek đuaĭ hăng tơbiă hĭ mơ̆ng sang kơkuh pơpŭ.
Currently Selected:
Yôhan 8: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
